भरतपुर– पूर्वी चितवनको राप्ती नगरपालिकामा बसको ठक्करबाट एक जना तीर्थयात्रीको मृत्यु भएको छ । राप्ती–२ गड्यौलीस्थित पूर्व–पश्चिम राजमार्गमा सुनसरीको चतराधामबाट फर्केकी राप्ती नगरपालिका–२ गड्यौली बस्ने ६० वर्षीया निमाकुमारी रिजालको आफूले यात्रा गरेको बसको ठक्करबाट मृत्यु भएको हो । उक्त बसले उनलाई ओर्लने क्रममा ठक्कर दिएको प्रहरीले जनाएको छ ।
बसको ठक्करबाट गम्भीर घाइते भएकी उनको पुरानो मेडिकल कलेजमा उपचारको मृत्यु भएको चितवन जिल्ला प्रहरी कार्यालयका प्रवक्ता श्रीराम भण्डारीले बताए । ठक्कर दिने बस र त्यसका चालक मकवानपुर हेटौँडा उपमहानगरपालिका–१८ बस्ने वर्ष ४१ क कृष्ण सापकोटालाई नियन्त्रणमा लिएर कारबाही प्रक्रिया प्रारम्भ गरिएको उनले जानकारी दिए ।
पुर्ण कुमार/मध्यान्ह
डोल्पा : हिमाली जिल्ला डोल्पाको छलगाड खोलामा निर्माण हुन लागेको पक्की पुल निर्माणको लागि संक्षिप्त वातावरणीय अध्ययन प्रतिवेदनको सार्वजनिक सुनुवाइ सम्पन्न भएको छ ।
भेरी करिडोर अन्तर्गत डोल्पा–जाजरकोट सडक खण्डमा पर्ने त्रिपुरासुन्दरी नगरपालिका १ को छलगाड खोलामा पक्की पुल निर्माण सम्बन्धी संक्षिप्त वातावरणीय अध्ययन प्रतिवेदनको सार्वजनिक सुनुवाइ सम्पन्न गरिएको हो ।
वातावरण संरक्षण ऐन २०७६ को दफा ३ को उप दफा (३) र वातावरण संरक्षण नियमावली २०७७ को नियम ६ बमोजिम आयोजना क्षेत्रको प्राकृतिक भौतिक प्रणाली, जैविक प्रणाली, सामाजिक प्रणाली, सांस्कृतिक प्रणाली र आर्थिक प्रणालीमा पार्न सक्ने प्रभावहरुको बारेमा सरोकारवाला व्यक्ति र संघ संस्थाहरुसँग सामुहिक छलफल तथा अन्तरक्रिया कार्यक्रम गरी राय र सुझाव संकलन गर्नुपर्ने कानूनी प्रावधान अनुसार उक्त पुल निर्माणको विषयमा संक्षिप्त वातावरणीय प्रदिवेदनको विषयमा सार्वजनिक सुनुवाइ कार्यक्रम गरिएको हो ।
सार्वजनिक सुनुवाइ कार्यक्रममा जिल्ला समन्वय समिति डोल्पाका प्रमुख श्यामबहादुर रोकाया, प्रमुख जिल्ला अधिकारी तुलसी प्रसाद दाहाल, त्रिपुरासुन्दरी नगरपालिकाका प्रमुख जनचन्द्र रोकाया, जिल्ला प्रहरी कार्यालय डोल्पाका प्रहरी नायब उपरीक्षक हरीकृष्ण केसी, जिल्लास्थित राजनीतिक दलका पार्टी प्रतिनिधि, त्रिपुराकोटका स्थानीयको उपस्थितिमा सार्वजनिक सुनुवाइ कार्यक्रम सम्पन्न गरिएको सडक विभागका वातावरण विद् चिरञ्जीवी काफ्लेले बताए ।
काफ्लेका अनुसार समुन्द्री सतहबाट १९७५.३३ मिटर उचाइमा बन्ने छलगाड खोलामा ४० मि. लम्बाइ र ११ मी. चौडाइ भएको पक्की पुल निर्माण बन्ने छ । पुल बनेको स्थानको दायाँतर्फ ७२.५ मिटर र बायाँतर्फ ७२.५ मिटर गरेर कुल १४५ मिटर कालोपत्रे समेत गरिनेछ ।
नाली बाहेक पहुँच सडकको विस्तार ११ मि. को हुनेछ । जसमा ७.५ मिटरको कालोपत्रे र सडकको दायाँ-बायाँ १.७५,१.७५ मिटरको सोल्डर हुनेछ । पहुँच सडकको लागि आवश्यक नाली तथा पहुँच सडकभित्र पर्ने अन्य भौतिक संरचनाहरु जस्तै, बिजुलीको पोल, सिँचाइ कुलो, मठ मन्दिर आदिको विस्तृत विवरण समेत संक्षिप्त वातावरणीय प्रतिवेदनमा उल्लेख गरिएको छ ।
पक्की पुल निर्माणको क्रममा हुने समस्या र तीनको समाधानको विषयमा समेत छलफल गरिएको छ । पुल निर्माण तोकेकै समयमा सक्ने गरी काम गर्न उपस्थित सरोकारवाला निकायको भनाइ थियो । तल्लुबगर र रूपगाड खोलामा निर्माणाधीन बेलिब्रिज जसरी अलपत्र पारेर पुल निर्माणको काम नरोक्न समेत ध्यानाकर्षण गरिएको थियो ।
उपस्थित स्थानीयले पुल निर्माणको बेला हुने कामकाजमा यहाँको स्थानीयको सहभागीता हुनुपर्ने माग गरेका थिए । छलगाड खोलामा निर्माण हुन लागेको पक्की पुल बन्ने स्थान शे–फोक्सुण्डो राष्ट्रिय निकुञ्जको मध्यवर्ती क्षेत्रभित्र पर्ने भएपनि पुल निर्माणमा निकुञ्जले अवरोध नगर्ने शे–फोक्सुण्डो राष्ट्रिय निकुञ्जका संरक्षण अधिकृत विश्वबाबु श्रेष्ठले बताए ।
त्यस्तै जिल्ला समन्वय समितिका प्रमुख रोकायले डोल्पाकै प्रसिद्ध धार्मिक एवम् पर्यटकीयस्थल श्री बाला त्रिपुरासुन्दरी मन्दिरको जगमै पक्की पुल बन्न लागेकोले यसमा उचित ध्यानका साथ काम गर्न र कामलाई तीव्र गतिमा अघि बढाउन आग्रह गरे ।
त्यस्तै प्रमुख जिल्ला अधिकारी दाहालले पुल निर्माणको क्रममा आउने विभिन्न समस्याहरुलाई समाधान गर्न जिल्ला प्रशासन कार्यालय हरदम तयार रहेको बताए । पुल भनेकै समयमा काम सम्पन्न गर्न समेत सुझाव दिए ।
त्रिदेशीय मार्ग(चीन–नेपाल–भारत) जोड्ने सबै भन्दा नजिकको राजमार्गभित्र पर्ने यो महत्वपूर्ण पुल समेत हो । यो खोलामाथि पुल निर्माण नहुँदा अहिले बर्खाको समयमा डोल्पाबासीले निकै महंगी मारमा पर्ने गरेका छन् ।
ठेक्का पाएको मितिले ४२ महिनाभित्र पुल निर्माणको कार्य सक्ने गरेर तीन वटा पुलको कुल ३६ करोड २४ लाख ८६ हजार ७ सय रुपैयाँमा वाइपी, एमआर जेवि भरतपुर चितवनले लिएको छ ।
निर्माण कम्पनीले भेरी करिडोर अन्तर्गत डोल्पा – जाजरकोट सडकखण्डमा पर्ने तीन ठाउँमा पुल निर्माणको जिम्मा लिएको छ ।
जाजरकोटको नलगाड नगरपालिका १२ को तल्लुबगरस्थित भेरी नदी, डोल्पा त्रिपुरासुन्दरी ०५ को खदाङ्गस्थित भेरी नदी र छलगाड खोलामा निर्माण हुने पक्की पुल निर्माणको जिम्मा लिएको छ । जसमध्ये तल्लुबगरमा पक्की पुल निर्माण कार्य शुरु भइसकेको छ भने बाँकी २ ठाउँको पुल निर्माण कार्य केही महिनामा शुरु हुने निर्माण कम्पनीका इन्जिनियर प्रदीप शर्माले बताए ।
दिवाकर अधिकारी/मध्यान्ह
काठमाडौं : महोत्तरीको मटिहानीस्थित जरलहवाहत्तामा आगलागी हुँदा १२५ घर जलेर नष्ट भएको छ । प्रहरीका अनुसार आगलागीबाट थप १५० बढी घरमा क्षति पुगेको छ ।
प्रहरीका अनुसार हावा चलेको बेला आगलागी हुँदा नियन्त्रण बाहिर गएको थियो । जलेका अधिकांश घर काठले बनेका र जस्तापाताको छानो भएका थिए । यसकारणले पनि आगो नियन्त्रणमा आउन समय लागेको बताइन्छ ।
प्रहरीका अनुसार जरलहवाहत्तामा भएको आगलागीबाट १५ करोड भन्दा बढीको क्षति भएको प्रारम्भिक अनुमान छ ।
आगलागीबाट आवासबीहिन भएकाहरु बिचल्लीमा परेका छन् । धनमाल नष्ट भएका व्यक्ति अति गरिब र विपन्न परिवार हुन् । उनीहरुका लागि खाने र बस्ने दुवै समस्या भएको छ ।
आगो निभाउन महोत्तरीका ६, धनुषाका तीन तथा सीमावर्ती भारतबाट एउटा दमकल ल्याइएको थियो । आगो निभाउन नेपाल प्रहरी, सशस्त्र प्रहरी, नेपाली सेना र स्थानीयवासी खटिएका थिए । प्रहरीका अनुसार आगलागी नियन्त्रणमा आएको छ ।
दिउँसो एक बजेको समयमा लागेको आगो साँझ ६ बजेपछि नियन्त्रणमा आएको थियो । आगलागी नियन्त्रणमा आएसँगै सरकारी निकाय र स्थानीयहरु प्रभावितको व्यवस्थापनमा लागेका छन् ।
आगलागी नियन्त्रणका लागि समेत दमकल लगायतका उपकरण र जनशक्तिको अभाव महसुस भएको मटिहानी वडानम्बर ६ का वडा अध्यक्ष कलिम अंसारी बताउँछन् ।
‘तर, दक्ष जनशक्ति हामीकहाँ थिएन । दमकल पनि टाढाबाट ल्याउनुपर्यो । ठूलो क्षेति भइसकेपछि आगो नियन्त्रणमा लियौं । अझ ठूलो क्षेति हुनबाट रोक्यौं’ उनी भन्छन्, ‘स्थानीय सरकार र सुरक्षा निकायले सक्दो गरेका छन् ।’
राहत लगायतका विषयमा प्रदेश सरकारबाट आश्वासन आएको तर, ठोस केही नभइसकेको उनले बताए । संघीय सरकारसँग कुनै समन्वय आफूहरुको नरहेको पनि उनले दुःखेसो गरे ।
‘प्रदेशका एक जना मन्त्रीले आश्वासन दिनुभएको छ । प्रदेशबाट केही खबर आएको छैन । दुःखमा प्रदेश सरकार र संघ सरकारले सम्झिएला भन्ने अपेक्षा छ ।’
मटिहानीमा तत्काल आवास र खानपासको समस्या भएको उनले बताए । केही खाने कुरा नजिकका टोलबाट आएका छन् । तर, कतिले पाउँछन पाउँदैनन् त्यो भन्न सकिँदेन ।’
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार गर्मी याम लागेसँगै देशका बिभिन्न क्षेत्रमा आगलागिका घटनाहरु बढेका छन् । गत चैत र चलू वैशाख महिनामा गुल्मी, पाल्पा, अर्घाखाँची, रोल्पालगायत जिल्लाका विभिन्न ठाउँमा डढेलो र आगलागीका घटना भएका छन् ।
आगलागी भएका क्षेत्रमा स्थानीय सरकारले उपस्थिति जनाएको छ । तर, स्थानीय सरकारसँग विपदका बेला त्यसलाई नियन्त्रणमा लिनसक्ने दक्ष जनशक्ति र स्रोतसाधन नभएको स्थानीय सरकारको गूनासो रहँदै आएको छ ।
सरकारी तथ्याङ्क अनुसार ७५३ स्थानीय तहमध्ये ६३१ वटासँग दमकल समेत छैन । यस्तो अवस्थामा प्रदेश र संघीय सरकारले सक्रियता देखाउनुपर्ने हुन्छ । तर, नागरिकको दुखःमा प्रदेश र संघ सरकार बेखबर रहेको आगलागी र डढेलो प्रभावितहरुको दुःखेसो छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार पछिल्लो तीन महिनामा भएका आगलागीमा परेर १५ जनाको मृत्यु भएको तथ्याङ्क छ । तर, यसबीचमा बसेको संघीय मन्त्रिपरिषद् बैठकमा यो विषयमाथि छलफल भएको छैन ।
मुकुन्द लामिछाने/मध्यान्ह
काठमाडौं : नेपालले कतारबाट पोखरा र लुम्बिनी हवाइ उडानको प्रस्ताव गरेको छ । कतारी राजा शेख तमिम बिन हमाद अल थानीसँगको द्विपक्षीय वार्ताका क्रममा प्रधानमन्त्री पुष्पकमल दाहाल प्रचण्डले औपचारिक रुपमै प्रस्ताव राखेका हुन् ।
साढे तीन लाख भन्दा बढी नेपाली श्रमिक कतारमा छन् । यसका अलावा नेपालमा कतारी पर्यटक आवागमन लगायतका आधारमा नेपालले कतारबाट पोखरा र लुम्बिनीमा नियमित हवाइ उडान गर्न सकिने नेपालको प्रस्ताव छ । तर, यसमा औपचारिक सम्झौता भने भएको छैन ।
बरु थानीको नेपाल भ्रमणका क्रममा बिभिन्न दुई वटा सम्झौता र आठ बुँदे समझदारी भएको छ । दुई देशबीचका महान्यायाधिवक्ता कार्यालयसम्बन्धी, कूटनीतिक तालिम र अध्ययन, कतार चेम्बर अफ कमर्श र नेपाल उद्योग वाणिज्य महासंघबीच दुईटा सम्झौता भएका हुन् । नेपाल र कतारबीच कला संस्कृति, शिक्षा, सञ्चार, युवा तथा खेलकुद, कानुनी सहायता र उद्योग वाणिज्य क्षेत्रमा सहकार्य गर्ने सम्बन्धी समझदारी पनि भएको छ ।
नेपाल र कतारका सरकारी समाचार एजेन्सीबीच समाचार आदानप्रदान सम्झौता तथा कला र संस्कृतिका क्षेत्रमा सहकार्य, शिक्षाका क्षेत्रमा सहयोग आदानप्रदानसम्बन्धी समझदारी पत्रमा हस्ताक्षर भएको हो ।
प्रधानमन्त्री प्रचण्ड र कतारी राजा थानीसहितको प्रतिनिधिमण्डलबीच भएको वार्तापछि सहमतिमा हस्ताक्षर भएको हो ।
सरकारीस्तरमा भएका समझदारी पत्रमा नेपालका तर्फबाट कानुन, न्याय तथा संसदीय मामिला मन्त्री पदम गिरी र कतारका तर्फबाट विदेश राज्यमन्त्री सुल्तान विन साद अल मुराइखीले हस्ताक्षर गरेका न् । निजी क्षेत्रका तर्फबाट नेपाल उद्योग वाणिज्य महासंघका अध्यक्ष चन्द्रप्रसाद ढकाल र कतार चेम्बरका तर्फबाट शेख खालिफ विन जसिम अल थानीले हस्ताक्षर गरेका छन् ।
कतारी राजा थानी बुधबार नै स्वदेश प्रस्थान गरेका छन् । परराष्ट्र मन्त्रालयका अनुसार थानीले नेपालमा २२ घण्टा बिताए ।
मध्यपूर्व एसियाबाट नेपालमा पहिलो पटक यो उच्चस्तरको भ्रमण भएको हो । भ्रमणलाई नेपालले पनि उच्च प्राथमिकतामा राखेको थियो । सरकारले थानीको भ्रमणका अवसरमा वैशाख ११ गते सार्वजनिक बिदा दिएको थियो ।
थानीलाई त्रिभुवन विमानस्थलमा स्वागत गर्न राष्ट्रपति रामचन्द्र पौडेल आफैँ पुगेका थिए । त्रिभुवन विमानस्थलबाट सिधै राष्ट्रपति भवन शीतल निवास पुगेका थानीसँग मंगलबार नै रामचन्द्र पौडेलको दुई पक्षीय वार्ता भएको थियो ।
त्यसपछि होटल सोल्टीमा थानीले रात्री भोजको आयोजना गरेका थिए । होटलमै नेपालस्थित कतारी दूतावासका प्रतिनिधिहरुसँग थानीले भेटघाट गरेका थिए । बुधबार सोही होटलमा प्रधानमन्त्री प्रचण्ड र थानीबिच वान टु वान वार्ता भएको थियो । त्यसपछि नेपाल र कतारका प्रतिनिधिमण्डलबिचमा दुई पक्षको बिचमा छलफल भई आठ बुँदे सम्झौता पत्रमा हस्ताक्षर भएको हो ।
हस्ताक्षरपछि प्रधानमन्त्री प्रचण्डले द्वारिका होटलमा आयोजना गरेको दिवाभोजमा सहभागी भएका थानी त्यहाँबाट सिधै त्रिभुवन विमानस्थल पुगे । कतारी राजा थानीलाई बिदाइ गर्न राष्ट्रपति रामचन्द्र पौडेल र प्रधानमन्त्री प्रचण्ड लगायतका नेपालका अधिकारीहरु त्रिभुवन विमानस्थलमा पुगेका थिए ।
शिव विक/मध्यान्ह
काठमाडौं : बागमती प्रदेशका सरकारी कार्यालयले तीन भाषामा सूचनापाटी राख्नुपर्ने भएको छ । हाल सरकारी कार्यालयलहरुले तीन/तीन महिनामा सूचना पार्टीमा कार्यालयका गतिविधिबारे जानकारी राख्नुपर्ने व्यवस्था छ । यो व्यवस्था अनुसार सूचना नेपाली भाषामा राख्ने गरिएको छ ।
तर, बुधबार बसेको बागमती प्रदेश मन्त्रिपरिषद्को बैठकले नेपाली भाषा, तामाङ भाषा र नेपाल भाषामा सरकारी कार्यालयले सूचना दिनुपर्ने निर्णय गरेको हो । साथै, कार्यालयका बोर्डमा समेत तनि वटै भाषामा लेखिनुपर्ने निर्णय गरेको छ ।
संघीयता अनुसारको पहिचान भेटिने नाम राख्न नसकेको भनी कतिपयले आलोचना गरिरहेका बेला बागमती प्रदेश सरकारले सरकारी कार्यालयको बोर्ड र सूचना पार्टीमा राखिने सूचना तामाङ र नेपाल भाषामा समेत हुनुपर्ने बाध्यकारी व्यवस्था गरेको हो ।
बागमती प्रदेश सरकारका प्रवक्ता एवं आन्तरिक मामिला तथा कानुनमन्त्री गंगानारायण श्रेष्ठका अनुसार प्रदेशको मन्त्रिपरिषद् बैठकले यही वैशाख २४ गते सरकारी कामकाजको भाषा शुभारम्भ गर्ने निर्णय पनि गरेको छ । त्यसदिन बागमती सरकारले सार्वजनिक बिदा दिने निर्णय गरेको छ ।
सरकारका प्रवक्ता श्रेष्ठका अनुसार प्रदेश सरकारी कामकाजी भाषा ऐन २०८० कार्यान्वयन भएको अवसरमा सार्वजनिक बिदा दिने निर्णय गरेको भएको हो । प्रदेशवासीमा संस्कृति र पहिचानको अपनत्व महसुस गराउन ऐन कार्यान्वयन हुने दिनमा बिदा दिइएको श्रेष्ठले जानकारी दिए ।
२७ पुस २०७६ मा प्रदेशको नाम बागमती घोषणा भएको थियो । त्यसबेला प्रदेशसभामा भएको मतदानमा ११० सदस्यीय प्रदेशका १०८ सदस्यले पक्षमा मत दिएका थिए । कतिपयले बागमती प्रदेशको नामाकारण नेवा–ताम्सालिङ हुनुपर्ने मत समेत राखेका थिए । माओवादी केन्द्रले संविधान निर्माणको समयमा यही नामको पक्षमा वकालत गरेको थियो । तर, चुनाव पछिको प्रदेश सभाका बहुमत सदस्यहरु बागमती नाममा सहमत भएका थिए ।
नेवा–ताम्सालिङ नाम राख्नुपर्ने प्रस्ताव प्रदेश सभामा पुग्न सकेको थिएन । पहिचानको पक्षधरहरुको माग र चाहना समेतलाई सम्बोधन गर्ने गरी प्रदेश सरकारले प्रदेश सरकारी कामकाजी भाषा ऐन २०८० ल्याएको थियो । त्यसलाई कार्यान्वयन गर्ने क्रममा बागमती प्रदेश सरकारले सरकारी कार्यालयको बोर्ड र सूचना पार्टीमा लेखिने सूचना तामाङ र नेपाल भाषामा समेत हुनुपर्ने बाध्यकारी व्यवस्था गरेको हो ।
बागमती प्रदेश सरकारका प्रवक्ता श्रेष्ठ प्रदेश सरकारको निर्णय र ऐन कार्यान्वयनसँगै सरकारी कामकाजको भाषामा नेपाल भाषा र तामाङ भाषा प्रयोगमा देखिने बताउँछन् । उनी भन्छन्, ‘मन्त्रिपरिषदको निर्णय र प्रदेश सरकारी कामकाजी भाषा ऐन २०८० कार्यान्वयनमा आएसँगै सरकारी कामकाजको भाषामा नेपाल भाषा र तामाङ भाषा समेत प्रयोगमा देखिन्छ ।’
काठमाडौं : ललितपुर महानगरपालिकाले पाठेघरको मुखको क्यान्सरको प्रारम्भिक परीक्षण (स्क्रिनिव) सेवा शुरु गरेको छ । गत वर्षदेखि नै आफ्नै साधन स्रोत परिचालन गरी ३० देखि ६० वर्ष उमेर समूहका १३०० महिलाहरुको एचभीपी डिएनए विधिबाट ८ वटा वडाहरुमा प्रारम्भिक परीक्षण तथा उपचारको पहल गर्दै आएको ललितपुर महानगरपालिकाले आर्थिक वर्ष २०८०/२०८१ मा थप २९ वटै वडाहरुमा यो सेवा प्रदान गर्न शुरु गरेको हो ।
जनचेतना र स्क्रिनिवका साथसाथै उपचार गर्नुपर्ने अवस्थाका महिलाहरुलाई नेपाल क्यान्सर केयर फाउण्डेशनको प्राविधिक सहयोगमा महानगरपालिकाले निःशुल्क उपचार सेवा समेत प्रदान गर्ने भएको छ । पाठेघरको मुखको क्यान्सरको प्रारम्भिक परीक्षण तथा उपचार सबैको पहुँचमा पुर्याइ जनचेतना बढाउने उद्देश्यले यो योजनाको शुरुवात गरिएको ललितपुर महानगरपालिकाका प्रवक्ता राजु महर्जनले बताए ।
ललितपुर महानगरपालिकामा गरिने पाठेघर मुखको क्यान्सरको प्रारम्भिक परीक्षण एचपीभी डिएनए प्रविधिबाट हुनेछ । नेपाल क्यान्सर केयर फाउण्डेशनका निर्देशक तथा क्यान्सर रोग विशेषज्ञ डा.सरिता घिमिरेका अनुसार पाठेघरको मुखको क्यान्सरको प्रारम्भिक परीक्षण (स्क्रिनिव) गर्नका लागि संसार भरिमै हाल उपलब्ध विभिन्न विधिहरु जस्तै प्याप स्मियर, भिआइए भन्दा एचपिभी डिएनए विधि सबैभन्दा प्रभावकारी विधि हो । नेपाल क्यान्सर केयर फाउण्डेशनको आकँडा अनुसार महिलाहरुमा हुने क्यान्सरमध्ये स्तन र पाठेघरको क्यान्सर सबैभन्दा बढी मात्रामा देखिएको र पाठेघरको क्यान्सरबाट पूर्ण रुपले बच्न सकिने तथा स्तन क्यान्सरको प्रारम्भिक चरणमै थाहा पाउन सकिने भएको हुनाले यी जाँचहरु नियमित रुपमा गर्नुपर्ने आवश्यकता रहेको डा.घिमिरेले बताए ।
सन् २०३० सम्म ३० वर्षमाथिका महिलाहरुमध्ये ९० प्रतिशतको पाठेघरको मुखको क्यान्सरको ‘स्क्रिनिव’ गर्ने दिगो विकाश लक्ष्य प्राप्तिका लागि र विश्व स्वास्थ्य संगठनको सिफारिस अनुसार नेपाल सरकारले आ.व २०८०/२०८१ मा कोशी, मधेश, बागमती र लुम्बिनीका ८ वटा जिल्लाका १४ स्थानीय तहबाट एचपीभी डिएनए विधिबाट पाठेघरको मुखको क्यान्सर स्क्रिनिव सेवा पाइलट प्राजेक्टको रुपमा शुरुवात गरिसकेको छ । नेपाल सरकारले आगामी आर्थिक वर्षमा सातै प्रदेशमा यो सेवा विस्तार गर्ने योजना बनाएको छ ।
यद्यपी, एसपीभी डिएनए विधिबाट पाठेघरको मुखको क्यान्सरको स्क्रिनिव सेवा लागू नभएका स्थानीय तहहरुमा भिआइए विधिबाट नै नियमित रुपमा पाठेघरको मुखको क्यान्सरको स्क्रिनिव गरिने जनाएको छ । सरकारले यसै वर्षको अन्त्यसम्ममा ४५ हजार भन्दा बढी महिलाहरुको एचपीभी डिएनए विधिबाट स्क्रिनिव गर्ने लक्ष्य लिएको छ भने आगामी वर्षमा स्क्रिनिव सेवालाई बढाउँदै लैजाने योजना बनाएको स्वास्थ्य तथा जनसंख्या मन्त्रालय, स्वास्थ्य सेवा विभाग, परिवार कल्याण महाशाखाका प्रमुख डा. विवेक कुमार लालले बताए ।
लालबाबु बानिया/मध्यान्ह
पर्सा : पर्साको धोबिनी गाउँपालिका वडा नं ३ हरिहरपुरमा बुधबार आगलगी हुँदा पाँच वटा फुसको घर जलेर नष्ट भएको छ । स्थानीय योगेन्द्र साह कानुको घरबाट सल्केको आगोले उनको सहित पाँच घर जलेर नष्ट भएको हो ।
आगलागीबाट लक्ष्मी साह कानु, भरत साह कानु, हरिन्द्र साह कानु र सेठ साह कानुको घर पनि जलेर नष्ट भएको इलाका प्रहरी कार्यालय लंगडीका प्रहरी नायब निरीक्षक तोजेन्द्र बिसीले जानकारी दिए ।
आगलागीबाट स्थानीय सेठ साह बेहोस भएको र उनको उपचार भइरहेको प्रहरीले जनाएको छ । आगलगीबाट घरमा रहेका फर्निचर, अन्नबाली, लत्ताकपडा, गरगहना तथा घरमा राखिएको सखुवाका काठ जलेर नष्ट हुँदा करिब १५ लाख रुपैयाँ बराबरको क्षति भएको प्रहरीले जनाएको छ ।
हवाहुरीका कारण आगलागी नियन्त्रणमा लिन समस्या भएको थियो । स्थानीय, नेपाल प्रहरी, सशस्त्र प्रहरी र पोखरिया नगपालिकबाट आएको वारुणयन्त्रको सहयोगमा आगो नियन्त्रणमा लिइएको थियो ।
रुपन्देही : रुपन्देहीमा डढेलो निभाउन गएको दमकल नै डढेलोमा परी जलेको छ ।
रुपन्देहीको तिलोत्तमा नगरपालिकाको दमकल आगो निभाउने क्रममा जलेर क्षतिग्रस्त भएको हो । नगरपालिकाको लु १ ग ३४९ नम्बरको दमकलमा आगलागी भएको हो ।
आगलागीबाट दमकलको इन्जिनसहितका भाग जलेको प्रहरीले जनाएको छ। घटनामा मानवीय क्षति भने नभएको प्रहरीले जनाएको छ ।
महोत्तरी : महोत्तरीको मटिहानी नगरपालिका-६ मा भीषण आगलागी भएको छ ।
मटिहानी नगरपालिका-६ स्थित जर्लाहावा गाछी टोलमा बुधबार बिहान ११ बजेदेखि लागेको आगो अझै पूर्णरुपमा निण्न्त्रणमा आएको छैन ।
गाउँको करिब १ सय घरमा आगो सल्किएको र अहिले पनि झन्डै ५० घरमा आगलागी भइरहेको बताइएको छ ।
आगलागी नियन्त्रणमा लिनका लागि मटिहानी नगरपालिका, जलेश्वर नगरपालिका, रामगोपालपुर नगरपालिका, प्रदेश प्रहरी कार्यालय जनकपुरको वारुणयन्त्रसँगै नेपाली सेना, नेपाल प्रहरी, सशस्त्र प्रहरी, मटिहानी नगरपालिकाका कर्मचारीलगायतले प्रयास गरिरहेको मटिहानी नगरपालिकाका मेयर हरिप्रसाद मण्डलले बताए ।
आगलागीबाट ५१ वटा घर पुर्ण रुपमा जलेको जिल्ला प्रहरी कार्यालय महोत्तरीका प्रमुख एसपी नकुल पोखरेलले बताए । अन्य घरमा समेत आंशिक क्षति भएको उनको भनाइ छ ।
दिलमाया शाही/मध्यान्ह
जुम्ला : बालयौन दुर्व्यवहारको आरोप लागेका नेकपा एमाले जुम्लाका उपाध्यक्ष सुरतबहादुर शाही प्रहरीमा हाजिर भएका छन् । शाहीले पटक–पटक यौन दुर्व्यवहार गरेको आरोप लगाउँदै १७ वर्षीया एक बालिकाले उजुरी दिएकी थिइन् । प्रहरीमा उजुरी परेपछि शाहीविरुद्ध गत आसोज २४ गते जिल्ला अदालत जुम्लाले पक्राउ पुर्जी जारी गरेको थियो ।
पक्राउ पुर्जी जारी भएपछि फरार रहेका शाही एक साताअघि नै जुम्ला आएर लुकीछिपी बसेको बुझिएको छ । आगामी वैशाख १५ र १६ गते हुन लागेको ऐमालेको जिल्ला अधिवेशनका लागि शाही जुम्ला आएको बताइएको छ । जिल्ला प्रहरी कार्यालय जुम्लाका डीएसपी छेदीलाल कामतीका अनुसार शही आफैं प्रहरीमा हाजिर हुन आएका हुन् । उनले भने, ‘हामी खोज्दै थियौँ, उनी प्रहरीको कार्यालयमा आफैं हाजिर गर्न भन्दै आएका हुन् ।' उनका अनुसार शाहीलाई अहिले हिरासतमा राखेर अनुसन्धान कार्य अगाडि बढाइएको छ ।
शाहीले तातोपानीकी एक आफन्त भतिजी नाता पर्ने किशोरीलाई यौन क्रियाकलापका लागि प्रस्ताव गरेको, फकाएको र प्रलोभनमा पार्ने गरी फोन गरेको अडियो सार्वजनिक भएको थियो ।
पीडित किशोरीका बुबाले बालबालिकासम्बन्धी ऐन २०७५ को दफा ६६ बमोजिम जिल्ला प्रहरी कार्यालय जुम्लामा जाहेरी दर्ता गराएका थिए । शाहीले किशोरीलाई प्रवेश परीक्षामा नाम निकालिदिने, पढाइदिने, ट्युसन खर्च आफैं व्यहोर्ने र बदलामा संवेदनशील अंगको फोटो पठाउनुपर्ने र यौनसम्बन्ध राख्न दिनुपर्ने प्रस्ताव गरेको अडियो रेकर्ड सार्वजनिक भएको थियो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies