बाँके : नेपालगन्ज उपमहानगरपालिका वडा नं. ५ फुलटेक्रास्थित ब्रिनोज कान स्वास्थ्य सामुदायिक सेवाको १४ औं वार्षिक साधारण सभा सम्पन्न भएको छ ।
संस्थाका सचिव प्रदीप शाहद्वारा सञ्चालित कार्यक्रममा ब्रिनोज कान स्वास्थ्य सामुदायिक सेवाका अध्यक्ष बिमल कुमार टण्डनको अध्यक्षता, नेपालगन्ज उपमहानगरपालिकाका नगर प्रमुख प्रशान्त बिष्टको प्रमुख आतिथ्यमा सम्पन्न भएको हो ।
कार्यक्रममा प्रमुख अतिथि बिष्टले १४ औं वार्षिकोत्सव र नयाँ वर्ष २०८१ सालको सबैलाई शुभकामना दिँदै हस्पिटललाई उपमहानगरपालिकाबाट सहयोग गर्ने प्रतिबद्धता जनाए ।
साथै यस हस्पिटलको गुणस्तरीय सेवाले नेपाल र भारतमा नेपालगन्जको पहिचान बढेको भन्दै अझै गुणस्तरीय सेवा दिन आग्रह गरे ।
कार्यक्रममा भेरी अस्पताल नेपालगञ्जका अध्यक्ष वीरेन्द्रबहादुर शाह, गैरसरकारी संस्था महासंघ नेपाल बाँकेका अध्यक्ष चन्द्र प्रकाश तिमिल्सिना लगायतले शुभकामना मन्तव्य राखेका थिए ।
कार्यक्रममा ब्रिनोज कान स्वास्थ्य सामुदायिक सेवा कार्यसमितिका सदस्य अभिनाष चौधरीले स्वागत मन्तव्य राखेका थिए । ब्रिनोज कान स्वास्थ्य सामुदायिक सेवाका प्रबन्धक चेत नारायण चौधरीले नेपाल सरकारमा वि.सं.२०६६ सालमा दर्ता भएकोे पहिलो संस्था ब्रिनोज कान स्वास्थ्य सामुदायिक सेवा रहेको भन्दै यस हस्पिटलमा २६ जना कर्मचारी कार्यरत रहेको जानकारी गराए । कार्यक्रममा यस क्षेत्रमा आजको समयमा सबैभन्दा बढी ९९ औं पटक रक्तदान गर्नु हुने सञ्चारकर्मी तथा नेपाल स्वयंसेवी रक्तदाता समाज बाँकेका सल्लाहकार पवन जायसवाललाई प्रमुख अतिथि प्रशान्त बिष्ट, हस्पिटलका अध्यक्ष बिमल कुमार टण्डन, बिशिष्ट अतिथि चन्द्र प्रकाश तिमिल्सिनाले खादा ओढाएर सम्मान गरेका थिए ।
प्रबन्धक चौधरीले गत आर्थिक वर्ष २०७९/०८० को प्रगति प्रतिवेदन बिरामी दर्ता ३२०२८ जना जसमध्ये ९ हजार ९ सय १८ जनाको कान पाक्ने रोग भेटिएका थिए । ७ सय ७४ जनाको कानको अप्रेशन, ४ हजार २ सय ६८ जनाले प्याथालोजी सेवाबाट लाभान्वित भएका थिए । २०६६/०६७ देखि आ.व.२०७९/०८० सम्म २,४८९८२ जना कानका बिरामीहरु लाभान्वित भएको बताएका छन् ।
यस संस्थाले कान सम्बन्धी सबै रोगको परीक्षण र औषधि उपचार वाक्स,फारेन बोदि रिमुभ अप्रेशनहरुमा एम.प्लाष्टि, टि.प्लाष्टि, एम.आर.एम, आर.एम.,तथा कानको सुनाईको जाँच, कान सुन्ने मेसिनहरुको जडान जस्ता सम्पूर्ण सेवाहरु, बिरामीहरुलाई अझ व्यवस्थित र सहुलियत दरमा सेवा प्रदान गर्नको लागि आफ्नै प्याथोलोजिक सेवा सञ्चालनमा रहेको छ ।
बिरामीहरुलाई थप गुणस्तरीय कान उपचार सेवा दिन र बिरामीहरुको सुरक्षालाई ध्यानमा राखी प्याथोलोजी विभागमा थप परिक्षणहरु समेत शुरु गरिएको छ । बिरामीहरुलाई सहुलियत दरमा गुणस्तरीय र भरपर्दो औषधि उपलब्ध गराउन संस्थाले औषधि पसल सञ्चालन गरेको छ ।
पवन जायसवाल/मध्यान्ह
बाँके : बाँकेको साहू समाज समिति जिल्ला कार्य समिति र साहू समाज युवा समिति नेपालगन्जद्वारा वैशाख ५ गते बुद्धवार श्रीराम नवमी (श्रीराम जन्मोत्सव) को उपलक्ष्यमा प्रसाद बितरण कार्यक्रम सम्पन्न भएको छ ।
नेपालगन्ज उप–महानगरपालिका वडा नंं ५ स्थित साहू समाज समितिद्वारा निर्मित श्रीराधा कृष्ण मन्दिर एवं धर्मशालामा रहेको साहू समाज समिति जिल्ला कार्य समिति र साहु समाज युवा समितिको संयुक्त आयोजनामा नेपालगञ्जको मुख्य चौकको रुपमा रहेको त्रिभुवन चौकमा श्रीराम नवमी (श्रीराम जन्मोत्सव) को उपलक्ष्यमा नेपालगञ्को प्रसिद्ध मन्दिर माता बागेश्वरीको दर्शन गर्न र राम नवमी मेला हेर्न आउने नेपाल र भारतको विभिन्न स्थानबाट आउने दर्शकहरुका लागी प्रसाद बितरण गरिएको थियो ।
उक्त कार्यक्रममा साहू समाज जिल्ला कार्य समितिका अध्यक्ष हंशराम साहू, युवा समितिका अध्यक्ष राम किसुन साहू , समाजका सचिव बाबुराम साहू , हरिष गुप्ता (साहु), राम नरेश तेली, प्रहलाद साहू (पे्रमलाल), मोतीलाल साहु, बृजलाल साहु, सह सचिव प्रदीप शाह, कानूनी सल्लाहकार रामनाथ साहू, पिन्टू साहू, दिनेश साहू, राजकुमार साहू, कन्धईलाल साहू, नीरज कुमार साहू, रामसनेही साहरु, राम नरेश साहू, मूलचन्द साहू, शिव प्रसाद साहू, बिक्रम कुमार साहू, राजु साहू सन्तोष साहू लगायतको सक्रियता प्रसाद बितरण कार्यक्रम सम्पन्न भएको छ ।
यसरी रानीतलाव नजीक रहेको मन्दिर, त्रिवेणी चौक स्थित मन्दिर, लगायत विभिन्न ठाउँमा दर्शकहरुका लागी प्रसाद बितरण कार्यक्रम गरिएको छ ।
ओबराज शाही/मध्यान्ह
हुम्ला : हुम्लाको सिमकोट गाउँपालिकाले कार्यालय सहयोगीहरु धेरै भएको भन्दै हटाउने निर्णय गरेको छ । सिमकोट गाउँपालिका भरी ३२ जना कार्यालय सहयोगीहरु छन् । त्यसमध्ये २४ जना करारका र ८ जना स्थायी दरबन्दी कार्यालय सहयोगी छन् ।
ठूलो संख्यामा गाउँपालिकाले कार्यालय सहयोगी भर्ना गरेको हुँदा जेठ महिनासम्म सबै करार कार्यालय सहयोगी हटाउने र न्यून संख्यामा कार्यालय सहयोगी राख्ने निर्णय गरिएको गाउँपालिका प्रमुख प्रशासकीय अधिकृत सुवास आलेले जानकारी दिए ।
यसले गर्दा आर्थिक भार गाउँपालिकाले भोग्दै आएको र काम भन्दा बढी कार्यालय सहयोगी भएकाले हटाउन खोजिएको प्रमुख प्रशासकीय अधिकृत आलेको भनाइ छ । गाउँपालिकामा भएका करार कार्यालय सहयोगीलाई यसभन्दा अगाडिका वर्ष प्रति महिना २२ हजार पाँच सय रुपैयाँ तलब दिँदै आएको भएपनि आफू यस गाउँपालिकामा आएदेखि ५ हजार घटाएर १७ हजार पाँच सय रुपैयाँ प्रतिमहिना दिँदै आएको आलेले बताए ।
२४ जना करार कार्यालय सहयोगीलाई यसभन्दा अगाडिका वर्षमा प्रति महिना ५ लाख ४० हजार गाउँपालिकाबाट भुक्तानी हुन्थ्यो, तर अहिले ४ लाख २० हजार भुक्तानी हुन्छ । घटाएर दिँदा १ लाख २० हजार बच्ने हुँदा त्यो रकम गाउँपालिकाको काममा खर्च गरिने उनले बताए । घटाएर तलब दिँदा पनि आर्थिक भार हुने र अनावश्यक कर्मचारी बढी हुने हुँदा जेठ महिनासम्म करारका कार्यालय सहयोगीहरु मात्र राख्ने र त्यसपछि हटाउने निर्णय गरिएको गाउँपालिकाले जनाएको छ ।
काठमाडौं : मध्यान्ह राष्ट्रिय दैनिकका सम्पादक मदनकुमार श्रेष्ठले आफ्नो जन्मदिन वृक्षारोपण गरेर मनाएका छन् । आफ्नो जन्मदिनका अवसरमा सामाजिक कार्य गर्दै आएका सम्पादक श्रेष्ठले यसपटक वैशाख ५ गते बुधबार तराई विकास तथा सञ्चार केन्द्र नेपाल काठमाडौंको संयोजनमा राजधानीको तीनकुनेमा एबोगाडोको बिरुवा रोपेर जन्म दिन मनाएका हुन् ।
सो अवसरमा संक्षिप्त मन्तव्य राख्दै सम्पादक श्रेष्ठले प्रकृति संरक्षणका लागि वृक्षारोपण कार्य महत्वपूर्ण रहेको बताए । सम्पादक श्रेष्ठले बढ्दो शहरीकरणले हरियाली पक्ष जोखिममा परेको अवस्थामा ‘जन्मदिनलाई सत्कर्ममा जोडौं, वृक्षारोपण गरौं’भन्ने अभियान चलाउँदै आएको तराई विकास तथा सञ्चार केन्द्र नेपाल काठमाडौंका अध्यक्ष तथा नेपाल पत्रक्रार महासंघका सचिव गोविन्द चौलागाईंलाई धन्यवाद दिँदै आभार व्यक्त गरे ।
सो अवसरमा संक्षिप्त मन्तव्य राख्दै राष्ट्रिय समाचार समितिका महाप्रबन्धक सिद्वराज राईले वन जंगल विनास हुँदै जाँदा जलवायु परिवर्तनले पर्यावरणमा गहिरो असर गरेको अवस्थामा वरिष्ठ पत्रकार मदनकुमार श्रेष्ठले जन्मदिनको अवसरमा वृक्षारोपण गरेर अनुकरणीय कार्य गरेको बताए ।
यस्तै केन्द्रका अध्यक्ष चौलागाईंले जन्मदिनको अवसरमा विभिन्न खालका भड्किला कार्यक्रम गरेर साधन र स्रोतको फजुल खर्च गर्ने बढ्दो परिवेशमा सम्पादक श्रेष्ठले वृक्षारोपण गरेर पर्यावरण संरक्षणमा योगदान दिएको बताए ।
उनले सञ्चारकर्मी तथा नागरिक अभियानमा लागि परेका व्यक्तित्वहरूले आफ्नो जन्मदिनको अवसरमा वृक्षारोपण, वृद्ववृद्वा तथा आश्रयविहीन बालबालिकाको शिक्षा दीक्षाका लागि योगदान गर्ने संस्कृतिको शुरूवात गर्नुपर्ने धारणा राखे ।
त्यस अवसरमा मध्यान्ह दैनिककी प्रकाशक सितादेवी श्रेष्ठले पनि वृक्षारोपण गरेकी थिइन् । सो अवसरमा केन्द्रका पदाधिकारीहरू उदय मास्के, एलिजा लामिछाने, पत्रकार महासंघ काठमाडौंकी पूर्व उपाध्यक्ष सीता पोख्रेल, हिमान्सु मिश्र, सुदान्सु मिश्र, मनोज थापा, मध्यान्ह दैनिकका उपसम्पादक मुकुन्द लामिछाने, अर्थ विभाग प्रमुख सागर तिमिल्सिना, वैदेशिक रोजगार विट प्रमुख रेशमराज पौडेल, उपत्यका संवाददाता लक्ष्मी खरेललगायत केन्द्रका वृक्षारोपण अभियन्ताहरुको उपस्थिति रहेको थियो ।
काठमाडौं : हाम्रो नयाँ कृषि सहकारीको रकम अपचलन प्रकरणमा पक्राउ परेर छुटेका लीलाबहादुर गुरुङ फेरि पक्राउ परेका छन् ।
केन्द्रीय अनुसन्धान ब्युरो (सीआईबी)ले रिहा गरेपनि सहकारीको रकम हिनामिना प्रकरणमा उनलाई जिल्ला प्रहरी परिसर ललितपुरले फेरि पक्राउ परेको हो ।
उनीविरुद्ध मंगलबार नै जिल्ला अदालत ललितपुरबाट ५ दिनको म्यादसमेत लिएर अनुसन्धान अघि बढाइएको जिल्ला प्रहरी परिसर ललितपुरले जनाएको छ ।
यसअघि काठमाडौंस्थित नयाँ कृषि सहकारीको रकम हिनामिना प्रकरणमा सीआईबीबाट पक्राउ परेका उनीहरुद्ध मुद्दा नचल्ने निर्णय गरिएको थियो ।
नयाँ कृषि सहकारीको उपाध्यक्ष रहेका गुरुङ उपकार सहकारीको पनि उपाध्यक्ष रहेको बताइएको छ ।
विराटनगर : विराटनगर–१५ स्थित रानी क्षेत्र दुई समूहबीच विवाद भएपछि तनावग्रस्त बनेको छ । एक समूहले निकालेको र्यालीलाई अर्को समूहले अवरोधको प्रयास गरेको थियो ।
रामनवमीको अवसरमा विश्व हिन्दु परिषद नेपाल युवा विभागले निकालेको र्यालीमा सहभागी केही युवा र मुस्लिम समुदायको युवाहरुबीच झडप भएको छ ।
दुवै पक्षका युवाहरुले एकअर्को बीच ढुंगामुढासमेत प्रहार गरेका छन् । स्थिति नियन्त्रणमा लिनका लागि प्रहरीले बल प्रयोग गरेको छ । केही राउण्ड हवाई फायर र केही सेल अश्रुग्यास पनि प्रहार गरेको जिल्ला प्रहरी कार्यालय मोरङले जनाएको छ ।
बल प्रयोग गरेपछि दुवै समूह तितरबितर भएको र अहिले अवस्था सामान्य हुँदै गएको प्रहरीले जानकारी दिएको छ ।
दिलमाया शाही/मध्यान्ह
जुम्ला : चन्दननाथ नगरपालिका वडा नं. ५ मा रहेको एशिया इन्टरनेशनल मोडेल अंग्रेजी स्कुलले आधारभूत सूचना र प्रविधि (आईटी)को अध्ययन अध्यापन गराउँदै आएको छ । यस स्कुलले एक वर्षदेखि आईटी कक्षा सञ्चालन गर्दै आएको हो ।
विद्यालयका अनुसार आईटी पढाइ हुन थालेपछि यहाँ अध्ययनरत छात्रछात्राहरु उत्साहित भएका छन् । विद्यालयका सञ्चालक मनोज बुढाथोकी मगरले युगले मागेको जीवनउपयोगी सीप र क्षमताको विकासका लागि सूचना र प्रविधिसम्बन्धीको ज्ञान धेरै आवश्यक रहेको बताए । उनले भने, ‘स्कुलका एक कक्षादेखि ८ सम्मका विद्यार्थीहरूको कम्प्युटरसम्बन्धी सीप र ज्ञान हेर्दा कुनै विकसित र सेवासुविधा सम्पन्न क्षेत्रको स्कुलभन्दा कम देखिँदैन । जुम्ला भर्खरै विकासको क्षेत्रमा बामे सर्दैछ । यसले सूचना तथा प्रविधिको क्षेत्रमा बालबालिकाहरूलाई यसरी सीप र ज्ञान दिनु भनेको समग्र समाज विकासका लागि ठूलो टेवा पुर्याउनु हो ।’
सामान्यतया दैनिक जीवनमै कम्प्युटर शिक्षाबिना मानिसहरूले यो बदलिँदो समयअनुसार चुस्त र दुरूस्त सेवा सुविधा प्राप्त गर्न नसक्ने सञ्चालक बुढाथोकीले बताए । उनका अनुसार यस्तो सामाजिक चेतना र अवस्था रहेको बेला यसरी एक निजी विद्यालयले विद्यार्थीहरुलाई निःशुल्क कम्प्युटर आईटी शिक्षा र सीप दिनुलाई सामान्य मान्न सकिँदैन ।
उनले भने, ‘संसारका विकसित मुलुकहरुले उत्कृष्ट मानव मस्तिष्कहरुमा लगानी गरिरहेका छन् भने हाम्रो समाज यस्तो प्रकारको सोच र दुनियाँबाट अझै पर छ । स्कुलले सूचना तथा प्रविधि र आविष्कारको युगअनुसार काम गर्न र आफ्ना सपनालाई साकार पार्न पहल गरिरहेको छ ।’
चन्दनाथ नगरपालिका–२ जुम्ला भण्डारीबाडा गाउँ निवासी वरिष्ठ पत्रकार कर्णबहादुर भण्डारीले एशिया स्कुल जुम्लाले निर्माण गरेको आईटी ल्याब नमुना भएको बताए । उनले भने, ‘यतिसम्म सुविधा सम्पन्न र व्यवस्था भएको स्कुल अहिलेसम्म जुम्लामा छैन ।’ उनले यो पकारको सिकाइले यहाँका बालबालिकाहरु भविश्यमा विश्व बजारसम्म प्रतिस्पर्धा गर्न सक्ने सक्षम हुने दाबी गरे । उनले भने, ‘किताबी ज्ञान मात्र सवथोक होइन । जीवनमूखी शिक्षा र विद्या आवश्यक छ । यसले प्राविधिक विषयको आवश्यकतालाई समेत क्रमशः विकास गर्दै लैजाने देखिन्छ ।’
उक्त विद्यालयमा सात सय छात्रछात्रा अध्ययनरत रहेको प्रधानाध्यापक चन्द्रबहादुर महतले बताए । उनले कम्प्युटर शिक्षासम्बन्धी व्यवहारिक सिकाइले शैक्षिक गुणस्तरमा वृद्धि गर्ने भूमिका खेलेकै कारण बालबालिकाहरुको मनोबल वढदै गएको बताए । उनले यसको प्रयोगवाट नयाँ घटना, सूचनाहरु संकलन गर्न तथा महत्वपूर्ण कामहरु छिटोछरितोरुपमा सम्पन्न गर्न सहज भएको बताए ।
कम्प्युटर शिक्षाको पढाइले कम्प्युटरसम्बन्धी धेरै कुरा सिक्ने अवसर मिलेको विद्यार्थीहरु बताउँछन् । सामान्यतः सामुदायिक विद्यालयको तुलनामा संस्थागत विद्यालयका विद्यार्थीहरु कम्प्युटर शिक्षामा अगाडि रहेको देखिन्छ । सरकारले सामुदायिक विद्यालयमा निःशुल्क कम्प्युटर शिक्षा पाठ्यक्रममा राखेपनि त्यो प्रभावकारी हुन सकेको छैन ।
अहिलेको समयमा प्रविधिमैत्री क्षमता भएको विद्यार्थी उत्पादन गर्न तल्लो तहबाट नै कम्प्युटर विषय समावेश गरिएको स्कुलले बताएको छ । स्कुलले सैद्धान्तिक र प्रयोगात्मक दुवै किसिमका कक्षा सञ्चालन गर्न स्तरीय ल्याब र दक्ष शिक्षकको प्रबन्ध गरेको छ । कम्प्युटर विषयमा सैद्धान्तिक बाहेक प्रयोगात्मक कक्षा पनि छ । त्यसले विद्यार्थीको सीप पनि विकास हुने र अध्ययनपछि कामको अवसर पनि मिल्ने स्कुलले बताएको छ ।
आधारभूत तहका कम्प्युटर सीप नसिकेका विद्यार्थीले माध्यमिक तहमा कम्प्युटर अध्ययनपछि सामान्य काम गर्न सक्ने कम्प्युटर शिक्षक बताउँछन् । विद्यार्थीले फोटोकपी गर्ने, सामान्य फोटोसपको काम गर्ने, टाइपिङ गर्ने जस्ता काम गर्न सक्छन् । आफ्नो मुख्य उद्देश्य काम गर्ने दक्ष जनशक्ति उत्पादन गर्नेभन्दा पनि उनीहरुमा आधारभूत सीप विकास गर्नु रहेको स्कुलले बताएको छ ।
कुलेन्द्र शाही/मध्यान्ह
सुर्खेत : गत बिहीबार प्रदेश अस्पताल सुर्खेतमा शल्यक्रियाको क्रममा मृत्यु भएकी दैलेख आठबिस नगरपालिका–५, पिपलकोटकी २२ वर्षीया भीमा (गुरूङ) बलामीको शव अझै पोस्टमार्टम हुन सकेको छैन । मृतकका परिवारले अस्पतालले क्षतिपूर्ति नदिएसम्म शव जिम्मा नलिने अडान लिएपछि शव प्रदेश अस्पताल कालागाउँमै थन्किएको छ ।
गर्मी मौसम भएकाले एक हप्तादेखि शव त्यसै राखिँदा दुर्गन्ध फैलन सक्ने सम्भावना बढेको छ । पाठेघर सफा गर्ने क्रममा डाक्टरहरूको लापरबाहीका कारण मृत्यु भएको भन्दै युवतीका आफन्तहरूले क्षतिपूर्तिको माग राख्दै निरन्तर आन्दोलन गरिरहेका थिए । उनीहरूले ८ महिने दुधे बालिकाको पालनपोषणका लागि उचित राहत, परिवारका सदस्यमध्ये १ जनालाई रोजगारी, घटनाको उच्चस्तरीय छानबिन समिति गठन, बालिकाको पठनपाठनको ग्यारेन्टी नभएसम्म शव पोस्टमार्टम गर्न नदिने अडान राखेका थिए ।
मागको कुनै सुनुवाइ नभएपछि आफन्तहरूले शव अस्पतालमै छोडेर घर फर्किएका छन् । ‘शान्तिपूर्ण आन्दोलन, धर्ना र पटक–पटक वार्ता गर्दा पनि अस्पताल प्रशासनले यस विषयलाई गम्भीरतापूर्वक लिएन,’ मृतक भीमाकी बुबा गोविन्दबहादुर गुरुङले भने, ‘हामीले शव नबुझेरै घर फर्कियौं, अब अस्पतालले जे गर्छ गरोस् ।’
अस्पतालले भने डाक्टरहरूका कारण मृत्यु नभएको दाबी गर्दै आएको छ । प्रदेश अस्पताललाई देशकै उत्कृष्ट भनिएपनि सेवा प्रवाहका विषयमा भने व्यापक प्रश्न उठ्दै आएको छ ।
सुर्य प्रसाद भुसाल/मध्यान्ह
अर्घाखाँची : सामुदायिक वन डढेलो नियन्त्रण सञ्जाल डोहोटे अर्घाखाँचीका अध्यक्ष रेशमराज बन्जाडे आजभोलि डढेलोबाट वन कसरी जोगाउने भनेर स्थानीय समुदायसँग छलफलमा खटिएका छन् । उनी दैनिक सामुदायिक वनका पदाधिकारी तथा वन सरोकारवालासँग जंगलमा डढेलो लाग्नै नदिने र लागिसकेपछि नियन्त्रणमा कसरी लिने भनेर छलफलमा खटिने र अन्तरक्रिया गर्ने गरेका छन् ।
उनी मात्रै होइन, सो क्षेत्रका सामुदायिक वनका अध्यक्ष, पदाधिकारी, सदस्यहरु, सव डिभिजन कार्यालय बाणगङ्गा, सव डिभिजन वन कार्यालय शितगंगा, सामुदायिक वनमा काम गर्ने संघसंस्था तथा सरोकारवाला निकायहरू अहिले डढेलो नियन्त्रणसम्बन्धी जनचेतनामूलक कार्यक्रमका साथै वन जोगाउन रातदिन खटिएका छन् । वसन्त ऋतु (चैत÷वैशाख)मा खासगरी वनजंगल जोगाउनै सकस पर्ने गरेको बाणगङ्गा सव डिभिजन कार्यालयका वन अधिकृत पन्नालाल भट्टराईले बताए ।
बाणगङ्गा सव डिभिजन अन्तर्गत धिरिखोला सामुदायिक वन उपभोक्ता समितिका पूर्वअध्यक्ष नारायण पौडेलले भने, ‘उपभोक्ताहरूले वर्षभरि दुःख गरेर जोगाएको वन डढेलोले एकैछिनमा सखाप पारिदिन्छ, त्यसैले पनि हामी उपभोक्तालाई चैत, वैशाखमा जहिल्यै पनि वन जंगल जोगाउनै चिन्ता पर्ने गरेको छ ।’
वैज्ञानिक वन व्यवस्थापन समितिका केन्द्रीय सदस्यसमेत रहेका पौडेल पनि हिजोआज डढेलोबाट वन कसरी जोगाउने भनेर समुदायमा छलफलमा व्यस्त देखिन्छन् भने वनको हेरचाहमा लागिपरेका छन् ।
गर्मीयाम शुरु भएसँगै अर्घाखाँचीको शितगंगा नगरपालिकाभित्रका १ सय १० वटा सालघारि रहेका सामुदायिक वन उपभोक्ता समितिहरुले सामुदायिक वनमा अग्निरेखा नियन्त्रण, आगलागी नियन्त्रणसम्बन्धी जनचेतना जगाउने खालका सन्देश दिने गरे पनि समाजमा रहेका केही नबुझ्ने व्यक्तिहरूले आगो लगाइदिने गरेका कारण डढेलोको प्रकोपबाट जंगल जोगाउन सकस हुने गरेको गैडे सामुदायिक वन उपभोक्ता समितिका सचिव तथा वैज्ञानिक वन व्यवस्थापन महासंघका केन्द्रीय सदस्य सीता बेल्बासेको भनाइ छ ।
डिभिजन वन कार्यालय अर्घाखाँचीका वरिष्ठ डिभिजन वन अधिकृत ईश्वरीप्रसाद पौडेलले गर्मीयाममा जंगलका विभिन्न ठाउँमा आगलागी भइ बहुमूल्य काठ, जडीबुटी तथा जीवजन्तुको बासस्थान, स–साना बोटबिरुवा वर्षेनी नोक्सान हुने गरेकाले जंगल जोगाउन वनका कर्मचारी रातदिन नभनी खटिने गरेको बताए । पौडेलले भने, ‘वनजंगलमा डढेलो लाग्न नदिनका लागि वन कार्यालय एक्लैले केही गर्न सक्दैन, त्यसका लागि सरोकारवाला निकाय सबैको सहयोग र आम उपभोक्ताले महत्वपूर्ण भूमिका निर्वाह गर्नुपर्ने हुन्छ । त्यो सहयोग अर्घाखाँचीमा हुने गरेकाले डढेलोमा कमी आएको छ ।’
केही उपभोक्ताले समयमा ध्यान नदिँदा हरियो वन वर्षेनी डढेलोका कारण मासिँदै गएको बताउँदै पौडेलले भने, ‘त्यसका लागि हामीले पनि अर्घाखाँचीका सबै सामुदायिक वनलाई सचेतनाका कार्यक्रम सञ्चालन गर्न लगाएका छौं, आफैंले पनि गरिरहेका छौं भने डढेलो नियन्त्रणका लागि सामुदायिक वनलाई चाहिने सामग्री पनि प्रदान गरेका छौं ।’
डिभिजन वन कार्यालय अर्घाखाँचीका वरिष्ठ वन अधिकृत मदन प्रसाद ढुंगाना भन्छन्, ‘गर्मीयामा बढी आगलागी भइ बहुमूल्य काठ, जडीबुटी तथा जीवजन्तुको बासस्थान, स–साना बोटबिरुवा वर्षेनी नोक्सान हुने गरेकाले त्यो जोगाउन वन कार्यालय केही सफल भएको छ ।’
सामुदायिक वन उपभोक्ता महासंघ अर्घाखाँचीका नेता लक्ष्मण पराजुलीले वन क्षेत्रमा डढेलो लाग्दा चाहिने सुरक्षा सामग्री र दक्ष तथा तालिमप्राप्त जनशक्ति नहुँदा नियन्त्रण गर्न नसकेर वर्षेनी वन मासिँदै गइरहेको बताए ।
शितगंगा सव डिभिजन कार्यालयका वरिष्ठ वन अधिकृत मरिच लामा भन्छन्, ‘घना जंगल रहेको अर्घाखाँचीको दक्षिणी खाचीमा वन क्षेत्र वर्षेनी डढेलोका कारण जोगाउन कठिन छ भने हुर्किएका बोटबिरुवा चैत/वैशाखको समयमा फैलने डढेलोले वर्षेनी मासिँदै गएका छन्, जसले गर्दा बुढा तथा पुराना रुखबाहेक नयाँ पालुवा हुर्किन कठिन हुने गरेको छ ।’
जंगलमा डढेलो लाग्दा अग्नि नियन्त्रण गर्ने दक्ष जनशक्ति अभाव रहेको बताउँदै डिभिजन वन कार्यालय अर्घाखाँचीका वरिष्ठ डिभिजन वन अधिकृत पौडेलले भने, ‘डढेलो नियन्त्रणका लागि हामीसँग छुट्टै दक्ष जनशक्ति छैन, वनरक्षक, सामुदायिक वनका पदाधिकारी र सेना तथा प्रहरीकै सहयोगमा हामीले डढेलो नियन्त्रणमा लिने प्रयास गर्दै आएका छौं ।’
डिभिजन वन कार्यालयलाई अग्नि नियन्त्रण गर्न चाहिने एक अलग्गै दमकल, सव डिभिजनका लागि पानी बोक्ने ट्यांकर नहुँदा पनि जंगलमा सल्किएको डढेलो नियन्त्रणमा लिन गाह्रो भइरहेको डिडिजन वन कार्यालयका सूचना अधिकारी यादव सापकोटाले बताए । डढेलो नियन्त्रणका लागि चाहिने पर्याप्त आवश्यक सामग्री हुनुका साथै डढेलोका लागि मात्रै छुट्टै मोबाइल टोली बनाउन सकिए जंगल जोगिन सक्ने सूचना अधिकारी सापकोटा बताउँछन् ।
अर्घाखाँची जिल्लामा सन्धिखर्क नगरपालिकासँग मात्रै एउटा दम्कल छ । सोही दम्कल जिल्लाभर प्रयोग हुने गरेको छ ।
काठमाडौं- आन्तरिक राजस्व कार्यालय त्रिपुरेश्वरले विभिन्न ३० वटा कम्पनीलाई पत्र पठाएको छ । कार्यालयले कम्पनीहरूले कर निर्धारण नहुनु पर्ने कारणसहित जवाफ पेश गर्न निर्देशन दिएको हो । मंगलबार विभिन्न ३० वटा कम्पनीलाई पत्र पठाउँदै कर निर्धारण हुनु नपर्ने ठोस प्रमाण तथा कागजात पेस गर्न १५ दिनको समय दिइएको छ ।
कार्यालयले आयकर ऐन, २०५८ को दफा १०१ को उपदफा ४ मा तथा मूल्य अभिबृद्धि कर ऐन, २०५२ को दफा २० को उपदफा ४ क बमोजिम पशुपति ट्रेड कन्सर्न, एन्टिक इन्जिनियरिङ्ग एण्ड कन्स्ट्रक्सन, जैन ईन्टरप्राईजेज, कृष्ण सर्जिकल सप्लायर्स, जय सचिदानन्द अटो पार्टस, आकाश ट्रेड कन्सर्न, कर्पोरेटिभा मुराटोरी एण्ड सिमनटिष्ट, चैतन्य ब्युटी, पावर प्याक रिपेयरीङ्ग सेन्टर, प्रभात श्री इन्टरनेशनल, मेराज रेडिमेड कपड़ा पसल पिक ट्रेडिङ, अभयकान्ति ईन्टरप्राईजेजलाई ठोस प्रमाण पठाउन निर्देशन दिएको हो ।
यस्तै, खाँडदेवी इन्टरप्राइजेज, सूर्या सप्लायर्स, विज थी सिक्स्टी वान, ऊझ साई मेशिनरी सप्लायर्स, सनसाइन टेडर्सरऋषभ जोगाई, बेल स्टोन हाईटेक नेपाल, सिने डे सेफ कम्पनी, काठमाण्डौ स्क्रेप सप्लायर्स, सगुन सुमित्र इन्टरप्राईजेज, श्री जय दुर्गा ट्रेडर्स, काभ्रे ट्रेड एण्ड जनरल सप्लायर्स, मरु विनायक इन्टरप्राइजेज, डि सि डेस्कोट फेशन स्टोर्स, ओम गोरख मेशिनरी ट्रेडर्स, प्रिन्ट प्वाइन्ट पब्लिसिङ्ग, एभरेष्ट इन्टरनेशनलरशुदर्शन कुमार चुडिवाला, क्वालिटेक स्क्यान एण्ड प्रि–प्रेस लाई निर्देशन दिएको हो ।
‘जालसाजीले गर्दा कुनै व्यक्तिको कर निर्धारण गलत ढङ्गबाट भएको रहेछ भने जुनसुकै बखत विभागले त्यस्तो कर निर्धारणमा संशोधन गर्न सक्नेछ । यसरी संशोधन गर्दा जालसाजी गरी विवरण राखेको वा कर निर्धारण गरेको जानकारी प्राप्त भएको एक वर्षभित्र संशोधन गरिसक्नु पर्नेछ,’ आयकर ऐन, २०५८ को दफा १०१ को उपदफा ४ मा उल्लेख छ ।
त्यस्तै, मूल्य अभिबृद्धि कर ऐन, २०५२ को दफा २० को उपदफा ४क मा कुनै व्यक्तिले झुट्टा लेखा वा बीजक वा अन्य कागजात तयार गरी वा जालसाजी गरी कर छलेको रहेछ भने जुनसुकै बखत विभागले पुनः कर निर्धारण गर्न आदेश दिन सक्ने व्यवस्था गरिएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies