काठमाडौं : आईसीसी क्रिकेट विश्वकप लिग २ अन्तर्गत त्रिवि क्रिकेट मैदानमा भएको दोस्रो खेलमा नेपालले नेदरल्याण्ड्समाथि शानदार जित निकालेको छ ।
शनिबार नेदरल्याण्ड्सले दिएको १३७ रनको सामान्य लक्ष्य नेपालले १५.२ ओभरमा एक विकेटको क्षतिमा भेट्टायो । नेपालका अनिलकुमार साहले ५७ र आसिफ सेखले ५४ रन बनाउँदा कुशल भुर्तेलले २८ रनको योगदान गरे ।
नेपालले टस जितेर फिल्डिङ रोजेपछि ब्याटिङमा आएको नेदरल्याण्ड्स ३९ ओभरमा आलआउट हुँदै १ सय ३७ रन बनाएको थियो ।
काठमाडौं : एसीसी महिला प्रिमियर कप क्रिकेटको सेमिफाइनल खेलमा नेपाल घरेलु टोली मलेसियासँग ४ विकेटले पराजित भएको छ । जितका लागि ११६ रनको विजयी लक्ष्य पछ्याएको मलेसियाले १९ दशमलव ५ ओभरमा ६ विकेट गुमाउँदै पूरा गर्यो । यस हारसँगै तेस्रो पटक एसिया कप खेल्ने नेपालको सपना अधुरै भएको छ ।
मलेसियाको जितमा एल्सा हन्टरले सर्वाधिक ६९ रनको योगदान दिइन् । उनले ५३ बलमा ६ चौकासहित ६९ रनको अविजित इनिङ खेल्दै टोलीलाई जिताएकी हुन् । त्यस्तै मास एलिसाले १३ रन जोडदा महिराह इजाती १६ र वान जुलिया ११ रनमा आउट भइन् ।
नेपालका लागि सीता रानामगर र कविता जोशीले समान दुई/दुई विकेट लिए भने रुविना क्षेत्री र कविता कुँवरले समान एक/एक विकेट लिए ।
त्यसअघि मलेसियाको बायोमास ओभल क्रिकेट मैदानमा टस जितेर पहिला ब्याटिङ रोजेको नेपालले निर्धारित २० ओभरमा ६ विकेट गुमाउँदै ११५ रनको योगफल बनाएको थियो ।
नेपालकी कप्तान इन्दु बर्मा ३७ बलमा २ चौकासहित सर्वाधिक २९ रन बनाएकी थिइन् । डली भट्टले १४ बलमा १ चौका र २ छक्कासहित २५ रन बनाइन् । सीता रानामगरलाई ६ रनमा आउट भएकी थिइन् । कविता कुवरले ३१ बलमा २ चौकासहित २३ रन बनाइन् भने रुविना क्षेत्रीले १८ बलमा २ चौकासहित २० रन जोडीन् ।
मलेसियाकी महिराह इजाती इस्मालील २ विकेट लिइन् भने विनिफ्रेड दुराईसिंघमले १ विकेट लिइन् ।
शुक्रबार नै भएको अर्को सेमिफाइनल खेलमा युएईले थाइल्यान्डलाई ४ रनले हराउँदै फाइनलमा पुगेको छ । यो जितसँगै मलेसिया र युएई एसिया कपमा छनोट भएका छन् ।
काठमाडौं : आईसीसी पुरुष क्रिकेट विश्वकप लिग-२ को त्रिकोणात्मक शृङ्खलाको उद्घाटन खेलमा नेपाल नामिबियासँग चार विकेटले पराजित भएको छ ।
कीर्तिपुरस्थित त्रिवि क्रिकेट मैदानमा भएकाे खेलमा जितसँगै नामिबियाले दुई अंक जोडेको छ । जितका लागि नेपालले दिएको एक सय ३३ रनको सामान्य लक्ष्य नामिबियाले ३३ दशमलव एक ओभरमा छ विकेट गुमाउदै पूरा गर्यो ।
नामिबियाको जितमा जान फ्रिलिङ्कले सर्वाधिक ३४ रनको योगदान दिए । उनले ५३ बल खेल्ने क्रममा चार चौका प्रहार गरे । त्यसैगरी जान निकोल लोफिट इटनले ३१ रन बनाए भने मिचेल भान लिङगेनले २३ रन बनाए । त्यस्तै निकोलास डाभिनले १५ रन जाडे । बलिङतर्फ नेपालका सोमपाल कामीले तीन र ललित राजबंशीले दुई विकेट लिए । त्यस्तै कप्तान रोहितकुमार पौडेलले एक विकेट झारे ।
त्यसअघि टस हारेर पहिला ब्याटिङको निम्तो पाएको नेपाल ४१ दशमलव एक ओभरमा सबै विकेट गुमाउदै एक सय ३२ रनमा समेटिएको थियो । नेपालका लागि भीम सार्कीले सर्वाधिक ४४ रनको योगदान दिए । उनले ८६ बल खेल्ने क्रममा दुई चौका र एक छक्का पनि प्रहार गरे । त्यस्तै गुल्शन झाले २१ रन बनाए । उनले ३१ बल खेल्दै तीन चौका प्रहार गरे र ३८ बल खेलेका करण केसीले तीन चौकाको सहयोगमा १६ रन बनाए ।
कप्तान रोहितकुमार पौडेल १३ बल खेल्दै एक रन मात्रै बनाउन सके भने कुशल मल्लले २२ बलमा एक चौका र एक छक्काको सहउोगमा १५ रन बनाए । सोमपाल कामी दुई रनमा आउट हुँदा कुशल भुर्तेलले खाता खोल्न सकेनन् । त्यसैगरी पवन शर्राफले १२, अनिल शाहले आठ तथा आशिफ शेखले चार रन बनाए ।
नेपाललाई सस्तैमा समेट्ने क्रममा नामिबियाका जजेरार्ड एरास्मस पाँच विकेट चट्काए । त्यस्तै ज्याक ब्रासेल र रुबेन ट्रम्पलम्यानले समान दुई-दुई विकेट लिए । अब नेपालले आफ्नो दोस्रो खेल शनिबार नेदरल्याण्ड्ससँग खेल्नेछ ।
दिलमाया शाही/मध्यान्ह
जुम्ला : जुम्लामा कर्णाली प्रदेशस्तरीय फुटबल प्रतियोगिता हुने भएको छ । प्रतियोगिता यही फागुन १५ देखि १९ गतेसम्म सञ्चालन हुने भएको हो । जुम्लामा खेलमैदान नहुँदा सेनाको मैदान मागेर फुटबल खेलाउनु पर्ने बाध्यता रहिआएको छ । जुम्लामा प्रदेशस्तरीय फुटबल प्रतियोगिता पहिलो पटक हुने भएको हो ।
त्यस्तै यसपटक जुम्लाले प्रदेशस्तरीय फुटबल प्रतियोगिता गर्ने अवसर मिलेको जिल्ला फुटबल संघ जुम्लाका अध्यक्ष भरतबहादुर बुढ्थापाले बताए । उनका अनुसार प्रतियोगितामा कर्णाली प्रदेशका दश वटै जिल्लाबाट एक–एक वटा फुटबल टिम आउने छन् ।एक टिममा दुई जना अफिसियलसहित १५ जना सहभागी हुने छन् । कर्णालीको १० जिल्लाबाट झण्डै एक सय ५० जना फुटबल खेलाडी भेला हुने जिल्ला फुटबल संघले जनाएको छ ।
अध्यक्ष भरत बुढ्थापाका अनुसार यही फागुन २० देखि २६ गतेसम्म रेफ्रि तालिम पनि जुम्लामा हुँदैछ । जुम्लाका हरेक पालिकाबाट दुई जना सहभागी गराउन भनिएको छ । पहिलो पटक प्रदेशस्तरीय फुटबल प्रतियोगिता हुने भएपछि जुम्लाका खेलाडीहरु उत्साहित भएका छन् । पहिले झुम्राको बल बनाएर धान रोप्ने खेतमा फुटबल खेलिरहेका खेलाडीहरु अहिले प्रदेशस्तरीय प्रतियोगितामा प्रतिस्पर्धा गर्न पाउने भएकोमा खुसी छन् । यसअघि यहाँका खेलाडी फुटबल खेल्नका लागि बाहिर जिल्ला जान्थे ।
त्यस्तै प्रदेशस्तरीय फुटबल प्रतियोगितामा छनोट भएका खेलाडीहरु सिधै राष्ट्रियस्तरको प्रतियोगितामा सहभागी हुन पाउने जिल्ला फुटबल संघ जुम्लाका महासचिव दिपेन्द्र हमालले बताए । उनले पहिलो पटक जुम्लाले राष्ट्रियस्तरको फुटबल प्रतियोगिता हुँदा जनशक्ति तयार पार्ने अवसर पाएको बताए । जुम्लाका लागि यो सुनौलो अवसर रहेको बताउँदै उनले यस अवसरको सबै मिलेर सहीरुपमा सदुपयोग गर्नुपर्ने बताए । प्रतियोगिताले जुम्लामा फुटबल खेलमा विवादै विवाद भइरहेको भन्ने गलत सन्देशको पर्दाफास गरेर फुटबलमैत्री जुम्लाको पहिचान बनाउने उनले बताए ।
कर्णाली खेलकुद विकास परिषदको आर्थिक सहयोग, कर्णाली प्रदेश फुटबल संघ र जिल्ला खेलकुद विकास समितिको समन्वय तथा जिल्ला फुटबल संघको आयोजनामा प्रतियोगिता हुन लागेको हो । खेलाडीहरुको टिम चिन्ने र खेलाडीहरुको प्रतिभा हेर्ने अवसर नछुटाउन खेलप्रेमीहरुलाई आह्वानसमेत गरिएको छ । जिल्ला फुटबल संघले प्रदेशस्तरीय फुटबल प्रतियोगिता सफल बनाउने बारेमा स्थानीय सरकारका प्रमुखहरुसँग छलफल गरेको छ ।
काठमाडौं : नेपाल क्रिकेट संघ (क्यान) ले नेपाली सिनियर पुरुष राष्ट्रिय क्रिकेट टोलीको ‘ए’ टिम घोषणा गरेको छ । क्यानले बुधबार विनोद भण्डारीको कप्तानीमा १६ खेलाडी समावेश गरेर 'ए' टिम घोषणा गरेको हो ।
गत महिना भएको प्रधानमन्त्री कप क्रिकेट प्रतियोगिता र हालै भएको यु-१९ विश्वकपमा गरेको प्रदर्शनका आधारमा क्यानले खेलाडीहरुलाई 'ए' टिममा समावेश गरेको हो ।
'ए' टिममा राष्ट्रिय टिमबाट खेलिसकेका भण्डारीसहित विवेक यादव, सन्दीप जोरा, प्रतिश जिसी लगायत छन् । 'ए' टिमले क्यानडासँग प्रतिस्पर्धा गर्दै छ ।
क्यानले 'ए' टिमका लागि लागि दुई प्रशिक्षक तोकेको छ । जसमा नेपाली क्रिकेट टोलीका पूर्वकप्तान ज्ञानेन्द्र मल्ल र कलाम अली रहेका छन् ।
तिलु शर्मा पौडेल/मध्यान्ह
दोहा, कतार : मलेसियामा रहेका म्याग्दीलीहरुको साझा संस्था म्याग्दी प्रवासी नेपाली संघ (मोना) मलेसियाले आयोजना गरेको 'प्रथम मोना कप खुला भलिबल प्रतियोगिता'को उपाधि नवलपुरले हात पारेको छ । आयोजक मोनालाई हराउँदै नवलपुरले उपाधि चुम्दा गुल्मीले भने तृतीय स्थानमा चित्त बुझायो ।
चिनियाँ नयाँ वर्षको अवसर पारेर आयोजना गरिएको उक्त प्रतियोगिताका विजेताले ३ हजार एक सय ११, उपविजेताले २ हजार १ सय ११ र तृतीय हुनेले १ हजार १ सय ११ आरएमसहित मेडल र प्रमाण पत्र प्राप्त गरेका छन् । मलेसियाको सेलाङ्गर राज्यको साह अलम सेक्सन २७ मा सम्पन्न प्रतियोगितामा २० टिमको सहभागिता रहेको थियो । मोना मलेसियाका अध्यक्ष पूर्ण प्रसाद रोका मगरले मध्यान्हलाई दिएको जानकारी अनुसार घैंटो फोर खेलको उपाधि भने हेन्सम कार्कीले जिते । उनले आरएम २ सय ५० सहित मेडल र प्रमाण पत्र प्राप्त गरे ।
मलेसियामा हुने भलिबलका अन्य प्रतियोगितामा भन्दा यस प्रतियोगितामा निकै उत्साहजनक सहभागिता रहेको थियो । परदेशमा मेलमिलाप र सहयोगी बन्न सक्नुपर्छ भन्ने सन्देशका साथै म्याग्दीलाई चिनाउने र पर्यटन प्रवर्द्धनमा सहयोग पुर्याउने हेतुले भलिबल प्रतियोगिता आयोजना गरिएको मोना मलेसियाका संस्थापक अध्यक्ष रामचन्द्र केसीले जानकारी दिए ।
काठमाडौं : नेपाल क्रिकेट संघ (क्यान)ले नेपाल ए टिम घोषणा गरेको छ । क्यानले बुधबार सम्भावित ३६ खेलाडी सम्मिलित ए टिम घोषणा गरेको हो ।
क्यानले ए टिमका लागि लागि दुई प्रशिक्षक तोकेको छ । जसमा नेपाली क्रिकेट टोलीका पूर्वकप्तान ज्ञानेन्द्र मल्ल र कलाम अली रहेका छन् ।
गत महिना भएको प्रधानमन्त्री कप क्रिकेट प्रतियोगिता र हालै भएको यु-१९ विश्वकपमा गरेको प्रदर्शनका आधारमा क्यानले खेलाडीहरुलाई ए टिममा समावेश गरेको हो ।
ए टिममा राष्ट्रिय टिमबाट खेलिसकेका विनोद भण्डारी, विवेक यादव, सन्दीप जोरा, प्रतिश जिसी, दिलीप नाथ, बसिर अहमद, मैसम ढकाल लगायत छन् । ३६ जनामध्येबाट १६ जनाको ए टिम बनाउने क्यानको तयारी छ ।
काठमाडौं : कुवेतलाई हराउँदै नेपाल एसिसी महिला प्रिमियर कप क्रिकेट प्रतियोगिताको सेमिफाइनमा प्रवेश गरेको छ ।
मलेसियाको क्वालालाम्पुरस्थित वाइएसडी युकेएम क्रिकेट मैदानमा आज भएको खेलमा नेपालले कुवेतलाई आठ विकेटले पराजित गर्दै सेमिफाइनलमा पुगेको हो । टस जितेर पहिला ब्याटिङ रोजेको कुवेतले नेपाललाई ७४ रनको लक्ष्य दिएको थियो ।
ब्याटिङ गर्ने क्रममा वर्षाले खेल प्रभावित बनेको थियो । नेपालले १२ ओभरमा ५० रन बनाउनु पर्ने लक्ष्य पाएकामा ६ दशमलव ५ ओभरमा दुई विकेट गुमाउँदै लक्ष्य पूरा गर्यो ।
नेपालको जितमा कप्तान इन्दु बर्माले सर्वाधिक २२ रन बनाइन् । उनले २१ बलमा एक चौकाको साहयताले अविजित २२ रन बनाएकी हुन् । त्यस्तै सीता रानामगरले १७ रन जोडिन् भने कविता जोशीले अविजित ४ रन बनाइन् । बलिङतर्फ कुवेतकी मारयाम ओमरले एक विकेट लिइन् ।
यसअघि कुवेतले निर्धारित २० ओभरमा ९ विकेट गुमाउँदै ७३ रनको योगफल बनाएको थियो । कुवेतका लागि प्रियदा मुरलीले सर्वाधिक २९ रनको योगदान दिइन् । उनले ३३ बलमा तीन चौका र एक छक्काको मद्दतमा २९ रन बनाएकी हुन् । त्यस्तै खादिजा खालिल र सान्थी बलासुब्रमानीले समान १३÷१३ रन जोडे ।
कुवेतलाई ७३ रनमा समेट्नेक्रममा नेपालकी सीता राना मगरले ह्याट्रिक विकेट लिइन् भने रुबिना क्षेत्री र कविता कुँवरले समान दुई/दुई विकेट लिए ।
नेपाल समूह ‘डी’ को विजेता तथा कुवेत समूह ‘ए’ को उपविजेताका रूपमा क्वाटरफाइनलमा प्रवेश गरेका हुन् । नेपालले समुह चरणको खेलमा हङकङ, भुटान र माल्दिभ्सलाई पराजित गरेको थियो । योजितसँगै सेमिफाइनल खेलमा नेपालले आयोजक मलेसियाको सामना गर्नेछ ।
प्रतियोगिताको फाइनलमा पुग्ने दुई टोलीले आगामी सेप्टेम्बरमा आयोजना हुने एसिया कप क्रिकेटमा सहभागिता जनाउन पाउनेछन् ।
जिपि लामिछाने/मध्यान्ह
जापान : गैरआवासीय नेपाली संघ राष्ट्रिय समन्वय परिषद् जापानको आयोजनामा हुने दोस्रो 'एनआरएनए फुटसल रनिङ कप २०२४' प्रतियोगिताको तयारी तीव्र गतिमा भइरहेको छ । 'युवाका लागि खेलकुद' भन्ने मान्यताका साथ मार्च ३ तारिकदेखि हुने उक्त प्रतियोगिताका लागि जापानभर रहेका फुटसल प्रेमीहरूले टिम दर्ता गराउने क्रम जारी रहेको र टिम दर्ताका लागि फेब्रुअरीको २३ तारिकसम्म अन्तिम म्याद राखिएको कार्यक्रमका संयोजक तथा एनआरएनए जापानका युवा संयोजक मुक्तिराज रेग्मीले जानकारी दिए ।
संयोजक रेग्मीका अनुसार जापानमा रहेका नेपाली युवाहरुलाई खेलकुदप्रति सक्रिय बनाइराख्न र खेलकुदका माध्यमबाट सामाजिक क्रियाकलापमा संलग्न बनाउन उत्प्रेरित गराउन सहयोग पुर्याउनका लागि एनआरएनए जापानले गत वर्षदेखि सञ्चालन गरेको प्रतियोगितालाई यस वर्ष व्यवस्थितरुपमा निरन्तरता दिन लागिएको बताए ।
जापानको चिवाको जेड फुटसल स्पोर्ट्स ८५ माएगासकी नागारेयामा हुने फुटसल प्रतियोगिताको विजेता टिमलाई ५ लाख ५ हजार ५ सय ५५ जापानी येन, रनिङ कप, प्रमाण पत्र र ट्रफी, फस्ट रनरअप टिमलाई ३ लाख ३ हजार ३ सय ३३ जापानी येन, प्रमाण पत्र र ट्रफी, सेकेन्ड रनरअप टिमलाई १ लाख ११ हजार १ सय ११ जापानी येन, प्रमाण पत्र र ट्रफीसहितको पुरस्कार प्रदान गरिने सहआयोजक एनआरएनए जापान क्षेत्रीय समिति चिवाले जानकारी दिएको छ ।
खेलाडीको हौसला वृद्धि गराउने उद्देश्यले खेल सञ्चालनका क्रममा बेष्ट प्लेयर, बेष्ट गोलकिपर, द टप स्कोरर, द बेष्ट कोच, द फेयर अवार्ड टिमलाई १० हजार जापानी येन र म्यान अफ दि म्याचलाई ट्रफी प्रदान गरिने आयोजक टिमका सदस्य तथा एनआरएनए जापानका उपाध्यक्ष सचिन श्रेष्ठले बताए ।
खेल क्षेत्रमार्फत सामाजिक सेवाका कार्यमा सहभागी हुन युवाहरुलाई उत्साहित बनाउँदै एनआरएनएको अभियानमा जोड्नका लागि यो फुटसल फलदायी हुने विश्वास आफूले लिएको एनआरएनए जापानका अध्यक्ष नविन निउरेले बताए । जापानमा रहेका सबै संघ संस्था व्यावसायिक व्यक्तित्व एनआरएनएका अभियन्ता र सामाजिक अभियन्ताहरुलाई उक्त फुटसल प्रतियोगिताका लागि आफ्नो ठाउँबाट सकेको सहयोग गर्न अध्यक्ष निउरेले आग्रह गरेका छन् ।
एनआरएनए जापानले जापानभर रहेका युवाहरुलाई समेट्ने उद्देश्यले प्रतियोगिता सञ्चालन गर्न लागेकाले यससँग चासो राख्ने सम्पूर्ण जापानवासी नेपाली युवाहरुलाई प्रतियोगितामा भाग लिन र अन्य दाजुभाइ दिदीबहिनीलाई आर्थिकसहितको आवश्यक सहयोग गरिदिनका लागि कार्यक्रम संयोजक रेग्मीले अनुरोध गरेका छन् । 'प्रतियोगिता सञ्चालनका लागि आर्थिक सहयोग अभियान सञ्चालन गरिसकिएको छ । सहभागिताका लागि सम्पूर्णमा अनुरोध गर्दछु,' संयोजक रेग्मीले भने ।
प्रतियोगितालाई मर्यादित र व्यवस्थितरूपमा सञ्चालन गर्ने गरी आवश्यक सम्पूर्ण तयारी भइरहेको र खेल पूर्णत: व्यवस्थित, मर्यादित र शान्तपूर्ण रूपमा सम्पन्न हुने आयोजकको भनाइ छ । प्रतियोगिताको आयोजक एनआरएनए जापान, सहआयोजक एनआरएनए जापान क्षेत्रीय समिति चिवा र सहयोग एनआरएनए जापानका ११ वटै क्षेत्रीय समितिको रहेको छ ।
काठमाडौं : अनिल साह र भीम सार्कीको शतकमा नेपालले एकदिवसीय क्रिकेट सिरिजको तेस्रो तथा अन्तिम खेलमा क्यानडाविरुद्ध शानदार जित निकालेको छ । सोमबार कीर्तिपुरस्थित टियु क्रिकेट मैदानमा भएको खेलमा नेपालले क्यानडालाई ९ विकेटले पराजित गरेको हो । योसँगै नेपालले क्यानडाविरुद्धको सिरिज क्लिनस्वीप गरेको छ । सिरिज नेपालले ३-० ले जितेको हो । यसअघि भएको पहिलो एकदिवसीय खेल नेपालले ७ रनले र दोस्रो खेल ४ विकेटले जितेको थियो ।
सोमबार क्यानडाले दिएको २३३ रनको लक्ष्य नेपालले ४४.३ ओभरमा एक विकेटको क्षतिमा पूरा गर्यो । नेपालका लागि ओपनर अनिल साह र भीम सार्कीले शतकीय इनिङ खेले । अनिलले १२४ बलमा नटआउट ११२ रन बनाए । सो क्रममा उनले १२ वटा चौका र २ वटा छक्का प्रहार गरे । यस्तै भीमले १२९ बलमा नटआउट १०१ रन बनाए । सो क्रममा उनले ११ वटा चौका र १ वटा छक्का प्रहार गरे ।
अनिल र भीमले एकदिवसीय क्रिकेटमा नेपालका लागि सबैभन्दा ठूलो साझेदारी पनि बनाए । दोस्रो विकेटका लागि अनिल र भीमले १ सय ८९ रनको साझेदारी गरे । यसअघि सन् २०२३ मा कुशल भुर्तेल र आसिफ शेखले जिम्बावेविरुद्ध १ सय ७१ रनको साझेदारी गरेका थिए । त्यस्तै ओपनर कुशल भुर्तेलले १४ बलमा ३ चौकको मद्दतमा १३ रन बनाए । क्यानडाका लागि डिलोन हेलिगरले एक विकेट लिए ।
त्यसअघि टस हारेर पहिले ब्याटिङ गरेको क्यानडाले निर्धारित ५० ओभरमा ८ विकेट गुमाउँदै १३२ रन बनाएको थियो । क्यानडाका लागि नवनीत धलिवालले अर्धशतकीय पारी खेले । उनले ८२ बल खेल्दै पाँच चौकाको मद्दतमा सर्वाधिक ५० रन जोडेका हुन् । त्यस्तै क्यानडाका अर्का ओपनर निखिल दत्तले ४५ रन बनाए भने कप्तान साद बीन जाफरले ३१ रन बनाए । हर्ष थेकरले २९, श्रेयस मोब्बाले २५ र श्रीमान्थ विजेरत्नले २२ रन जोडे । त्यसबाहेक अन्य खेलाडीले दोहोरो अङ्कमा रन जोड्न सकेनन् ।
क्यानडालाई मध्यम रनमा रोक्ने क्रममा नेपालका लागि डेब्यू खेलाडी हेमन्त धामीले ३ विकेट लिए । यस्तै कुशल मल्लले २ विकेट लिए भने ललित राजवंशी र अकाश चन्दले समान १-१ विकेट लिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies