सुर्य प्रसाद भुसाल/मध्यान्ह
गुल्मी : आफूहरुले मतदान गरेर विजयी बनाएर जिम्मेवार पदमा पुर्याएका जनप्रतिनिधि विभिन्न समस्याका बारेमा जिज्ञासा राख्दै आफ्नो घर–दैलोमै टुप्लुक आइपुग्दा गुल्मीको रुरुक्षेत्र गाउँपालिकाका स्थानीयहरु उत्साहित भएका छन् ।
गाउँपालिकाभित्रका ८० वर्ष उमेर पूरा भएका ज्येष्ठ नागरिकलाई लक्षित गरेर रुरुक्षेत्र गाउँपालिकाले ‘टोलटोलमा ज्येष्ठ नागरिक, घरघरमा स्वास्थ्य सेवा’ अभियान केही महिना अगाडिदेखि चलाएको छ ।
गाउँपालिकाका अध्यक्ष यदु ज्ञवालीको अगुवाईमा शुरु गरिएको उक्त अभियानका क्रममा गाउँपालिकाका प्रमुख प्रशासकीय अधिकृत लक्ष्मण पाण्डेसहितका कर्मचारी तथा वडाका जनप्रतिनिधिहरु गाउँका जनताको कुरा बुझ्न घरघरमा जाँदा स्थानीयहरु हर्षित भएको भन्दै वडा नम्बर १ निवासी प्रदीप बिकले खुसी व्यक्त गरे ।
गाउँपालिकाले ज्येष्ठ नागरिकहरुको माग अनुसारका सामग्रीहरु पनि वितरण गर्ने गरेको छ । गाउँ सभा हुनुपूर्व सबै वडाका मुख्य समस्या, गाउँपालिकाबाट अनुदानमा दिएका विभिन्न कृषि सामग्रीहरुको प्रयोग सही ठाउँमा भए–नभएको बुझ्नका लागि गाउँपालकिा अध्यक्ष ज्ञवाली, प्रमुख प्रशासकीय अधिकृत पाण्डे तथा सम्बन्धित वडाका अध्यक्ष स्थानीयहरुको घरघरमा पुग्ने गरेका छन् ।
स्थानीय निर्वाचनबाट निर्वाचित जनप्रतिनिधि घरदैलोमै आएर स्वस्थ्य, शिक्षा, खानेपानी, विद्युत तथा गाउँको समग्र विकासका बारेमा जानकारी लिँदा धेरै समस्या हल भएको स्थानीयहरु बताउँछन् ।
रुरुक्षेत्र गाउँपालिका अहिले पनि कार्यसम्पादनमा गुल्मी जिल्लामै अब्बल रहेको, गाउँपालिकाले राम्रो काम गरेको समाचार सुन्न पाउँदा खुसी लाग्ने वडा नम्बर १ का विष्णु भट्टराईले बताए ।
यस्तै गाउँपालिका अध्यक्ष ज्ञवालीले आफू जनप्रतिनिधि भएका नाताले सदैव आफ्नो ध्यान जनताको सेवामै समर्पित हुने बताए । गाउँपालिकाले गाउँपालिकाबाट हुने गरेका विकास निर्माण कार्यसम्पादन तथा अन्य गतिविधिहरु जनताको बीचमा पुर्याउनका लागि प्रत्येक पहिलो चौमासिक, दोस्रो चौमासिक, तेस्रो चौमासिक र चौथो चौमासिकमा बृहत् सार्वजनिक सुनुवाइ गर्ने र जनताले दिएका सुझावलाई ग्रहण गरेर गुनासो सम्बोधन गर्नेजस्ता महत्वपूर्ण कामहरु गरिरहेको प्रमुख प्रशासकीय अधिकृत पाण्डेले बताए ।
इलाम : आगामी वैशाख १५ गते हुने इलाम क्षेत्र नं २ कोे उपनिर्वाचनका लागि नेपाल कम्युनिष्ट पार्टी (एमाले) र नेपाल कम्युनिष्ट पार्टी (माओवादी केन्द्र)का साझा उम्मेदवार सुहाङ नेम्बाङले मनोनयन दर्ता गराउनुभएको छ । सुहाङसहित हालसम्म सातजनाले मनानयन दर्ता गराइसकेका छन् ।
बाजागाजा र झाँकीसहित निर्वाचन कार्यालयमा पुगेका सुहाङको प्रस्तावक रामप्रसाद सुवेदी र समर्थक धिरेन्द्र शर्मा रमण रहेका छन् । सुहाङले मनोनयन दर्तामा जानुअघि भानुरत्न चोक इलाममा रहेको सहिद रत्नकुमार वान्तवा, सहिद बम वान्तवा र आदिकवि भानुभक्त आचार्यको सालिकमा माल्यार्पण गरेका थिए ।
मुख्य निर्वाचन अधिकृतको कार्यालय इलामका अनुसार सबैभन्दा पहिला जनमत पार्टीका उम्मेदवार प्रेमकुमार थाम्सुहाङ (प्रेमदीप)ले मनोनयन दर्ता गराएका थिए ।
यस्तै, नेपाल मजदुर किसान पार्टीका श्याम दर्जीले पनि मनोनयन दर्ता गराएका छन् । डाकप्रसाद गौतमले स्वतन्त्र रूपमा मनोनयन दर्ता गराएका छन् । पहिचानवादीका तर्फबाट डकेन्द्र सिंह थेगिमले मनोनयन दर्ता गराएका छन् । एकीकृत समाजवादीका जीतबहादुर राईले पनि मनोनयन दर्ता गराएका छन् ।
रास्वपाबाट केही बेरमा मिलन लिम्बूले उम्मेदवारी दर्ता गर्ने तयारी गरेका छन् । नेपाली कांग्रेसले मनोनयन दर्ता गर्न बाँकी रहेको मुख्य निर्वाचन अधिकृतको कार्यालयले जनाएको छ । इलाम क्षेत्र नं २ मा आगामी वैशाख १५ गते हुने उपनिर्वाचनका लागि आज उम्मेदवारको मनोनयन दर्ता भइरहेको हो ।
दिवाकर अधिकारी/मध्यान्ह
काठमाडौं : शनिबार (आज) इलाम–२ मा हुने प्रतिनिधि सभा सदस्यको उपनिर्वाचनका लागि उम्मेदवारी दर्ता हुँदैछ । बझाङ–१ मा सुदूरपश्चिम प्रदेश सभा सदस्यका लागि हुने उपनिर्वाचनका लागि उम्मेदवारी दर्ताको समय पनि शनिबार नै छ । तर राजनीतिक दलहरुको ध्यान इलाम २ मा ज्यादा छ ।
पहिचान पक्षधर समूहरु कोशी प्रदेशको नामाकरणको विषयलाई इलाम–२ को उपचुनावसँग जोडिरहेका छन् । पहिचान पक्षधरबाट डकेन्द्रसिंह थेगिम उम्मेदवार चयन भइसकेका छन् ।
नेपाली कांग्रेसले वामपन्थी किल्ला भत्काउन चाहेको छ भने एमाले जोगाउन प्रयासरत छ । यसका लागि कांग्रेसले इलाम–२ मा डम्बर खड्कालाई उम्मेदवार बनाउने निर्णय गरेको छ । कांग्रेसका उम्मेदवार खड्का गत निर्वाचनमा एमालेका सुवास नेम्वाङसँग ११४ मतले पराजित भएका थिए । उनी कांग्रेस इलामका सभापति पनि हुन् ।
एमालेका उपाध्यक्ष एवं संविधान सभा अध्यक्ष सुवासचन्द्र नेम्वाङको गत भदौ २६ गते निधन भएपछि इलाम २ बाट प्रतिनिधि सभा सदस्यको पद रिक्त भएको थियो । त्यसक्षेत्रमा एमालेले उम्मेदवार नेम्वाङकै कान्छा छोरा सुहाङलाई बनाएको छ ।
एमालेले अन्य नेताहरुलाई छाडेर सुहाङलाई नै उम्मेदवार बनाउनुको कारण वामपन्थी किल्ला जोगाउन पर्यास हो । किनभने यो क्षेत्रमा २०४८ साल देखि नै एमालेका स्वर्गीय नेता सुवासचन्द्र नेम्वाङ निरन्तर निर्वाचित हुँदै आएका थिए ।
यहीबेला राष्ट्रिय स्वतन्त्र पार्टी (रास्वपा)को शीर्ष टीम नै चुनावी मैदानमा उत्रिएको देखिन्छ । रास्वपाका सभापति समेत रहेका उपप्रधान तथा गृहमन्त्री रवि लामिछाने हालै मात्र काठमाडौं फर्किएका छन् ।
निर्वाचन आयोगले उपचुनावको मिति तय गरेसँगै सहमहामन्त्री कविन्द्र बुर्लाकोटीलाई इलाम २ मा खटाएको थियो भने मत सर्वेक्षण गर्न ६ जना सांसद खटिएका थिए । मत सर्वेक्षण समेतका आधारमा रास्वपाले मिलन लिम्बुलाई उम्मेदवार बनाएको छ । इलाम २ मा जनसंख्याको दृष्टिमा राइ पछि लिम्बुको बाहुल्यता छ ।
निर्वाचन कार्यतालिका अन्तर्गत शनिवार उम्मेदवारको मनोनयन दर्ता हुनेछ । २५ चैतमा उम्मेदवारको विरोधमा उजुरी दिने, २६ चैतमा मनोनयनपत्र र उजुरीउपर जाँचबुझ गरी निर्णय गर्ने, २७ चैतमा उम्मेदवारको अन्तिम नामावली प्रकाशन, उम्मेदवारी फिर्ता, र निर्वाचन चिह्न वितरण गरिनेछ । २८ चैतदेखि १२ वैशाखसम्म प्रचारप्रसारको समय छ भने १५ वैशाखमा मतदान हुनेछ ।
स्याङ्जा : नेकपा एमालेका अध्यक्ष केपी शर्मा ओलीले अहिलेको सत्ता समीकरणलाई कमजोर हुन नदिइने बताएका छन् ।
नेकपा एमाले स्याङ्जाको नवौं जिल्ला अधिवेशनको शुक्रबार स्याङ्जाको पुतलीबजारमा उद्घाटन गर्दै उनले अहिलेको समीकरणलाई कमजोर हुन नदिने र थप मजबुद बनाउँदै लगिने बताएका हुन् । “यसअघि भएको गठबन्धन धेरैबेर टिक्दैन भनेको थिएँ, भयो पनि त्यस्तै”, उनले भने, “उक्त गठबन्धन खरानीको डल्लोजस्तो थियो, जुन पानी परे पनि फुट्थ्यो, सुके पनि फुट्थ्यो, अहिलेको गठबन्धन कमजोर नभई बलियो छ ।”
यो समीकरणलाई देखेर आन्तरिक तथा बाह्य शक्तिहरुको रुवाबासी शुरु भएको उनको भनाइ थियो । “नेकपा एमाले यस्तै सरकार बनाइरहने हेरफेर गरिरहने खेलमा लागिरहन्छ भन्ने पक्षमा होइन”, उनले भने, “देशलाई त्यही अवस्थामा छाड्ने हो भने देशमा राजनीतिक अस्थिरता, अराजकता हुने भएकाले निकासका लागि नयाँ समीकरण बनाएका हौं ।”
कम्युनिष्ट आन्दोलनलाई आन्तरिक तथा बाह्य शक्तिहरुले घेराबन्दीमा हाल्ने र प्रहार गर्ने कोशिस भए पनि केही सीप नचल्ने उनले बताए । उनले भ्रष्टाचारका विरुद्ध र सुशासनका पक्षमा पार्टीलाई अगाडि बढाउँदै ‘मिसन ८४’ लाई निर्णायक तहमा पु¥याउने गरी अगाडि बढ्न नेता कार्यकर्तालाई निर्देशन दिए ।
जिल्लाको यस नवौं अधिवेशनले अध्यक्ष, उपाध्यक्ष, सचिव एक-एक जना, उपसचिव दुई जना र एक सय सदस्य गरी एक सय पाँच जनाको जिल्ला कमिटी चयन गर्नेछ । अधिवेशनमा स्याङ्जाका ११ स्थानीय तहका ९७ वडा कमिटी, पार्टीका जनसंगठन सबैको प्रतिनिधित्व हुनेगरी कूल छ सय नौ जना प्रतिनिधि रहेका छन् ।
काठमाडौं : सुदूरपश्चिम प्रदेशमा नयाँ मुख्यमन्त्रीका लागि दाबी पेस गर्न आह्वान भएको छ ।
प्रदेश प्रमुख नजिर मियाँले शुक्रबार संविधानको धारा १६८ (२) अनुसार दुई वा दुई भन्दा बढी दल मिलेर सरकार गठनका दाबी पेस गर्न आह्वान गरेका हुन् ।
मुख्यमन्त्री कमलबहादुर शाहले पदबाट राजीनामा दिएपछि नयाँ मुख्यमन्त्री दाबी पेस गर्न आह्वान भएको हो ।
दलहरुलाई ९ दिनको समय दिइएको छ । अब बहुमत जुटाउन सक्ने दलका नेताले वैशाख २ बेलुकी ५ बजेभित्र मुख्यमन्त्रीमा दाबी पेस गर्नुपर्नेछ ।
काठमाडौं : लुम्बिनी प्रदेशको मुख्यमन्त्रीमा माओवादी संसदीय दलका नेता जोखबहादुर महरा नियुक्त भएका छन् ।
शुक्रबार लुम्बिनी प्रदेश प्रमुख अमिक शेरचनले नेपालको संविधानको धारा १६८ को उपधारा २ बमोजिम महरालाई मुख्यमन्त्री नियुक्त गरेका हुन् ।
माओवादी संसदीय दलका नेता महराले शुक्रबार नै बहुमत ४४ सांसदको हस्ताक्षरसहित मुख्यमन्त्रीमा दाबी पेस गरेका थिए ।
उनलाई एमालेका २९, माओवादीका १०, नाउपाका ४, जसपाका ३, नेकपा एसका १ र स्वतन्त्र १ सांसद गरी ४८ सांसदको समर्थन छ ।
काठमाडौं : लुम्बिनी प्रदेशमा मुख्यमन्त्रीको दाबी गर्दै नेकपा माओवादी केन्द्र संसदीय दलका नेता जोखबहादुर महराले बहुमत सदस्यको हस्ताक्षर बुझाएका छन् ।
नेकपा एमालेका संसदीय दलका नेता लीला गिरी, प्रमुख सचेतक तुल्सी चौधरी, एकीकृत समाजवादीकी भगवती घिमिरेसहित पुगेका महराले प्रदेश प्रमुख शेरचन समक्ष दाबी पेश गरेका हुन् ।
मुख्यमन्त्री नियुक्तिको लागि महराले एमाले, एकीकृत समाजवादी, जसपा र स्वतन्त्र २ जनासहित ४४ जना सांसदको समर्थन पेस गरेका हुन् ।
नेकपा एमालेका २९, माओवादीका १०, जसपाका ३, एकीकृत समाजवादी १ र १ जना स्वतन्त्र प्रदेश सभा सदस्यले महराको पक्षमा हस्ताक्षर गरेका छन् ।
संविधानको धारा १६८ को उपधारा २ बमोजिम प्रदेश मन्त्रिपरिषद् गठन प्रक्रिया शुरु भएको हो ।
काठमाडौं : प्रधानमन्त्री पुष्पकमल दाहाल प्रचण्डले नवप्रवर्तनमा आधारित समयसापेक्ष पाठ्यक्रम तयार गरेर लागू गर्नुपर्नेमा जोड दिएका छन् । मध्यपश्चिम विश्वविद्यालयको १४औँ सभा बैठकमा प्रधानमन्त्री प्रचण्डले पाठ्यक्रम पुनःसंरचना, भौतिक एवं मानव संशाधन विकासमा विश्वविद्यालयको ध्यान जानुपर्ने बताएका छन् ।
प्रधानमन्त्री प्रचण्डले भने, ‘विश्वविद्यालयले अवलम्बन गरेका शैक्षिक उत्कृष्टता, आर्थिक वृद्धि, पाठ्यक्रम पुनःसंरचना, अन्तर्राष्ट्रिय सम्बन्ध तथा आदान–प्रदान र पूर्वाधार विकाससम्बन्धी मार्गनिर्देशक सिद्धान्त, नीति तथा कार्यक्रमहरू समेत सराहनीय छन् ।’ विश्वविद्यालयको सम्पूर्ण शैक्षिक क्रियाकलापहरू पूर्वनिर्धारित शैक्षिक पात्रोअनुसार शैक्षिक गतिविधि सञ्चालन गर्ने नीति लिनु सुधारको पाटो भएको उल्लेख गर्दै प्रधानमन्त्री प्रचण्डले विश्वविद्यालयको विद्यमान परीक्षा प्रणालीमा सुधार गरी शैक्षिक पात्रोअनुसार परीक्षा लिने तथा निर्धारित समयभित्र नतिजा प्रकाशन गर्ने नीति कार्यान्वयनमा सरकारले सहयोग गर्ने विश्वास दिलाए । उनले परिवर्तनशील वैश्विक परिवेश एवं राष्ट्रिय, क्षेत्रीय र स्थानीय विकासका नीति तथा अवधारणा र श्रम बजारको मागअनुसार विश्वविद्यालयका सम्पूर्ण शैक्षिक कार्यक्रम तथा पाठ्यक्रमलाई थप प्राथमिकता दिन सुझाव दिए ।
प्रधानमन्त्री प्रचण्डले विश्वविद्यालयका विभिन्न प्रयोगशालाबाट उत्पादित वस्तु, सेवा र सूचनाहरूको बजारीकरण र बिक्री वितरणमा आवश्यक पर्ने राष्ट्रिय नीति तथा कानुन निर्माणमा नेपाल सरकारको तर्फबाट सहयोग रहने प्रतिबद्धता व्यक्त गरे । संविधानबाट निर्दिष्ट गणतान्त्रिक राज्यव्यवस्थाले अनुसरण गरेको सुशासन र सामाजिक न्यायको सिद्घान्तमा आधारित समाजवादउन्मूख शैक्षिक नीति, रणनीति तथा कार्यक्रम निर्माण गर्नुपर्ने बताउँदै प्रधानमन्त्री प्रचण्डले नेपाली विद्यार्थीलाई स्वदेशमै उच्च शिक्षा अध्ययन गर्न उत्प्रेरित गर्दै देशको समृद्धिमा टेवा पुर्याउन विश्वविद्यालयले सकारात्मक भूमिका खेल्ने विश्वास व्यक्त गरे । उनले कृषि तथा वन विज्ञानका क्षेत्रमा कर्णाली प्रदेश र समग्र नेपालकै भौगोलिक, सामाजिक एवं आर्थिक अवस्थालाई मध्यनजर गर्दै जल, जमिन, जङ्गल, जडीबुटी र जनशक्तिमा आधारित शैक्षिक, व्यावसायिक कार्यक्रम सञ्चालन गर्नुपर्ने बताए ।
प्रधानमन्त्री प्रचण्डले आधुनिक र रैथाने कृषि प्रणाली र ज्ञान–सीपको संयोजन गरी विभिन्न कार्यक्रम र परियोजनाहरू सञ्चालनमा आउने विश्वास व्यक्त गरे । प्रधानमन्त्री प्रचण्डले सांस्कृतिक विविधता र प्राकृतिक स्रोत–साधनले सम्पन्न तर भौतिक पूर्वाधार विकास, औद्योगिकीकरण तथा मानव विकासका सूचकाङ्कमा पछाडि परेको कर्णाली प्रदेशमा स्थापित मध्यपश्चिम विश्वविद्यालयले आफ्नो स्थापनाको छोटो समयमै प्राज्ञिक उन्नयन, भौतिक विकास, सूचना प्रविधि सहितको कार्यप्रणाली विकासमा गरेको योगदान महत्त्वपूर्ण रहेको बताए ।
सपना बोहरा/मध्यान्ह
दाङ : लुम्बिनी र सुदूरपश्चिम प्रदेशका मुख्यमन्त्रीले राजीनामा दिएका छन् । दुवै प्रदेशमा कांग्रेसको नेतृत्वमा सरकार थियो । यी दुवै प्रदेशमा नेकपा एमाले र नेकपा माओवादी केन्द्रसहितको नयाँ गठबन्धनले सरकार बनाउन बहुमत जुटाएको छ । संघीय सत्ता समीकरणमा रहेका दलहरुरुको बहुमत पुगेसँगै दुवै प्रदेशका मुख्यमन्त्रीले राजीनामा दिएका हुन् ।
सुदूरपश्चिम प्रदेशका मुख्यमन्त्री कमलबहादुर शाहले बिहीबार प्रदेश सभाबाट विश्वासको मत लिने तयारी गरेका थिए । मुख्यमन्त्रीले विश्वासको मत लिने प्रयोजनका लागि दिउँसो ३ बजे प्रदेश सभा बैठक आह्वान गरिएको थियो । तर, विश्वासको मत पाउने अवस्था नभएपछि उनले राजीनामा दिएका हुन् ।
सत्तासाझेदार नागरिक उन्मुक्ति पार्टी (नाउपा)का सबै सांसदले विश्वासको मत नदिने भएपछि मुख्यमन्त्रीले राजीनामाको विकल्प रोजेका हुन् ।
५३ सदस्यीय सुदूरपश्चिम प्रदेशमा सरकार बनाउन आवश्यक २७ मत आवश्यक पर्छ । नयाँ गठबन्धनले बहुमत पुर्याउने भएको छ । एमाले १०, माओवादी ११, एकीकृत समाजवादी ४ र स्वतन्त्र एक जना नयाँ गठबन्धनमा छन् । नाउपाका पनि दुई जना नयाँ गठबन्धनको पक्षमा छन् ।
यसो हुँदा कांग्रेस १९ र राप्रपाका एक जना हुँदा २० मत मात्रै पुग्ने भएकाले कांग्रेस नेतृत्वमा सरकार नबन्न भएको हो । लुम्बिनी प्रदेशमा पनि एमाले–माओवादी गठबन्धनले बहुमत जुटाएको छ ।
कांग्रेसबाट मुख्यमन्त्री भएका डिल्लीबहादुर चौधरी अल्पमतमा परेर बिहीबार राजीनामा दिए । यो सँगै सँगै नयाँ प्रक्रिया सुरु भएको छ ।
८७ सदस्यीय प्रदेश सभामा बहुमतका लागि ४४ सांसद आवश्यक पर्छ । जसमा एमालेको २९, माओवादीको सभामुखबाहेक १०, जसपाको ३, एकीकृत समाजवादीको एक गरी ४३ सिट छ । रोल्पा १ (२) बाट स्वतन्त्र रूपमा निर्वाचन जितेका दीपेन्द्र पुन नयाँ गठबन्धनमै रहेकाले बहुमत पुगेको हो ।
विपक्षमा कांग्रेसको २७ सिट, राप्रपाको ४, जनमत पार्टीको ३, लोसपाको ३, राजमोको एक सांसद छन् । नाउपा आन्तरिक विवादमा छ ।
कृष्ण तिवारी/मध्यान्ह
काठमाडौं : नेकपा एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले नेताहरु पदको पछाडि लागे देश नबन्ने टिप्पणी गरेका छन् ।
बिहीबार काठमाडौंस्थित रौतहट टाईंम्स साप्ताहिकको २६ औं वार्षिकोत्सवको अवसरमा प्रमुख अतिथिको रूपमा नेता नेपालले उक्त कुरा बताएका हुन् ।
पछिल्लो समय देशमा पदकै लागि हानथाप हुन थालेको कारण देशको विकासमा बाधा पुगेको नेता नेपालले जिकिर गरे ।
पूर्व प्रधानमन्त्री नेता नेपालले आफ्नो गृह जिल्ला रौतहटको चर्चा गर्दै सदरमुकाम गौर नगरपालिकामा मेयर शम्भु साहले गरिरहेको विकास निर्माणको काम जिल्लाकै लागि उदाहरणीय रहेको चर्चा गरेका थिए ।
उनले देशमा लागुपदार्थ दुर्व्यसनीको संख्या दिनानुदिन बढिरहँदा सरकारले नियन्त्रणमा चासो नदेखाएको आरोप लगाए । उनले यसमा सरकार मूकदर्शक भएको बताए । नेता नेपालले रौतहट, कैलालीलगायत जिल्लामा पछिल्लो समय लागुपदार्थ दुर्व्यसनी बढिरहेको भन्दै सरकार, प्रहरी र प्रशासनको भूमिकामाथि प्रश्न उठाएका थिए । नेताहरु इमान्दार तथा निष्ठावान भएर स्वच्छ छवि कायम राख्न नसकेमा कर्मचारीहरु कुनै राम्रो काम सिक्न नसक्ने उनले दाबी गरे ।
कार्यक्रममा पूर्व मन्त्री तथा समाजवादी नेता डाक्टर बंशिधर मिश्रले नेपालका नेताहरु बंगलादेशसँग सिक्नुपर्ने बताए । उनले बंगलादेशमा पानीमा धान उब्जाउने गरेको चर्चा गर्दै नेपालीहरु आफ्नो खेत बाँझो राखेर वैदेशिक रोजगारीमा जानु दुर्भाग्य रहेको बताए ।
‘आ–आफ्नो जन्मदिनको अवसरमा वृक्षारोपण गरेर मनाऔं’ भन्ने प्रतिबद्धतासहित रौतहट टाइम्स साप्ताहिक पत्रिकाको वार्षिकोत्सव कार्यक्रममा संघीय संसदको शिक्षा सूचना तथा प्रविधि समितिको सभापति अमर बहादुर थापा, प्रेस काउन्सिलका अध्यक्ष बाल कृष्ण बस्नेत, नेपाल पत्रकार महासंघका केन्द्रीय अध्यक्ष बिपुल पोखरेल, गौर नगरपालिकाका मेयर शम्भु साह लगायतले वर्तमान समयमा छापा मिडिया अर्थात् पत्रिका प्रकाशन चुनौतीपूर्ण काम रहेको भन्दै पत्रिका नियमित प्रकाशनसँगै समाज सेवामा समेत सक्रिय सम्पादक प्रकाशक गोविन्द चौलागाईंको प्रशंसा गरेका थिए । रौतहटको चन्द्रपुर नगरपालिका घरभइ चौलागाईं राजधानी काठमाडौं बसेर २६ वर्षदेखि नियमित पत्रिका प्रकाशन गर्दै आएका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies