काठमाडौं : राष्ट्रिय खेलकुद परिषद् (राखेप)का सदस्यसचिव टंकलाल घिसिङले बुद्धिचालले विश्व खेलकुद वृत्तमै छुट्टै पहिचान बनाउन सफल भइसकेकोले नेपालमा पनि यो खेललाई व्यावसायिकरुपमा अगाडि बढाउन जोड दिनुपर्ने बताएका छन् ।
सोमबारबाट ललितपुरको च्यासलस्थित तुलसीलाल प्रतिष्ठान हलमा शुरु भएको छैटौं तुलसीलाल स्मृति राष्ट्रिय क्लब टिम च्याम्पियनसिप बुद्धिचाल प्रतियोगिताको उद्घाटन समारोहमा बोल्दै घिसिङले नेपालमा बुद्धिचाल खेललाई व्यावसायिक विकासमा जोड दिनुपर्ने बताएका हुन् ।
‘विश्व फिडे महासंघ र अन्तर्राष्ट्रिय ओलम्पिक कमिटि (आईओसी)ले बुद्धिचाललाई आफ्नो महत्वपूर्ण अफिसियल खेलको रुपमा मान्यता दिइसकेको छ, यस्तो अवस्थामा नेपालमा पनि बुद्धिचाल खेललाई व्यावसायिक ढाँचामा रुपान्तरित गर्न जरुरी भइसकेको छ,’ उद्घाटन समारोहमा बोल्दै सदस्यसचिव घिसिङले भने, ‘जसका लागि नेपाल बुद्धिचाल महासंघ, सम्बन्धित निकाय र व्यक्तिहरुले नेपालमा फुटबल र क्रिकेटमा जस्तो बुद्धिचालमा पनि व्यावसायिक लिग सञ्चालनमा ल्याउन जरुरी छ ।’
यस्तै उनले प्रतियोगितालाई आयोजनामा मात्र सीमित गर्नुभन्दा पनि बढी भन्दा बढी खेलाडीलाई प्रतियोगितामा सहभागि गराउनु र नेपालमा बुद्धिचाल खेल तथा खेलाडीको स्तर विकास गर्नु महत्वपूर्ण विषय रहेको बताए । प्रतियोगिता उद्घाटन समारोहका प्रमुख अतिथि समेत रहेका घिसिङले बुद्धिचाल खेलको विकासमा सक्रियरुपमा विभिन्न राष्ट्रिय तथा अन्तर्राष्ट्रिय प्रतियोगिता आयोजना गर्दै आएको नेपाल बुद्धिचाल महासंघलाई राखेपले सहयोग गर्दै आएको र आगामी दिनमा पनि यो कार्यलाई निरन्तरता दिने बताए ।
सोमबारबाट शुरु भएको प्रतियोगितामा रोखप सदस्यसचिव घिसिङले सेतो तथा नेपाल बुद्धिचाल महासंघका कार्यवाहक अध्यक्ष हेराकाजी महर्जनले कालो गोटी चाल्दै प्रतियोगिताको उद्घाटन गरेका थिए । नेपाल कम्युनिष्ट पार्टीका तत्कालीन महासचिव स्वर्गीय तुलसीलाल अमात्यको स्मृतिमा ललितपुर स्पोर्ट्स क्लब र नेपाल बुद्धिचाल महासंघको संयुक्त आयोजनामा शुरु भएको प्रतियोगिता पुस २८ गतेसम्म चल्ले छ ।
लिग कम नकआउट आधारमा शुरु भएको प्रतियोगिताका खेलहरु गत वर्षहरुमा भन्दा फरक शैलीमा खेलाइँदै छ । यस पटकको प्रतियोगितामा प्रत्येक टिममा वैकल्पिकसहित ५ जना खेलाडीहरुको सहभागिता रहेको छ । जसअनुसार प्रतियोगिता संरचनामा खेलाडीहरुलाई ए, बी, सी र डी गरी चार समूहमा वर्गीकरण गरिएको छ ।
जसअन्तर्गत समूह ए मा टाइटल प्राप्त खेलाडी, पूर्व नेपाल च्याम्पियन, राष्ट्रिय प्रतियोगितामा उत्कृष्ट दश स्थान प्राप्त खेलाडी तथा १९०० रेटिङ माथिका खेलाडी रहेका छन् । समूह बी मा १९०० रेटिङ मुनिका खेलाडीहरु, समूह सी मा अण्डर २० र मूह डी मा अण्डर १६ वा महिला खेलाडी रहेका छन् । वैकल्पिकमा जुन समूहको खेलाडी हो त्यही समूहबाट प्रतिस्पर्धा गर्न पाउने छन् ।
प्रतियोगितामा डिफेन्डिङ च्याम्पियन थापाथली चेस पार्क क्लब, ललितपुर स्पोर्ट्स क्लब, गोल्डेन गेट क्लब, लुम्बिनी इभेन्ट मेनेज्मेन्ट टिम, सुदुर पश्चिम खेलकुद विकास परिषद, दोलखा चेस होम, दोलखा बुद्धिचाल संघ, गण्डकी प्रदेश बुद्धिचाल संघ, कास्की जिल्ला बुद्धिचाल संघ, ललितपुर महानगरपालिका, गोदावरी नगरपालिका, पुल्चोक क्याम्पस, ललितपुर जिल्ला बुद्धिचाल संघ गरी २० टिम सहभागी छन् ।
प्रतियोगिताका संयोजक राजु ताम्राकारका अनुसार विजेता टिमले नगद पुरस्कार २ लाख, उपविजेताले १ लाख २० हजार, तेस्रो स्थान प्राप्त गर्ने टिमले ६० हजार र चौथो हुने टिमले ४० हजार नगद पुरस्कार प्राप्त गर्नेछन् । त्यसैगरी प्रत्येक बोर्डमा प्रथम हुने ४ जना खेलाडीहरुलाई जनही १०–१० हजार पुरस्कारको व्यवस्था गरिएको छ । प्रतियोगिताको कुल पुरस्कार राशि ४ लाख ७० हजार रुपैयाँ रहेको छ ।
नेपाल बुद्धिचाल महासंघका कार्यवहाक अध्यक्ष हेराकाजी महर्जनले अध्यक्षतामा भएको उद्घाटन कार्यक्रममा महासंघका महासचिव धरम लामाले स्वागत मन्तव्य राखेका थिए ।
प्रचण्ड खत्री/मध्यान्ह
रुकुम पश्चिम : रुकुम पश्चिमको बाँफिकोट गाउँपालिकामा गाउँपालिकास्तरीय राष्ट्रपति रनिङ शिल्ड प्रतियोगिता शुरु भएको छ । वीरेन्द्र माध्यामिक विद्यालय बाँफिकोटको प्राङ्गणमा जिल्ला समन्वय समिति प्रमुख लुम्बिनी गौतमले प्रतियोगिताको उद्घाटन गरेकी हुन् ।
प्रमुख अतिथि समेत रहेकी जिल्ला समन्वय समिति प्रमुख गौतमले खेल क्षेत्र सबैको क्षेत्र भएकाले खेलाडीलाई प्रोत्साहन गर्नुपर्ने बताइन् ।
तेस्रो राष्ट्रपति रनिङ शिल्ड विजेता वीरेन्द्र माध्यामिक विद्यालयले गाउँपालिकालाई शिल्ड समेत हस्तान्तरण गरेको छ । शिल्ड जित्ने टोलीले प्रत्येक वर्ष गाउँपालिकालाई शिल्ड बुझाउनुपर्ने हुन्छ ।
गाउँपालिका शिक्षा, युवा तथा खेलकुद शाखाका विद्यालय निरीक्षक रत्नबहादुर केसीको अध्यक्षतामा भएको प्रतियोगिता उद्घाटन कार्यक्रममा जिल्ला खेलकुद विकास समिति कार्यलय प्रमुख लीलाप्रसाद ढकाल, जिल्ला शिक्षा समन्वय इकाइ प्रमुख ताराप्रसाद पुन मगर, गाउँपालिकाका अध्यक्ष जनककुमार बाठा मगर, नेकपा माओवादी केन्द्र बाँफिकोटका अध्यक्ष चन्द्रबहादुर केसी, गाउँपालिकाका निमित्त प्रमुख प्रशासकीय अधिकृत ज्ञान बहादुर खड्का, गाउँपालिका उपाध्यक्ष तारा बुढा केसी, १० वटै वडाका वडा अध्यक्षहरु, विभिन्न शाखाका शाखा प्रमुखहरुको आतिथ्यता रहेको थियो ।
प्रतियोगितामा बाँफिकोट गाउँपालिकाका १० माध्यामिक विद्यालयको सहभागिता रहेको बाँफिकोट गाउँपालिका अन्तर्गत शिक्षा, युवा तथा खेलकुद शाखाका विद्यालय निरीक्षक रत्नबहादुर केसीले बताए । कार्यक्रममा विद्यार्थीहरु आ-आफ्नो विद्यालयको पोशाकमा उपस्थित थिए । कार्यक्रम सञ्चालन शिक्षा युव तथा खेलकुद शाखा प्रमुख वीरेन्द्र बुढाथोकीले गरेका थिए ।
काठमाडौं : नेपाली खेलकुदको प्रतिष्ठित एनएसजेएफ पल्सर स्पोर्ट्स अवार्डको २०औं संस्करण आगामी माघ १२ गते हुने भएको छ । अवार्ड आयोजक नेपाल खेलकुद पत्रकार मञ्च (एनएसजेएफ)ले आइतबार पत्रकार सम्मेलन आयोजना गर्दै पल्सरको आधिकारिक विक्रेता हंशराज हुलासचन्द एन्ड कम्पनीसँग सम्झौता गरेको छ । मञ्चका अध्यक्ष दुर्गानाथ सुबेदी (देवेन्द्र) र मुख्य प्रायोजक हंशराज हुलासचन्द कम्पनीका कार्यकारी निर्देशक अभिमन्यू गोल्छाले सम्झौतापत्रमा हस्ताक्षर गरेका हुन् ।
२०६० सालदेखि हुँदै आएको नेपाली खेलकुदको लोकप्रिय अवार्डलाई गोल्छा ग्रुपले साथ दिएको यो लगातार १५औं वर्ष हो । सम्झौता अनुसार गोल्छा ग्रुपले यस पटक पाँच वटा बजाज पल्सरको एन सिरिज मोटर साइकल प्रदान गर्नेछ । जसमा एन २५० दुईवटा र एन १६० तीनवटा मोटर साइकल रहेको छ । साथै गोल्छाले १२ लाख रुपैयाँ नगद पनि दिने उल्लेख गरेको छ ।
पल्सर स्पोट्स अवार्ड नेपाली खेलकुदमा वर्षभर उत्कृष्ट प्रदर्शन गर्ने खेलाडीसहित प्रशिक्षक र खेलकर्मीलाई सम्मान गर्ने कार्यक्रम हो । सो अवसरमा कम्पनीमा निर्देशक अभिमन्यू गोल्छाले पल्सरको उद्देश्य नेपाली खेलकुदसँगै युवाहरूसँग जोडिनु रहेको उल्लेख गर्दै यो अवार्डले नयाँ बेन्चमार्क स्थापित गरेको धारणा राखेका थिए ।
उनले भने, ‘मञ्चले हरेक अवार्डमा नयाँ नयाँ शैली र प्रविधि अपनाएर अवार्डलाई उच्च स्तरको बनाएको छ । मञ्चसँग सहकार्य गर्न पाउदा गोल्छा ग्रुप गर्व महसुस गर्छ । जस्तो सुकै आर्थिक परिस्थिति भएपनि गोल्छाले मञ्चसंग सहकार्य गर्दै जानेछ ।’
मञ्चका अध्यक्ष सुवेदीले आर्थिक रूपमा कठिन परिस्थितिमा कम्पनीले लगातार अवार्डलाई साथ दिएकोमा गोल्छा ग्रुपको कदमको सह्रानीय गरे । यस पटक मनोनयनमा पर्ने खेलाडी र अवार्ड कार्यक्रमको ढाँचामा परिवर्तन गरिने एनएसजेएफले जनाएको छ । यसअघि प्रज्ञा प्रतिष्ठानमा अवार्ड भए पनि केही नयाँ गर्ने उद्देश्यले कार्यक्रम स्थल र कार्यक्रमको शैलीमा परिवर्तन गरिने मञ्चका अध्यक्ष सुवेदीले बताएका छन् ।
यस वर्ष पनि अवार्डमा ९ विधा नै समावेश छ । जसअन्तर्गत वर्षका उत्कृष्ट खेलाडी पुरुष, वर्षका उत्कृष्ट खेलाडी महिला, वर्षका उत्कृष्ट खेलाडी युवा, वर्षका उत्कृष्ट प्रशिक्षक र पिपल्स च्वाइस अवार्ड छन् । यी पाँच जना अवार्ड विजेताले पल्सर मोटरसाइकल पाउनेछन् ।
यीमध्ये वर्ष खेलाडी पुरुष, महिला, युवा, प्रशिक्षक र पिपल्स च्वाइसको मनोनयन केही दिनमै सार्वजनिक गरिने मञ्चले जनाएको छ । यस अवार्डमा पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड र एसियन स्पोट्र्स जर्नालिस्ट अवार्ड विधा रहनेछ । यस विधाका विजेताले जनही ५० हजार रुपैयाँसहित विभिन्न गिफ्ट ह्याम्पर पाउनेछन् ।
मनोनयन नहुने विधा लाइफटाइम, स्पेसल, पारा एथलिट र एसियन स्पोर्टस जर्नालिस्ट अवार्ड विजेताको घोषणा कार्यक्रमकै दिनमा गरिनेछ ।
गत वर्ष पुरुषतर्फ फुटबलका अञ्जन विष्ट, महिलातर्फ भलिबलकी अरुणा शाही र प्रशिक्षकतर्फ फुटबलका अब्दुल्लाह अलमुताइरी, युवामा मनीष डाँगी उत्कृष्ट भएका थिए । पिपल्स च्वाइस अवार्ड भलिबलकी उषा भण्डारीले जितेकी थिइन् । स्पेसल अवार्ड दानबहादुर तामाङ र उनकी पत्नी मायादेवी मोक्तानलाई प्रदान गरिएको हो । उनीहरू ब्याडमिन्टनका रत्नजित, सरादेवी र नङ्सदेवीका मातापिता हुन् ।
पारा एथलिट सम्मान तेक्वान्दोकी पलेशा गोवर्धन, एसियन स्पोर्टस जर्नालिस्ट अवार्ड कतारका मोहम्मद हिजी र लाइफटाइम एचिभमेन्ट अवार्ड ओलम्पिक रघुराज वन्तलाई प्रदान गरिएको थियो ।
काठमाडौं : आईसीसी टी–२० विश्वकपमा नेपाल समूह डीमा परेको छ । आईसीसीले शुक्रबार सार्वजनिक गरेको खेल तालिका अनुसार नेपाल दक्षिण अफ्रिका, बंगलादेश, श्रीलंका र नेदरल्याण्डस् रहेको समूह डीमा परेको हो । टी–२० विश्वकप आउँदो जुनमा अमेरिका र वेष्ट इण्डिजमा हुँदै छ ।
समूह एमा भारत, पाकिस्तान, अमेरिका, क्यानडा, आयरल्यान्ड, समूह बीमा इंग्ल्यान्ड, अस्ट्रेलिया, नामिबिया, स्कटल्यान्ड, ओमान र समूह सीमा न्युजिल्यान्ड, वेस्ट इन्डिज, अफगानिस्तान, युगान्डा, पपुवा न्युगिनी छन् ।
नेपालले जुन ४ मा नेदरल्याण्ड्ससँग आफ्नो पहिलो खेल खेल्दै प्रतियोगिताको शुरुवात गर्नेछ । यस्तै नेपालले जुन ११ मा श्रीलंकासँग आफ्नो दोस्रो खेल खेल्नेछ भने जुन १४ मा साउथ अफ्रिकासँग आफ्नो तेस्रो खेल खेल्नेछ । नेपालले आफ्नो समूह चरणको अन्तिम खेल बंगलादेशसँग जुन १६ मा खेल्नेछ ।
नेपालले शुरुवाती दुई खेल अमेरिकामा खेल्नेछ भने त्यसपछि बाँकी दुई खेल वेस्टइन्डिजमा गएर खेल्नेछ । नेपालले नेदरल्याण्ड्स र श्रीलंकासँगको खेल अमेरिकामा हुनेछ भने साउथ अफ्रिका र बंगलादेशसँगको खेल वेस्ट इन्डिजमा खेल्नेछ ।
हरेक समूहमा रहेका देशले ४–४ खेल खेल्ने छन् र समूहका शीर्ष दुई टिम सुपर एटमा पुग्नेछन् । जहाँ ८ टोलीलाई दुई समूहमा विभाजन गरिनेछ । दुवै समूहको शीर्ष दुई –दुई टोलीले सेमिफाइनल खेल्ने छन् ।
यसअघि जुन ४ देखि ३० सम्म हुने भनिएकोमा आईसीसीले मिति हेरफेर गरेको छ । अब टी२० विश्वकप जुन १ देखि २९ सम्म हुनेछ । पहिलो खेल अमेरिका र क्यानडाबीच जुन १ मा डल्लासमा हुनेछ ।
गत कात्तिकमा घरेलु मैदानमा यूएईलाई हराउँदै नेपालले १० वर्षपछि टी–२० विश्वकपमा स्थान पक्का गरेको थियो ।
सन्तोष पौडेल/मध्यान्ह
बर्दिया : बर्दियाको गेरुवा गाउँपालिकामा भएको छैटौं अध्यक्ष कप तथा गेरुवा गाउँपालिका अन्तर विद्यालयस्तरीय राष्ट्रपति रनिङ शिल्ड एक प्रिय राठौर मावि पाताभारले चुमेको छ । २१ वटा स्वर्ण पदक, १० वटा रजत पदक र ५ वटा कास्य पदक जित्दै एक प्रिय राठौर मावि पाताभारले यसपटकको रनिङ शिल्ड आफ्नो पोल्टामा पारेको हो ।
त्यस्तै मावितर्फको १४ स्वर्ण पदक, ४ रजत पदक र ७ कास्य पदक हात पार्दै जनता मावि गोलाले द्वितीय स्थान प्राप्त गरेको छ भने ११ स्वर्ण पदक, ४ रजत पदक र ९ कास्य पदक जित्दै जानकी मावि जनकनगरले तृतीय स्थानमा चित्त बुझाएको छ ।
आधारभूत विद्यालयतर्फको ४ स्वर्ण पदक, ३ रजत पदक र २ कास्य पदक जित्दै सरस्वती आ.वि. जोधीपुरले प्रथम स्थान सुरक्षित गरेको छ । ४ स्वर्ण पदक, २ रजत पदक र ३ कास्य पदक हात पार्दे सरस्वती आ.वि. विन्द्रा द्वितीय र ४ स्वर्ण पदक, २ रजत पदक र १ कास्य पदकसहित जनता आधारभूत विद्यालय सरखोल तृतीय भएको छ ।
त्यस्तै प्राथमिक विद्यालयतर्फको ४ स्वर्ण पदक र १ रजत पदक जित्दै नेपाल राष्ट्रिय प्रा.वि. गणेशपुर प्रथम, १ स्वर्ण पदक र १ रजत पदक जित्दै दिव्य ज्योति प्रा.वि. गुप्तीपुर द्वितीय र १ स्वर्ण पदक हात पार्दै नवज्योति प्रा.वि. सुखार तृतीय भएको छ ।
गेरुवा गाउँपालिकाको आयोजना तथा पशुपति माध्यमिक विद्यालय पशुपतिनगरको आतिथ्यतामा वडा नं ४ को गेरुवा खेलग्राममा प्रतियोगिता सम्पन्न भएको हो । मार्चपास, एथलेटिक्स, कबड्डी, भलिबल तथा कराते र तेक्वान्दो गरी ६ विधामा प्रतियोगिता भएको थियो । माध्यमिक तहको प्रतियोगितामा ७, आधारभूत तहको प्रतियोगितामा ८ र प्राथमिक तहको प्रतियोगितामा १२ वटा विद्यालयले प्रतिस्पर्धा गरेका थिए ।
प्राथमिक तहको प्रतियोगितामा कबड्डी, भलिबल र मार्सल आर्टको विधा समावेस गरिएको थिएन भने आधारभूत तहको प्रतियोगितामा कबड्डी र मार्सल आर्टको विधासमेत समावेश नगरिएको खेलकुद प्रतियोगिता सञ्चालन सचिवालयका संयोजक भीमबहादुर धामीले बताए ।
सामुदायिक र निजी गरी ३३ वटा विद्यालयमध्ये २० वटा विद्यालय मार्चपासमा सहभागी भएका थिए । प्रतियोगिताको समापन कार्यक्रममा बोल्दै गेरुवा गाउँपालिकाका अध्यक्ष जमानसिंह केसीले रनिङ शिल्ड प्रतियोगितामा ३ वर्ष लगातार प्रथम हुने माध्यमिक विद्यालय, आधारभूत विद्यालय र प्राथमिक विद्यालयलाई क्रमशः ५ लाख, ३ लाख र २ लाख रुपैयाँ अनुदान स्वरुप रकम गाउँपालिकाले प्रदान गर्ने घोषणा गरे । प्रतियोगिता सोमबारदेखि ३ दिनसम्म चलेको थियो ।
काठमाडौं : नेपाल क्रिकेट संघ (क्यान)ले वार्षिक खेलतालिका सार्वजनिक गरेको छ । क्यानले बिहीबार पत्रकार सम्मेलन गर्दै सन् २०२४ मा नेपालले खेल्ने राष्ट्रिय तथा अन्तर्राष्ट्रिय प्रतियोगितालाई समेट्दै वार्षिक खेलतालिका सार्वजनिक गरेको हो ।
नेपालले आईसीसी विश्वकप लिग दुई, टी–२० सिरिज, एकदिवसीयलगायतका सिरिजलाई खेलतालिकामा समेटेको छ । नेपालले आगामी फेब्रुअरी १० देखि १४ तारिखसम्म क्यानडासँग तीन खेलको एकदिवसीय सिरिज खेल्नेछ । त्यस्तै नेपालले २७ फेब्रुअरीदेखि ५ मार्चसम्म नामिबिया, नेदरल्यान्ड्स र नेपालबीच त्रिकोणात्मक टी–२० सिरिज खेल्ने खेलतालिकामा उल्लेख छ । उक्त खेल नेपालमै हुनेछ । त्यस्तै १९ मार्चदेखि ३० अप्रिलसम्म नेपाल ‘ए’ले आयरल्यान्ड ‘ए’सँग पाँच एकदिवसीय र तीन टी–२० खेल खेल्ने छ ।
यसैगरी क्यानले आफ्नो खेलतालिकामा आगामी मंसिरमा नेपाल प्रिमियर लिग क्रिकेट प्रतियोगिताको आयोजना गरिने उल्लेख गरेको छ । क्यानका सचिव पारस खड्काले नेपालसँग कुनै देशले खेल्न चाहेमा त्यसलाई पनि खेलतालिकामा समावेश गरिने बताए ।
तिलु शर्मा पौडेल/मध्यान्ह
दोहा, कतार : पहिलो पटक देशबाहिर आयोजित भलिबल प्रतियोगितामा सहभागी हुन यूएई पुगेका म्याग्दी बेनी नगरपालिका-९ घतान नेप्टेचौरका सुजन चोखाल यूएईमा सम्मानित भएका छन् l परदेशी हातेमालो सहकारी संस्था यूएईले आयोजना गरेको 'परदेशी हातेमालो दोस्रो कप २०२३-२४' भलिबल प्रतियोगितामा भाग लिन नेपालबाट आएका खेलाडी चोखाललाई म्याग्दी प्रवासी नेपाली संघ (मोना) यूएईले एक कार्यक्रमका बीच खादा र सम्मान पत्रले सम्मान गरेको हो ।
बुधबार साँझ एक कार्यक्रमको आयोजना गर्दै उक्त प्रतियोगितामा भाग लिन यूएई आएका चोखालसहित गलकोट नगरपालिका बागलुङका खेलाडीद्वय रबी केसी र इन्द्र बि.क., बरेङ गाउँपालिका बागलुङका जीवन सुनार, चापाकोट नगरपालिका स्याङ्जाका राजन दर्लामी मगर, लिखुपिके गाउँपालिका सोलुखुम्बुका विष्णु बस्नेतलाई पनि सम्मान गरिएको थियो ।
कार्यक्रममा बोल्दै चोखालले प्रवासमा खेल खेल्न आएर पनि आफ्नै जिल्लाका दाजुभाइहरूसँग भेटघाट भइ सबै खेलाडीहरूसँग भेट हुन पाउँदा खुसी लागेको बताए l राष्ट्रिय टोलीबाट विभिन्न खेलहरूमा सहभागी भइसकेका गण्डकी प्रदेशका सेटर चोखाल विभागीय टोली सहभागी भएका खेलहरूमा समेत हाबी हुने खेलाडी हुन् । उनले विदेशमा रहेका नेपालीको भलिबलप्रतिको चासो देखेर उत्साहित भएको बताए । प्रतियोगितामा चोखाल उत्कृष्ट सेटर घोषित भएका थिए l
कार्यक्रममा आफ्ना भनाइ राख्दै सल्लाहकार भीम कुमार राना मगरले मोनाले पनि यस्तै प्रकृतिको कार्यक्रमको आयोजना गरी खेलाडीहरूलाई निमन्त्रणा गरी खेलाउन सकेमा भलिबल जगतको विकासमा इँटा थपिने बताए l विदेशी भूमिमा आफ्नो खेल कौसलता देखाउने आएका भयका खेलाडीहरूलाई सम्मान गर्न पाउँदा खुसी लागेको संघका अध्यक्ष सुवास राम्जालीले बताए l खेलाडीहरू बुधबार राति नै स्वदेश फर्किएका छन् l
कुलेन्द्र शाही/मध्यान्ह
सुर्खेत : गत वर्ष २०७९ कात्तिक २ गते पोखरामा बसेको राष्ट्रिय खेलकुद परिषद् (राखेप)को बोर्ड बैठकले दशौं संस्करणको राष्ट्रिय खेलकुद प्रतियोगिता कर्णालीमा आयोजना हुने निर्णय गर्यो । बैठकले २०८१ मंसिर २ देखि ९ सम्ममा कर्णालीमा हुने निर्णय गरेको थियो । निर्णय गरेसँगै दशौं राष्ट्रिय खेलकुद कर्णालीमा नहुने धेरैले आंकलन गर्दै आइरहेका छन् । अहिलेसम्म केन्द्र सरकारले कुनै समन्वय, सहकार्य र बजेट नदिँदा आवश्यक भौतिक पूर्वाधार लगायत व्यवस्थापनको विषयमा प्रदेश सरकार एक्लैले सक्ला त भन्ने प्रश्न उठ्ने गरेको छ ।
त्यति ठुलो प्रतियोगिता प्रदेश राजधानी वीरेन्द्रनगरमा निर्माणाधीन एउटा रंगशालाले मात्रै धान्ने अवस्था रहँदैन । त्यसका लागि संघीय सरकारले अन्य जिल्लाहरूमा खेल पूर्वाधार निर्माणका लागि चासो नदिएको प्रदेश खेलकुद विकास परिषद्को भनाइ छ । दशौं राष्ट्रिय खेलकुद कर्णालीमा हुने भएपछि सबैको चासो अहिले कर्णालीतर्फ गएको छ । यसका लागि कर्णाली प्रदेशको राजधानी वीरेन्द्रनगरमा रंगशालाको काम तिव्र गतिमा भइरहेको छ ।
दशौं राष्ट्रिय खेलकुदलाई सफल पार्न भने कर्णालीमाथि चुनौतीका चाङ छन् । केन्द्र सरकार तथा आयोजक संस्था राष्ट्रिय खेलकुद परिषद्को बेवास्ताका कारण राष्ट्रिय खेलकुद आयोजनाबारे विगतदेखि नै विभिन्न प्रश्न उठिरहेका छन् । कर्णालीका मन्त्रीहरुले समेत विभिन्न कार्यक्रममा दशौं राष्ट्रिय खेलकुद कर्णालीलाई अवसरसँगै चुनौती पनि भएको बताउँदै आएका छन् ।
बुधबार कर्णाली प्रदेश सामाजिक विकास मन्त्री खड्गबहादुर पोखरेलले कर्णालीमा हुन लागेको दशौं राष्ट्रिय खेलकुद चुनौतीसँगै अवसरको विषय भएको बताएका थिए । नेपाल पत्रकार महासंघ कर्णाली प्रदेशले आयोजना गरेको खेलकुद पत्रकारितासम्बन्धी दुईदिने तालिममा उनले यस्तो बताएका थिए । उनले अहिले निर्माणाधीन वीरेन्द्रनगर रंगशालामा मात्रै सबै खेलहरु खेलाउन सम्भव नरहेको बताए ।
वीरेन्द्रनगरमा निर्माणाधीन रंगशालाबाहेक प्रदेशका अन्य जिल्लामा खेलकुद पूर्वाधारको अभाव छ भने स्वयं कर्णालीलाई खेलकुद प्रतियोगिता लक्षित पूर्वतयारीको लागि समेत बजेट अभाव छ । दशौं राष्ट्रिय खेलकुदका सम्पूर्ण खेलहरु उक्त रंगशालामा मात्रै खेलाउन कठिन हुने मन्त्री पोखरेलको भनाइ छ । उनले त्यसका लागि अन्य जिल्लाहरुमा पनि आवश्यक संरचनाहरु बनाउन आवश्यक रहेको बताए ।
तर आर्थिक अभाव भने कायमै रहेको उनको भनाइ छ । आर्थिक अभावका बीचमा पनि दशौं राष्ट्रिय खेलकुद प्रतियोगिता गर्नुपर्ने बाध्यतामा कर्णाली रहेको छ । गौरवको रंगशालाको काम अहिले धमाधम भइरहेको छ । कर्णालीको खेलकुद विकासलाई अगाडि बढाउन सरकार अग्रसर भइरहेको पनि मन्त्री पोखरेलले बताए । यता खेलकुद परिषद्का सदस्य सचिव विश्वामित्र सञ्ज्यालले भने रंगशालाको काम तोकिएको समयमा सम्पन्न हुने र दशौं राष्ट्रिय खेलकुद कर्णालीबाट अन्त सार्नुपर्ने अवस्था आउन नदिने दाबी गर्दै आइरहेका छन् ।
१ अर्ब ५९ करोड ४७ लाख ४७ हजार ६ सय रुपैयाँ लागतमा बन्ने रंगशाला २०८१ जेठ महिनासम्म सम्पन्न गरिसक्ने लक्ष्य लिइएको छ । अत्याधुनिक प्रविधिको प्रयोगमा निर्माण भइरहेको रंगशालामा १० हजार दर्शक अट्ने क्षमताको बनाइँदैछ । २०७८ कात्तिकमा पूर्वमुख्यमन्त्री तथा नेपाली कांग्रेस संसदीय दलका नेता जीवनबहादुर शाहीले शिलान्यास गरेको उक्त रंगशालाको काम हालसम्म ८० प्रतिशत सम्पन्न भएको छ ।
२०८१ मंसिर २ गतेबाट शुरु हुने दशौं राष्ट्रिय खेलकुदका लागि प्रदेश गौरवको रंगशाला निर्माणकोे काम धमाधम भइरहेको छ । जसमा आर्थिक प्रगतितर्फ ६२ र भौतिकतर्फ ८० प्रतिशत काम सम्पन्न भएको खेलकुद परिषद्का सदस्य सचिव सञ्ज्यालले मध्यान्ह दैनिकलाई जानकारी दिए ।
शिवजी मण्डेल/मध्यान्ह
बझाङ : बझाङको केदारस्युँ गाउँपालिकामा अन्तर माध्यमिक विद्यालयस्तरीय राष्ट्रपति रनिङ शिल्ड प्रतियोगिता शुरु भएको छ । 'राष्ट्रका लागि खेलकुद स्वास्थ्यका लागि खेलकुद' भन्ने मूल नारका साथ बुधबारदेखि केदारस्युँ गाउँपालिका ९ झोतामा तेस्रो पालिका अन्तर माध्यमिक विद्यालय स्तरीय राष्ट्रपति रनिङ शिल्ड प्रतियोगिता शुरु भएको हो ।
केदारस्युँ गाउँपालिकाको आर्थिक सहयोग तथा भैरव माध्यमिक विद्यालयको आयोजनामा शुरु भएको रनिङ शिल्ड प्रतियोगितामा पालिकाभरका १३ वटा माध्यमिक विद्यालयले सहभागिता जनाएका छन् ।
केदारस्युँ गाउँपालिका खेलकुद विकास समिति अध्यक्ष हरिश कुमार मल्लको अध्यक्षतामा शुरु भएको प्रतियोगितमा गाउँपालिका अध्यक्ष गणेशबहादुर बोहरा प्रमुख अतिथि रहेका थिए । विशिष्ट अतिथिमा उपाध्यक्ष मनिषा धामी, जिल्ला खेलकुद समितिका अध्यक्ष पुष्पलाल रोकाया (ज्वाला) रहेका थिए भने अतिथि गाउँपालिकाका प्रमुख प्रशासकीय अधिकृत पदमराज उपाध्याय, ९ वटै वडाका वडाध्यक्षलगायत रहेका थिए ।
राष्ट्रपति रनिङ शिल्ड प्रतियोगितामा भलिबल, कबड्डी तथा एथलेटिक्समा विद्यार्थीबीच प्रतिस्पर्धा गराइने छ । बुधबार पहिलो दिन छात्रछात्रा सटफुट सम्पन्न भएको छ । जसमा छात्रतर्फ जगन्नाथ माद्यामिक विद्यालय सैन्सु प्रथम, चन्द्रोदय माध्यामिक विद्यालय भाडसैन दोस्रो र नमादेव माध्यामिक विद्यालय भाडिकोट तेस्रो भएको छ । त्यस्तै छात्रातर्फ नमादेव माद्यामिक विद्यालय भाडिकोट प्रथम, भैरव माद्यामिक विद्यालय झोता दोस्रो, र कैलाश माद्यामिक विद्यालय लोतु तेस्रो भएको छ । प्रतियोगिता २१ गतेसम्म सञ्चालन हुने छ ।
प्रतियोगिता केदारस्युँ गाउँपालिकाले निमार्ण गरेको खेलमैदानमा भइरहेको छ । झोता सेती नदी छेउमा गाउँपालिकाले रनिङ शिल्ड सञ्चालन गर्नकै लागि भनेर निर्माण गरेको खेलमैदानमा प्रतियोगिता भइरहेको गाउँपालिका खेलकुद विकास समितिका अध्यक्ष हरिश कुमार मल्लले बताए । पालिकाले आफूसँग भएको स्रोत साधन प्रयोग गरी खेलमैदान निर्माण गरेको थियो । खेलमैदान निर्माणका लागि झोता सुडिखोलाका ३५ गिरी परिवार, करिब ६ बिष्ट परिवार र कडायत परिवारले १ बिघाभन्दा बढी जमिन उपलब्ध गराएका थिए ।
राष्ट्रपति रनिङ शिल्ड शुरु गर्नुपर्ने तर खेल उचित खेल मैदान नहुँदा समस्या भएपछि गाउँपालिकाले खरिद गरेको स्काभेटरले पुस ४ गतेदेखि उक्त खेलमैदान निमार्ण कार्य शुरु गरेको थियो । तत्काल रनिङ शिल्ड सञ्चालनका लागि निर्माण गरिएको खेल मैदालाई व्यवस्थित बनाउका लागि आवश्यक पहल भइरहेको गाउँपालिका अध्यक्ष गणेशबहादुर बोहराले बताए ।
जिल्लाका ४ वटा स्थानीय तहले राष्ट्रपति रनिङ शिल्ड गर्न बाँकी
जिल्लाको चार वटा स्थानीय तहले पालिकास्तरीय राष्ट्रपति रनिङ शिल्ड प्रतियोगिता गर्न बाँकी रहेको छ । जयपृथ्वी नगरपालिका, मष्टा गाउँपालिका, बित्थडचिर गाउँपालिका र सुर्मा गाउँपालिकाले रनिङ शिल्ड सञ्चालन गर्न बाँकी रहेको हो ।
अहिलेसम्म छबिसपाथिभेरा गाउँपालिका, दुर्गाथली गाउँपालिका, थलारा गाउँपालिका, तलकोट गाउँपालिका, साइपाल गाउँपालिका, बुङ्गल नगरपालिका, खप्तडछान्ना गाउँपालिकामा राष्ट्रपति रनिङ शिल्ड सम्पन्न भएको छ भने केदारस्युँ गाउँपालिकामा चलिरहेको छ ।
जिल्ला खेलकुद समितिले पुस मसान्तभित्र राष्ट्रपति रनिङ शिल्ड प्रतियोगिता सम्पन्न गरिसक्ने भनेर पत्राचार गरेको छ । माग दोस्रो सातादेखि जिल्लास्तरीय राष्ट्रपति रनिङ शिल्ड प्रतियोगिता सञ्चालन गर्ने तयारी रहेको जिल्ला खेलकुद समितिका अध्यक्ष रोकायाले जानकारी दिए ।
काठमाडौं : प्रधानमन्त्री कप महिला टी–२० राष्ट्रिय प्रतियोगिताको उपाधि सशस्त्र प्रहरी बलको एपीएफ क्लबले जितेको छ । एपीएफ क्लबले कोशी प्रदेशलाई फाइनल खेलमा ११ रनले पराजित गर्दै उपाधि जितेको हो । विजेता एपीएफ क्लबले रु पाँच लाख तथा उपविजेता कोशीले रु तीन लाख पुरस्कार प्राप्त गर्यो ।
कीर्तिपुरस्थित त्रिभुवन विश्वविद्यालयको क्रिकेट मैदानमा टस जितेर पहिला ब्याटिङ गर्दै एपीएफ क्लबले कोशी प्रदेशसामु जितका लागि एक सय १५ रनको लक्ष्य प्रस्तुत गरेको थियो । कोशीले २० ओभर खेल्दै चार विकेटको क्षतिमा एक सय तीन रन मात्र बनाउन सक्यो । यसअघि ब्याटिङ गर्ने क्रममा एपीएफ क्लबले सात विकेटको क्षतिमा एक सय १४ रन बनाएको थियो । एपीएफका लागि इन्दु बर्माले अद्र्धशतकीय पारी खेलिन् । उनले ४७ बल खेल्दै ५३ रनको योगदान दिइन् । सो क्रममा बर्माले छ चौका र एक छक्का प्रहार गरिन् । यस्तै ज्योति पाण्डेले २७ तथा रोमा थापाले १४ रन बनाइन् ।
बलिङतर्फ कोशीका लागि अप्सरी बेगमले ह्याट्रिक गरिन् । उनले २०औँ ओभरको पहिलो, दोस्रो र तेस्रो बलमा लगातार विकेट लिइन् । पहिलो बलमा इन्दु बर्मा, दोस्रो बलमा नेरी थापा तथा तेस्रो बलमा सोनु खड्काको विकेट लिइन् । यस्तै एलिशा खडियाले दुई तथा कप्तान रुविना क्षेत्री र निशा शाहले एक–एक विकेट लिइन् ।
यस्तै कोशी प्रदेशका लागि ब्याटिङ गर्ने क्रममा कप्तान रुबिना क्षेत्रीले अद्र्धशकतीय पारी खेलिन् । उनले ६२ रन बनाइन् । क्षेत्रीले ५८ बल खेल्दै एक छक्का र सात चौका प्रहार गरिन् । यस्तै काजल श्रेष्ठले २९ बलमा २२ रन बनाइन् । बलिङतर्फ एपीएफ क्लबका लागि करुणा भण्डारी र कप्तान सीता रानामगरले एक एक विकेट लिइन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies