तिलु शर्मा पौडेल/मध्यान्ह
दोहा, कतार : गैरआवासीय नेपाली संघ (एनसीसी) कतार र तमु (गुरुङ) समाज कतारको संयुक्त आयोजनामा आयोजित ‘गैरआवासीय नेपाली तारा–२०२३ कतार सिजन ४’को तेस्रो चरणको प्रतिस्पर्धा शुक्रबार सम्पन्न भएको छ । शुक्रबार प्लाजामलमा अवस्थित वेलफेयर रेस्टुरेन्टको सभा हलमा सम्पन्न प्रतियोगिताबाट गायन र नृत्य विधाबाट पाँच–पाँच जना फाइनलिष्ट चुनिएका छन् ।
फाइनलिष्ट पाँचमा गायन विधाबाट दीपक कुमार घले (भोटिङ नं. १), इशान रेग्मी (भोटिङ नं. २), सुजन गुरुङ (भोटिङ नं. ३), मानसिङ परियार (भोटिङ नं. ४) र रुस्तम तामाङ (भोटिङ नं. ५) रहेका छन् । त्यस्तै नृत्य विधाबाट जुनु माया कुमाल (भोटिङ नं. १), सरोज लामा (भोटिङ नं. २), निरु श्रेष्ठ (भोटिङ नं. ३), झरना राई (भोटिङ नं. ४) र सौजन चहार (भोटिङ नं. ५) रहेका छन् । ‘नेपाली कला संस्कृतिको सम्मान गरौं, प्रवासमा रहेको प्रतिभाको खोजी गरौं’ भन्ने नाराका साथ राष्ट्रिय आविष्कार केन्द्रको सहयोगार्थ, प्रवासमा लुकेर बसेको कलालाई प्रस्फुटन र उजागर गर्ने उद्देश्यले आयोजित प्रतियोगिताको तेस्रो चरणमा अतिथि निर्णायकको भूमिकामा गायक तथा संगीतकार प्रभात त्रिपाठी रहेका थिए ।
त्रिपाठीले सहभागीहरूले प्रवासमा रहेर पनि नेपाली कला संस्कृतिको प्रवद्र्धनका लागि गरेको सराहनीय कार्यको प्रशंसा गरेका थिए । उनले गीतसंगीत सागर रहेको बताउँदै सबैमा सरस्वतीको बास नहुने बताए । कसैले गीतसंगीत सिकेर अगाडि बढ्न चाहेमा राष्ट्रिय लोक तथा दोहोरी गीत प्रतिष्ठानले संगीत कक्षाहरू सञ्चालन गरेको बताउँदै उनले सिक्नका लागि अवसर खुला रहेको बताए । उनले सहभागीहरूलाई सांगीतिक तथा व्यक्तिगत जीवनमा प्रगतिको कामना गरेका थिए ।
प्रतिस्पर्धाको गायन विधातर्फ वीरेन्द्र श्रेष्ठ, गुन्जन तामाङ र मंगल विक निर्णायकका रूपमा रहेका छन् भने नृत्य विधातर्फ भबिन तामाङ, भीम प्रसाद गुरुङ र जनक लाफा मगरले निर्णायकको जिम्मेवारी सम्हालेका छन् । निर्णायकहरुले प्रतियोगीलाई संगीत सिक्दै र फरक–फरक जनरामा रहेर अभ्यास गर्दै अगाडि बढ्न सुझाव दिएका थिए । पर्यवेक्षकद्वय बुधबल गुरुङ र क्रान्ति सिंहले कार्यक्रम अवधिभर निरीक्षण तथा सहभागीलाई सुझाव राखेका थिए ।
एनसीसी कतारका सचिव रोशन अर्याल र तमु समाजका महासचिव ज्ञान बहादुर गुरुङ (डिजन)ले सहजीकरण गरेको कार्यक्रमको अन्त्यमा बोल्दै एनसीसी कतारका अध्यक्ष रमेश भट्टले प्रतिस्पर्धामा सहभागी सबैप्रति शुभकामना व्यक्त गरे । उनले फिनालेमा पुग्ने प्रतिस्पर्धीहरुलाई शुभकामना दिँदै जो प्रतियोगिताबाट बाहिरिए पनि नतिजालाई सकारात्मक रूपमा लिँदै थप मेहनत गरेर संगीत क्षेत्रमा निरन्तर बग्न शुभेच्छा प्रकट गरेका थिए । आयोजक संस्था तमु (गुरुङ) समाजकी अध्यक्ष टौमाया गुरुङसहित एनआरएनए आईसीसीका विभिन्न तहका व्यक्तित्वको विशेष आतिथ्यता रहेको थियो ।
प्रतियोगिताको गायन विधाका विजेताले १ लाख ८१ हजार र नृत्य विधाका विजेताले १ लाख ५० हजार रुपैयाँ नगद पुरस्कारसहित ट्रफी प्राप्त गर्नेछन् भने उपविजेताले ७५ हजार रुपैयाँ प्राप्त गर्नेछन् । फेब्रुअरी २, २०२४ मा हुने ग्राण्ड फिनालेका लागि अतिथि निर्णायकसहित आविष्कार केन्द्रका संस्थापक महावीर पुनलाई नेपालबाट कतार ल्याउन पहल भइरहेको आयोजकले जनाएका छन् । कार्यक्रमबाट भएको मुनाफाको ६५ प्रतिशत रकम राष्ट्रिय आविष्कार केन्द्रलाई सहयोग गरिने भएको छ । मध्यान्ह राष्ट्रिय दैनिक उक्त आइडलको मुख्य सञ्चार सहयोगीका रूपमा रहेको छ ।
तिलु शर्मा पौडेल/मध्यान्ह
दोहा, कतार : सामाजिक सञ्जाल टिकटक तथा रिलमा तहल्का मच्चाउन सफल पानी, बिजुली वर्षा गीतसहित सयौँ गीतकी गायिका प्राश्ना शाक्य तथा भोजपुरी, मैथिली हिन्दी तथा थुप्रै नेपाली गीतमा कुशल नृत्य प्रस्तुत गरेकी सफल नृत्यंगना मेनुका माझी कतार आइपुगेका छन् । रात्रिकालीन व्यवसायमा सफल व्यवसायीका रूपमा स्थापित युवा व्यवसायी उत्तम गुरुङले हालै सञ्चालनमा ल्याएको भेल्भेट लाउन्ज एन्ड क्लबले आयोजना गरेको "भेल्भेट नाइट" मा आफ्नो सांगीतिक प्रस्तुति दिन उनीहरु कतार आइपुगेका हुन् ।
अतिथि कलाकारको स्वागतार्थ हमाद विमानस्थलमा क्लब सञ्चालक गुरुङ, कार्यक्रम संयोजक नाजिर रहमानलगायतका अन्य व्यक्तित्वहरू पुगेका थिए । अतिथि कलाकारहरूले कतारमा रहेका सबै नेपालीहरूलाई कार्यक्रममा निमन्त्रणा गर्दै सँगै रमाएर कार्यक्रमलाई भव्य बनाइदिन आग्रह गरेका छन् ।
दोहाको मुटु सल्वा रोडमा रहेको जरीर बुक स्टोरको ठिक पछाडि आईभोरी ईन होटेलको चौथो तलामा रहेको भेल्भेट लाउन्ज एन्ड क्लबमा आज साँझ पाँच बजेदेखि कार्यक्रम शुरु हुने सञ्चालक गुरुङले मध्यान्ह दैनिकलाई जानकारी दिए । दिउँसो ४ बजेबाट गेट खुल्ने छ भने पुरुषका लागि ५० कतारी रियाल र महिलाका लागि निःशुल्क प्रवेशको व्यवस्था गरिएको छ ।
क्लब प्रवेशमा सहजताका लागी कुनैपनि किसिमको शुल्क नलाग्ने, मेम्बरसिप कार्डको जरुरत पनि नपर्ने, तर क्लब प्रवेशका लागि २१ वर्ष कटेको, म्याद भएको कतारी आइडी कार्ड या पासपोर्ट भने आवश्यक पर्नेछ ।
तिलु शर्मा पौडेल/मध्यान्ह
दोहा, कतार : गैरआवासीय नेपाली संघ (एनसीसी) कतार र तमु (गुरुङ) समाज कतारको संयुक्त आयोजनामा आयोजित “गैरआवासीय नेपाली तारा- २०२३ कतार सिजन ४” को तेस्रो चरणको प्रतिस्पर्धा शुक्रबार हुने भएको छ । आउँदो शुक्रबार बिहान प्लाजामलमा अवस्थित वेलफेयर रेस्टुरेन्टको सभा हलमा सम्पन्न हुने प्रतियोगिता आन्तरिकरूपमा गरिने आयोजकले जनाएका छन् l
'नेपाली कला संस्कृतिको सम्मान गरौं, प्रवासमा रहेको प्रतिभाको खोजी गरौँ' भन्ने नाराका साथ राष्ट्रिय आविष्कार केन्द्रको सहयोगार्थ, प्रवासमा लुकेर बसेको कलालाई प्रस्फुटन र उजागर गर्ने उद्देश्यले आयोजित प्रतियोगिताको तेस्रो चरणमा अतिथि निर्णायकको भूमिकामा गायक तथा संगीतकार प्रभात त्रिपाठीलाई निमन्त्रणा गरिएको छ l तेस्रो चरणबाट गायन र नृत्य गरी दुवै विधाबाट उत्कृष्ट पाँच पाँच जनालाई ग्राण्ड फिनालेमा लगिने छ l फेब्रुअरी २, २०२४ मा हुने ग्राण्ड फिनालेका लागि अतिथि निर्णायक सहित आविष्कार केन्द्रका संस्थापक महावीर पुनलाई नेपालबाट कतार ल्याउन पहल भइरहेको आयोजकले बताए l पछिल्ला चरणहरूमा भएका कमजोरी सुधार्दै प्रतिस्पर्धीहरूलाई यातायातको समेत व्यवस्था गरिने यातायात संयोजक केशव कार्कीले मध्यान्ह दैनिकलाई जानकारी दिए l
प्रतियोगिताको तेस्रो चरणमा गायन विधाबाट १७ जना र नृत्य विधाबाट १० जना प्रवेश गरेका छन् l गायन विधाबाट सुजन गुरुङ, बुद्ध सिंह लिम्बू, भीम बहादुर कार्की, जोन विक, असोक गुरुङ, रुष्तम तामाङ, मानसिंह परियार, ईशान रेग्मी, सुरज केसी, मालती लामा, वनिता राई, दीपक कुमार घले, गौतम सामी लिम्बू, प्रविन रामदाम, क्षितिज तामाङ, उत्तम राई र सरला तामाङले प्रतिस्पर्धा गर्दै छन् l त्यस्तै नृत्य विधाबाट जुनुमाया कुमाल, झरना राई, दिया सिंह, जीवन खालिंग राई, अमित राई, रिता श्रेष्ठ, सौजार चाहार, निरु श्रेष्ठ, सरोज लामा र सुनिता शेर्पाले प्रतिस्पर्धा गर्दै छन् l प्रतिस्पर्धाको गायन विधातर्फ वीरेन्द्र श्रेष्ठ, गुन्जन तामाङ र मङ्गल विक निर्णायकका रूपमा रहेका छन् भने नृत्य विधातर्फ भबिन तामाङ, भीम प्रसाद गुरुङ र जनक लाफा मगरले निर्णायकको जिम्मेवारी सम्हालेका छन् l
काठमाडौं : काठमाडौंमा सम्पन्न दोस्रो जीवन्त म्युजिक अवार्डबाट वरिष्ठ ध्वनि सम्पादक किशोर थापा सम्मानित भएका छन् । लामो समयदेखि नेपाली सांगीतिक क्षेत्रमा ध्वनि सम्पादकको रुपमा कार्यरत थापालाई जरुरी कुरा छ बोलको गीतबाट सर्वोकृष्ट ध्वनि सम्पादकको अवार्ड प्राप्त भएको हो ।
उक्त गीतमा अर्जुन पोखरेलको संगीत सुरेश वाग्लेको शब्द अन्जु पन्त सुरेश लामाको स्वर रहेको छ । तीन हजारभन्दा बढी गीतहरुमा ध्वनि सम्पादन गरिसकेका थापा नेपाली सांगीतिक क्षेत्रमा तीन दशकदेखि सक्रिय छन् । उनको ध्वनि सम्पादनमा सुप्रसिद्ध गायक गायिका प्रेमध्वज प्रधान उदित नारायण झा दिप श्रेष्ठदेखि अहिलेका अधिकांश गायक गायिकाको स्वर सुन्न सकिन्छ ।
नेपालकै एक विशिष्ठ वरिष्ठ ध्वनि सम्पादकको रुपमा प्रख्यात किशोर थापासँगै उक्त अवार्ड विभिन्न ४५ विधाका सर्जकहरुलाई प्रदान गरिएको थियो । संस्कृति पर्यटन तथा नागरिक उडयान राज्यमन्त्री शुसीला सिर्पाली ठकुरीको प्रमुख आतिथ्यतामा सम्पन्न उक्त कार्यक्रममा नेपाल संगीत तथा नाट्य प्रज्ञा प्रतिष्ठानका पूर्वउपकुलपति एवम् अग्रज संगीतकार शम्भुजीत बास्कोटालगायतका व्यक्तिहरुको उपस्थिति रहेको थियो ।
काठमाडौं : रामेछापको शैलुङ डाँडाको पर्यटन पवर्द्धनका लागि विविध तयारी गरिरहेको अग्लेश्वरी हिल्स कोषद्वारा आयोजित ‘दोस्रो जीवन्त नेपाल म्युजिक अवार्ड–२०२३’ विभिन्न ४५ विधामा अवार्ड प्रदान गर्दै शनिबार राति सम्पन्न भएको छ । समारोहमा संस्कृति पर्यटन तथा नागरिक उड्डयन राज्यमन्त्री शुशीला सिर्पाली ठकुरी, नेपाल संगीत तथा नाट्य प्रज्ञा प्रतिष्ठानका पूर्वउपकुलपति एवम् अग्रज संगीतकार शम्भुजीत बासकोटासहित विभिन्न अग्रज कलाकारले समारोहमा कलाकारलाई सम्मान तथा अवार्ड प्रदान गरेका थिए ।
नेपाली गीतसंगीतको प्रवद्र्धन र अग्लेश्वरी हिल्सको पर्यटन प्रवर्द्धनको लागि आफूहरुले यो अवार्ड आयोजना गर्दै आएको आयोजक संस्थाका संस्थापक अध्यक्ष सिजम सिँजालीले कार्यक्रममा बताए ।
अवार्ड समारोहमा उत्कृष्ट राष्ट्रिय गीत, गायकको अवार्ड माटोको मायाबाट नीमा शेर्पा, पर्यटन प्रवद्र्धन गीतको अवार्ड सुन्दर रामेछापबाट गायक प्रकाश कटुवाल, पर्यटन गीततर्फ नै गीतकारको अवार्ड खाँडादेवी माई २ बाट कल्याणरत्न कार्कीले हासिल गरे ।
यस्तै चलचित्र संगीततर्फ उत्कृष्ट चलचित्र संगीतकारको अवार्ड छक्का पञ्जा ४ को दर्शन सलाम गीतबाट दिपक शर्मा, पब्लिक च्वाइस अवार्ड चलचित्र प्रसाद २ को मारसी धान गीतबाट राजनराज शिवाकोटी, उत्कृष्ट चलचित्र गीतकारको अवार्ड छक्का पञ्जा ४ कै दर्शन सलामबाट राजेन्द्र थापा, उत्कृष्ट चलचित्र गीत गायकको अवार्ड छक्का पञ्जा ४ कै दर्शन सलामबाट डेभिड शंकर, गायकमै पब्लिक च्वाइस अवार्ड चलचित्र नाइ नभन्नु ल ६ को तिम्रो आँखामा गीतबाट प्रताप दास र चलचित्र गायिकाको अवार्ड बाबरी चलचित्रको बाबरी रंग गीतबाट अस्मिता अधिकारीले हासिल गरे ।
यस्तै आधुनिक गीततर्फ उत्कृष्ट आधुनिक गीतकारको अवार्ड दुर सागरबाट डब्बु क्षत्री, गीतकारकै डायस्पोरा अवार्ड मैले प्रेम गरिकी हुँबाट राज मुकारुङ, जूरी अवार्ड सचिता कर्माचार्य, उत्कृष्ट संगीतकारको अवार्ड मेरो दिलको राजाबाट पदम रोकाया, गायकको अवार्ड राम साइलीबाट नरेश बीबीसी, जूरी अवार्ड बाँचिएलाबाट विशाल थापा, पपुलर गीतको अवार्ड सुनकोशीबाट सबु थापामगर, गायिकाको अवार्ड आधा दुःखबाट सुनिता कार्की, जुरी अवार्ड जिन्दगीका गोरटोबाट कुसुम बराल, नयाँ गायकको अवार्ड सुनको दरबारबाट बालाराम परियारले हासिल गरे ।
यस्तै आधुनिक गीत भिडियोतर्फ महिला मोडलको अवार्ड तिमी मेरोबाट जिसु कोइराला, जुरी अवार्ड सम्झनाबाट अनिता गिरी, पुरुष मोडलको अवार्ड भ्रष्टाचारी भेनाबाट ईश्वर बल्लभ उप्रेती, पुरुष नयाँ मोडलको अवार्ड सुनकोशीबाट सुनिल न्यौपाने, महिला नयाँ मोडलको अवार्ड जिन्दगीका गोरेटोबाट रेश्मा श्रेष्ठ, सिनेमेटोग्राफरको अवार्ड मायाले नै होबाट रुपेश थापा, भिडियो सम्पादकको अवार्ड कठैबाट पदम सुवेदी, भिडियो निर्देशकको अवार्ड सपना वनेरबाट सत्यराज चौलागाईं र भिडियो निर्देशकको पब्लिक च्वाइस अवार्ड सुन कोशीबाट दिलीप समनले हासिल गरे ।
यस्तै पपगीततर्फ म्युजिक भिडियोमा उत्कृष्ट महिला मोडलको अवार्ड कास्तो होलाबाट अस्मिता तामाङ, नव पुरुष मोडलको अवार्ड शुभकामनाबाट रमेश विश्वकर्मा, पप गीततर्फ उत्कृष्ट गायकको अवार्ड तिमि धुनबाट चेतन राई, जूरी अवार्ड तिम्रो यादमाबाट प्रशान्त मिष्ट, पपगीत गायिकाको अवार्ड मजा बेग्लै छबाट रिज्योना कार्की, डायस्पोरा अवार्ड मैले प्रेम गीतबाट मञ्जु लामा र जुरी अवार्ड तिमीलाई गीतबाट चाँदनी शाक्य, पप गीतकारको अवार्ड आमाबाट किरण माइकल घिमिरे, संगीत संयोजकको अवार्ड छुनुमुनु २बाट आमोस तामाङले हासिल गरे ।
यस्तै बाल कलाकारतर्फ उत्कृष्ट मोडलको अवार्ड मायाको आशबाट सफल पौडेल, जुरी अवार्ड छुनुमुनु २ बाट जविस श्रेष्ठ÷जविन श्रेष्ठ, पब्लिक च्वाइस अवार्ड चाँहिदैन तिम्रोबाट आयुषी ढकाल, कोरियोग्राफरको अवार्ड सातै सुरबाट कृष्ण रसाल, कोरियोग्राफर जुरी अवार्ड कालीकालीबाट विकास नेपालीले हासिल गरे । यस्तै गीत मिक्सिङ र मास्टरिङको अवार्ड जरुरी कुराबाट किशोर थापा, उत्कृष्ट गजल गायकको अवार्ड मौसम खराबबाट गुणराज श्रेष्ठ, गजलमै जुरी अवार्ड माया गरेझैंबाट डीबी खड्का र देउडा गायिकाको अवार्ड उधारो खाइदियोबाट शोभा थापाले हासिल गरे ।
लोकदोहोरीतर्फ गीतकारको अवार्ड ठमेल आसनबाट नेत्र अर्याल, संगीतकारको अवार्ड डाँडा घरे साइँलीबाट श्रीकृष्ण बम मल्ल, संगीत संयोजकको अवार्ड मेरो सानुबाट नरेन्द्र वियोगी, उत्कृष्ट लोकदोहोरी गायकको अवार्ड ठमेल असनबाट खेम सेन्चुरी, जुरी अवार्ड मुसौरीबाट सरोज लामिछाने, उत्कृष्ट गायिकाको अवार्ड फूल फुल्यो अमलाबाट पार्वती कार्की, नव गायिकाको अवार्ड बिउ खायोबाट कविता खत्री, नव गायिका जुरी अवार्ड रातो सल्कोबाट सावित्रा भुजेल र लोकदोहोरी नव गायकको अवार्ड तिहारै आयोबाट नकुल गौतमले हासिल गरे ।
यस्तै लोकदोहोरीतर्फ नै म्युजिक भिडियो महिला मोडलको अवार्ड सोल्टी बजारबाट रजनी गुरुङ, जुरी अवार्ड च्यात्यो रुमालबाट अनिता बस्नेत, पुरुष मोडलको अवार्ड मनको चाहनाबाट सागर लम्साल, महिला नवमोडलको अवार्ड नौलो चिनजानीबाट शशिकला राई, नव पुरुष मोडलको अवार्ड कति राम्रो रामेछापबाट नविन गौतमले हासिल गरे । यस्तै लोकदोहोरीतर्फ नै भिडियो सम्पादकको अवार्ड सिमसिम पानीबाट मिलन विश्वकर्मा, छायाँकारको अवार्ड पातली मोरीबाट राम कृष्ण कँडेल, भिडियो निर्देशकको अवार्ड ढुकुरको गुँडबाट खमेश श्रेष्ठ, कल्चरल गीत गायिकाको अवार्ड गेतेंगा टेंगाबाट कल्पना सुनुवार र उत्कृष्ट कल्चरल गीत भिडियो निर्देशकको अवार्ड दमौलीका चाइना पुलबाट उमेश गुरुङले हासिल गरे । कार्यक्रममा विभिन्न सञ्चारकर्मी, समाजसेवी, कलाकार, उद्यमी, व्यवसायीलगायतलाई सम्मानित गरिएको थियो ।
अवार्डको निर्णायकमा गायक सिडी विजय अधिकारी, संगीतकार शंकर थापा ‘स्माइल’, मोडल रुविना अधिकारीलगायत थिए । कार्यक्रममा मोडल अदिती श्रेष्ठको नृत्य निकै आकर्षक थियो । यस्तै गायकहरु डेभिड शंकर, प्रताप दासले आफ्ना गीतबाट दर्शकलाई नचाए । कार्यक्रममा नेपाल मगर सांस्कृतिक संघका कलाकारहरुको नृत्य, लुगुम चेलिबेटी आमा समूहको पञ्चेबाजा प्रस्तुति रहेको थियो ।
काठमाडौं : ‘मिस इको इन्टरनेशनल नेपाल २०२४’को विजेता फ्लाविया महर्जन घोषित भएकी छन् । काठमाडौंकी २१ वर्षीया विजेता महर्जनले इजिप्टमा आयोजना हुने अन्तर्राष्ट्रिय सौन्दर्य प्रतियोगिता ‘मिस इको इन्टरनेशनल २०२४’मा नेपालको प्रतिनिधित्व गर्नेछिन् ।
ग्रीनआर्ट मिडियाले राजधानीमा शुक्रबार साँझ आयोजना गरेको कार्यक्रममा महर्जन ‘मिस इको इन्टरनेशनल नेपाल २०२४’को ताजसहित इजिप्ट प्रतियोगिताका लागि छनोट भएकी हुन् । कार्यक्रममा महर्जनलाई गत वर्षकी विजेता रक्षा उप्रेतीले ‘मिस इको इन्टरनेशनल नेपाल २०२४’को ताज लगाइदिएकी थिइन् ।
स्ट्याण्ड लन्च एण्ड बार बत्तीसपुतलीमा आयोजित कार्यक्रममा अन्तर्राष्ट्रिय कोरियोग्राफर रोजिन शाक्य, अन्तर्राष्ट्रिय सौन्दर्य प्रतियोगिता हेरिटेज प्याजेन्टका निर्देशक सन्तोष सापकोटा, कोरियोग्राफर जयन सुब्बा मानन्धर, ग्रीन आर्ट मिडियाका सिइयो प्रविन लाकौल, चलचित्र पत्रकार संघका उपाध्यक्ष कुबेर राज गिरी, सञ्चारकर्मी अनुरा भट्टराई, मिस स्टार युनिभर्स २०२३ श्रृष्टि महर्जन, मिस हेरिटेज २०२३ आज्मा महर्जन लगायतको उपस्थिति थियो ।
कार्यक्रममा गत वर्षकी ‘मिस इको इन्टरनेशनल’ विजेता उप्रेतीले इजिप्टमा आयोजना हुने अन्तर्राष्ट्रिय सौन्दर्य प्रतियोगिता ‘मिस इको इन्टरनेशनल’ नेपाललाई विश्वमा चिनाउने एउटा सुनौलो अवसर भएको बताउँदै उक्त मञ्चको महर्जनले राम्रोसँग सदुपयोग गर्ने बताइन् । उप्रेतीले महर्जनबाट ‘मिस इको इन्टरनेशनलको’ ताज नेपाल भित्रिने आस गर्न सकिने धारणा राखिन् ।
विजेता महर्जनले मिस इको आफ्ना लागि एउटा राम्रो अवसर भएको बताइन् । उनले अवसर प्रदान गर्ने ग्रीन आर्ट मिडिया प्रति आभार व्यक्त गर्दै प्रतियोगितामा जस्तो सुकै चुनौती आएपनि सामना गर्ने धारणा राखिन् । प्रतियोगितामा आफूले नेपालका कल्चरल, सांस्कृतिक र पर्यटकीय स्थानको समेत प्रचार गर्ने उनले बताइन् ।
ग्रीन आर्टस मिडियाका सिइयो प्रविन लाकौलले महर्जनले ‘मिस इको इन्टरनेशनल’मा नेपालको नाम राखेर फर्किने बताए । अन्तर्राष्ट्रिय कोरियोग्राफर रोजिन शाक्यले नेपालको प्रतिनिधित्व गरेर अन्तर्राष्ट्रिय प्रतियोगितामा सहभागी हुन पाउनु निकै गौरवको विषय भएको बताउँदै उक्त अवसरको सदुपयोग गर्दै आफ्नो र राष्ट्रको नाम उचो राख्न महर्जनलाई सुझाए ।
आगामी फेब्रुअरीमा आयोजना हुने प्रतियोगितामा ६० बढी देशका इको सुन्दरीहरुको सहभागिता रहनेछ । प्रतियोगिताका लागि महर्जन नेपालको तर्फबाट एक्लो प्रतिनिधि हुन् । महर्जनलाई प्रतियोगिताका लागि ग्रीन आर्ट मिडियाकी प्रबन्ध निर्देशक तथा अन्तर्राष्ट्रिय कोरियोग्राफर अनिला श्रेष्ठ र नेपालका प्रतिष्ठित व्यक्तिहरुबाट ग्रुमिङ गरिनेछ ।
ग्रीन आर्टस मिडियाकी अनिला श्रेष्ठ २०१५ देखि मिस इको इन्टरनेशनलको आधिकारिक नेपाल राष्ट्रिय निर्देशकको रुपमा चुनिएकी हुन् । मिडियाको सिईओमा प्रविन लाकौल रहेका छन् ।
मिस इको इन्टरनेशनल एक प्रतिष्ठित अन्तर्राष्ट्रिय सुन्दरी प्रतियोगिता हो । जसको एल.टी.सि.पि. अर्गनाइजेशनले ब्युटी फर इको’ जागृत गर्दै टुरिजम् र वातावरणको विषयलाई मुख्य कार्यक्षेत्र बनाइ इजिप्टबाट २०१५ देखि शुरु गरेको हो । यसको मुख्य उद्देश्य विश्वभरका पर्यावरण र संस्कृतिलाई अन्तर्राष्ट्रिय नेटवर्कमार्फत सूचना प्रवाह गर्ने रहेको छ ।
काठमाडौं : स्कुले जीवनबाट नै गीतसंगीतमा रुची राख्ने राजेन्द्र पुरीले २०६९ सालबाट स्वदेश, विदेशमा हुने ठूला कार्यक्रमहरुको आयोजना गर्दै दर्जनौं लोकप्रिय कलाकारहरुलाई आफ्नो कार्यक्रममा सहभागिता गराइसकेका छन् ।
२०७० देखि मलेसियालगायत नेपालमा हुने विभिन्न सांस्कृतिक कार्यक्रम आयोजनामा सक्रिय सहभागिता जनाउँदै आएका राजेन्द्र पुरीको संयोजनमा हालै रोयल मुभिज प्रालि र सिन्धुपाल्चोक सेवा समाज यूएई दुबईको संयुक्त आयोजनामा पाँचौं ज्योति फिल्म म्युजिक अवार्ड २०८० सम्पन्न भएको छ । पुरीको सक्रियतामा दोस्रो अन्तर्राष्ट्रिय प्रियसी सिल्भर म्युजिक अवार्ड थाइल्याण्ड, सिंगापुर र मलेसियामा आयोजना गरी झण्डै ३० जना कलाकर्मीलाई विभिन्न विधामा अवार्ड प्रदान गरिएको थियो ।
निकट भविष्य हुन गइरहेको तेस्रो सिल्भर इन्टरनेशनल म्युजिक अवार्ड २०२४ ‘अन्तर्राष्ट्रिय कला स्रष्टा सम्मान’को तयारीमा व्यस्त रहेका पुरीका अनुसार राष्ट्रियस्तरका कलाकारलाई थाइल्याण्ड, सिंगापुर र मलेसियामा उपस्थित गराएर सम्मान तथा अवार्ड प्रदान गरिने छ । कार्यक्रम संयोजक पुरी भन्छन्, ‘यस्तो कार्यक्रम गर्नु आफैंमा गहन विषय हो भने सही व्यक्तित्वलाई निष्पक्ष ढंगले विवादरहित सम्मान वितरण गर्न पनि कार्यक्रम संयोजकको महत्वपूर्ण भूमिका रहन्छ ।’
गएको ७ महिनामा चार देशमा भव्यरुपमा चार वटा अवार्ड कार्यक्रम सम्पन्न गरी झण्डै १२० जना भन्दा बढी कलाकार, पत्रकार, समाजसेवी, व्यवसायीलाई सम्मान गरिसकेका गीतकारसमेत रहेका पुरीले थाइल्याण्ड, मलेसिया र सिंगापुरमा हुन गइरहेको तेस्रो सिल्भर इन्टरनेशनल म्युजिक अवार्ड २०२४ कार्यक्रमलाई सभ्य र भव्यरुपमा सम्पन्न गर्न कुनै कसर बाँकी नराख्ने बताए ।
पोखरा : नेसनल बक्स अफिस सर्ट फिल्म अवार्ड २०८० पोखरामा सम्पन्न भएको छ । पोखरा माहानगरपालिकाका प्रमुख धनराज आचार्यको प्रमुख आतिथ्यतामा पोखराको पामेमा अंग्रेजी नयाँ वर्षको इभको मध्यरातमा सर्ट फिल्म अवार्ड सम्पन्न भएको हो । बक्स अफिस इन्टरनेशनल ग्रुप र ग्लोबल एकट्रेस फ्रेडेसन (विश्व कलाकार महासंघ)ले आयोजना गरेको नेसनल बक्स अफिस सर्ट फिल्म अवार्ड २०८० मा २२ जनाले अवार्ड चुमेका छन् ।
सर्ट फिल्म अवार्ड विजेताले यो वर्ष पनि टर्फीसँगै हरेक विधामा १ लाख ११ हजार १ सय ११ रुपैयाँ नगद पुरुषकार प्राप्त गरेका छन् । यो वर्ष ७३ वटा सर्ट फिल्ममध्ये वरिष्ठ द्वन्द्व निर्देशक, निर्देशक तथा कलाकार सुरेन्द्र शाहले निर्माण–निर्देशन गरेको ‘हाइस्कुल’, रत्नबहादुर डंगोलको ‘हार र पिबि थापाको ‘आकृति’को अवार्डमा मुख्य वर्चस्व रह्यो ।
सर्ट फिल्म अवार्डमा मोफसलबाट निर्माण भएका छोटा फिल्म पनि प्रतिस्पर्धामा थिए । ७७ जिल्लाको सर्ट फिल्महरुलाई पछि पार्दै मोफसल अभिनेतामा अर्जुन खड्का ‘बदला’बाट सम्मानित भए । त्यसैगरी ‘बदला’बाटै सर्वश्रेष्ठ द्वन्द्व विधामा राजेन्द्र ढकाल र सर्वश्रेष्ठ निर्देशक विधामा पोखराका संगम कायस्थले ‘परिस्थिति’बाट अवार्ड जिते ।
वरिष्ठ निर्माता विनयराम श्रेष्ठ, कलाकार सरिता लामिछाने, निर्देशक–निर्माता बाबु बलामी, गायिका सूर्यकला आचार्य, संगीतकार राजु खड्का गरेर पाँच सदस्य जुरी रहेको अवार्डमा केन्द्रीय स्तरबाट निर्माण भएको विभिन्न सर्ट फिल्मलाई पछि पार्दै सर्वश्रेष्ठ मेकअप शर्मिला सुनवार ‘हार’, सर्वश्रेष्ठ कथा राजेन्द्र ढकाल ‘मोहोनी’, सर्वश्रेष्ठ लेखक विश्वनाथ तामाङ ‘मन’, सर्वश्रेष्ठ सम्पादक जोन राई ‘हार’, सर्वश्रेष्ठ छायाँकार श्याम तामाङ ‘आकृति’, सर्वश्रेष्ठ चरित्र अभिनेता आर.बि कटुवाल ‘माध्यमिक विद्यालय’, सर्वश्रेष्ठ सहनायक गिल्डहसन (विदेशी) ‘आकृति’बाट अवार्ड उचाल्न्न सफल भए ।
त्यसैगरी सर्वश्रेष्ठ नवनायिकामा प्रतीक्षा खड्का ‘हार’, सर्वश्रेष्ठ नवनायक हिमाल जंग कटुवाल ‘माध्यमिक विद्यालय’, सर्वश्रेष्ठ अभिनेत्री प्रति रिजाल ‘आकृति’, सर्वश्रेष्ठ अभिनेता प्रदीप बास्तोला ‘हार’ र सर्वश्रेष्ठ नवनिर्देशक सुमन खाँड ‘आकृति’बाट अवार्ड जित्न सफल भए ।
यस्तै सर्वश्रेष्ठ जुरी अवार्ड निर्देशक (सापटी काका) दिवाकर भण्डारी ‘इतिहास’बाट अवार्ड हात पार्न सफल भए । उनले सामाजिक दाहित्व वहन गर्ने सर्ट फिल्म बनाएकोले यो विधाबाट सम्मान गरिएको हो ।
सर्वश्रेष्ठ निर्देशक कृटिक्स अवार्ड जीवन शाहीले ‘हार’बाट प्राप्त गरे । उनले फिल्ममा विशेषगरी युवा शक्ति किन बिनाकारण आत्महत्या गर्छन् ?, आत्महत्याको जड के हो ?, अन्तत मानिस सुन्दर जीवनबाट किन हार खान्छ ? भन्ने विषय उठाएकाले उनले ७३ वटा छोटा फिल्मलाई पछि पार्दै अवार्डसँगै नगद पनि जितेका हुन् ।
यो वर्षको आम जनुसमुदायमै बृहत् च्यारिटी शो हुँदै गरेको र थुप्रै ठाउँमा शोहरु भइ बक्स अफिस कलेकसन पनि राम्रै गरेको ‘माध्यमिक विद्यालय’का निर्देशक सुरेन्द्र शाहले उत्कृष्ट निर्देशकको अवार्ड जिते । शाहाले दर्जनौं सेलोलाइट फिल्ममा द्वन्द्व निर्देशनसँगै मजदुर, कारण अर्जुन र ठुलेजस्ता सफल चलचित्र निर्माण तथा निर्देशन गरेका छन् ।
२०८० को आसपासमा बनेको ७३ सर्ट फिल्मबाट सर्वश्रेष्ठ सर्ट फिल्म पिबि थापाले निर्माण गरेको ‘आकृति’ उत्कृष्ट फिल्न छानियो । नवनिर्देशको अवार्ड विजेता सुमन खाँडले कोरोना माहानारीको कठिन परिस्थिति र नेपाली नागरिकले विदेश यात्रामा भोग्नुपर्ने मार्मिक र यथार्थ राष्ट्रिय मुद्दा उठाएकाले सर्ट फिल्म ‘आकृति’लाई सर्वोश्रेष्ठ सर्ट फिल्म घोषणा गरिएको हो ।
अवार्ड कार्यक्रममा पोखराका गायक तथा संगीतकार जि पुन, सामाजिक अभियान्ता माया गुरुङ, मोडल अमुल्य राना मगर, रिलिज चलचित्र उपाहार, देव वाणी र चित्राको निर्माण टिमलाई सम्मान गरिएको थियो । पोखराको गुरुङ समुदायको सुन्दर नृत्य र स्थानीय कलाकारहरुको आकर्षक सांगीतिक कार्यक्रमले अवार्ड कार्यक्रममा रौनकता बढाएको थियो ।
संगीतकार तथा निर्माता दिपक रमण, निर्माता एवम् वितरक केदार पराजुली, निर्देशक रिम विश्वकर्मा, कलाकार हरिचन्द्र फुयाल, केदार खड्का, व्यवसायी रामशरण श्रेष्ठ अवार्डमा अथितिको रूपमा पोखरा पुगेका थिए भने स्थानीय समाजसेवी हरि भण्डारी, निर्माता रामप्रसाद गौतम, संगीतकार एवम् समाजसेवी इशा ढुंगाना, सुकदेव नेपाली, योगराज पौडेल, दिनेश कुँवर र रजनी केसीले विशेष अथितिका रुपमा रहेर अवार्ड तथा सम्मान वितरण गरेका थिए ।
चन्द्रज्योति फिल्म प्रा.लि.का चन्द्रज्योति ढुंगानाको सभापतित्व र बक्स अफिस इन्टरनेशनल ग्रुपको अध्यक्ष राम बाहादुर सुवेदी (आर के)को अध्यक्षतामा अवार्ड कार्यक्रम सम्पन्न भएको हो । कार्यक्रममा सहआयोजक ग्लोबल एक्ट्रेस फेडेरेसन (विश्व कलाकार महासंघ) का उद्देश्य र दीर्घकालीन योजनाबाट प्रभावित भएर प्याब्सनका महासचिव आर बि कटुवाल, हिमालय जंग कटुवाल, चितवनका युवा व्यवसायी महेश लामिछाने, निर्माता एवम् व्यवसायी रत्नबाहादुर डंगोल, नायिका प्रतीक्षा खड्का, सम्पादक जोन राई, नायिका अनुजा लोप्चन, पत्रकार सिला वाग्ले, निर्माता नरेन्द्र निम्बुहाङ, नायिका अनुजा लोप्चा, गायिका सिमिता तामाङ, व्यवसायी यादव पतुवार, राजकुमार थापा, अनुज कार्की, विष्णु बाहादुर राई, लोकेन्द्र लिम्बू, निर्माता तथा निर्देशक राजेन्द्र ढकाल, विश्व श्रेष्ठ, मौसमी खरेल, देव दिर्जे लामा, सूर्य तामाङ, सुरज लामा, विश्वनाथ तामाङलगायत विभिन्न व्यक्तित्वहरुलाई आजीवन सदस्यबाट सम्मानित गरिएको थियो ।
काठमाडौं : गीतकार नारद पोख्रेलको ‘नाजाने भो हाम्रो दुःख’ बोलको नयाँ गीत सार्वजनिक गरिएको छ । वरिष्ठ गीतकार राजेन्द्र थापाको प्रमुख आतिथ्यतामा काठमाडौंमा एक कार्यक्रमका बीच सार्वजनिक गरिएको गीतले सामाजिक वस्तु स्थिति झल्काउँछ । गीतमा गायक शिशिर योगीको स्वर रहेको छ भने ज्योति प्रकाशको संगीत रहेको छ ।
ओएस आर डिजिटलबाट सार्वजनिक गरिएको गीतको भिडियोमा शुरविर पण्डित, रश्मि भट्ट र राजानन्द माण्डव्यको अभिनय रहेको छ । गोविन्द अन्जानले छायाँकन गरेको भिडियोकोे निर्देशन दिपेन्द्र प्रकाश केसीले गरेका छन् ।
मकवानपुरको कुन्छाल गाउँमा छायाँकन गरिएको भिडियोमा राज्यको व्यवस्था बदलिए पनि आम नेपालीको अवस्था नबदलिएको कथा पेश गरिएको छ ।
गीत सार्वजनिक कार्यक्रममा प्रमुख अतिथि आम नेपालीको भावनालाई समेटेर तयार पारिएको गीत अत्यन्तै राम्रो भएको बताए ।
कार्यक्रममा गीतकार नारद पोख्रेल, गायक शिशिर योगी, कलाकार शुरविर पण्डित, कलाकार रश्मि भट्ट, गीतकार संघका अध्यक्ष बसन्त वित्यासी थापा, उपाध्यक्ष रमेश कोईराला, संगीतकार ज्योति प्रकाश, लगायतले गीतको सफलताको शुभकामना दिएका थिए ।
तिलु शर्मा पौडेल/मध्यान्ह
दोहा, कतार : राजधानीलाई सपनाको शहर पनि भनिन्छ । सपनीको शहरमा विभिन्न मानिस विभिन्न उद्देश्य र आकांक्षाले पुग्ने गरेका छन् । मोफसलबाट राजधानी अस्थायी बसोबास गर्नेसँग ठूला सपना केही नभए पनि आफ्ना लक्ष्य राजधानीले पूरा गर्छ भन्ने आशाको दियो जस्तै विश्वास हुन्छ । यस्तै सीमित सपना बोकेर राजधानी छिरेकी हुन् धरानकी निशा खपाङ्गी, चितवनकी विमला गुरुङ, धरानकै इशिका विश्वकर्मा र सिन्धुपाल्चोककी रेनु श्याङ्बो । भक्तपुर निवासी मुस्कान चौगुठीसँगको भेट उनीहरूको धेरै पुरानो नभए पनि एकै आमाका सन्तान जस्तो मान्छन् उनीहरू आफूहरूलाई ।
गीतसंगीतमा केही गर्ने सपनालाई साकार पार्न यी पाँच युवती अलग अलग ब्याण्डमा रहेर गाउने बजाउने गरेको बताउँछिन् विमला । मध्यान्ह दैनिकसँग कुरा गर्दै विमलाले अलग अलग ब्याण्डमा रहन भन्दा एउटा ब्याण्ड स्थापना गरेर संयुक्तरूपमा अगाडि बढ्न गरेको प्रस्ताव बाँकी ब्याण्डका मेम्बरले स्वीकार गरेपछि सन् २०२३ मार्च १५ मा ‘स्त्री ब्याण्ड’को स्थापना गरिएको बताइन् ।
शुरुवाती दिनमा गीत गाउँदै टिकटक, इन्स्टामा रिल हाल्ने गरेको स्मरण गर्दै आफूहरूलाई सामाजिक सञ्जालले फरक पहिचान दिएको उनी बताउँछिन् । ब्याण्डमा सबै महिलाहरू मात्र भएको हुँदा स्त्री ब्याण्ड राखे पनि उनीहरूले सबै भर्सन र सबै कलाकारका गीत गाउने गरेका छन् । सक्रिय ब्याण्डहरूले झैं यो ब्याण्डले नेपालसहित भारतका केही शहरमा आफ्नो प्रस्तुतिद्वारा धमाका मच्चाइसकेको छ । विभिन्न सहयोग अभियानमा समेत आफ्नो प्रस्तुतिद्वारा योगदान गर्दै आएको ब्याण्डले पहिलो पटक कतारमा सांगीतिक प्रस्तुति दिँदै धमाका मच्चाएको छ । अंग्रेजी नयाँ वर्ष २०२४ को अवसर पारेर ग्राण्ड रिगल होटेलमा अवस्थित अर्मानि एक्स लन्ज एण्ड बारले आयोजना गरेको ‘न्यु इयर धमाका’मा ब्याण्डले गत बिहीबार, शुक्रवार र आइतबार गरी तीन दिन धमाका मच्चाएर नेपाल फर्किसकेको छ ।
आइतबार राति क्लबको स्टेजमा विभिन्न भेषभुषामा सजिएका मेन भोकलिष्ट निशा खपाङ्गी, ड्रमर विमला गुरुङ, लिड गितारिष्ट इशिका विश्वकर्मा, रिदम गितारिष्ट मुस्कान चौगुठी र बेस गितारिष्ट रेनु श्याङ्बो देखिए । ‘यो मन त मेरो नेपाली हो’ बोलको देशभक्ति गीतबाट प्रस्तुति राख्न शुरु गरेको ब्याण्डले लगातार एक दर्जन गीत प्रस्तुत गर्दै नयाँ साल मनाउन आएका पाहुनालाई सँगै गाउँदै नाच्न बाध्य पा¥यो । स्वदेशी तथा विदेशीसम्मका दर्शक उनीहरूको प्रस्तुतिमा मध्यरातसम्म झुमे । विदेशी नागरिकलेसमेत उनीहरूको लाइभ प्रस्तुतिमा जानी नजानी सँगै गाए र रमाए ।
तीन दिन फरक–फरक जनरा तथा भाषाका गीत गाउँदै कतारमा ब्याण्डले वाहीवाही कमाउँदै सोमबार नेपाल फर्किएको छ । नेपाल फर्किनु पूर्व आयोजकले ब्याण्डका सबै सदस्यहरूलाई सम्मान पत्रले सम्मान गर्दै बिदाइ गरेको थियो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies