काठमाडौं : प्रमुख सत्ता साझेदार नेपाली कांग्रेसका केही युवाहरुले शुक्रबारदेखि मेची–महाकाली संकल्प यात्रा थालेका छन् । कांग्रेस नेता भूपेन्द्रजंग शाहीको नेतृत्वमा केही युवाहरुले झापाबाट सुरु गरेको यो संकल्प यात्रा सुदूरपश्चिमको कञ्चनपुर पुगेर टुंगिनेछ । अभियान उद्घाटन कांग्रेस झापाका सभापति देउमान थेवेले गरे ।
शाही नेतृत्वको अभियानलाई उनीहरुले कांग्रेसकै युवा अभियान भनेर प्रचार गरिरहेका छन् । तर कांग्रेस युवा अभियान भनिएकोमा कांग्रेसभित्रै असन्तुष्टि छ । एक नेताका अनुसार यो कांग्रेसभित्र एउटा समूहको अभियान हो ।
‘डा.शेखर कोइराला निकट केही युवाहरुले थालेको अभियानलाई कांग्रेसकै अभियान भनेर प्रचार गरिनु भएन’ ती नेता भन्छन्, ‘पार्टीले यस्तो अभियान राखेकै छैन ।’ उनका अनुसार डा. शेखरको प्रचार र स्थानीय स्तरमा माहोल बनाउन युवा अभियान भनिएको हो । कांग्रेस संस्थापन इतरमै रहेका यी नेता भन्छन्, ‘अहिले कांग्रेस सरकारको प्रमुख साझेदार शक्ति हो, एमालेलाई विश्वासमा लिन पनि पार्टीले यस्ता कार्यक्रम सञ्चालन गर्न सक्ने अवस्था छैन ।’
तर शुक्रबार सुरु भएको अभियानको उद्देश्य भ्रष्टाचार उन्मुलन र सुशासन, महँगी र मूल्यबद्धि नियन्त्रण, युवालाई रोजगारी भएको यसमा आवद्ध नेताहरुले बताएका छन् । यी एजेण्डा उठाएर कुनैपनि अभियान हुनु र सरकारलाई खबरदारी गर्नु गलत होइन ।
यद्यपि कांग्रेसभित्र शेखर कोइरालाको विगतलाई आधार मान्दा भने यो अभियानलाई चासोका साथ हेर्न मिल्छ । डा. शेखर पार्टीको नेतृत्व हत्याउने लामै समयदेखि संघर्षरत छन् । २०७८ मंसिर–पुसमा सम्पन्न १४औं महाधिवेशनमा शेखरले सभापति पदमै प्रतिस्पर्धा गरेका थिए ।
तर दोस्रोपटक पनि शेरबहादुर देउवाले सभापति जिते । देउवासँग शेखरले प्यानल बनाएरै प्रतिस्पर्धा गरेका थिए । तर उपसभापतिमा धनराज गुरुङ, महामन्त्रीमा गगन थापा लगायत केही पदाधिकारी जितेपनि शेखरले सभापति जित्न सकेनन् ।
देउवाले भने सभापति सहित केन्द्रीय समितिमा झण्डै ८० प्रतिशत जिते । यही बहुमतका आधारमा देउवाले पार्टी चलाउँदै आएका छन् । तर शेखरमा भने ठूलै छटपटी देखिन्छ । अझ एउटै प्यानलमा बसेर महामन्त्री जितेका गगन थापाले समेत शेखरसँग दुरी बढाएको देखिन्छ । महामन्त्री महामन्त्री विश्वप्रकाश शर्मा, महामन्त्रीमै पराजित प्रदीप पौडेल सहित नेताहरुको विश्वास लिएर गगन पार्टी गतिविधिमा सक्रिय छन् ।
तर १४औं महाधिवेशनमा आफूसँगै उभिएका नेताहरुको समेत विश्वास जित्न नसकेका शेखर कोइराला वर्तमान सरकारलाई खुलेर समर्थन वा विरोध गर्न सक्ने अवस्थामा छैनन् । किनकि सभापति देउवासँग आलोपालो गर्ने सहमतिमा एमाले अध्यक्ष ओली प्रधानमन्त्री छन् ।
यो सरकार फेर्दा फेरि माओवादी केन्द्रका अध्यक्ष पुष्पकमल दाहाल प्रचण्ड अथवा एकीकृत समाजवादीका अध्यक्ष माधवकुमार नेपाललाई प्रधानमन्त्री स्वीकार्नुपर्ने हुन्छ । यस्तो एजेण्डा अगाडि बढाउँदा कांग्रेसभित्र शेखरको पक्षमा मत बढ्ने देखिन्न । देउवालाई नै प्रधानमन्त्री बनाउनेगरी राजनीतिक समीकरण बनाउनु उल्टै राजनीतिक घाटाको यात्रा हो ।
बाँकी विकल्प हो, अरु कुनै दलको समर्थनमा आफै प्रधानमन्त्री हुने । तर बिगतका भूमिकाकै कारण शेखरलाई एमाले वा माओवादीबाट समर्थन जुट्ने देखिदैन । त्यसको एउटा उदाहरण हो, कोशीको मुख्यमन्त्री प्रकरण ।
गत वर्ष कांग्रेस र माओवादीको सत्ता हुँदा कोशीमा केदार कार्की मुख्यमन्त्री बनेका थिए । देउवालाई माओवादीलाई मुख्यमन्त्री छोड्दा एमालेको समर्थन पाएर शेखर निकट केदार मुख्यमन्त्री भए । तर पछि एमालेलाई धोका दिनेगरी शेखर अगाडि बढे, केदारलाई कांग्रेस–माओवादीकै समर्थन प्राप्त भयो । यो प्रकरणमा शेखरले एकैपटक एमाले र माओवादी नेताहरुको विश्वास गुमाए ।
त्यसैकारण अप्ठ्यारोमा परेका शेखर आफू निकट नेताहरु जिल्लाजिल्ला परिचालन गरेर माहोल बनाउने रणनीति देखिए ।
