–मचिन्द्र खत्री, धरान
कतै फूल राता कतै कोपिला छन्
शरद् आज आयो सबै जोशिला छन् ।
मुना पात रम्दै सबै छन् फुलेका
शरद् साथ झुम्दै यतै छन् डुलेका ।।
यतै छन् जुरेली प्रियासाथ घुम्दै
यतै माहुरी छन् यिनै फूल चुम्दै ।
शरद् डुल्छ नौला सबै भीर पाखा
शरद् हेर्न आऊ उघारेर आँखा ।।
यतै शीत आयो यतै प्रीत लायो
यतै मन्द हावा बिहानै सुसायो ।
सबै साफ डाँडा शरद् खुल्न लाग्यो
नयाँ मात छर्दै यता घुल्न लाग्यो ।।
नदी नीर गंगा बगेको छ पानी
सफा पोखरी छन् सबै रूप रानी ।
यतै हाँस पौडी चखेवा रमायो
नदीकात नौलो कतै काँस छायो ।।
शरद् राज आयो सबै छन् जवानी
सबै बोल्न थाले सुनौलो कहानी ।
न यो घाम चर्को न यो मेघ लर्को
धराधाम खुल्दा उघारेर बर्को ।।
सँगै चाड आयो शरद्ले लिएर
दसैँ साथसाथै खुलासा दिएर ।
सबै व्योम खुल्दा खुले जून तारा
यता धान हल्ले झुले खेत सारा ।।
फुले खेतका ती रमाएर धान
यता वायु चल्दा भयो स्वर्ण सान ।
पस्यो स्वाद मीठो यतै सुन्तलामा
शरद् राज आयो जतै भू धरामा ।।
कुना कन्दरामा नयाँ हर्ष जाग्यो
थियो मेघ कालो सबै दूर भाग्यो ।
अझै लेक फुल्दा रमाएर झाडी
शरद् बस्न थाल्यो सबैकाज छाडी ।।
घना जङ्गली ती सबै रूख हाँसे
यतै शीत थोपा सँगै प्रीत गाँसे ।
सबै झुल्न थाले सबै फुल्न थाले
शरद् साथ साथै सबै घुल्न थाले ।।
गायनसुत्र–भुजङ्गप्रयात
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies