–शाम्भवी बाशिष्ठ
कहिले उमङ्गका साथ रमाउँदै
कहिले दुःखी हुँदै
कहिले आफ्नैसँग रिसाउँदै
कहिले उनैलाई फकाउँदै
कहिले घुम्दै/डुल्दै
कहिले लखतरान परेर आराम गर्दै
लामो र घुमाउरो बाटो हुँदै
पार गर्नै पर्दोरहेछ
यो छोटो जिन्दगीको लामो यात्रा ।।
कहिले आफैँसँग लहडिँदै
कहिले आफ्नासँग लड्दै
कहिले कुनै काम नबनेर निराश हुँदै
कहिले आशाका किरणहरू खोज्दै
पार गर्नै पर्दोरहेछ
यो छोटो जिन्दगीको लामो यात्रा ।।
बिहानीको सूर्यको किरणले
धर्तीलाई स्पर्श गरे जस्तो
धर्तीले साना विरुवाहरूलाई माया गरे जस्तो
मिठास र मित्रता संगाल्दै
बित्दै बित्दै जाने न हो यो जीवन ।।
धर्ती मुस्कुराए जस्तै मुस्कुराउँदै
आकाशमा बादल झै मुलायम हुँदै
पार गर्नै पर्दोरहेछ
यो छोटो जिन्दगीको लामो यात्रा ।।
कहिले साथीभाइसँग रमाउँदै
कहिले उनै साथीहरूसँग झगडा गर्दै
कहिले अरूलाई देखाउँनकै लागि
मुसुक्क मुस्कुराउँदै
कहिले प्रसन्नता छाएर पनि
खिसिक्क पर्दै
पार गर्नै पर्दोरहेछ
यो छोटो जिन्दगीको लामो यात्रा ।।
आँसु लुकाउने ठाउँ खोज्दै
कहिले आँसु बगाउन मिल्ने साथ खोज्दै
कहिले पीडा लुकाउने बहानामा आफूलाई लुकाउँदै
पार गर्नै पर्नेरहेछ
यो छोटो जिन्दगीको लामो यात्रा ।।
आफ्ना शब्द र भावनालाई प्रस्तुत गर्दै
नबुझ्नेलाई बुझाउन खोज्दै
कहिले बोल्दै बोल्दै
भावना बुझिदिने मान्छे खोज्दै
ती मान्छेसँग मनका भावनाहरू साँट्दै
पार गर्नै पर्दोरहेछ
छोटो जिन्दगीको लामो यात्रा ।।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies