कैलाली : नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले उपप्रधानमन्त्री एवम् गृहमन्त्री रवि लामिछानेको राजीनामा मागेर बदनाम गराउन खोजेको आरोप लगाएका छन् ।
आज प्रेस चौतारी कैलालीले धनगढीमा आयोजना गरेको पत्रकार सम्मेलनमा उनले सहकारीसँग कुनै सम्बन्ध नै नभएका लामिछानेलाई जबरजस्ती बदनाम गराउन खोजिएको दाबी गरे । लामिछानेको सहकारीसँग कुनै सम्बन्ध नभएको भन्दै उनले छानबिनमा कुनै प्रभाव नपर्ने जिकिर गरे ।
उनले सहकारीपीडितले चाँडै न्याय पाउने समेत उल्लेख गरे । “कुनै मन्त्री वा सांसदविरुद्ध उजुरी पर्दैमा पद नरहने भए मन्त्री र सांसद सबै खाली हुने अवस्था हुने थियो”, उनले भने ।
उनले प्रदेश सरकारको भागबण्डा र कम्युनिष्ट पार्टीबीचको एकीकरणबारे अनुमानका भरमा प्रतिक्रिया दिन नहुने टिप्पणी गरे । सोमबार एमाले डडेल्धुराको नवौं अधिवेशन उद्घाटन गरेर धनगढी आइपुगेका ओली आज काठमाडौं फर्किएका छन् ।
काठमाडौं : प्रमुख प्रतिपक्षी नेपाली कांग्रेसले सहकारी अनियमिततामा गृहमन्त्री रवि लामिछानेको संलग्नताबारे छानबिन गर्न संसदीय समिति गठनको माग गरेको छ ।
प्रतिनिधि सभाको बैठकमा बोल्दै नेपाली कांग्रेसका प्रमुख सचेतक रमेश लेखकले गृहमन्त्री लामिछानेको संलग्नताबारे छानबिन गर्न संसदीय समिति गठनको माग गरेका हुन् ।
उनले प्रधानमन्त्री पुष्पकमल दाहाल 'प्रचण्ड'लाई नै गलत जानकारी दिइएको बताउँदै अब कसरी निष्पक्ष छानबिन होला ? भन्दै प्रश्न गरे । उनले गृहमन्त्री लामिछानेविरुद्ध प्रधानमन्त्रीले प्रमाण छैन भनेपनि पर्याप्त प्रमाण भएको दाबी गरे ।
उनले सरकारीबाट रवि लामिछानेको नाममा पेश्की फच्छ्यौट भएको र प्रहरी कार्यालयमा जाहेरी दर्ता गरिएको बताए ।
प्रतिनिधिसभाको मंगलबारकै बैठकमा प्रधानमन्त्री प्रचण्डले गृहमन्त्रीको बचाउ गरेका थिए । उनी कुनै सहकारीको सञ्चालक र व्यवस्थपन नभएको र उनको नाममा प्रवाह भएको ऋण फर्छ्यौट भएको देखिन आएकाले अनुसन्धान गर्नुपर्ने नदेखिएको भन्ने प्रहरीबाट ब्रिफिङ आएको प्रधानमन्त्रीको दाबी थियो ।
काठमाडौं : नेकपा माओवादी केन्द्रले उपाध्यक्ष कृष्णबहादुर महरा पक्राउको विषयमा छलफल गरेको छ । प्रधानमन्त्री निवास बालुवाटारमा आज बसेको पार्टीको पदाधिकारी बैठकमा सुन तस्करी प्रकरणमा प्रहरीले सोमबार उपाध्यक्ष महरालाई पक्राउ गरेको विषयमा छलफल भएको उपाध्यक्ष एवम् प्रवक्ता अग्निप्रसाद सापकोटाले जनकारी दिए ।
“छलफल जारी छ । विभिन्न कोणबाट हामी छलफल गरिरहेका छौं । छिट्टै निष्कर्षमा पुग्छौ”, प्रवक्ता सापकोटाले भने । पार्टीको जिम्मेवारीबाट निलम्बन गर्ने वा नगर्ने भन्ने विषयमा पनि छिट्टै निष्कर्षमा पुगिने उनको भनाइ छ । उनले नियमित बैठक बसेर एउटा धारणा सार्वजनिक गरिने जानकारी दिए ।
बैठकमा प्रधानमन्त्री एवम् पार्टी अध्यक्ष पुष्पकमल दाहाल ‘प्रचण्ड’ले सुनको अवैध पैठारी (तस्करी) नियन्त्रणसम्बन्धी जाँचबुझ आयोग, २०८० को प्रतिवेदनबारे जानकारी गराएका थिए ।
उपाध्यक्ष महरालाई सोमबार विहान कपिलवस्तुबाट पक्राउ गरी काठमाडौं ल्याइएको थियो । उनलाई सोमबार नै काठमाडौं जिल्ला अदालतबाट अनुसन्धानका लागि चार दिन म्याद थप गरिएको छ ।
मनीषा अवस्थी/मध्यान्ह
काठमाडौं : सत्ताको बागडोर सम्हाल्न यतिबेला माओवादी ‘कमाण्डर’ पुष्पकमल दाहाल प्रचण्ड सिंहदरबार छन् । तेस्रो पटक प्रधानमन्त्री नियुक्त प्रचण्डले गत ३० फागुनमा मात्रै तेस्रोपटक विश्वासको मत लिएका छन् ।
तर माओवादीका सर्वोच्च नेता प्रचण्ड तेस्रोपटक मुलुकको नेतृत्व गरिरहँदा उनका पुराना सहयात्री र उच्च तहका नेताहरू संदिग्ध गतिविधीमा मुछिने क्रम बढिरहेको छ । सोमबार मात्रै पूर्वसभामुख र पटकपटक मन्त्री भइसकेका माओवादीका शीर्ष तहका नेता कृष्णबहादुर महरा पक्राउ परेका छन् । महरा पक्राउ परेकै अघिल्लो दिन पूर्व उपराष्ट्रपति एवं माओवादीका पूर्व कमाण्डर नन्दकिशोर पुनका छोरा एवं अखिल क्रान्तिकारी महासचिव दिपेश पुन पक्राउ परेका थिए ।
महरा दोस्रो पटक पक्राउ
एकताका प्रचण्डका विश्वासपात्र मानिने कृष्णबहादुर महरा दोस्रो पटक सोमबार पक्राउ परेका छन् । यसअघि यौन दुराचारमा जेल नै परिसकेका महरा यतिबेला ठूलो परिमाणको सुन तस्करीका मुछिएका छन् ।
महरालाई २०७९ पुस १० मा दुबईबाट नेपाल भित्रिएको करिब ९ केजी सुन ल्याउने दावा जिनवाङलाई काठमाडौंमा संरक्षण दिएको आरोप छ । गत वर्षको असोज महिनामा नै महरा र छोरा राहुल सहित ४ जनाविरुद्ध संगठित अपराध र भन्सार छलीको अभियोगमा मुद्दा दायर भएको थियो । सो कसुरमा उनका छोरा राहुल हाल पुर्पक्षका क्रममा केन्द्रीय कारागारमा छन् । महरालाई भने यसअघ राजनीतिक दबाबमा पटक पटक बचाउने काम भएको थियो ।
यसपटक भने सुन तस्करी सम्बन्धी छानबिन गर्न गठित उच्चस्तरीय जाँचबुझ आयोगले महरालाई मुद्दा चलाउन सिफारिस गरेपछि प्रहरीले उनलाई पक्राउ गरेको हो । यसअघि २०६७ भदौ १८ मा उनी चिनियासँग सांसद किनबेचका निम्ति पैसाका मागेको अडियो उनी सभामुख भएको बेला सार्वजनिक भएको थियो ।
संगठित तस्करीमा पुन
संगठित अपराधमा मुछिएका माओवादी उच्च तहका अर्का नेता हुन्, पूर्व उपराष्ट्रपति नन्दबहादुर पुन । संगठित सुन तस्करीमा पुनका छोराहरू दिपेश र जितेन्द्र सहित सचिवालयका कर्मचारी पनि मुछिएका छन् । ती मध्ये दिपेश भने गत शुक्रबार पक्राउ परिसकेका छन् भने जितेन्द्र फरार छन् । उनीहरूमाथि सहकारी ठगी लगायतका अन्य मुद्दा पनि छन् ।
दिपेशलाई गत वर्ष हङकङबाट ब्रेक सुमा लुकाएर ल्याएको करिब ६१ किलो सुनमा संलग्नता भएको आरोप छ । उनीमाथि २०७९ पुस १० मा दुबईबाट विद्युतीय चुरोट भेपमा लुकाएर ल्याइएको करिब ९ किलो सुन तस्करीमा पनि संलग्न रहेको आरोप छ । दिपेश फरार रहेका जीबी राई नेतृत्वमा बुटबलमा रहेको सुप्रिम बचत तथा ऋण सहकारीका पनि संलग्नता थियो ।
यसैगरी नन्दबहादुर पुनमा जेठा छोरा जितेन्द्र हालै संगठित सुन तस्करीमा मुछिएका छन् । यति मात्रै होइन, जितेन्द्रले उपराष्ट्रपति कार्यालयबाट बनाएको स्वकीय सचिवको परिचयपत्र र अन्य सरकारी कागजात राखी चिनियाँ बिक्रेतासँग उधारो सुन किनेको प्रमाण पनि भेटिएको थियो । जितेन्द्रले सोही ४ किलो सुनको भुक्तानी नदिएको कसुरमा चिनियाँ अदालतबाट दोषी ठहर भएका छन् ।
जेलमा टोपबहादुर
माओवादीका शीर्ष नेता टोपबहादुर रायमाझी यतबेला कारागारमा छन् । नक्कली भुटानी शरणार्थी काण्डमा मुछिएका उनी पुर्पक्षका लागि थुनामा छन् । रायमाझी अमेरिका लगिदिने भन्दै नक्कली भुटानी शरणर्थी बनाएर ८ सय ७५ नेपालीलाई ठगेको मुद्दामा संलग्न छन् ।
उक्त घटनामा राइमाझीका छोरा सन्दिप पनि मुछिएका छन् । रायमाझी बाबुछोरा सहितका ३० जनालाई प्रतिवादी रहेको उक्त मुद्दा काठमाडौं जिल्ला अदालतमा विचाराधीन छ ।
अर्थमन्त्रीकै अपराध ‘कनेक्सन’
प्रधानमन्त्री प्रचण्डले विश्वासपात्रका रूपमा अर्थमन्त्रालय पु¥याएका अर्थमन्त्री वर्षमान पनि उस्तै विवादित छन् । माओवादीका उपमहासचिव एवं अर्थमन्त्री पुन ६० किलो सुन तस्करीमा संलग्न रहेको भेटिैको थियो । सुन तस्कर बेल्जियमा नागरिक दावा छिरिङ पक्राउ परेपछि दावा र उनकी श्रीमती अमला रोकामगरसँग बर्षमानको घनिष्ठ सम्बन्ध रहेका प्रशस्त प्रमाणहरू फेला परिसकेका छन् ।
यसैगरी सुन तस्करीमा मुछिएका पुर्व उपराष्ट्रपति नन्दबहादुर पुनका तत्कालीन परराष्ट्र विज्ञ बनेका जीवनकुमार गुरुङसँग पनि उनको सम्बन्ध रहेका तथ्यहरू आएका छन् । सो प्रकरणमा बर्षमानका भाइ प्रनिश पुन संगठित सुन तस्करीमा पक्राउ परेका दावासँग व्यापारिक साझेदारी गरेको कुरा पनि आएको थियो ।
बादलका काण्डै काण्ड
माओवादी एमालेको एकीकरणपूर्व प्रचण्ड निकट मानिने रामबहादुर थापा बादलको नाम पनि नक्कली भुटानी शरणार्थी काण्डमा मुछिएको छ । बादलका छोरा प्रतिकले गृहमन्त्री भएको बेला काम मिलाइदिने भन्दै नक्कली भुटानी शरणार्थी बनाउने गिरोहसँग रकम असुलेको आरोप छ ।
छोरा उक्त प्रकरणमा मुछिएसँगै पारिवारिक हिसाबले उनको नाम पनि सो अपराधमा मुछिएको हो । प्रतिकमाथी अहिले काठमाडौं जिल्ला अदालतमा संगठित अपराध, राज्य विरुद्वको अपराध, किर्ते, ठगी लगायतका कसुरमा मुद्दा विचाराधीन छ भने उनी हाल फरार छन् । बादल गृहमन्त्री हुँदा उनका सचिवालयका कर्मचारी पनि नक्कली भुटानी शरणार्थी काण्डमा मुछिएका थिए ।
जनार्दनको क्लिन चिट
प्रचण्डका अर्का विश्वास पात्र जनार्दन शर्मा पनि पटक पटक विभिन्न विवादमा मुछिरहेका छन् । पछिल्लो बजेट निर्माणमा अनाधिकृत ब्यक्तिलाई प्रवेश गराई आफु अनुकल करका दर परिवर्तन गरेको आरोपमा निलम्बित भएका छन् । केही समयपछि त्यसमा उनले प्रचण्डको संरक्षणमा क्लिनचिट पनि पाएका थिए । त्यसअघि २०७८ को चैतमा एक युवाले अनाधिकृत रूपमा नेपाल ल्याएको रकम राष्ट्र बैंकले जफत गरेपछि छुटाउनका लागि पटक पटक राष्ट्र बैंकलाई दबाब दिएका थिए । सो विषयम विवाद बढेपछि उनले गभर्नर महाप्रसाद अधिकारीलाई निलम्बन समेत गरे ।
माओवादीका अर्का चर्चित नेता हाल लुम्बिनी विकास कोषको उपाध्यक्ष रहेका पुर्व सासंद ल्हारक्याल लामा पनि दाहोरो नागरिकताको विवादमा मुछिसकेका छन् । यी बाहेक माओवादीका कयौं शिर्ष नेताहरू केही न केही विवाद तथा अपराधमा संलग्न रहेको विषय बाहिरिरहन्छ ।
मुकुन्द लामिछाने/मध्यान्ह
काठमाडौं : गण्डकी प्रदेशका नवनियुक्त मन्त्री राजीव गुरुङ (दीपक मनाङे)ले पद तथा गोपनीयताको शपथ लिएका छन् । उनलाई प्रदेश प्रमुख डिल्लीराज भट्टले शपथ खुवाए ।
सोमबार मुख्यमन्त्री सुरेन्द्रराज पाण्डेले मनाङेलाई भौतिक पूर्वाधार तथा यातायात विकास मन्त्री नियुक्त गरेका थिए । लगत्तै पोखरास्थित प्रदेश प्रमुखको कार्यालयमा शपथ गराइएको हो ।
कांग्रेस नेतृत्वको सरकारमा मनाङे सहभागी भएता पनि स्पष्ट बहुमत पुग्दैन । ६० सदस्यीय गण्डकी प्रदेशमा सरकार बनाउन ३१ सांसद आवश्यक पर्छ । कांग्रेससँग २७ सांसद छन् । मनाङेको साथ पाउँदा २८ हुन्छ । राप्रपाले साथ दिए कांग्रेस नेतृत्वको सरकारको पक्षमा ३० सांसद देखिनेछन् ।
तर माओवादी केन्द्रको चुनाव चिन्हबाट चुनाव लडेका नेसपा नेता तथा प्रदेश सभा सदस्य फणिन्द्र देवकोटाले कांग्रेस नेतृत्वको सरकारलाई साथ दिन खोजेको नेताहरु बताउँछन् । यसो हुँदा उनको प्रदेश सभा सदस्य पद नरहन पनि सक्छ । फणिन्द्र देवकोटाको पद गए पनि कांग्रेससँग दिपक मनाङे हुँदा ३० सांसद अर्थात बहुमत पुग्छ । यही कारण उनले मन्त्री बन्ने अवसर पाएका छन् ।
मनाङे नहुँदा संघीय सरकारमा गठबन्धन गरेका दलहरुसँ पनि सरकार बनाउन आवश्यक संख्या पुग्दैन । संघीय सरकारमा रहेका दलहरको गठबन्धनसँग २९ सांसद छन् । नयाँ गठबन्धनमा रहेका दल एमालेका २२ र माओवादीका ८ गरी २९ सांसद छन् ।
फणिन्द्र देवकोटाको पद रिक्त भए २८ मा झर्छ । यस्तो अवस्थामा सभामुखले राजीनामा दिए २९ पुग्छ । यो अवस्थामा मनाङले नयाँ गठबन्धनलाई साथ दिए सरकार बन्न सक्छ । अर्थात, मनाङे जता गए त्यतै सांसदको संख्यामा बहुमत पुग्छ ।
स्वतन्त्र चुनाव जितेका दीपक मनाङे नेकपा एकीकृत समाजवादीमा प्रवेश गरेकाले नयाँ गठबन्धनको सरकार बनाउन साथ दिने कतिपयको बुझाइ थियो । तर मनाङले एकीकृत समाजवादी पार्टी नै छाडिदिए र कांग्रेस नेतृत्वको सरकारमा सहभागी भए । यो सँगै वर्तमान सरकारको विकल्पका लागि नयाँ गठबन्धनलाई असहज भएको छ ।
मनाङे यसअघि प्रदेश सभाको अघिल्लो कार्यकालमा पनि पटक–पटक मन्त्री भएका थिए । मनाङे त्यस्ता माननीय भएका छन् जसलाई अस्थिर राजनीतिकले सँधै अवसर दिलाएको छ । प्रदेश सभाको अघिल्लो कार्यकालमा अस्थिरताकै कारण पटक–मन्त्री भएका मनाङेलाई चालू कार्यकालमा पनि अस्थिरताले नै मन्त्री पद दिलाएको छ । मन्त्री भएपछि मनाङेले अब गठबन्धन नबदल्ने पनि बताएका छन् ।
‘अब म गठबन्धन जे भए पनि कतै जान्न । बारम्बार यताउता गर्दा मजा आउँदैन’ उनी भन्छन्, ‘केन्द्रमा मलाई सोधेर पार्टी र सरकार फुटेको होइन । गठबन्धन घरीघरी फुटाउँदै हिँड्छन्, म बटुल्दै हिँड्न सक्दिनँ । म स्वतन्त्र हो, ह्वीप लागे लागोस् । मलाई के मतलब ? म फेरि जितिहाल्छु ।’
काठमाडौं- राष्ट्रियसभाको आजको बैठकले प्रतिनिधिसभा सदस्य मञ्जु शर्मा अन्सारीको निधनमा शोक प्रस्ताव पारित गरेको छ । बैठकमा राष्ट्रियसभाका अध्यक्ष नारायणप्रसाद दाहालले अन्सारीको निधनप्रति श्रद्धाञ्जली व्यक्त गर्दै शोकसन्तप्त परिवारमा गहिरो समवेदना प्रस्ताव गरेको छ । उक्त प्रस्ताव बैठकले सर्वसम्मतरुपमा पारित गरेको थियो ।
बैठकमा दिवङ्गत सांसद अन्सारीप्रति एक मिनेट मौनधारणा गरिएको थियो । अन्सारी जनता समाजवादी पार्टी जसपा नेपालबाट विसं २०७९ को प्रतिनिधिसभामा समानुपातिक सदस्यका रुपमा निर्वाचित हुनुभएको थियो । उहाँको उपचारका क्रममा आइतबार निधन भएको थियो ।
राष्ट्रियसभाको अर्को बैठक यही चैत ७ गते बुधबार बिहान ११ बजेर १५ मिनेटमा बस्नेछ ।
काठमाडौं - नेकपा माओवादी केन्द्रका उपाध्यक्ष कृष्णबहादुर महरा पक्राउ परेका छन् ।
महरालाई कपिलवस्तुबाट पक्राउ गरी काठमाडौं ल्याउन लागेको प्रहरीले जनाएको छ ।
सुन तस्करी सम्बन्धी छानबिन गर्न गठित उच्चस्तरीय जाँचबुझ आयोगले महरालाई मुद्दा चलाउन सिफारिस गरेपछि प्रहरीले उनलाई पक्राउ गरेको हो ।
यसअघि सिफारिस अनुसार तत्काल कारबाही गर्न गृह मन्त्रालयले प्रहरीलाई निर्देशन दिएको थियो ।
महरासँग आयोगले बयान समेत लिएको थियो । उनका छोरा राहुल महरा विद्युतीय चुरोट भेपमार्फत भएको सुन तस्करी प्रकरणमा पुर्पक्षका लागि थुनामा छन् ।
दिवाकर अधिकारी/मध्यान्ह
काठमाडौं : प्रमुख प्रतिपक्षमा पुगेपछि नेपाली कांग्रेसभित्र नेतृत्वको विषयमा बहस हुन थालेको छ । नयाँ नेतृत्वका लागि शेखर कोइराला, शशांक कोइराला, पूर्णबहादुर खड्का, बिमलेन्द्र नीधि, गगन थापा लगायतले सक्रियता बढाएका छन् । कृष्णप्रसाद सिटौला, प्रकाशमान सिंह लगायत नेताहरु पनि सभापतिका आकांक्षी छन् ।
कांग्रेसको विधानतः पार्टीको १५औं महाधिवेशन २०८२ मंसिर मसान्तभित्र हुनुपर्छ । गत फागुन ७ देखि १० गतेसम्म राजधानीमा बसेको महासमिति बैठकमा सांगठनिक प्रतिवेदन प्रस्तुत गर्दै महामन्त्री गगन थापाले समयमै महाधिवेशन गर्ने प्रस्ताव राखेका थिए । जसलाई महासमिति बैठकले स्वीकार गरेको छ ।
फेरि विधानतः सभापति शेरबहादुर देउवा भने त्यो महाधिवेशनमा फेरि नेतृत्वका लागि दावी गर्न पाउँदैनन् । कांग्रेसमा लगातार दुई पटक भन्दा बढी सभापति हुन पाउने व्यवस्था छ । त्यसैले नेतृत्वमा दावी नगर्ने देउवालाई मनाएर नेतृत्व हत्याउन नेताहरुको होड नै चलेको छ ।
नेताहरुका अनुसार सभापति देउवाले कसलाई विश्वास गर्छन् उसले कांग्रेसको नेतृत्व पाउने सम्भावना बलियो रहन्छ । यसकारण सभापतिका आकांक्षीहरु देउवालाई रिझाउन लागिपरेका छन् ।
पूर्वमहामन्त्री डा. शशांक कोइरालाले सार्वजनिक रुपमै १५औं महाधिवेशनमा पार्टी सभापति हुने गरी अघि बढेको बताएका छन् । आइतबार रामेछापमा आयोजित कार्यक्रमलाई सम्बोधन गर्दै कोइरालाले सभापति बनेर नयाँ ढंगले पार्टी सञ्चालन गर्ने योजना रहेको बताएका हुन् । ‘तपाईंहरूको आग्रह जायज छ, सोही अनुसार म नेतृत्वका लागि अघि बढ्छु । सभापति बनेर अहिलेभन्दा भिन्न ढंगले पार्टी चलाउने मेरो योजना छ’ उनले भने ।
अहिलेको समयमा पार्टी चलाउने शैलीमा परिवर्तन आवश्यक रहेको र आफू कांग्रेसको नेतृत्वका लागि योग्य रहेको उनको भनाइ छ । अर्थात् नेताहरुले खुलेरै १५औं महाधिवेशन केन्द्रित गतिविधि गर्न थालेका हुन् ।
राजनीतिक विश्लेषक गेजा शर्मा वाग्लेका अनुसार, वर्तमान सभापति देउवा अबको महाधिवेशनपछि स्वभाविक रूपमा अवकाशमा जान्छन् । त्यसकारण भावी नेतृत्वबारे छलफल हुनु स्वाभाविक हो ।
वाग्लेका अनुसार सभापति देउवाले उत्तराधिकारी तोक्ने सम्भावना कम छ । यदि देउवाले उत्तराधिकारी घोषणा गरे नेता÷कार्यकर्ताहरूले विवेकसम्मत निर्णय गर्छन् । उत्तराधिकारी घोषणा गरेनन् भने सभापतिका सबै आकांक्षीहरु उनको नजिक हुन खोजिरहन्छन् ।
कांग्रेसको महासमिति बैठकपछि नेताहरुबीच चियापान गर्ने होडबाजी नै देखिएको थियो । पूर्वउपसभापति शशांक कोइरालाले आयोजना गरेको चियापान कार्यक्रममा आयोजक शशांक र धन्यवाद सभापति देउवाले दिएका थिए । यस्तो दृश्य देखिनुको कारण पनि देउवासँग नजिक हुने र विश्वास जित्ने प्रयास भएको नेताहरु बताउँछन् ।
काठमाडौं -राष्ट्रिय प्रजातन्त्र पार्टी राप्रपाका अध्यक्ष राजेन्द्र लिङ्देनसहित नेताहरू मधेस झर्ने तयारी गर्दैछन् ।
सरकारसमक्ष ४० बुँदे माग अघि सार्दै आन्दोलनमा होमिएको राप्रपाले आउँदो चैत २७ गते काठमाडौंमा वृहद जनप्रदर्शन गर्दैछ । उक्त जनप्रदर्शनलाई भव्य र प्रभावकारी बनाउने उद्देश्यले राप्रपाका नेताहरू पाँच दिन तराइ यात्रामा निस्किने भएका छन् ।
आफ्ना मागहरूबारे जनतालाई जागरूक तुल्याउन र जनमत सिर्जना नेताहरूको मधेश यात्रा तय गरिएको प्रवक्ता मोहन श्रेष्ठले बताए । चैत ८ गतेसम्म चल्ने यो अभियानमा राप्रपाका नेताहरू मधेसका जिल्लाहरूमा पुग्नेछन्। मधेसका आठै जिल्लामा राप्रपाले आमसभा र कार्यकर्ता भेला गर्ने उनले बताए। यात्रामा अध्यक्ष लिङ्देन, वरिष्ठ उपाध्यक्षहरू बुद्धिमान तामाङ, रवीन्द्र मिश्र, महामन्त्री धवलशमशेर राणा, प्रवक्ता ज्ञानेन्द्र शाही, मधेस प्रदेश अध्यक्ष भरत गिरी, नेताहरू बिना जयसवाल, खुस्बु ओलीलगायत रहनेछन्।
सोमबारदेखि मधेश यात्रा तय गरेको राप्रपाले यही चैत २७ गते काठमाडौं केन्द्रित जनप्रदर्शन पनि गर्दैछ। चैत ५ गते जनकपुरस्थित जानकी मन्दिरमा पूजाआजा गरेर मधेस यात्रा सुरू गरिने, सोमबार धनुषामा अगुवा कार्यकर्ता भेला र सर्लाहीको बरहथवामा आमसभा, चैत ६ गते रौतहटको गौरमा कार्यकर्ता भेला र पर्साको वीरगञ्जमा आमसभा हुनेछ भने साँझ वीरगञ्जका उद्योगी तथा व्यवसायीहरूसँग अन्तक्रिया गर्ने कार्यक्रम रहेको प्रवक्ता श्रेष्ठले जानकारी दिए। यसैगरी चैत ७ गते बाराको निजगढमा आमसभा र बर्दिबासमा महोत्तरीको अगुवा कार्यकर्ता भेला हुनेछ भने चैत ८ गते सिराहाको लाहानमा कार्यकर्ता भेला हुनेछ भने सप्तरीको बोधेबसान नगरपालिकामा आमसभा गर्ने तय भएको उनले जानकारी दिए।
काठमाडौं - उपप्रधान एवं गृहमन्त्री रवि लामिछानेले तत्काल पूर्वसभामुख कृष्णबहादुर महरासहित प्रतिवेदनले औंल्याएका निजामती तथा प्रहरी कर्मचारीलाई कारबाही गर्न निर्देशन दिएका छन् ।
आइतबार मन्त्रालयमा भएको छलफलमा लामिछानेले सुनको अवैध पैठारी तस्करी नियन्त्रण सम्बन्धी जाँचबुझ आयोगको प्रतिवेदन तत्काल कार्यान्वयन गर्न निर्देशन दिएका हुन् ।
आइतबार बिहान गृहसचिव एकनारायण अर्याल, प्रहरी महानिरीक्षक वसन्त कुँबर र नेपाल प्रहरीको केन्द्रीय अनुसन्धान विभागका प्रमुख श्याम ज्ञवालीलाई लामिछानेले आयोगको प्रतिवदेन तत्काल कार्यान्वयन गर्न निर्देशन दिएका हुन् । यसअघि बिहीबार सुनको अवैध पैठारी तस्करी नियन्त्रणसम्बन्धी जाँचबुझ आयोगले उपप्रधान तथा गृहमन्त्री लामिछानेलाई प्रतिवेदन बुझाएको थियो । पूर्वन्यायाधीश डिल्लीराज आचार्य अध्यक्ष रहेको आयोगले बिहीबार गृहमन्त्रीलाई प्रतिवेदन बुझाएको हो। करिब ५ महिनाको छानबिनपछि आयोगले बनाएको प्रतिवेदन ४८५ पृष्ठ, १३ अनुच्छेद र ९ अनुसूची रहेको छ ।
९ वटा भन्सार नाकाको स्थलगत अनुगमन, ६८ व्यक्तिसँगको बयान र ६१ विज्ञसँगको परामर्शका आधारमा प्रतिवेदन तयार पारिएको आयोगले जनाएको छ । आयोगले केही व्यक्तिविरुद्ध मुद्दा चलाउन सिफारिससमेत गरेको छ । विभागीय कारबाही, सीडीआर डीएफएलमा नियमित देखिएका व्यक्तिको सूची र निर्दोष देखिएका व्यक्तिको नामावली प्रतिवेदनमा समेटिएको छ ।
प्रधानमन्त्री पुष्पकमल दाहाल ‘प्रचण्ड’ले जाँचबुझ आयोगले गरेको सिफारिस कार्यान्वयन गर्न उपप्रधानमन्त्री एवं गृहमन्त्री लामिछानेलाई निर्देशन दिएका थिए । त्यस्तै गृहमन्त्री लामिछानेले बाँसबारी छालाजुत्ता कारखानाको १० रोपनी जग्गा सरकार मातहत ल्याउने प्रकृया पनि तत्काल सुरु गर्न निर्देशन दिएका छन् ।यस विषयमा सर्वोच्च अदालतमा मुद्दा विचाराधीन रहेको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies