एजेन्सी : बंगलादेशस्थित रोहिंग्या शरणार्थी शिविरमा भीषण आगलागी भएको छ । कक्स बजारमा रहेको ११ नम्बर शरणार्थी शिविरमा आगलागीबाट कम्तीमा २ हजार घर टहरा जलेर नष्ट भएका छन् ।
आगलागीबाट हजारौं शरणार्थी बासविहीन बनेका छन् । ३५ वटा अस्थायी मस्जिद र १२ वटा प्रारम्भिक सिकाई केन्द्रहरु पनि जलेर नष्ट भएको बताइएको छ ।
बंगलादेशको दक्षिण पूर्वमा रहेको यो शिविरमा लागेको आगलागीका कारण १२ हजार मानिस घरबारविहीन भएका छन् ।
अधिकारीहरुका अनुसार कक्स बजारमा लागेको आगो नियन्त्रणमा आएको छ र ठूलो क्षतिको अनुमान गरिएको छ । आगलागीको यो घटनामा कुनै मानवीय क्षति भएको खबर छैन । आगलागीको कारण पनि खुल्न सकेको छैन ।
गत वर्ष जनवरीमा उखिया शरणार्थी शिविरमा भएको आगलागीमा ६ सय घर जलेर नष्ट भएका थिए । गत वर्ष मार्चमा भएको अर्को आगलागीमा करिब १० हजार आश्रयस्थल जलेर १५ जनाको मृत्यु भएको थियो ।
सन् २०१७ मा म्यानमारमा भएको सैनिक कारबाहीपछि भागेका करिब १० लाख रोहिंग्या शरणार्थीहरू बंगलादेशको शिविरमा बस्दै आएका छन् ।
 9 chait 2079-Nepali_001.jpg)
