काठमाडौं : सुदूरपश्चिममा चाड पर्वमा मनाइने लोककथाहरूको सँगालोमा आधारित नयाँ लोक देउडा गीत ‘जौमास’ सार्वजनिक भएको छ । सरोज खड्काको शब्द र देवेन्द्र खड्काको लय संगीतमा रहेको ‘जौमास’ गीतमा देवेन्द्र खड्का र संगीता थापाको स्वर रहेको छ ।
यो गीत ‘माँझ आँगन’ युट्युब च्यानलमार्फत सार्वजनिक गरिएको हो । सरोज खड्काले निर्देशन गरेको गीतमा स्थानीय संस्कृतिको प्रवर्द्धन गरिएको छ । केटा र कटीबीचको प्रेम देखाइएको यो गीतले अहिले प्रशंसा बटुलिरहेको छ ।
सुदूरपश्चिमको अछाम जिल्लामा छायाँकन गरिएको यो गीतले स्थानीय कुरालाई देखाएको छ भने संस्कृतिको जगेर्ना गर्ने उद्देश्यले यो गीत तयार पारिएको गायक देवेन्द्र खड्काले बताए । अछाम जिल्लामा जन्मेका देवेन्द्र खड्का आर आर क्याम्पसमा स्नातक गरेर अहिले कलानीधिमा संगीत सिकिरहेका छन् ।
तिलु शर्मा पौडेल/मध्यान्ह
दोहा, कतार : करिब २५० भन्दा बढी म्युजिक भिडियोमा फरक-फरक भूमिकामा काम गरिसकेकी कुशल मोडल तथा नृत्यङ्गना रबिना भण्डारीले गायनमा डेब्यू गरेकी छिन् l म्याग्दी जिल्लाको रघुगंगा गाउँपालिका वडा नं. २ मौवाफाटमा जन्मिएकी भण्डारीले आफ्नै आवाजमा रहेको 'मेटाउ कसरी' बोलको गीत सार्वजनिक गर्दै गायनमा डेब्यू गरेकी हुन् l
'गायिका बन्छु भन्ने उद्देश्यले भन्दा पनि गीत गाउने एउटा सपना थियो, त्यो सपना पूरा गर्न पहिलो पटक डराइ-डराइ नयाँ कदम चालेकी हुँ,' मध्यान्ह दैनिकसँगको कुराकानीमा उनले बताइन् l भण्डारीले आइतबार साँझ आफ्नै युट्युब च्यानलबाट गीत सार्वजनिक गरेपछि अग्रज व्यक्तिहरूले आफूलाई फोन गरेर राम्रो प्रतिक्रिया दिएको बताइन् l 'मैले गाएको पनि गीत छ भनेर आफूले आफूलाई सांगीतिक क्षेत्रमा अगाडि बढ्न र थप मेहनत गर्न पनि प्रोत्साहन मिल्ने अपेक्षा छ,' उनले भनिन् l एउटा कलिलो बिरुवा दर्शकहरूलाई उपहार दिएको बताउँदै भण्डारीले सांगीतिक कर्ममा निरन्तर लागिरहने बताइन् l
आफ्नै सहोदर दाइ राजिन भण्डारीको शब्द, दिनेश परियारको संगीत तथा संगीत संयोजन रहेको गीतको भिडियोमा स्वयं रबिना फिचर्ड छिन् l प्रविन थापाले निर्देशन गरेको भिडियोलाई वीरेन्द्र भट्टले खिचेका हुन् भने भिडियोको सम्पादन तथा रङ्ग भर्ने काम पदम सुवेदीले गरेका हुन् l
तिलु शर्मा पौडेल/मध्यान्ह
दोहा, कतार : नेपाली गीतसंगीतको क्षेत्र धेरै जनाका लागि सपना र गन्तव्यको क्षेत्र हो । यस क्षेत्रमा काम गरिरहेका कतिपय पलायन भएपनि यो क्षेत्रमा मरिमेटेर काम गरिरहेका र सफलता पाइरहेकाहरू पनि छन् । पछिल्लो एक दशकदेखि गीतसंगीतको निर्माणदेखि अभिनय र नृत्यमा व्यस्त छन् शिशिर पौडेल ।
स्याङ्जाको चापाकोटमा जन्मिएका पौडेलले करिब तीन सय म्युजिक भिडियोमा आफ्नो कलाको जादु देखाइसकेका छन् । रोमान्टिक फिल्मको हिरो जस्तै देखिने पौडेल भने सेन्टिमेन्टल गीतमा जमेका छन् । अझै भन्नु पर्दा उनलाई दर्शकले बेस्सरी रुचाएको सेन्टिमेन्टल गीतमा नै हो । मध्यान्ह दैनिकसँगको कुराकानीमा पौडेलले आफूले फरक–फरक विधाका गीतमा काम गरे पनि सेन्टिमेन्टलबाट बढी चिनिएको स्वीकारे । दर्शकको भावना सेन्टिमेन्टलमा बढी जोडिने गरेको आफूले पाएको बताउँछन् पौडेल । सांगीतिक प्रस्तुति दिन दुबईसम्म पुगिसकेका पौडेल नेपालका स्टेज कार्यक्रममा पनि रुचाइएका कलाकार हुन् ।
‘आज मुटु’, ‘सनिसार’, ‘सोल्टी बजार’, ‘ओ जाम हिन’, ‘रुँदै बितेका रात’, ‘राम्दी तरेर’लगायतका गीतहरू उनका लाखौं पटक हेरिएका गीतमा पर्छन् । नेपाली लोक सांगीतिक क्षेत्रमा निकै व्यस्त पौडेलले अभिनय गरेको पछिल्लो गीत ‘सत्य जीवन’ चर्चामा छ । गीतमा गाउँमा पण्डित पेसा गर्ने ब्राह्मणको घर चलाउन कति समस्या पर्छ र परदेश पुग्छ भन्ने कथालाई आकर्षकरूपमा देखाइएको छ । फरक भूमिकामा रहेर काम गर्न मन पराउने पौडेलको यो भूमिकाको प्रशंसा भइरहेको छ ।
उक्त गीतका शब्द प्रदीप खनालले लेखेका हुन् भने संगीत र स्वर कुशल बेल्बासेले भरेका छन् । बेल्वासेलाई स्वरमा गायिका शान्ति श्री परियारले साथ दिएकी छिन् । शिशिर पौडेल युट्युब च्यानलबाट रिलिज गरिएको गीतमा पौडेलसँगै जुना कार्कीले अभिनय गरेकी छिन् । जेरी भण्डारीले निर्देशन गरेको भिडियोलाई राम केसीले खिचेका हुन् भने भिडियोको सम्पादन अमृत चापागाईंले गरेका छन् ।
नेपालमा कुनै समय ‘सिम्पल सिम्पल कान्छीको डिम्पल पर्ने गाला’ र पछिल्लो समय ‘उन भित्र गुन फूल्ने र सिरुपाते जुंगामा दाइने हातको ताउ’ सर्वाधिक चर्चामा छन् । कुनै समय नेपाली गीतसंगीतमा एकछत्र राज गर्ने उनै चर्चित गीतकार हुन् शंकर अधिकारी (घायल) । उनलाई नेपाली गीतकारमा पनि आँसु गीतकारका रुपमा चिनिन्छन् । बाल्यकालमा नाटक, कथा र गीति नाटकमा कलम चलाएपछि उनलाई गीत लेखनमा चाख बढेको थियो । सुनसरी घरमा उनले हुलाकमार्फत रेडियो नेपालको गीतिकथा कार्यक्रममा समेत आफ्ना कथाहरु पठाएर आफ्नो सिर्जना स्रोतामाझ पुर्याउने गरेका थिए । रेडियो नेपालबाट आफ्नो गीतिकथा प्रसारण भएपछि उनलाई गीत लेखनमा इच्छा बढ्यो । तर उनलाई गीत लेख्ने कसरी हो थाहा थिएन । तै पनि उनी गीत लेखनमा कलम चलाउने गर्थे । जब उनी काठमाडौं आए उनको गायिका नित्या सिवासँगको भेट भयो । उनले गीत लेख्ने यसरी हो नि दाइ भनेपछि उनले लेख्न शुरु गरे । उनले फिल्म ‘दादागिरी’को ‘तिम्रो आँखामा बस्ने रहर भो मलाई’ बोलको गीत लेखेका थिए । जुन गीत अहिले पनि चर्चामा छ । नेपाल टेलिभिजनबाट प्रसारण भइरहेको हास्य टेलिश्रृंखला ‘मेरि बास्सै’को शीर्ष गीत पनि उनैले लेखेका हुन् । त्यसपछि फिल्म ‘खलनायक’, ‘नासिब आफ्नो’, रेखा थापाको फिल्म ‘अन्दाज’को ‘सिम्पल सिम्पल कान्छीको डिम्पल पर्ने गाला’ हिट भएपछि उनले पछाडि फर्केर हेर्नै परेन । उनी एकाएक चर्चामा रहे । उनी गीत लेखनलाई निरन्तता दिँदै फिल्मसमेत लेखन तथा निर्देशनमा लागे । उनले फिल्म ‘लभ इज लाइफ’ लेखे । त्यसपछि उनको व्यस्तता नेपालीमा मात्र नभएर भोजपुरीमा समेत बढ्यो । उनले भोजपुरी फिल्म ‘इ कैसन बौछार’ लेखे । त्यो पनि चर्चामा रह्यो । उनका गीत लेखनमा विशेष भूमिका रह्यो । प्रस्तुत छ कुशल गीतकार तथा निर्देशक शंकर अधिकारी (घायाल)ले मध्यान्ह दैनिकका लागि सानु श्रेष्ठसँग गरेको कुराकानीको सम्पादित अंश :
के छ हालखबर ?
ठिकै छ । गीत लेखनसँगै चलचित्रको काममा नै व्यस्त छु ।
सिरुपाते जुँगा खुब हिट भयो है ?
हो नि । यो गीत यसरी हिट होला भनेर सोचेको पनि थिइनँ । तर यो गीत फिल्म ‘छक्का पञ्जा ४’मा समावेश भएपछि थप चर्चामा आयो । टिकटक तथा सामाजिक सञ्जालमा एकदमै हिट भयो । जुन बुस्ट पनि गरिएको थिएन ।
सिम्पल सिम्पल पछिको यही गीत हिट होला है ?
अरु पनि थुप्रै छन् । तर सिम्पल सिम्पल कान्छीको पछि यही गीतले फेरि मलाई उचाईमा पुर्याउन सफल भयो । १४ वर्षको अन्तरालमा राम्रो सफलता पाएको छु ।
तपाईं गीत कुन समयमा लेख्नुहुन्छ ?
मेरो गीत लेख्ने समय नै हुँदैन । जतिबेला पनि लेख्छु । तपाईंले अहिले यही लेख भन्नु, म केही मिनेटमा नै सकाइदिन्छु । मान्छेहरु भन्छन् नि राति लेख्छु, दिउँसो लेख्छु । यो समयमा लेख्छु । मेरो त्यस्तो छैन । जुन बेला पनि लेखिरहेको हुन्छ । मलाई गीत लेख्नका लागि कुनै समय चाहिँदैन ।
हरेक गीत तपाईंको हिट छन् । पहिलो पटक रेकर्ड भएको कुन गीत थियो ?
पहिलो हरेक कुरा थाहा हुन्छ । त्यसैले मैले पहिलो पटक लेखेको गीत ‘नियतिले मलाई मात्र गरिरह्यो झेल’ रहेको थियो । जुन गीत स्रोतामाझ लोकप्रिय पनि बन्यो । अहिले पनि यो गीत उतिकै चर्चामा छ । यो गीतमा बालन्द राईको संगीत रहेको थियो । मेरो पहिलो फिल्मको कुरा गर्ने हो भने ‘मैदान’ हो । उक्त फिल्ममा समावेश गीत ‘तिम्रै आँखा भित्र’ रहेको छ । यो गीतले पनि त्यो समयमा चर्चा कमाएको थियो । यस गीतमा स्वर्गीय जेनी कँुवरले अभिनय गर्नुभएको थियो ।
सफल चलचित्रको गीत छान्नुपर्दा ?
मेरो सबै गीतहरु हिट नै छन् । मैले छान्नै पर्दा फिल्म ‘दादागिरी’लाई छान्छु, त्यो बेलाको । किनभने यो फिल्ममा समावेश भएको गीतमा ‘तिम्रो आँखामा बस्ने रहर भो मलाई’ एकदमै हिट भएको थियो । किनभने यो गीतले रेडियो, टेलिभिजन र क्यासेटमा पनि राम्रो कमाइ गरेको थियो । त्यसपछि फिल्म ‘किस्मत’को पनि छ । यो फिल्ममा लेखेको गीत ‘घरि घरि मुसुमुसु मुस्कुराएर मार्यौ’ पनि स्रोता दर्शकले एकदमै माया गरेको गीत हो । यसरी छान्दै जाने हो भने त थुप्रै रहेका छन् । अर्को खलनायक फिल्मको गीत पनि राम्रो लागेको छ ।
पछिल्लो समय गीतसंगीतको अवस्थालाई कसरी हेर्नुभएको छ ?
खोइ, स्रोता दर्शकको मनोभाव बुझेर पनि बुझी नसक्नु छ । कुन गीत कतिखेर मन पर्छ थाहै हुँदैन । कस्तो किसिमको गीत लेख्नुपर्ने हो, बुझ्नै गाह्रो छ । अब ‘सिरुपाते’को गीतकार पनि म नै हुँ । ‘उन भित्र गुन फूल्ने’को गीतकार पनि म नै हुँ । अब आकास जमिनको फरक छ गीतमा । तर स्रोताले दुवै गीतलाई एकदमै मन पराइदिनुभयो । उत्ताउलो शब्दमा बनेका गीतहरु चलिरहेको अवस्थामा मेरा गीतहरु चले ।
गीतसंगीतमा अश्लिलताले ठाउँ ओगटेको छ भन्न खोज्नुभएको हो ?
हो, गीत संगीतमा अश्लिलताले राम्रा सिर्जनाहरु मरिरहेका छन् । यो एकदमै नकरात्मक कुरा हो । गीत भनेको त एउटा लघु कथा हो नि । छोटो शब्दमा धेरै कुरा बोल्नुपर्छ नि गीतले । तर यहाँ गीत चलाउने नाममा, भाइरल हुने नाममा, जथाभावी छाडा शब्दहरु आएका छन् । यसको नियमन गर्ने कुनै संघसंस्था छैन । हालै एउटा लोक तथा दोहोरी गीत प्रतिष्ठानले अरुको ट्रयाकमा गीत गाउन नपाउने भन्ने कुरा उठाएको सुनें । यो राम्रो कुरा सुनें । पहिला पनि गीत संगीत सेन्सर हुन्थ्यो । अहिले त्यो पनि छैन । यो नियमन गर्नुपर्छ भन्ने लाग्छ ।
अन्त्यमा तपाईंको कुन सिर्जना आउने तयारीमा छ ?
मेरा थुप्रै सिर्जनाहरु बजारमा आउने तयारीमा छन् । म र रेखा थापाले १४ वर्षको अन्तरालमा फिल्म ‘उपहार’मा सहकार्य गरेका छौं । त्यस गीतमा समावेश गीत ‘वा वा वा’सार्वजनिक भइसकेको छ । जुन गीत स्रोता दर्शकले मन पराइदिइराख्नुभएको छ । अहिले यसैको प्रमोसनमा पनि लागेको छु ।
तिलु शर्मा पौडेल/मध्यान्ह
दोहा, कतार : सञ्चारकर्मी, सर्जक तथा लोक दोहोरी गायक अमित विश्वकर्माले ‘मनकी रानी गुल्मी बजारमा’ पञ्चेबाजा गीत बजारमा ल्याएका छन् । विश्वकर्माकै शब्दमा रहेको गीतमा स्वर अमितसँगै गायिका सुनिता बुढा क्षेत्रीको रहेको छ । विकास अनुरागी विश्वकर्माको लय रहेको गीतको म्युजिक भिडियो अमित विश्वकर्मा युट्युब च्यानलबाट सार्वजनिक गरिएको छ ।
आशिष अविरलले संगीत संयोजन गरेको गीतको भिडियोमा दीप सागर र जुना गुरुङको आकर्षक अभिनयसहितको नृत्य रहेको छ । दुर्गा पौडेलको छायाँकन र निर्देशन रहेको भिडियो मंगला गाउँपालिका ३ बरंजा, खानीगाउँ घाम्ताङमा छायाँकन गरिएको हो । गीतको म्युजिक भिडियोमा बरंजाको ऐतिहासिक पर्यटकीय स्थल चिनाकोत धुरी (बाइसे, चौबिसे राजाको दरबारका भग्नावशेष रहेको ठाउँ)लाई समेत समावेश गरिएको छ । गुल्मी र बेनी बजारका मायालु जोडिएको प्रेमका भावहरूलाई गीतमा व्यक्त गरिएको छ ।
चिनाकोटको प्रचार प्रसारमा सहयोग पुगोस् भन्ने हेतुले चिनाकोट धुरीमै पुगेर गीतको भिडियो निर्माण गरिएको गायक विश्वकर्माले बताए । गीतको भिडियोमा गायक तथा मोडल ध्रुव जिसी, गायक रवि कार्की, विजुन केसी, भलिबल प्रशिक्षक तेजेन्द्र बानियाँ, सर्जक कलाधर कँडेल, गोकुल विश्वकर्मा, गायक जीवन कार्की लगायतलाई पनि देख्न सकिन्छ ।
तिलु शर्मा पौडेल/मध्यान्ह
दोहा, कतार : कतारमा रहेको र नेपाली व्यवसायीले सञ्चालन गरेको एक मात्र एसियाना दोहोरीसाँझ तथा गजल बारमा शुक्रबार 'एड्भान्स क्रिसमस सांस्कृतिक धमाका' हुने भएको छ । उक्त धमाकामा दोहोरीसाँझमा रहेका कलाकारसँगै नेपालबाट आमन्त्रित कलाकारहरूले प्रस्तुति दिने सञ्चालकले जानकारी दिए ।
नेपालबाट आमन्त्रित कलाकारहरूमा पछिल्लो समयकी चर्चित गायिका समीक्षा अधिकारी र तुलसी प्रसाद सिवाकोटी रहेका छन् । प्रवेश शुल्क पचास कतारी रियाल कायम गरिएको कार्यक्रममा कलाकारद्वयले कतारवासी नेपालीहरूलाई निमन्त्रणा गरेका छन् । शुक्रबार दिउँसो २ बजेबाट गेट खुला रहने कार्यक्रम दिउँसो ४ बजेबाट शुरु हुनेछ भने राती अबेर सम्म चल्ने छ ।
शुक्रबार सार्वजनिक बिदाको दिन र एक हप्ताको कामको थकावट मेट्न र चाडबाडसँगै विशुद्ध मनोरञ्जन प्रदान गर्ने हेतुले कार्यक्रम आयोजना गरिएको आयोजकले जनाएको छ ।
काठमाडौं : साम्राट बस्नेतको निर्देशनमा बन्न लागेको नयाँ फिल्म ‘कंगारु’मा कलाकारको लाइनअप बलियो बन्दै गएको छ । राजिब गुरुङ ‘दीपक मनाङे’को प्रस्तुतिमा तयार हुन लागेको यो फिल्ममा केही दिनअघि कलाकार केदार घिमिरे ‘माग्ने बुढा’ले साइन गरेका थिए ।
केदारको प्रवेशसँगै फिल्मको अर्को प्रमुख पात्रमा अर्पण थापाले पनि साइन गरेका छन् । थापा र यो फिल्मको निर्माण पक्षबिच आज औपचारिक रूपमा सम्झौता भएको हो ।
यो फिल्मलाई सस्पेन्स, थ्रीलर र कमेडी जनरामा निर्माण गर्न लागिएको छ । यसअघि उनले निर्देशन गरेको फिल्म ‘लाखे’लाई एक्सन जनरामा निर्माण गरिएको थियो । फुलमुन मोसन पिक्चर्स र उत्तरगया म्युजिक एन्ड फिल्मसँग आस्याप इन्टरटेन्मेन्टको सहकार्यमा यो फिल्म निर्माण हुन लागेको हो । फिल्ममा प्रेम थापा, धन बहादुर गुरुङ र लक्ष्मी राई निर्माताको रुपमा छन् ।
फिल्मको सह–निर्मातामा रोनिश बहादुर बस्नेत छन् । टीका भण्डारी र सन्तोष अधिकारी (अष्ट्रेलिया) कार्यकारी निर्माता रहेको फिल्मको लाइन प्रोड्यूसरमा आस्याप इन्टरटेन्मेन्ट (अष्ट्रेलिया) रहेको छ ।
फिल्ममा सीमा गुरुङको कथा, महेश दवाडीको पटकथा छ । फिल्म निर्माणमा लक्ष्मी ज्वेलर्स यूकेले पनि सहकार्य गरेको छ । फिल्मका प्रोडक्सन डिजाइनर दिलीप पन्त छन् । निर्देशक बस्नेतले कंगारुमा केही फरक कथा भन्न मन लागेको र दर्शकले फरक स्वादमा हेर्न पाउने बताएका छन् ।
काठमाडौं : नेपालका वरिष्ठ गायक, गायिका र नेपाली भाषी भुटानी समुदायका चर्चित कलाकारको सहभागितामा अमेरिकाको पेन्सिलभेनिया राज्यको ह्यारिसवर्गमा बृहत् सांगीतिक समारोह आयोजना गरिएको छ । इन्ट्रा नेशनल वेलफेयर एण्ड सपोर्ट फाउण्डेशन अफ अमेरिकाद्वारा आयोजित ‘इन्ट्रा कल्चरल इभेन्ट–२०२३’ मा नेपालका वरिष्ठ कलाकारहरुले प्रस्तुति दिएका छन् ।
कार्यक्रममा वरिष्ठ संगीतकार न्ह्यू बज्राचार्य, गायक एवं संगीतकार कालिप्रसाद बाँस्कोटा, गायिका प्रविसा अधिकारी, दोहोरीगीत प्रस्तोता कृष्ण कँडेल तथा गायक विमल डाँगी र निशा विश्वकर्माको प्रस्तुतिले अमेरिकामा रहेका नेपाली भाषी दर्शकलाई मनोरञ्जन दिएको थियो ।
समारोहमा नेपाली गीतमा ह्यारिसवर्ग, ल्यान्क्यास्टर र स्क्रान्टन सहरका इन्ट्रा संगीत एवं नृत्य विद्यालयका बालबालिका र किशोरकिशोरीको प्रस्तुति एवं ती सहरका स्थानीय नेपाली कलाकारका सांस्कृतिक प्रस्तुति निकै रोचक थिए ।
त्यसैगरी गायक केशव पौडेल, मुस्कान मगर, जीवन गुरुङ तथा मोडल एवं नृत्य प्रशिक्षक शंकर विसी, पार्वती राई र रुपेस उप्रतीको सांगीतिक प्रस्तुतिले पनि यहाँ उपस्थित रहेका नेपाली भाषीलाई थप मनोरञ्जन दिएको थियो ।
कार्यक्रममा पेन्सिलभेनिया राज्यका सांसदहरु प्याटी किम, डेभिड मेड्सेन र जस्टिन फ्लेमिङ्ग एवं यहाँका स्थानीय सङ्घसंस्थाका प्रतिनिधिको पनि उपस्थिति रहेको थियो ।
कार्यक्रमको उद्घाटन गर्दै इन्ट्रा–फाउण्डेसनका अध्यक्ष डिल्ली अधिकारीले संसारभरकै नेपाली जातिलाई कला र संस्कृतिका माध्यमबाट एकसूत्रमा बाँध्न सकिने र सांस्कृतिक एकताको अभियान नै चलाएर नेपालीहरुको मनलाई जोड्न सकिने भएकाले समयसमयमा यस्ता कार्यक्रम गर्ने गरेको बताए ।
फाउण्डेसनका निर्देशक ओम गुरुङले नेपाली भाषा, संस्कृति मानेका कारण नै भुटानबाट लखेटिएर आफ्नो पितृभूमि नेपाल पुग्दा शरणार्थी बन्न बाध्य हुनुपरेकाले अमेरिका आएर पनि आफ्नो नेपाली जातीय पहिचानलाई अघि बढाइरहेको जानकारी दिए ।
गैरआवासीय नेपाली सङ्घ अमेरिकाका अध्यक्ष डा अर्जुन बञ्जाडे र भुटानिज कम्युनिटी इन ह्यारिसवर्गका अध्यक्ष तिलक निरौलालेले संस्कृतिका माध्यमबाट अमेरिकामा नेपाली पहिचानलाई जीवन्त राख्न गरिएको प्रयासको प्रशंसा गरे ।
नेपाल र अमेरिकाको राष्ट्रिय गानबाट सुरु भएको सो सांगितीक कार्यक्रममा स्थानीय कलाकारहरुले लोक तथा आधुनिक गीत, टप्पा र साकेला नृत्यसमेत प्रस्तुत गरेर नेपालको पहिचानलाई अमेरिकी नेपालीबीच प्रस्तुत गरेका थिए ।
काठमाडौं : पुस २७ गते रिलिज हुने घनश्याम लामिछाने निर्देशित 'चित्रा'ले १० वर्षमुनिका बालबालिकाले यो फिल्म सित्तैमा हेर्न पाउने घोषणा गरेको छ । फिल्ममा डेब्यू गरेका अभिनेता सन्तोष अधिकारी, अर्पण थापा, प्रमोद अग्रहरी, शुभेक्षा खड्का, मेनुका प्रधान, सिम्रन खड्का, अञ्जना बराइली, प्रकाश घिमिरे तथा बालकलाकार आयुशी ढकालको प्रमूख भूमिका रहेको छ।
फिल्मले बाबुछोरीको मार्मिक कथा पेस गर्ने भएकाले निर्माण पक्षले यस्तो घोषणा गरेको हो । टिकट १० वर्ष मुनिका बालबालिका लागि निःशुल्क भएपनि अभिभावकका लागि भने शुल्क लाग्ने छ। यो सँगै 'चित्रा' नाम भएकी बालिकाले सोको प्रमाण पेस गरेमा ३ वटा टिकट नि:शुल्क पाउने घोषणा फिल्मका कार्यकारी निर्माता सन्तोष अधिकारीले जानकारी दिए ।
उनले यो घोषणा व्यापारिक रणनीतिका लागि मात्र नभइ आफ्नो फिल्म धेरैभन्दा धेरै दर्शकहरुले हेरुन् भन्ने उदेश्यसँगै नेपाली बालबालिकाहरुलाई सानैदेखि नेपाली फिल्म हेर्नुपर्छ र साँच्चै राम्रा नेपाली फिल्मको कमी छैन भन्ने सन्देशका लागि गरिएको बताए । 'यसले नेपाली फिल्मको प्रवर्द्धनमा सहयोग पुग्ने मेरो विश्वास छ । यसका साथै यसले प्रस्तुत गरेको कथा पारिवारिक छ र आमाबाबु तथा सन्तानले यसलाई एकसाथ हेर्नुहोस् भन्ने चाहनाले यस्तो घोषणा गरेको हुँ', उनले भने, 'म आफू पनि एक सन्तानका पिता भएकाले यस्तो गरेको हुँ ।'
'चित्रा'लाई आशिष थापा मगरले निर्माण गरेका हुन् । फिल्ममा अजय अधिकारीको कथा र मनिष गौतमको पटकथा रहेको छ भने संगीतकार राजनराज शिवाकोटी हुन् । महेश पौडेलले छायाँकन गरेको फिल्ममा बनिश शाह र सन्देश शाहको संयूक्त सम्पादन रहेको छ । फिल्ममा पार्श्व संगीत शैलेश श्रेष्ठको छ ।
सन्तोष अधिकारी फिल्म्सको ब्यानर एवम् अस्याप इन्टरटेन्मेन्ट नेपाल र अस्ट्रेलियाको निर्माणमा तयार भएको फिल्मलाई केदार पराजुलीको श्री कृष्ण फिल्म्सले वितरण गर्नेछ । यस्तै फिल्मको अष्ट्रेलियाको अधिकार अविनास रोका मगरले लिएका छन् ।
काठमाडौं : लोक दोहोरी, लोक पप तथा आधुनिक गीत–संगीत क्षेत्रमा चर्चित नाम हो, गीता भट्टराई । नवलपुर मध्यविन्दु नगरपालिका वडा नं ८ मा बुबा रामप्रसाद आचार्य र आमा इन्द्रादेवी आचार्यको कोखबाट जन्मिएकी गायिका भट्टराईलाई सानैदेखि गीत–संगीतमा रुची थियो । गीता सानैदेखि घरका काम गर्दा, बाटोमा हिँड्दा पनि गीत गुनगुनाउने गर्थिन् । सानैदेखिको रुचीलाई वास्तविकतामा परिणत गर्न धेरै मिहिनेत गरिन् गीताले । आफ्नो गायिका बन्ने धोको पूरा गर्न उनले संगीत पनि सिकिन् । संगीत सिकेर यो क्षेत्रमा होमिएकी गायिका भट्टराईले पछाडि फर्किएर हेर्नु परेको छैन ।
काठमाडौंको बनस्थली बस्दै आएकी गायिका भट्टराई विद्यालयमा हुने हरेक कार्यक्रममा गायनका लागि तम्तयार भएर बस्थिन् । विद्यालयका कार्यक्रममा आफ्नो गायनको प्रतिभा देखेर विद्यालयका शिक्षक, शिक्षिका तथा साथीहरुले बेजोड प्रशंसा गर्ने गरेको उनले सुनाइन् । गायन कौशल राम्रो भएकै कारण उनी विद्यालयका कार्यक्रममा विभिन्न पुरस्कारबाट पुरस्कृत हुन्थिन् ।त्यस्ता कार्यक्रममा उनी प्रथम, द्वितीय तथा तृतीय हुन्थिन् ।
२०६८ सालबाट औपचारिकरुपमा गीत–संगीत क्षेत्रमा लागेकी गायिका भट्टराईले हालसम्म एक सय वटा भन्दा बढी गीत बजारमा ल्याइसकेकी छिन् । उनका ‘चन्द्रागिरि घुम्न जाँदा’, ‘स्विट्जरल्यान्ड घुम्न जाँदा’, ‘माया जालमा परें’, ‘रेलको साँचो रेलैले भाँच्यो’, ‘भुल्न गाह्रो भो’, ‘ए ठूले’, ‘नक्कलीले खायो मेरो देश’, ‘मेरो प्यारा परदेशी भूमिमा’, ‘मोतीराम र जमुना’, ‘बिहे गर्ने भन्दाभन्दै जोवन ढल्क्यो’ लगायतका गीत दर्शक स्रोतामाझ चर्चित छ । उनको आफ्नै रचना, लय र स्वर रहेको ‘ए ठूले’ बोलको गीत झण्डै करोड क्लबमा पुग्न सफल भएको छ । गायिका भट्टराईको पछिल्लो पटक सार्वजनिक भएको ‘चोखो मायामा’ बोलको गीत पनि दर्शक स्रोताले रुचाएका थिए । उनको उक्त गीत युट्युबको ट्रेन्डिङमा पनि आएको थियो । साथै आफू अहिले नयाँ गीत सार्वजनिक गर्ने तयारीमा रहेको पनि उनले सुनाइन् । हाल उक्त गीतको रेकर्डिङको काम भइरहेको उनले बताइन् । उनले लोक दोहोरी, लोक पप, तीज, रक, आधुनिकलगायतका विभिन्न विधाका गीतमा आफ्नो सुमधुर स्वर दिएकी छिन् भने सबै विधामा सफलतासँगै चर्चा कमाउन सफल भएकी छिन् । गायनसँगै गायिका भट्टराईले केही म्युजिक भिडियोमा अभिनय पनि गरेकी छिन् । आफ्नो मुख्य विधा गायन नै भएपनि नयाँ केही गर्ने उत्साह र इच्छाका कारण मोडलिङ गरेको उनी बताउँछिन् ।
दर्शक स्रोताले माया गरेकै कारण देश तथा विदेशमा हुने विभिन्न कार्यक्रममा उनको माग पनि उत्तिकै छ । गायिका भट्टराईले देशका विभिन्न जिल्ला तथा विदेशमा आफ्नो प्रस्तुतिबाट दर्शक स्रोताको मन जितिसकेकी छिन् । गायिका भट्टराईले कतारमा लोक दोहोरी प्रतिष्ठान दोहा, कतारले आयोजना गरेको कार्यक्रम तथा भारतीय दूतावासले कतारमा आयोजना गरेको कार्यक्रममा पनि सांगीतिक प्रस्तुति दिइसकेकी छिन् । सन् २०२२ मा कतारमा आयोजित फिफा विश्वकप फुटबलको अवसरमा विभिन्न भारतीय तथा नेपाली समाजले गरेका कार्यक्रमहरुमा गायिका गीताले नेपालको राष्ट्रिय झण्डा बोकेर आफ्नो प्रस्तुति दिएकी थिइन् ।
लोकसंगीत बहुउद्देश्यीय सहकारी संस्थाको संस्थापक सदस्य, लोकदोहोरी प्रतिष्ठानको आजीवन सदस्य तथा सहयात्रा नेपालको मानार्थ सदस्यसमेत रहेकी गायिका भट्टराई आफ्नो प्रस्तुतिले दर्शक स्रोताको मुहारमा खुसी ल्याउँदा जस्तो आनन्दको अनुभूति अन्य केही गर्दा नपाइने बताउँछिन् । दर्शक स्रोताको मायाले नै आफूलाई यस क्षेत्रमा झनै क्रियाशील भएर लाग्न उत्प्रेरित गरेको उनको भनाइ छ ।
एक दशक लामो सांगीतिक यात्रमा गायिका भट्टराई विभिन्न अवार्डबाट सम्मानित पनि भएकी छिन् । उनले ‘जमुना र मोती’ बोलको गीतबाट ‘सहयात्रा तीज म्युजिक अवार्ड २०७५’मा सर्वोत्कृष्ट अवार्ड, ‘मेलोडी म्युजिक अवार्ड २०७७’मा सर्वोत्कृष्ट गायिका, ‘ए ठूले’ बोलको गीतबाट ‘हिमालयन इन्टरनेशनल नेपाली म्युजिक अवार्ड २०७८’मा सम्मान, ‘माया जालमा परें’ बोलको गीतबाट ‘स्टार इन्टरनेशल अवार्ड २०७८’मा उत्कृष्ट अवार्ड, ‘चन्द्रागिरि घुम्न जाँदा’ बोलको गीतबाट ‘तेस्रो एपिक म्युजिक अवार्ड २०७८’मा सम्मान पाएकी छिन् ।
गत साउनमा राजधानीको भृकुटीमण्डपमा आयोजना गरिएको जनचेतनामूलक सांगीतिक कार्यक्रममा गायिका भट्टराईले हजारौं दर्शकहरुलाई आफ्नो सुमधुर स्वरले मन्त्रमुग्ध बनाइन् । हजारौं दर्शक स्रोताहरुबाट वाहवाही कमाइन् ।
मिहिनेत, लगनशीलता तथा दृढ संकल्प लिएर अगाडि बढेमात्र जिन्दगीमा सफलता पाइने बताउने गायिका भट्टराईले यही मूलमन्त्रका साथ सांगीतिक क्षेत्रमा सफलता हासिल गरेकी छिन् । आफ्नो गायिका बन्ने सपना पूरा गरेकी उनले यस क्षेत्रमा आउने नयाँ प्रतिभाहरुको सपना पूरा गर्नका लागि प्रशिक्षण दिँदै आएकी छिन् । साथै गायिका भट्टराईले विभिन्न गायन प्रतियोगिताहरुमा निर्णयकको भूमिका पनि निभाउँदै आएकी छिन् । पछिल्लो समय गत असोजमा तीजको अवसर पारेर हेटौंडामा भएको तीज गीत प्रतियोगिता एवम् महोत्सवमा पनि गायिका भट्टराईले निर्णायकको भूमिका निभाएकी थिइन् । गायिका भट्टराईले युनिभर्सल टेलिभिजनमा तीज विशेष कार्यक्रम पनि सञ्चालन गरेकी थिइन् । सांगीतिक क्षेत्रमा लाग्ने बाल्यकालको इच्छा, सांगीतिक क्षेत्रमा गरेको संघर्ष र अहिले संगीत प्रशिक्षण दिनेसम्मको यात्रा सम्झिँदा गायिका भट्टराई निकै खुसी महसुस गर्छिन् ।
भविष्यमा पनि गीत संगीतकै माध्यमबाट देश र जनताका साथै दर्शक स्रोताहरुलाई मनोरञ्जन प्रदान गर्नु नै आफ्नो मुख्य लक्ष्य रहेको गायिका भट्टराईले बताइन् । गीत–संगीत नै आफ्नो जिन्दगी रहेको र बाँचुञ्जेल यसै क्षेत्रमा क्रियाशील भइरहने गायिका भट्टराईको अठोट छ । मिहिनेत गर्नेलाई गीत–संगीतमा करियर बनाउन गाह्रो नभएको तथा यसै क्षेत्रबाट नाम र दाम दुबै कमाउन सकिने बताउँदै गायिका भट्टराई गीत–संगीत क्षेत्रमा प्रवेश गर्नेहरुलाई प्रशिक्षण लिएर र पूर्णरुपमा केही गर्छु भन्ने अठोट लिएर मात्र आउन सुझाव दिन्छिन् । साथै गायिका भट्टराई गीतका अन्य विधासँगै नेपालको मौलिक लोक भाकालाई बचाइराख्नुपर्नेमा जोड दिन्छिन् । लोक भाकाको संरक्षणसँगै नेपालको गीत–संगीत क्षेत्रको उत्थानका लागि सरकारले विषेश पहल गर्नुपर्ने उनी बताउँछिन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies