दिलमाया शाही/मध्यान्ह
जुम्ला : जुम्ला रारा अल्ट्रा म्याराथनको महिलातर्फको उपाधि खोटाङकी प्रिया राईले जितेकी छन् । जुम्ला सदरमुकाम खलंगादेखि रारातालसम्मको ४९ किलोमिटर दुरी प्रियाले ६ घण्टा ७ मिनेट ५७ सेकेन्डमा पार गर्दै प्रथम स्थान हासिल गरेकी हुन् । राईले अन्य देशहरूमा नेपालको प्रतिनिधित्व गर्दै पदक समेत दिलाउँदै आएकी छन् ।
महिलातर्फ जुम्लाकी राज्यलक्ष्मी रावलले ६ घण्टा १५ मिनेट ९ सेकेन्डको टाइमिङ निकाल्दै दोस्रो भएकी छन् । त्यस्तै तिला गाउँपालिका जुम्लाकी अनिता बुढा ६ घण्टा ३३ मिनेट ३४ सेकेन्डमा निर्धारित दुरी पार गर्दै तेस्रो भएकी छन् ।
त्यस्तै पूरुषतर्फको उपाधि जुम्लाका धिरबहादुर बुढाले जितेका छन् । धिरबहादुरले जुम्ला सदरमुकाम खलंगादेखि रारातालसम्मको ४९ किलोमिटर दुरी ४ घण्टा ५७ मिनेट ३१ सेकेन्डमा पार गरेरका हुन् । त्यस्तै पुरुषतर्फ जुम्लाकै दलबहादुर कुँवर र शेरबहादुर बुढाले क्रमशः दोस्रो र तेस्रो स्थान ल्याएको कर्णाली स्पार्ट्से क्लब जुम्लाका अध्यक्ष सरोज शाहीले बताए । उनका अनुसार दलबहादुरले ५ घण्टा १२ मिनेट ४० सेकेन्डको टाइमिङ निकाले भने शेरबहादुरले ५ घण्टा १८ मिनेट ३५ सेकेन्डमा उक्त दुरी पार गरेका थिए ।
आयोजकका अनुसार म्याराथनमा ४ विदेशी खेलाडीसहित ५४ जना दौडिएका थिए । कर्णाली स्पार्ट्से क्लब जुम्लाको आयोजनामा भएको जुम्ला रारा अल्ट्रा म्याराथन युवा तथा खेलकुदमन्त्री विराजभक्त श्रेष्ठले उद्घाटन गरेका थिए । म्याराथनमा सोलुखुम्बु, खोटाङ, रुकुम पूर्व, कालीकोट, मुगु, ओखलढुंगा, सिन्धुपाल्चोकका र जुम्लाका धावकले भाग लिएको कर्णाली स्पार्ट्से क्लब जुम्लाले जनाएको छ ।
म्याराथनमा प्रथम हुनेलाई १ लाख रुपैयाँ नगदसहित मेडल र प्रमाणपत्र, दोस्रो हुनेलाई ७५ हजार र तेस्रो हुनेलाई ५० हजार रुपैयाँ दिइएको छ । म्याराथनमा सहभागी हुन सार्क राष्ट्रका धावकलाई १४ हजार ५ सय, अन्य राष्ट्रका धावकलाई १६ हजार, नेपाली धावकका लागि ७ हजार र स्थानीय धावकका लागि ५ हजार दर्ता शुल्क तोकिएको थियो ।
शिव विक/मध्यान्ह
काठमाडौं एसीसी प्रिमियर कपअन्तर्गत नेपालले आफ्नो दोस्रो खेलमा कतारलाई ३२ रनले पराजित गर्दै प्रतियोगितामा दोस्रो जित निकालेको छ । नेपाललाई जित दिलाउने क्रममा दीपेन्द्र सिंह ऐरीले अलराउण्ड प्रदर्शन गरे । टल जितेर पहिले ब्याटिङ गरेको नेपालले १९ ओभरमा ७ विकेट गुमाएर १७४ रन बनाएको थियो, क्रिजमा थिए दीपेन्द्र र सोमपाल कामी । २०औं ओभरमा स्ट्राइकमा रहेका दीपेन्द्रले ओभरका सबै ६ बलमा ६ छक्का प्रहार गरे । योसँगै उनले एकै ओभरमा ६ छक्का हान्ने विश्व कीर्तिमान बनाएका छन् ।
दीपेन्द्र नेपालबाट कुनैपनि अन्तर्राष्ट्रिय क्रिकेटमा एकै ओभरमा ६ छक्का हान्ने पहिलो खेलाडी समेत बने । यसअघि दीपेन्द्रले सेप्टेम्बरमा मंगोलियाविरुद्ध टी–२० आईमा दुई फरक ओभरमा लगातार ६ बलमा ६ छक्का हानेका थिए । सो खेलमा दीपेन्द्रले ९ बलमै क्रिकेट इतिहासकै सर्वाधिक छिटो अर्धशतक प्रहार गरेका थिए ।
तर विश्व क्रिकेटमा भने दीपेन्द्र एकै ओभरमा ६ छक्का हान्ने पाँचौं खेलाडी बने । दीपेन्द्रअघि दक्षिण अफ्रिकाका हर्सल गिब्स, भारतका युवराज सिंह, वेस्ट इन्डिजका काइरन पोलार्ड र अमेरिकाका जसकरण मलहोत्राले एकै ओभरमा ६ छक्का हान्ने विश्व रेकर्ड राखिसकेका छन् ।
हर्सलले एक दिवसीय अन्तर्राष्ट्रिय खेलमा सन् २००७ को विश्वकपमा नेदरल्यान्ड्सविरुद्धको खेलमा उक्त कीर्तिमान बनाएका थिए । युवराजले सन् २००७ को टी–२० विश्वकपमा इंग्ल्यान्डविरुद्ध एकै ओभरमा ६ छक्का बनाएका थिए । पोलार्डले श्रीलंकाविरुद्धको खेलमा ६ छक्का प्रहार गरेका थिए । मल्होत्राले पनि पपुवा न्युगिनीविरुद्धको एक दिवसीय खेलमा त्यस्तै कीर्तिमान बनाएका थिए ।
रामबहादुर थापा/रासस
गण्डकी : नेपाल भलिबल सङ्घद्वारा गत चैत पहिलो साता काठमाडौंमा आयोजित आठौँ ‘एनभिए भलिबल च्याम्पिएनसिप’का तीन स्पर्धामा रवि केसी उत्कृष्ट खेलाडी घोषित भएका थिए । गण्डकी प्रदेश टिमबाट खेलेका रविका लागि सम्भवतः उक्त प्रतियोगिता नै उनको भलिबल करिअरको अन्तिम प्रतियोगिता हुनेछ ।
भलिबलका उदीयमान प्रतिभा रवि टिम र देशका लागि उत्कृष्ट खेल्दाखेल्दै भलिबलबाट हात धुन विवश बनेका छन् । देशभित्रका कैयन प्रतियोगितादेखि गत वर्ष बंगलादेशमा भएको ‘बङ्गबन्धु एसियन यु–२३ सेन्ट्रल एसियन जोन अन्तर्राष्ट्रिय पुरुष भलिबल प्रतियोगिता’मा राष्ट्रिय टिमबाट खेलेका उनी केही दिनअघि वैदेशिक रोजगारीका लागि जापान पुगेका हुन् ।
तीन वर्षअघि ‘एनभिए भलिबल च्याम्पिएनसिप’ खेल्दै राष्ट्रियस्तरको प्रतियोगितामा डेब्यु गरेका प्रभावशाली ओपन स्पाइकर रविले भलिबल करिअरलाई बिट मार्दै विदेशिएका हुन् । राष्ट्रिय टिमबाट भलिबल खेल्ने सपना पूरा नभएपछि भविष्य सोचेर नयाँ बाटो तय गरेको उनले सुनाए । “भलिबलमा राम्रै भइरहेको थियो, प्रतियोगिता पनि खेलिरहेको थिएँ”, २४ वर्षीय रविले भने, “राष्ट्रिय टिमबाट खेल्न पाएको भए अझै केही वर्षसम्म भलिबल खेलिन्थ्यो होला, त्यो अवस्था नभएपछि भविष्य सोचेर विदेश जाने निर्णय लिएँ ।”
उनले राष्ट्रिय टिममा पर्न सके पुनः भलिबलमा फर्कने सोच बनाएको बताए । “केही महिनामा राष्ट्रिय टिमको छनोट हुन्छ, हेरौँ खेलाडीको सूची कसरी आउँछ”, रविले भने । गत वर्ष भलिबलको क्लोज क्याम्पमा परे पनि उनी राष्ट्रिय टिममा छनोट हुनसकेका थिएनन् । छोटो अवधिमै भलिबलमा चम्मेका रवि फेरि कोर्टमा फर्केलान्, नफर्केलान् तर खेलप्रेमीले भने उनलाई पछिसम्म सम्झनेछन् ।
बागलुङको गलकोट नगरपालिका–७ मल्ममा जन्मेका रवि कुनै औपचारिक प्रशिक्षणबिनै भलिबलमा उदाएका प्रतिभा हुन् । चौध–पन्ध्र वर्षको उमेरदेखि गाउँका कुनाकन्दरामा भलिबल खेल्दै, सिक्दै अगाडि बढेका रविले देशको जर्सीमा अन्तर्राष्ट्रिय प्रतियोगितासमेत खेल्न भ्याए । गाउँठाउँमा लोकप्रिय पनि रहेको र सानैदेखि अरुले खलेको देख्दा भलिबलतिर रुचि जागेको उनले सुनाए ।
दुई वर्षअघि बङ्गलादेशको राजधानी ढाकामा भएको ‘बङ्गबन्धु एसियन यु–२३ सेन्ट्रल एसियन जोन अन्तर्राष्ट्रिय पुरुष भलिबल प्रतियोगिता’का खेल्न पाउनुलाई उनले करिअरकै महत्त्वपूर्ण अवसरका रुपमा सम्झन्छन् । त्यो उनले देशका लागि खेलेको एकमात्र प्रतियोगिता हो । अन्य प्रतियोगिताका सिलसिलामा भने रवि मलेसिया र हङकङ पनि पुगेका थिए । “राष्ट्रिय टिमबाट देशका लागि खेल्ने ठूलो सपना थियो, तर पूरा हुनसकेन, क्लोज क्याम्पमा परेर पनि छनोटमा परिनँ”, उनले भने, “नेपाल भलिबल सङ्घले नयाँ खेलाडीलाई पनि स्थान दिनुपर्छ ।”
रविले नेपालमा हुने राष्ट्रियस्तरका प्रतियोगितामा राम्रो प्रदर्शन गर्दै आएका थिए । अधिकांश खेलमा उनी उत्कृष्ट खेलाडी घोषित हुन्थे । गत वर्ष पोखरामा भएको तेस्रो संस्करणको टाइगर कपमा सर्वोत्कृष्ट खेलाडीका रुपमा उनले रु २५ हजार र ट्रफी हात पारेका थिए । त्यसयताका प्रतियोगितामा पनि उनले सफलता जारी राखे ।
यसै वर्ष वीरगञ्ज स्मृति कप, लामाचौर कप र प्रदेशी हातेमालो सोसाइटीले हङकङमा आयोजना गरेको प्रतियोगितामा पनि उनी उत्कृष्ट खेलाडी घोषित भएका थिए । रविले हालै सुर्खेतमा भएको ३४औँ राष्ट्रिय भलिबल प्रतियोगिता र पोखरामा आयोजित चौँथो टाइगर कपमा गण्डकी प्रदेश टिमबाट खेलेका थिए । उनले गलकोट भलिबल टिमबाट पनि दर्जनौँ प्रतियोगिता खेल्दै टिमलाई जित दिलाएका थिए ।
गण्डकी प्रदेश भलिबल टिमका प्रशिक्षक रमेश केसीले हरेक प्रतियोगितामा रविले उत्कृष्ट प्रदर्शन गर्ने गरेको स्मरण गरे । उमेरले जुनियर खेलाडी भए पनि उचाइ र जम्पले केसीलाई साथ दिएको उनको भनाइ छ । “विपक्षी खेलाडीभन्दा धेरै माथिबाट रविले शक्तिबाली स्पाइक गर्न सक्छन्, उनको बलियो पक्ष भनेको हाइट र जम्प गर्न सक्ने क्षमता हो”, केसीले भने । रवि राष्ट्रिय टिममा पर्न योग्य खेलाडी रहेको उनको भनाइ छ ।
छोटो समयमै रविले भलिबलमा आफूलाई प्रमाणित गरेका थिए । व्यावसायिक सुरक्षा र अवसरको सुनिश्चितता भए भलिबलमै समर्पित भएर लाग्ने बताउँदै आएका रविले बाध्यतावश बाटो मोड्नु परेको सुनाए । “नेपालको अवस्था पनि यस्तै छ, खेलाडीको भविष्य सुरक्षित छैन, बाध्यता र भविष्य हेरेर मैले बिदेसिनुपरेको हो”, उनले भने ।
अवसर पाएमा जापानमा पनि भलिबललाई निरन्तरता दिने सोचमा उनी छन् । खेल कौशल सँगसँगै अनुशासनमा पनि उनी अब्बल मानिन्छन् । भलिबलमा चम्किएका रविको बर्हिगमनलाई लिएर खेलप्रेमी भने चिन्तित छन् । उनीहरुले उदाउँदो खेल प्रतिभालाई राज्यले चिन्न नसकेको टिप्पणी गरेका छन् । खेल टिप्पणीकार हेमराज हमालले उत्कृष्ट स्पाइकर रविलाई देशमा टिकाउन नसकिएकामा दुःख व्यक्त गरे । “रवि नेपालकै लागि लामो समय उत्कृष्ट स्पाइकर बन्न सक्थे, बिडम्वना राम्रा खेलाडी प्रतिभाहरु नै विदेश पलायन हुनुपर्ने अवस्था छ”, उनले भने ।
जिल्ला भलिबल सङ्घ, बागलुङका अध्यक्ष योगेश भण्डारीले रवि नेपाली भलिबलको प्रतिभावान खेलाडी रहेको बताए । भलिबलमा करिअर बनाएका धेरै नेपाली खेलाडीहरु विदेश पलायन भइरहेको उनको भनाइ छ । “विभागीय टिममा पर्न सके खेलाडीलाई राम्रै छ, नत्र केही समय खेलेर बीचमै छोड्नुपर्ने अवस्था छ”, उनले भने “राज्यका निकायले पनि खेलाडी संरक्षणको नीति र योजना ल्याउन सकेका छैनन् ।” राज्यले मात्रै सबै खेलाडीको व्यावसायिक सुरक्षाको सुनिश्चितता गर्न नसक्ने हुँदा कर्पोरेट क्षेत्रले पनि लगानी बढाउनुपर्ने अध्यक्ष भण्डारीले बताए ।
काठमाडौं : एसीसी प्रिमियर कपमा नेपालले लगातार दोस्रो जित हात पारेको छ । शनिबार ओमानमा भएको आफ्नो दोस्रो खेलमा कतारलाई ३२ रनले पराजित गर्दै नेपालले लगातार दोस्रो जित निकालेको हो । नेपालले दिएको २११ रनको लक्ष्य पछ्याएको कतारले निर्धारित २० ओभरमा ९ विकेट गुमाउँदै १७८ रन मात्र बनाउन सक्यो ।
कतारका कप्तान मोहम्मद तनवीरले अर्धशतकीय इनिङ खेले । उनले ३३ बलमा ६ चौका र ४ छक्काको सहयोगमा ६३ रन बनाए । यस्तै मोहम्मद अनफले १८ बलमा ४ चौकाको सहयोगमा २३ रन बनाए भने कमरन खानले १३ बलमा १ चौका र १ छक्काको सहयोगमा १८ रन बनाए । अदनन् मिर्जाले ८ बलमा ४ चौकाको सहयोगमा १९ रन बनाउँदा हिमान्शु राठोड १८ बलमा २२ रन बनाउँदै अविजित रहे ।
यसबाहेक कतारका अन्य कुनै पनि ब्याटरले दोहोरो अंकमा रन जोड्न सकेनन् । नेपालका लागि ललित राजवंशी, दीपेन्द्र सिंह ऐरी र गुल्शन झाले समान २-२ विकेट लिए भने अभिनाष बोहोरा र कुशल मल्लले समान १-१ विकेट लिए ।
त्यसअघि टस जितेर पहिलो ब्याटिङ गरेको नेपालले दीपेन्द्र सिंह ऐरीको विस्फोट ब्याटिङमा निर्धारित २० ओभरमा विकेट ७ गुमाएर २१० रन बनाएको थियो । नेपालका लागि दीपेन्द्रले २१ बलमा ७ छक्का र ३ चौका प्रहार गर्दै ६४ रनमा अविजित रहे । दीपेन्द्रले अन्तिम ओभरको ६ बलमा ६ छक्का प्रहार गरेका थिए । यस्तै आसिफ शेखले ५२ रनको अर्धशतकीय पारी खेले उनले ४१ बलको सामना गर्दै ६ चौका प्रहार गरे । कुशल मल्ले १८ बलको सामना गर्दै ३ छक्का र २ चौकाको सहयोगमा ३५ रन बनाएर आउट भए ।
कुशल भुर्तेलले ११ बलको सामना गर्दै २ चौकाको सहयोगमा १२ रन बनाएर आउट भए । कप्तान रोहित कुमार पौडेल १८ बनाउँदा सन्दीप जोरा ७ र गुलसन झाले ५ रनमा आउट भए । कतारका लागि हिमान्शु राठोड र मुसावर शाहले समान ३-३ विकेट लिँदा अमिर फारुकले १ विकेट हात पारे ।
दिलमाया शाही/मध्यान्ह
जुम्ला : कर्णालीबाट राष्ट्रियस्तरको फुटबल खेलमा उदाएका जुम्लाका खेलाडी यौद्धा शाहीको प्रोत्साहनका लागि परिवारले एक करोड १५ लाखको लगानीमा फुटसल ग्राउण्डसहित फुटबल एकेडेमी स्थापना गरिदिएको छ । कर्णालीको राजधानी सुर्खेतमा नयाँ वर्षको अवसरमा एक औपचारिक कार्यक्रम गरी ‘यौद्धा फुटबल एकेडेमी‘ उद्घाटन गरिएको हो ।
जुम्लाको चन्दननाथ नगरपालिका निवासी यौद्धा शाही नेपाली सेनाका जमदारा पदमा छन् । उनी नेपाली सेनामा छिरेपछि फुटबल क्षेत्रमा अग्रसर भएका थिए । उनमा उत्साह थप्न परिवारले एक करोड १५ लाखको लगानीमा फुटसल मैदान नै स्थापना गरी स–साना बालबालिकालाई खेल क्षेत्रमा सीप सिकाउने उद्देश्य राखेको छ । त्रिभुवन आर्मी क्लबका सिनियर खेलाडी यौद्धाको प्रोत्साहनमा सुर्खेतमा स्थापना गरिएको फुटसल मैदानको उद्घटन शाहीका बुबा पृथ्वीबहादुर शाही र आमा मुक्ति शाही तथा कर्णाली प्रदेश खेलकुद परिषदका उपाध्यक्ष प्रमोद हमालले संयुक्तरुपमा गरे ।
उद्घाटन कार्यक्रमा बोल्दै उपाध्यक्ष हमालले कर्णालीमा राष्ट्रिय खेलकुद प्रतियोगिता हुन गइरहेको अवसरमा स्थापना भएको फुटसल मैदानले थप सजिलो हुने बताए । उनले यस मैदानसँग निरन्तर खेलका लागि सहकार्य गर्ने बताए ।
यौद्धाका बुबा पृथ्वीबहादुर शाहीले छोराको खेलमा प्रगति हेर्दा खुशी लागेको बताए । उनले भने, ‘यसमा सबैको सहयोग आवश्यक छ ।’ योद्धाका दाजु द्धोन्द बहादुर शाहीले भाइको खेलप्रतिको लगाब हेरेर पश्चिम नेपालमा खेल शिक्षा र सीप दिने उद्देश्यले एकेडेमीको स्थापना गरिएको बताए ।
फुटबल एकेडेमीको सञ्चालक भने यौद्धाका दिदी उगुना शाही हुन् । उगुनाले भाइको खेलप्रतिको प्रगति र लगाब हेरेर परिवार सबै मिलेर फुटबल एकाडेमी स्थापना गरिएको बताइन् । उनले अहिले भने सिनियर राष्ट्रिय खेलाडी धवाञ्जरले कोचको रुपमा काम गर्ने बताइन् । सञ्चालक उगुनाले कर्णाली प्रदेश उद्योग परिषद परिसंघमा रहेर पनि काम गरिसकेकी छन् । सो फुटसल मैदानमा भर्खरै १३ वर्ष मुनिका खेलाड छनोटसमेत गरिएको छ ।
को हुन् यौद्धा शाही ?
यौद्धा शाही वि.सं २०६० सालमा नेपाली सेनाको सैन्य पदमा प्रवेश गरेका थिए । त्यसपछि शाही त्यसभित्रको त्रिभुवन आर्मी क्लबमा छनोट फुटबल खेल्नका लागि छनोट भएका थिए । तत्कालीन मेजर बिमल बिष्टको थप प्रोत्साहनमा २०६५ सालमा आहा रारा गोल्डकपमा उनले डेब्यू गर्ने अवसर पाए । शाहीले त्रिभुवन आर्मीबाट खेल्दा २०७१ सालमा माई भ्याली गोल्डकप र झापा गोल्डकपमा बेष्ट डिफेन्डर घोषित भएका थिए ।
नेपाल आर्मीको लिग खेल्दै गर्दा खेल राम्रो भएपछि उनलाई फष्ट सुपर लिग धनगढी एफसीले ७५ हजार रुपैयाँमा हायर गरेर खेलायो । यस्तै उनलाई सेकेण्ड लुम्बिनी खेलमा एक लाख २० हजार पारिश्रमिकमा हायर गरिएको थियो ।
यौद्धाले भारतको इन्दिरा गान्धी रंगशालामा नेपाल इन्डियन डुडान कप पनि खलेले । आफ्नो रिटायर्ड जीवन कर्णालीका खेलाडी उत्पादनमा ध्यान दिने उनी बताउँछन् ।
वीरेन्द्र नगरपालिकाभित्र १३ कठ्ठा आठ धुर जग्गामा उक्त खेल मैदान लिजमा लिइ बनाइएको हो । कर्णालीमा वीरेन्द्रनगरमा स्थापना गरिएको उक्त फुटसल मैदानमा चाइनिज म्याट, जाली, कार्यालय कोेठा, हल, चेन्जिङ कोठा स्थापना गरिएको छ ।
काठमाडौं : दीपेन्द्र सिंह ऐरीको विस्फोट ब्याटिङमा नेपालले एसीसी प्रिमियर कप अन्तर्गत आफ्नो दोस्रो खेलमा कतारलाई २११ रनको लक्ष्य दिएको छ । टस जितेर पहिलो ब्याटिङ थालेको नेपालले निर्धारित २० ओभरमा विकेट ७ गुमाएर २१० रन बनायो ।
नेपालका लागि दीपेन्द्रले २१ बलमा ७ छक्का र ३ चौका प्रहार गर्दै ६४ रनमा अविजित रहे । दीपेन्द्रले अन्तिम ओभरको ६ बलमा ६ छक्का प्रहार गरेका थिए ।
यस्तै आसिफ शेखले ५२ रनको अर्धशतकीय पारी खेले उनले ४१ बलको सामना गर्दै ६ चौका प्रहार गरे । कुशल मल्ले १८ बलको सामना गर्दै ३ छक्का र २ चौकाको सहयोगमा ३५ रन बनाएर आउट भए ।
कुशल भुर्तेलले ११ बलको सामना गर्दै २ चौकाको सहयोगमा १२ रन बनाएर आउट भए । कप्तान रोहित कुमार पौडेल १८ बनाउँदा सन्दीप जोरा ७ र गुलसन झाले ५ रनमा आउट भए । कतारका लागि हिमांशु राठोड र मुसावर शाहले समान ३३ विकेट लिदाँअमिर फारुकले १ विकेट हात पारे ।
काठमाडौं : एसीसी प्रिमियर कप टी-२० क्रिकेट प्रतियोगितामा नेपालले विजयी शुरुवात गरेको छ । ओमानमा शुक्रबारदेखि शुरु भएको प्रतियोगितामा मलेसियालाई ५ विकेटले पराजित गर्दै नेपालले विजयी शुरुवात गरेको हो ।
मलेसियाले दिएको १४४ रनको लक्ष्य नेपालले १९.२ ओभरमा ५ विकेट गुमाउँदै पूरा गर्यो । नेपालका आशिफ शेखले सर्वाधिक ३२ रन बनाए । ३५ बल खेलेका उनले ४ चौका प्रहार गरे । कप्तान रोहितकुमार पौडेलले २४ बलमा एक छक्काको सहयोगमा २८ रन बनाए । यस्तै कुशल भुर्तेलले २४ बलमा ३ चौकाको सहयोगमा २४ रन बनाए । दीपेन्द्रसिंह ऐरीले ११ बलमा २ चौका र एक छक्काको सहयोगमा २० रन बनाए ।
गुल्शनकुमार झा ७ बलमा एक चौका र २ छक्काको सहयोगमा १९ रनमा अविजित रहे भने सन्दीप जोरा १२ रनमा अविजित रहे । कुशल मल्ल ६ बलमा ७ रन बनाएर आउट भए । मलेसियाका वीरन्दीप सिंहले सर्वाधिक ३ विकेट लिए भने मोहम्मद वाफिक र पवनदीप सिंहले समान १-१ विकेट लिए ।
त्यसअघि टस जितेर पहिला ब्याटिङ गरेको मलेसियाले निर्धारित २० ओभरमा ३ विकेट गुमाउँदै १४३ रन बनाएको थियो । मलेसियाका कप्तान वीरन्दीप सिंहले अविजित रहँदै सर्वाधिक ७२ रन बनाए । ५७ बल खेलेका उनले ४ चौका र ४ छक्का प्रहार गरे ।
शर्विन मुनिन्दी ४१ र मोहम्मद अमिर १६ रनमा आउट हुँदा नजमुस साकिब ३ रनमा अविजित रहे । नेपालका दीपेन्द्रसिंह ऐरीले सर्वाधिक २ विकेट लिए । ४ ओभर बलिङ गरेका उनले १४ रन खर्चिए । यस्तै, अविनाश बोहराको नाममा १ विकेट रह्यो ।
नेपालको समूहमा मलेसिया, साउदी अरब, हंगकंग र कतार रहेका छन् । नेपालले शनिबार दोस्रो खेलमा कतारको सामना गर्नेछ । समूह बी मा यूएई, कुवेत, ओमान, बहराइन र कम्बोडिया रहेका छन् । ओमान र यूएईले शुक्रबार नै भएको खेलमा जित हासिल गर्दै विजयी शुरुवात गरिसकेका छन् ।
दुवै समूहबाट शीर्ष २ टोलीले सेमिफाइनलमा स्थान बनाउनेछन् । प्रतियोगिताको विजेता मात्र एसिया कपका लागि छनोट हुनेछ ।
काठमाडौं : एसीसी प्रिमियर कपमा मलेसियाले नेपाललाई १४४ रनको लक्ष्य दिएको छ । ओमानमा टस जितेर पहिला ब्याटिङ गरेको मलेसियाले निर्धारित २० ओभरमा ३ विकेट गुमाउँदै १४३ रन बनाएको हो ।
मलेसियाका कप्तान वीरन्दीप सिंहले अविजित रहँदै सर्वाधिक ७२ रन बनाए । ५७ बल खेलेका उनले ४ चौका र ४ छक्का प्रहार गरे । शर्विन मुनिन्दी ४१ र मोहम्मद अमिर १६ रनमा आउट हुँदा नजमुस साकिब ३ रनमा अविजित रहे ।
नेपालका दीपेन्द्रसिंह ऐरीले सर्वाधिक २ विकेट लिए । ४ ओभर बलिङ गरेका उनले १४ रन खर्चिए । यस्तै, अविनाश बोहराको नाममा १ विकेट रह्यो ।
काठमाडौं : एसीसी पुरुष प्रिमियर कप क्रिकेट प्रतियोगिता आजदेखि ओमानमा हुँदैछ । प्रतियोगिताअन्तर्गत आजै नेपालले मलेसियाको सामना गर्नेछ ।
ओमानको राजधानी मस्कटस्थित अल अमिरत क्रिकेट मैदानमा दुई देशबीच हुने यो टी–२० अन्तर्राष्ट्रिय खेल दशौं पटकको हो । यसअघि नेपालले आठ खेल जित्दा मलेसियाले एकमा मात्र विजय हासिल गरेको छ ।
टी–२० ढाँचामा हुने एसीसी प्रिमियर कपमा १० टोलीको सहभागी हुनेछन् । तिनलाई दुई समूहमा विभाजन गरिएको छ । नेपाल समूह ‘ए’मा परेको छ । यो समूहमा नेपाल, हङकङ, मलेसिया, कतार र साउदी अरब छन् ।
समूह ‘बी’ मा बहराइन, कम्बोडिया, कुवेत, ओमान र संयुक्त अरब इमिरेट्स (यूएई) छन् । उक्त प्रतियोगताको उपाधि जित्ने टोलीले एसिया कप खेल्न पाउनेछ ।
खेल तालिकाअनुसार आजै अपराह्न हुने समूह ‘ए’अन्तर्गतको अर्को खेल हङकङ र कतारबीच हुनेछ । नेपाल भोलि कतारसँग र वैशाख ३ गते हङकङसँग भिड्नेछ । समूह चरणको अन्तिम खेल वैशाख ४ गते साउदी अरबसँग हुनेछ । प्रतियोगितामा वैशाख ९ गतेसम्म सञ्चालन हुनेछ ।
नेपाली टोलीमा कप्तान रोहितकुमार पौडेलसहित गुल्सन झा, करण केसी, प्रतिश जिसी, कुशल भूर्तेल, सन्दीप जोरा, विवेक यादव, अविनाश बोहरा, सोमपाल कामी, दीपेन्द्रसिंह ऐरी, ललित राजवंशी, कुशल मल्ल, आसिफ शेख र अनिल साह छन् ।
काठमाडौं : ओमानमा हुने एसीसी प्रिमियर कपका लागि नेपालको १४ सदस्य टोली घोषणा भएको छ । एसियन क्रिकेट काउन्सिल (एसीसी)ले नेपालको अन्तिम १४ सदस्य टोली सार्वजनिक गरेको हो । नेपाली टिममा सबै भारतमा एसएमएस फ्रेन्डसिप कप खेलेका खेलाडी छन् । तर भारत भ्रमणमा परेका तीव्र गतिका बलर आकाश चन्द भने अन्तिम १४ मा पर्न सकेनन् ।
प्रिमियर कप १२ अप्रिलदेखि २१ अप्रिलसम्म ओमानमा हुनेछ । प्रिमियर कपको समूह ए मा नेपाल, मलेसिया, हङकङ, साउदी अरेविया र कतार छन् । समूह बी मा यूएई, कुवेत, बहराइन, ओमान र कम्बोडिया छन् ।
नेपालले पहिलो खेल मलेसियासँग चैत ३० गते खेल्नेछ । यस्तै नेपालले दोस्रो खेल कतारसँग वैशाख १ गते, तेस्रो खेल हङकङसँग वैशाख ३ गते र चौथो खेल साउदी अरेबियासँग वैशाख ५ गते खेल्नेछ । समूहमा शीर्ष दुई टिम सेमिफाइनल पुग्नेछन् । सेमिफाइनल खेल वैशाख ७ गते हुनेछ भने फाइनल खेल वैशाख ९ गते हुनेछ ।
यस प्रतियोगितामा विजेता हुने टिमले सन् २०२५ मा हुने एसिया कप खेल्ने पाउनेछ । यसपटकको एसिया कप टी-२० फर्म्याटमा हुने भएकाले प्रिमियर कप पनि टी-२० फर्म्याटमा नै हुनेछ । यस्तै यस प्रतियोगिताको शीर्ष ३ टिमले एसीसी इमर्जिङ टिम्स एसिया कप खेल्नेछन् ।
नेपालको टिममा रोहित पौडेल (कप्तान), आसिफ शेख, कुशल भुर्तेल, कुशल मल्ल, विवेक यादव, सन्दीप जोरा, अनिल शाह, गुलशन झा, दीपेन्द्रसिंह ऐरी, ललित राजवंशी, करण केसी, सोमपाल कामी, प्रतिश जि।सी र अभिनाश बोहरा रहेका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies