काठमाडौं : सूर्य नेपाल गल्फ टुर २०२३–२४ अन्तर्गतको तेस्रो प्रतियोगिता, सूर्य नेपाल इस्टर्न ओपन बुधबारदेखि धरान गल्फ क्लबमा शुरू हुँदैछ । तीन दिनसम्म चल्ने प्रो प्रतियोगिता ५४ होलको हुनेछ ।
प्रतियोगितामा ३० प्रोफेसनल र १० एमेच्योर गल्फरले भाग लिने निश्चित भएको नेपाल प्रोफेसनल गल्फर्स एसोसिएसन एनपीजीएका महासचिव दीपक आचार्यले बताए । मंगलबार सम्म नाम दर्ता गर्ने समय रहेकोले सहभागी संख्या बढ्न सक्नेछ । काठमाडौं बाहिर हुने दुई प्रतियोगितामध्ये सूर्य नेपाल इस्टर्न ओपनमा धरानका ५ प्रोफेसनल गल्फरको सहभागिता रहनेछ ।
प्रतियोगितामा डिफेन्डिङ च्याम्पियन तथा नेपाल नम्बर एक गल्फर शुक्र बहादुर राई घरेलु कोर्समा उपाधि रक्षा गर्ने कोशिसमा रहनेछन। यो सिजन उत्कृष्ट फर्ममा रहेका तथा सिजनको दोस्रो प्रतियोगिता सूर्य नेपाल एनपीजीए म्याच प्लेका उपाधि विजेता दिनेश प्रजापति पनि प्रमुख दाबेदार हुन् । यस्तै भुवन नगरकोटी,जयराम श्रेष्ठ, नीरज तामाङ, सञ्जय लामा, धन थापा पनि दाबेदार खेलाडी हुन् ।
३६ होलको समाप्तीमा कट लागु हुनेछ । जहाँ २१ टप प्रोफेसनल खेलाडीले अन्तिम १८ होलको लागि स्थान बनाउनेछन् । यो पटकदेखि एमेच्योर खेलाडीको हकमा भने प्रोफेसनल खेलाडीको कटमा पर्नेले मात्र अन्तिम १८ होलको प्रतिस्पर्धामा सहभागीता जनाउन पाउनेछन् ।
प्रतियोगितामा नेपाली राष्ट्रिय गल्फ टिमका दुई उत्कृष्ट एमेच्योर खेलाडी सुबाश तामाङ र सदभाव आचार्यले सहभागीता जनाउने छैनन् । सुबाश भारतीय गल्फ टुरको क्यू– स्कुलको तयारीमा रहदा सदभाव बंगलादेश ओपनमा सहभागी हुँदैछन् ।
कुल ८ लाख ४० हजार नगद पुरस्कार राशी रहेको प्रतियोगिताको विजेताले १ लाख ४० हजार, दोस्रो र तेस्रो हुनेले क्रमश ९६ हजार र ७२ हजार नगद पुरस्कार प्राप्त गर्नेछन् । साथै उत्कृष्ट २१ मा पर्न सफल प्रो गल्फरले नगद हात पार्नेछन् । प्रतियोगिताको अन्तिम दिन शनिबार प्रो–एम प्रतियोगिता हुनेछ ।
एनपीजीएका अध्यक्ष रबिन्द्रमान श्रेष्ठले प्रायोजक सूर्य नेपाल प्रालिलाई निरन्तरको सहयोग र साथको लागि धन्यवाद दिए । सूर्य नेपाल गल्फ टुर २०२३–२४ अन्तर्गत कुल आठ प्रतियोगिता हुनेछन् । जसमा कुल ६५ लाख नगद पुरस्कार रहेको छ ।
काठमाडौं : दक्षिण अफ्रिकामा जारी यु–१९ विश्वकप क्रिकेटमा नेपाल न्युजिल्याण्डसँग पराजित भएको छ । आइतबार दक्षिण अफ्रिकाको इस्ट लण्डनमा भएको खेलमा नेपाल न्युजिल्याण्डसँग ६४ रनले पराजित भएको हो । ३०३ रनको विजयी लक्ष्य पछ्याएको नेपालले निर्धारित ५० ओभरमा ९ विकेट गुमाउँदै २३८ रनमात्र बनाउन सक्यो ।
नेपालका लागि ओपनर अर्जुन कुमालले अर्धशतकीय इनिङ खेले । अर्जुनले १०४ बल खेल्दै १२ वटा चौकाको मद्दतमा ९० रन बनाए । कप्तान देव खनालले ३४ बलमा ३६ रनको योगदान दिए । ३६ रन बनाउने क्रममा देवले ५ वटा चौका र १ वटा छक्का हिर्काए । यस्तै सुवास भण्डारी ५२ बलमा ४ चौकाको मद्दतमा ३३ रन बनाएर अविजित रहे भने तिलक भण्डारी १९ बलमा २ चौका र १ छक्काको मद्दतमा १७ रन बनाएर अविजित रहे ।
यस्तै दिपक बोहोराले २७ बलमा १५ रन बनाए भने आकाश चन्दले २६ बलमा १४ रनको योगदान दिए । गुल्शन झा र आकाश त्रिपाठी २–२ रनमा आउट हुँदा तीन खेलाडी शून्य रनमा आउट भए । ओपनर दीपक बोहोरा, उत्तम मगर र दिपेश कंडेल शून्य रनमा आउट भएका हुन् । बलिङतर्फ न्युजिल्याण्डका लागि मेसन कलार्कले ३ विकेट तथा इवाल्ड श्रेडर ओस्कार र ओस्कार ज्याक्सनले २–२ विकेट लिए ।
टस जितेर पहिला ब्याटिङ गरेको न्युजिल्याण्डले निर्धारित ओभरमा ८ विकेट गुमाएर ३०२ रनको बलियो योगफल तयार पारेको थियो । न्युजिल्याण्डका लागि स्नेहिथ रेड्डीले नटआउट १४७ रनको शतकीय पारि खेल्दा ओसकार ज्याकसनले ७५ रन बनाए । यस्तै टम जोन्सले ३३ रन जोड्दा एलेक्स थम्पसनले १३ रन बनाएका थिए । नेपालका सुवास भण्डारीले ३ विकेट लिँदा गुलसन झाले २ विकेट हात पारे । यस्तै, दीपेश कंडेल, आकाश त्रिपाठी र तिलक भण्डारीले १–१ विकेट लिए ।
काठमाडौं : दक्षिण अफ्रिकामा जारी यु-१९ विश्वकप क्रिकेटको आफ्नो पहिलो खेलमा नेपाललाई न्युजिल्याण्डले ३०३ रनको लक्ष्य दिएको छ । दक्षिण अफ्रिकाको इस्ट लन्डनमा टस जितेर पहिले ब्याटिङ गरेको न्युजिल्याण्डले निर्धारित ५० ओभरमा ८ विकेट गुमाउँदै ३०२ रन बनायो ।
न्युजिल्याण्डका स्नेहिथ रेड्डीले शतकीय इनिङ खेले । उनी १२५ बलमा १४७ रन बनउँदै अविजित रहे । यस्तै न्युजिल्याण्डका कप्तान ओस्कार ज्याक्सनले अर्धशतकीय इनिङ खेले । उनले ८१ बलमा ७५ रन बनाए ।
बलिङ तर्फ नेपालका लागि सुवास भण्डारीले ३ विकेट लिए भने गुल्शन झाले २ विकेट लिए । यस्तै दिपेश कंडेल, तिलक भण्डारी र आकाश त्रिपाठीको नाममा एक-एक विकेट रह्यो ।
काठमाडौं : २३औं सशस्त्र प्रहरी दिवस २०८० को उवसरमा नेपाल प्रहरी र सशस्त्र प्रहरीबीच मैत्रीपूर्ण फुटबल प्रतियोगिता भएको छ । सशस्त्र प्रहरी बल नेपाल प्रधान कार्यालय हलचोकस्थित एपीएफ रंगशालामा बिहीबार ३५ वर्षभन्दा माथिका वरिष्ठ अधिकृत तथा अधिकृतहरुको सहभागितामा सञ्चालन भएको मैत्रीपूर्ण फुटबल प्रतियोगितामा सशस्त्र प्रहरीको तर्फबाट सशस्त्र प्रहरी महानिरीक्षक राजु अर्याल र नेपाल प्रहरीको तर्फबाट प्रहरी अतिरिक्त महानिरीक्षक किरण बज्रचार्य टिम क्याप्टेन रहेका थिए ।
प्रतियोगितामा नेपाल प्रहरी र सशस्त्र प्रहरी बल नेपालबीच गोलरहित बराबरीमा खेल सम्पन्न भएको छ । महानिरीक्षक राजु अर्यालले सशस्त्र प्रहरी बल नेपाल र प्रहरी अतिरिक्त महानिरीक्षक किरण बज्रचार्यले नेपाल प्रहरीको तर्फबाट एक आपसमा मायाको चिनो आदान–प्रदान गर्नुकासाथै महानिरीक्षक अर्यालले खेलमा सहभागी खेलाडी, प्रशिक्षक र टिम म्यानेजरलाई प्रशंसापत्र समेत प्रदान गरेका थिए ।
खेलकुद प्रतियोगितामा प्रहरी अतिरिक्त महानिरीक्षक मिरा चौधरी, सशस्त्र प्रहरी अतिरिक्त महानिरीक्षकहरु नारायणदत्त पौडेल, चन्द्र प्रकाश गौतम र वंशीराज दाहाल, प्रहरी नायव महानिरीक्षक केदार ढकाल लगायत नेपाल प्रहरी, सशस्त्र प्रहरी बल नेपालका वरिष्ठ अधिकृत, अधिकृत तथा विल्लादार जवानहरुको उपस्थिति रहेको थियो ।
काठमाडौं : प्रधानमन्त्री कप एकदिवसीय राष्ट्रिय क्रिकेट प्रतियोगितामा कोशी प्रदेशलाई हराउँदै नेपाल पुलिस क्लबले लगातार दोस्रो जित हासिल गरेको छ । जितका लागि १ सय ६७ रनको विजयी लक्ष्य पछ्याएको पुलिसले २३ दशमलव १ ओभरमा ३ विकेट गुमाउँदै पूरा गर्यो । पुलिसको जितमा अर्जुन साउदले सर्वाधिक ६२ रन बनाए । उनले ६३ बलमा ५ चौका र २ छक्कासहित ६२ रनमा अबिजित रहे ।
त्यस्तै दीपेन्द्रसिंह ऐरीले अबिजित ३८ रन बनाए । उनले १७ बलमा ४ चौका र २ छक्कासहित ३८ रन बनाए । दीलीप नाथले ३१ बलमा २ चौका र १ छक्कासहित ३१ बनाए । यसैगरी कुशल भुर्तेलले १२ र सुनिल धमलाले १६ रन बनाए । कोशीका कमल खत्रीले २ विकेट लिए भने सोनु मण्डलले १ विकेट लिए ।
त्यसअघि कीर्तिपुरस्थित त्रिवि मैदानमा भएको खेलमा कोशी प्रदेशले ४८ दशमलव २ ओभरमा सबै विकेट गुमाउँदै एक सय ६६ रनको योगफल बनाएको थियो । कोशीको लागि सुजन थपलियाले एक सय ५ रनको योगदान गरे । उनले १ सय २६ बलमा आठ छक्का र ६ चौकाको मद्दतले सर्वाधिक एक सय ५ रनको योगदान गरेका हुन् । यसैगरी अभ्यास तिमिल्सिनाले २३ र कप्तान अंकित सुवेदीले १० रन बनाए ।
सुजनले आठौं विकेटका लागि अभ्याससँग ९९ रनको साझेदारी गरेका थिए । यता पुलिसका लागि करण केसीले तीन विकेट लिए भने ललितनारायण राजवंशी र सुनिल धमलाले समान दुई दुई विकेट झारे । त्यस्तै राशिद खान, सागर ढकाल र कुशल भुर्तेलले समान एक एक विकेट लिए ।
यस्तै प्रतियोगितामा सुदूरपश्चिम प्रदेशले पनि लगातार दोस्रो जित निकालेको छ । पहिलो खेलमा लुम्बिनी प्रदेशलाई पराजित गरेको सुदूरपश्चिमले मंगलबार भैरहवाको सिद्धार्थ रंगशालामा कर्णाली प्रदेशलाई १३४ रनको फराकिलो अन्तरले पराजित गरेको हो ।
पहिला ब्याटिङ गरेको सुदूरपश्चिमले ५ विकेट गुमाएर २७७ रन बनाएको थियो । सुदूरपश्चिम प्रदेशका ३ खेलाडीले उत्कृष्ट अर्धशतकीय पारि खेले । पहिलो विकेटका लागि खडक बोहोरा र टेक रावतले १३८ रनको साझेदारी गर्दै घरेलु प्रतियोगितामा कीर्तिमान पनि कायम गरेका छन् । खड्क बोहोरा ८० रन बनाएर आउट हुँदा टेक रावतले ५९ रनको पारि खेले । यसैगरी किरण ढगुन्नाले ५० रन बनाउँदा नारायण जोशीले १२ बलमा ३१ रनको तुफानी पारि खेलेका थिए । यस्तै राजु रिजालले १९ रन बनाउँदा नारायण भट्टले १५ रन बनाए । कर्णालीका दिनेश अधिकारी, युनिश सिंह, प्रकाश जैशी र दीपेन्द्र रावतले एक एक विकेट लिए ।
२७८ रनको लक्ष्यसहित मैदान उत्रिएको कर्णाली प्रदेश ३७.२ ओभरमा सवै विकेट गुमाएर १४३ रनमा समेटिन पुग्यो । कर्णालीका लागि दिवान पुनले ३८ रन बनाउँदा अर्जुन घर्तीले २४ रन बनाए । यस्तै, दिनेश अधिकारीले २० तथा हिमांशु शाहीले १७ रन जोडेका थिए । कर्णालीलाई रोक्ने क्रममा सुदूरपश्चिम प्रदेशका शेर मल्लले ४ विकेट लिए । विकाश अग्रीले २ विकेट लँदा नारायण जोशी र भोजराज भाटले एक एक विकेट हात पारे ।यस्तै
मंगलबार नै भएको खेलमा बागमती प्रदेशले सहज जित निकालेको छ । बागमतीले मधेश प्रदेशलाई ८६ रनले पराजित गरेको हो । बागमतीको जितमा सूर्य तामाङले ह्याट्रिक सहित ६ विकेट लिए । मुलपानी क्रिकेट मैदानमा बागमतीले दिएको १९१ रनको लक्ष्य पछ्याएको मधेशले २९ ओभरमा सम्पूर्ण विकेट गुमाउँदै १०४ रन बनायो ।
मधेशका पवन सरार्फले सर्वाधिक ४५ रन बनाए । त्यस्तै मयन यादवल ३१ बनाउँदा निरज यादवले १५ रन बनाए । बागमतीका लागि सूर्यले २९ औं ओभरमा ह्याट्रिक लिए । उनले पहिलो बलमा रुपेशसिंहलाई बोल्ड आउट गर्दा दोस्रो बलमा राजेश यादव र तेस्रो बलमा साम्सद अन्सारीलाई आउट गराए । सूर्य तामाङले ९ ओभरमा ३ मेडनसहित १८ रन खर्चेर ६ विकेट लिए । त्यस्तै ईशान पाण्डे र प्रतिश जि.सीले दुई–दुई विकेट लिए ।
त्यसअघि टस हारेर पहिला ब्याटिङ गरेको बागमतीले ४९ ओभर २ बलमा सम्पूर्ण विकेट गुमाउँदै १९० रनमा अल आउट भएको थियो । बागमतीका प्रतिशले ५९ रनको अर्धशतकीय पारी खेले । त्यस्तै इशान पाण्डेले १५ रन बनाउँदा विपिन आचार्यले १३ रनको योगदान गरे । मधेशका लागि अरनिको यादव र रुपेश सिंहले दुई–दुई विकेट लिए । त्यस्तै राजेश यादव, रन्जित कुमार, हरिशंकर शाह र पवन सरार्फले एक–एक विकेट लिए । बागमतीको यो पहिलो जित हो ।
दिनेश ठाकुर/मध्यान्ह
नेपालगञ्ज : यही माघ २६ र २७ गते दुईदिने राष्ट्रिय हप्किडो च्याम्पियनसिप २०८० नेपालगञ्जमा हुने भएको छ । नेपाल हाप्किडो संघको आयोजनामा प्रोफेसनल राष्ट्रिय हाप्किडो च्याम्पियनसिप नेपालगञ्जको रंगशालामा आयोजना हुने भएको हो ।
हाप्किडो खेललाई विश्वव्यापी मूल्य र मान्यताअनुसार विकास तथा विस्तार गर्न खेलकुदको सांगठनिक ढांचामा समयसापेक्ष सुधार गर्न सरकारी, गैरसरकारी एवम् निजी क्षेत्रका खेलकुद संस्थाबीच समन्वय, सहकार्यमा व्यवसायको रूपमा स्थापित गर्ने उद्देश्यले च्याम्पियनसिप आयोजना गर्न लागिएको आयोजकद्वारा आयोजित पत्रकार सम्मेलनमा जानकारी दिइयो ।
प्रतिस्पर्धामा सातै प्रदेश र नेपाल प्रहरी स्कुलको टिम गरी ८ टिमको सहभागीता हुने आयोजक टिमका संयोजक मोहसिन हलवाईले जानकारी दिए । प्रतिस्पर्धामा फाइटतर्फ महिला र पुरुष दुवैमा ८–८ वटा तौल समूहमा प्रतिस्पर्धा हुनेछ । ४०–४४, ४४–४८, ४८–५२, ५२–५६, ५६–६०, ६०–६४, ६४–६८ र ६८+ तौल समूहमा प्रतिस्पर्धा हुने छ ।
यसैगरी सेल्फ डिफेन्स–डेमोष्ट्रेशन, हाई फल र लङ फलमा पनि प्रतिस्पर्धा हुने छ । च्याम्पियनसिपमा सहभागी हुन आउने सबै खेलाडी, प्रशिक्षक, रेफ्री, जज र निर्णायकको व्यवस्था आयोजकले गर्ने जनाएको छ ।
काठमाडौं : प्रधानमन्त्री कप एकदिवसीय राष्ट्रिय क्रिकेट प्रतियोगितामा नेपाल पुलिस क्लब, लुम्बिनी प्रदेश र मधेश प्रदेशले विजयी शुरुवात गरेका छन् । शनिबारबाट शुरु भएको प्रतियोगितामा बागमती प्रदेशलाई हराउँदै पुलिस, गण्डकी प्रदेशलाई हराउँदै लुम्बिनी तथा कोशी प्रदेशलाई हराउँदै मधेशले विजयी शुरुवात गरेका हुन् ।
त्रिवि क्रिकेट मैदान कीर्तिपुरमा भएको खेलमा पुलिसले बागमतीलाई ६८ रनले पराजित गरेको हो । पुलिसले पहिला ब्याटिङ गर्दै ८ विकेट गुमाएर २८२ रन बनाएको थियो । जवाफमा बागमतीको टोली ४२.३ ओभरमा सबै विकेट गुमाएर २१४ रनमा समेटियो ।
बागमतीका लागि आषुतोश घिरैयाले सर्वाधिक ९२ रनको अर्धशतकीय पारी खेले । उनले ८७ बलमा ९ चौका र ४ छक्का प्रहार गरे । त्यस्तै इसान पाण्डेले ४४ रन बनाउँदा सोनु देबकोटाले १९ रन जोडे । पुलिसका लागि सागर ढकालले तीन विकेट लिए । त्यस्तै करण केसी, राशिद खान र दीपेन्द्र सिंह ऐरीले दुई–दुई विकेट लिए ।
त्यसअघि टस जितेर पहिला ब्याटिङ गरेको पुलिसले निर्धारित ५० ओभरमा ८ विकेट गुमाउँदै २८२ रन बनाएको थियो । पुलिसका लागि राशिद खानले १०६ रनको शतकीय पारी खेले । उनले ११२ बलमा ९ चौका र ६ छक्का प्रहार गरे ।
त्यस्तै आरिफ शेखले ५७ रनको अर्धशतकीय पारी खेले । पुलिसका कप्तान दिपेन्द्र सिंह ऐरीले २१ रन बनाउँदा सुनिल धमला र अर्जुन साउदले २०–२० रन बनाए । बागमतीका रिजन ढकाल र सुर्य तामाङले तीन–तीन विकेट लिए । त्यस्तै गौतम केसी र सोनु देवकोटाले १–१ विकेट लिए ।
यस्तै भैरहवाको सिद्धार्थनगर मैदानमा भएको खेलमा लुम्बिनीले गण्डकीलाई ४ विकेटले पराजित गरेको हो । बाक्लो हुस्सुका कारण निर्धारित समय भन्दा ढिला गरी शुरु हँदा खेल ४२ ओभरमा झारिएको थियो । जसमा टस हारेर पहिला ब्याटिङ गरेको गण्डकी प्रदेशले ३४.४ ओभरमा सवै विकेट गुमाएर जम्मा १११ रन बनायो । गण्डकीका लागि करण पंगेनीले सर्वाधिक २८ रन बनाउँदा कृष्ण एरले १९ रन जोडे । त्यसैगरी अमृत गुरुङले १३ रन बनाउँद समीर कँडेलको ब्याटबाट पनि १३ रन बनेको थियो । अन्य खेलाडीले दोहोरो अंकमा रन बनाएनन् ।
लुम्बिनीका अजय चौहानले सर्वाधिक ५ विकेट लिए । मोहमद हुसेनले २ विकेट लिँदा कृष्ण कार्की, अभिषेक गौतम र नर शार्कीले एक एक विकेट हात पारे ।
११२ रनको सामान्य लक्ष्यसहित मैदान उत्रिएको लुम्बिनीले २८.२ ओभरमा ६ विकेट गुमाएर पूरा गरेको थियो । लुीम्बनीलाई जिता दिलाउन मृनल गुरुङले ४७ रनको पारी खैल्दा मोहमद हुसेनले २१ रन बनाए । गण्डकीका कृष्ण कार्कीले ३ विकेट लिँदा कमल परियारको नाममा पनि ३ विकेट नै रह्यो ।
त्यस्तै मुलपानी मैदानमा भएको खेलमा मधेश प्रदेशले काशी प्रदेशलाई ७ विकेटले पराजित गरेको हो । कोशी प्रदेशले दिएको १२८ रनको लक्ष्य पच्छाएको मधेश प्रदेशले २०.१ ओभरमा ३ विकेट गुमाउँदै जित निकाल्न सफल भयो ।
मधेश प्रदेशलाई जिताउन अनिल साहले सर्बाधिक ८८ रनको योगदान गरे । यसैगरी कप्तान हरि शंकर साहले २४ रन बनाउँदा निरज यादव ९ तथा पवन शर्राफ २ रनमा नटआउट रहे । कोशीका लागि सोनु मण्डलले २ तथा सुजन थपलियाले १ विकेट हात पारे ।
टस हारेर पहिला ब्याटिङ गरेको कोशी प्रदेशले ४१ ओभरमा सवै विकेट गुमाएर जम्मा १२७ रन बनाएको थियो ।
कोशीका लागि फिर्दोश अन्सारीले ४१ तथा कप्तान अंकित सुवेदीले ४० रन बनाउँदा अरु कुनै पनि खेलाडीले दोहोरो अंकमा रन बनाएनन् । मधेशका प्रदीप पासवानले सर्वाधिक ३ विकेट लिँदा राजेश यादव, रञ्जित कुमार र पवन सर्राफले २–२ विकेट लिए । विशाल पटेलले एक–एक विकेट लिए ।
सत्येन्द्र प्रताप सिंह/मध्यान्ह
रौतहट : रौतहटको सदरमुकाम गौरमा आयोजित गौरी शंकर यादव प्रिमियर लिग क्रिकेट प्रतियोगिताको उपाधि गौर नगरपालिका वडा नम्बर ४ सोवरनामाई ११ ले जितेको छ ।
गौरीशंकर यादव फाउण्डेशनले आयोजना गरेको गौरीशंकर यादव प्रिमियर लीगको शनिबार भएको फाइनल खेलमा गौर नगरपालिका वडा नम्बर १ क्रान्तिद्वार ११ लाई ५ विकेटले पराजित गर्दै सोवरनामाई ११ ले उपाधि जितेको हो ।
फाइनल खेलमा पहिले ब्याटिङ गर्दै क्रान्तिद्वार ११ ले निर्धारित २० ओभरमा ११२ रनको सामान्य स्कोर खडा गरेको थियो । जितका लागि ११३ रनको लक्ष्य सोवरनामा ११ ले १९.२ ओभरमा ५ विकेटको क्षतिमा पूरा गर्यो ।
प्रदेश सांसद नागेन्द्र प्रसाद साहले विजेता टिमलाई नगद १५ हजार रुपैयषँसहित शिल्ड प्रदान गरे भने आयोजक संस्थाका अध्यक्ष मोहन यादवले उपविजेता टिमलाई १० हजार रुपैयाँ र शिल्ड प्रदान गरे ।
फाइनल खेलमा राम्रो प्रदर्शन गरेका साहिल साहनीलाई म्यान अफ द म्याचको पुरस्कारबाट पुरस्कृत गरिएको थियो । प्रतियोगितामा उत्कृष्ट प्रदर्शन गरेका राहुल साहनीलाई बेस्ट ब्याट्सम्यान, रवी साहलाई बेस्ट बलर तथा अनिल पटेल बारहवा ११ लाई म्यान अफ द सिरिजको पुरस्कार दिइएको थियो ।
रौतहट : रौतहटको गौरमा रहेको गौर राइस मिलको मैदानमा शुक्रबार भएको मैत्रीपूर्ण क्रिकेट खेलमा राजदेवी नगरपालिका विजयी भएको छ ।
राष्ट्रिय एकता दिवसको अवसरमा आयोजित मैत्रीपूर्ण क्रिकेट खेलमा गौर नगरपालिका क्रिकेट टिमलाई १२ रनले पराजित गर्दै जनप्रतिनिधि र कर्मचारी सम्मिलित राजदेवी नगरपालिकाको टिम विजयी भएको हो ।
गौर नगरपालिकाका नगर प्रमुख शम्भु साह र राजदेवी नगरपालिकाका नगर प्रमुख भिखारी प्रसाद यादवले संयुक्तरुपमा उद्घाटन गरेको मैत्रीपूर्ण क्रिकेट खेलमा पहिलो बल्लेबाजी गर्दै राजदेवी नगरपालिकाले निर्धारित १५ ओभरको खेलमा ३ विकेट गुमाउँदै १४० रनको स्कोर खडा गरेको थियो ।
राजदेवी नगरपालिकाका राकेश यादवले सर्वाधिक ५० रनको योगदान दिए भने गौर नगरपालिकातर्फबाट बलिङमा निमित प्रमुख प्रशासकीय अधिकृत सुवास ठाकुरले २ विकेट लिए ।
राजदेवी नगरपालिकाले जितका लागि दिएको १४१ रनको लक्ष्य पछ्याएको गौर नगरपालिकाको टिम १५ ओभरमा ७ विकट गुमाउँदै १२८ रनमा सीमित भयो ।
उद्घाटन समारोहमा राजदेवी नगरपालिकाका नगर प्रमुख भिखारी यादव, गौर नगरपालिकाका नगर प्रमुख शम्भु साह कानू, प्रमुख जिल्ला अधिकारी हीरालाल रेग्मीले एकता दिवसको महत्व र खेलकुदको महत्वबारे आ-आफ्नो धरणा राखेका थिए ।
काठमाडौं : प्रधानमन्त्री पुष्पकमल दाहाल ‘प्रचण्ड’ले नेपालमा सम्भावनाका धेरै क्षेत्र भएको र त्यसमा पनि खेलकुद प्रचुर सम्भावना बोकेको क्षेत्र भएको बताएका छन् ।
नेपाल बादोरियो कराते डो संघद्वारा यहाँ आज आयोजित ‘चौथो राष्ट्रिय बादोरियो खुला कराते प्रतियोगिता’ को उद्घाटन गर्दै प्रधानमन्त्री दाहालले नेपालमा भर्खरै सम्पन्न दक्षिण एसियाली कराते च्याम्पियनसिप, बंगलादेशमा सम्पन्न पाँचौं दक्षिण एसियाली कराते च्याम्पियनसिप, १९औं संस्करणको एसियाली खेलकुदलगायत राष्ट्रिय तथा अन्तर्राष्ट्रिय प्रतियोगितामा नेपाली खेलाडीले राम्रो नतिजा निकालेको उल्लेख गर्दै खेलकुदमा राम्रो सम्भावना भएको बताए ।
प्रधानमन्त्री दाहालले भने, “नेपाल अपार सम्भावनाले भरिपूर्ण देश हो । देशको विकास र प्रगतिका निम्ति हामीसँग प्रशस्त सम्भावना छन् । त्यसमध्ये खेलकुद राम्रो सम्भावना बोकेको क्षेत्र हो । पछिल्लो दशक खेलमा नेपालले गरेको प्रगतिले पनि यो यथार्थलाई पुष्टि गर्दछ । त्यसैले मैले आफ्नो तेस्रो कार्यकालमा खेल क्षेत्रलाई सबैभन्दा बढी महत्व दिएको छु ।”
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies