-पूजा शर्मा (प्रकृतिप्रेमी)
विश्वव्यापी कोरोना महामारीबीच यस विकराल परिदृश्यलाई पछाडि धकेल्दै राष्ट्रको शक्ति एवं सत्ताको मञ्चमाथि सरकार आफ्नै नाटक मञ्चन गरिरहेको छ । जसले युवाहरुको मनमा राजनीतिप्रति गहिरो वितृष्णा पैदा गरेको छ । बहुमतको सरकारले संघीय गणतन्त्रको प्रभावकारीता पुनःस्थापना गर्न सकिरहेको छैन । समृद्धि र स्थायित्वको नारा बोकेर अहिलेको सरकार तानाशाही प्रवृत्तिमा चलेको छ । जनतालाई सपना त दियो तर, काम दिएन । परिणाम दिएन न त समृद्धि दियो न त सुशासन नै ।
देशले बहुमतको सरकार पायो, विभिन्न समयमा फरक–फरक नेतृत्व पायो र पनि इमान्दारीता साथ विकास र समृद्धिमा समर्पित हुने नयाँ नेतृत्व पाएको छैन । अहिलेको देशको नेतृत्वमा ४ दशक मुलुकको राजनीतिक नेतृत्व गर्नेहरूको हालीमुहाली छ । न त नयाँ अनुहार छन् न त नयाँ पुस्ता नेतृत्वमा नै छ । हाम्रो मौलिक राजनीतिक घटनाक्रमले यस्तै नेतृत्व निर्माण गर्यो र जब त्यो वर्ग सत्तामा पुग्यो, तब विज्ञ र दक्षहरूको परामर्शमा नीति निर्माण गर्ने साेंच बनाएन । आफू अनुकुल काम गरेर मनोमानी गर्ने परिपाटी निर्माण भयो । पटक–पटक मुलुकको साँचो दिँदा पनि परिणाममुखी नतिजा ल्याउन नसकेपछि कसरी बन्छ समृद्ध देश ?
राजनीति अनि समाज परिवर्तनको हकदार युवापुस्ता हुन् । जिम्मेवारी युवाकै हो । अब अभिभावक बनेर पुरानो पुस्ताले बुढो काधबाट निकालेर देशको नेतृत्व युवाको बलियो काँधमा सुम्पिनुपर्छ किनभने नयाँ पुस्ताको नेतृत्व अबको आवश्यकता हो ।
आजसम्म पनि नेतृत्वको आकांक्षी भनिएका नेताहरुलाई मोर्चाबन्दी गर्नु, आफ्नै तर्कमाथि पार्नु, उच्च तहका नेता रिझाउनु नै राजनीति हो भन्ने लागेको छ । उनिहरुले टिकट पनि पाई नै रहेका छन् । उनीहरुलाई लाग्छ नेता बन्ने तरिकै यहि हो । केवल भीडको लहडमाथि मात्र आफूँ हावी हुन खोज्ने अवसरवादीहरुको हातमा देशको नेतृत्व हुनुले देश अग्रगमनमा जान नसकेको जगजाहेर छ ।
अब ६० पुगेकालाई आराम गर्न लगाउनु पर्छ, उहाँहरुले युवाहरुलाई अभिभावकत्व दिनुपर्छ । कुसंस्कारको परम्परा तोड्ने साहस अब नयाँ पुस्ताले गर्नैपर्छ किनभने यहि प्रवृत्ति रहिराख्यो भने देश अझै अध्ँयारोमा भास्सिने निश्चित छ । अब नयाँ विधि र विधान सहित पृथक संगठन चाहिन्छ, जसले सिङ्गो देशलाई ह्यान्डलिङ गर्ने सामाथ्र्य राखोस् । हो, त्यसैले मलाई विकास अनि समृद्धिको राजनीति नेतृत्व गर्नुछ, मलाई राजनीतिक सक्रियता मात्रै राजनीति हो भन्ने सोच र परिभाषा बदल्नुछ ।
युवाहरु परिवर्तनका संवाहक हुन् । सोंच परिवर्तन गरे मात्रै समाज परिवर्तन हुनेछ । देश समाजप्रती स्वच्छ उदार भावना राख्दै देशमा रहेका आम नागरिकको तनाव रहित भबिस्य सुरक्षीत गर्दै दिगो बिकासमा अग्रसर हुन सक्नु नै एउटा असल नेताको खुबि हो । हेक्का राख्नुस् सम्मुनत राष्ट्र प्रगतिशील सोंचले बनाउँछ । परम्परागत र ‘डेट एक्स्पायर’ भैसकेको ‘आइडिया’ले होइन ।
मैंले यसो भन्दै गर्दा समाजका अराजक, विकास विरोधीलाई चिडचिड लाग्नसक्छ । उनिहरुले युवाहरु अल्लारे हुन्छन्, युवा वर्गमा अनुभव तथा विज्ञता तथा नेतृत्व गर्न सक्ने क्षमता हुँदैनन् भन्ने तर्कहरु दिन सक्छन् । देश र समाज सेवाका लागि अनुभव मात्र भएर पुग्दैन, नवीनतम साेंच धैर्यता, साहस, इच्छाशक्ति पनि चाहिन्छ । सँगै उर्जा चाहिन्छ । कालो र सेतो कोट लगाउँदैमा वकिल र डाक्टर, गोरु जोत्दैमा हलि बनिदैन । राजनीतिक सक्रियता हुँदैमा मात्र नेता बनिदैन । नेता त समय सापेक्ष विचार दिने र मार्गनिर्देशन गर्न सक्ने हुनुपर्छ । हाम्रो देशलाई स्पष्टताका साथ सहि मार्गमा हिडाउन सक्ने क्षमतावान नेतृत्व चाहिएको छ । हो त्यसैले म मेरो पुस्ताको नेतृत्व गर्दै राजनीतिक नेतृत्व गर्न चाहन्छु, यहिँ होमिन चाहान्छु ।
लामो समयदेखि राजनीतिमा संघर्ष गरेर आएका महिलाहरु ओझेलमा परेका छन । संविधान, आन्दोलन र परिवर्तनले दिएको भए पनि त्यो नै अलमलमा छ । संविधान र दलका कानूनी व्यवस्थाले भने पनि माथिदेखि तलसम्मका महिला कोटा भए पनि तिनको कार्यन्वायन नगरी उपेक्षा गरिएको छ । समाजले निर्धारण गरेको मूल्यमान्यतालाई व्यवहारमा उतार्ने क्रममा पितृसत्तात्मक सोंचको आधारमा व्यवहार गर्ने गरेको देखिन्छ । यस्तो बेलामा एउटा बलियो प्रतिरोधी शक्ति भनेको राजनीतिमा महिलाको उपस्थिति हो । म तिनै महिलाको नेतृत्व गर्न चाहान्छु ।
नेतृत्वको भूमिका यस्तै संवेदनशील विषय र क्षणहरूमा अपरिहार्य हुन्छ । युवाहरुमा जिम्मेवारी र जवाफदेहिताको खाँचो छ । म यहि खाडललाई पुर्न चाहान्छु । अग्रगामी समाजका निम्ति सही मुद्दामा समाजलाई परिचालन गर्दै चेतना र अवचेतनाको निर्माण गर्नु नेतृत्वको जिम्मेवारी हो । त्यसैले म रचनात्मकताको नेतृत्व गर्न चाहान्छु । धेरै वर्ष कोही आएर देशको नेतृत्व लिएर देशको विकास गर्छ कि, निकास दिन्छ कि, भनेर कुरियो । आँखाहरुले निराशा मात्रै पाए । कानहरुले उहीँ पुरानो शैलिका भाषण सुने । अपेक्षा थकित भयो, त्यसैले अब आफैं अघि बढेर अघिल्लो पुस्ताको नेतृत्वलाई चुनौती दिने बेला आएको महशुस भैरहेको छ । विकल्प कुर्दै बस्ने होइन, विकल्प बन्ने बेला भएको छ । अब म जस्तो युवा मैदानमा आउनु बाहेकको विकल्प छैन । मेरो पुस्ताले आउदो चुनावमा क्षमता र योग्यता हेरेर जनप्रतिनिधि चुन्नेछन, जहाँ म पनि उभिएको हुनेछु ।
एउटा कुशल नेतृत्वले दुरदृष्टि राख्दै बिकास निर्माणका क्रियाकलापमा अग्रता देखाउनु पर्दछ । उसको जीवनमा सफलता उच्च पद होइन, अर्थात् उस्ले पदको कसरी सदुपयोग ग¥र्याे, भुमिकालाई कति न्याय गर्यो र कस्ता काम गर्यो भन्ने कुरा हो । भ्रष्टाचारको अन्त्य गर्ने संकल्प गरौं । सबै प्रधानमन्त्री, मन्त्री, सांसद, राजनीतिक नियुक्ति पाउनेहरू र उच्चपदस्थ कर्मचारीहरूको सम्पत्ति छानबिन गरौं । हो अब नयाँ पुस्ताले लुटतन्त्रको अन्त्य र नयाँ लोकतन्त्र निर्माण गर्नैपर्छ ।
मैंले धेरै युवाको प्रतिनिधित्व गर्नुछ, उनिहरुको आवाज बन्नुछ । राजनीति फोहोरी खेल ठान्ने मानिसलाई सफाइ गरेर देखाउनुछ । मैले धेरै युवाहरूलाई राजनीतिमा आउन प्रेरित गर्नुछ । राजनीतिक स्थायित्व देशलाई दिने र जनताका समृद्धिका आकान्क्षाहरु पूरा गर्न अपरिहार्य छ, र हाम्रो देशलाई अन्तर्राष्ट्रिय समुदायमा एउटा स्वघोषित र स्वाभिमानि राष्ट्रको रूपमा चिनाउनु छ । जसको जिम्मेवारी हाम्रो काँधमा अएको छ । हो, म मा राजनीतिलाई निरन्तरता दिने आँट, सहास र इच्छाशक्ति छ । मैले बितेको केही बर्षदेखि आफ्नो उर्जावान समय देश र जनताकै सेवामा खर्चिदै आएकी छु । अब जिन्दगीको बाकी समय पनि राजनीतिमै समर्पित गर्नेछु । मेरो लागि राजनीति युद्धभूमि हो, यसैमा होमिन चाहन्छु । हो म राजनीतिक नेतृत्व गर्नेछु । यो मेरो राजनीतिक निष्ठा हो, सपना हो, अठोट हो ।
भनिन्छ नी, युवा निदाए, देश निदाउँछ । हो, हाम्रा नेताहरू निदाएका छन् । निदाएझैं नाटक गरिरहेका छन् । अब हामी युवाहरू मिलेर निदाइरहेको देश ब्युँझाउनुपर्छ, जगाउनुपर्छ र निराशाहरु चिर्दा आशाका किरणहरु फैलाउने भूमिकामा लाग्नुपर्छ । मेरो देशको सुन्दर भविष्यका निम्ति म अनि मेरो पुस्ता राजनीतिमा आउनैपर्छ ।
(लेखिका शर्मा नेवि संघसँग आबद्ध छिन्)
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies