सरु भुसाल/मध्यान्ह
अर्घाखाँची : क्याम्पसको स्तरोन्नति, सर्वाङ्गीण विकासका साथै पर्यटन प्रवद्र्धनका लागि ज्योती भविश्वर क्याम्पसको आयोजनामा आयोजित महायज्ञमा झण्डै ४० लाख रकम संकलन भएको छ ।
शितगंगा नगरपालिको ऐतिहासिक नगरी डमरु दहको काखमा नयाँ वर्षको पहिलो दिन शुरु भएको महायज्ञ ९ दिनसम्म सञ्चालन भएको क्याम्पस प्रमुख बिष्णु भट्टराईले जानकारी दिए । देशकै ठूलो नगरपालिका सितगंगा नगरपालिका भौगोलिक विकटताका कारण अझै पनि धेरै विकास हुन सकिरहेको छैन । एक वडाबाट अर्को वडा र पालिकाको केन्द्रसम्म पुग्न पनि थुप्रै समय लाग्ने जिल्लाको आधा भन्दा धेरै भू–भागमा भएको उक्त नगरपलिकाको केन्द्र ठाडामा पर्दछ । सोही स्थानमा वि.स २०६९ सालमा त्रिभुवन विश्वविद्यालयबाट अनुमति लिइ स्थापना भएको उक्त क्याम्पसमा शिक्षा तथा व्यवस्थापन संकायका विभिन्न विषयहरु अध्यापन हुँदै आएको छ ।
नगरपालिकाको एक मात्र ज्योति भविश्वर क्याम्पसले क्याम्पस सञ्चालनका लागि गरिएको महायज्ञमा बाजागाजा, नाचगान कलश यात्रा, भजनकिर्तन, विभिन्न कलाकारद्वारा धार्मिक नाटकका साथै विविध सांस्कृतिक प्रस्तुतीहरु, स्थानीय कला संस्कृतिहरु समेत प्रस्तुत गरिएको थियो ।
महायज्ञको लुम्बिनी प्रदेश सभा सदस्य रामजी प्रसाद घिमिरेले उद्घाटन गरेको थिए भने समापन नेपाल सरकारका पूर्व सहरी विकास मन्त्री एवम् प्रतिनिधि सभा सदस्य मेटमणी चौधरीले गरेका थिए । उद्घाटन र समापनका बीचमा लुम्बिनी प्रदेश सरकारमा मुख्य मन्त्री जोखबहादुर महरा, प्रदेश सरकारका अर्थ मन्त्री चेतनारण आचार्य, जिल्ला समन्वय समिति अर्घाखाँचीका प्रमुख जीवनारायण कोइराला, नगरप्रमुख छविलाल पौडेल,उपप्रमुख गिता भाट, प्रमुख प्रशासकीय अधिकृत अर्जुन शर्मा लगायतका जनप्रतिनिधि, राजनीतिक दलका नेताहरु, शैक्षिक तथा धार्मिक व्यक्तित्व, उच्चपदस्थ व्यक्तिहरुले महायज्ञको अवलोकनका साथै क्याम्पस निर्माण तथा विकासका सन्दर्भमा महत्वपूर्ण प्रतिबद्धताहरु व्यक्त गरेका थिए ।
विभिन्न ठाउँहरुमा महायज्ञ सञ्चालन गर्दे आएको मानवसेवा फाउण्डेशनका प्रमुख विजय कृष्णमूर्ति जी महाराजले यस महायज्ञमा पनि प्रमुख वाचकको रुपमा महत्वपूर्ण भूमिका खेलेका थिए । महायज्ञको अवधीभर बिहान, दिउसो,साँझ विभिन्न खालका कथा वाचन, भजन किर्तन, आरतीका साथै विवाह, व्रतबन्ध, रुद्री, ग्रहशान्ति, चौरासी पूजा, तुलादान, लक्ष्य पूजा समेत महायज्ञमा गरिएको मानव सेवा फाउण्डेशनका विष्णु थापाले बताए ।
महायज्ञमा अर्घाखाँची जिल्ला र विशेषगरी शितगंगा नगरपालिका क्षेत्रका विभिन्न शक्तिपिठहरुको आरती, दिव्य कलश पुजन, स्थानीय जातजातिको झाँकी प्रदर्शन, विशिष्ट व्यक्तित्वहरुलाई स्वागत तथा सम्मान, कन्या पुजन, धन्याञ्चल पर्वत तथा अन्य पुजा,जेष्ठ नागरिक तथा एकल नागरिकलाई सम्मान, विभिन्न संघसंस्थाहरुलाई सम्मान गर्नुका साथै धार्मिक तथा पर्यटकीयस्थलहरुको प्रचार–प्रसार गर्न महायज्ञ सफल भएको क्याम्पस सञ्चालक समितिका अध्यक्ष कुमार केशव बेल्वासेले बताए ।
क्याम्पसको अलपत्र अवस्थामा रहेको आठ कोठे भवनको निमार्णका लागि ८ जनाले प्रतिबद्धता गरेको र अन्य साझा प्रतिबद्धताहरु समेत भएको क्याम्पस सञ्चालन समितिका उपाध्यक्ष काशिराम आचार्यले बताए । आम्दानी र खर्चको विवरण संकलन अन्तिम अवस्थामा पुगेको र समितिबाट बैठक बसेर आम्दानी खर्च बाहिर प्रस्तुत गरिने आर्थिक समितिका संयोजन लक्ष्मण पन्थीले बताए । महायज्ञमा सहयोग गर्ने चन्दादाता,जग्गा दाता, जिन्सी, कलाकार, मानवसेवा फाउण्डेशनको टिम, विभिन्न संघसंस्थाहरुलाई स्वागत तथा सम्मान गरिएको थियो ।
सुर्य प्रसाद भुसाल/मध्यान्ह
अर्घाखाँची : अर्घाखाँचीस्थित सन्धिखर्क नगरपालिकाले ४० प्रतिशत अनुदानमा किसानहरुलाई कृषि मेसिनरी औजार प्रदान गरेको छ । सन्धिखर्क नगरपालिकाको आर्थिक वर्ष २०८०/०८१ को वार्षिक स्वीकृत कार्यक्रम अनुसार ५० थान कृषि औजारहरु हाते ट्याक्टर, कुटानी पिसानी मिलहरु विभिन्न समूह सहकारी तथा फर्महरुलाई हस्तान्तरण गरिएको नगरपालिकाका प्रमुख प्रशासकीय अधिकृत खुमलाल भुसालले जानकारी दिए ।
सन्धिखर्क नगरपालिका कृषि शाखाले विद्युतीय टेन्डरमार्फत खरिदको लागि २० लाख रुपैयाँको सामग्री हस्तान्तरण गर्ने प्रयोजनका लागि सूचना प्रकाशित गरेको थियो । सोही अनुसार स्मार्ट पावर प्रा.लि. काठमाडौंले १५ लाख ३४ हजार रुपैयाँमा सामग्री ल्याउने जिम्मा लिएको थियो ।
हाते टेक्टर १४ थान प्रति टेक्टर ४७ हजार, कम्बाइन मिल (कुटानी पिसानि मिल) ३० थान प्रति थान २७ हजार र कर्न सेलर(मकै छोडाउने मिल)प्रति थान ११ हजारका दरले नगरपालिकाको ६० प्रतिशत तथा विभिन्न समूह सहकारी तथा फर्महरुको ४० प्रतिशतमा खरिद गरी हस्तान्तरण गरिएको कृषि शाखा प्रमुख राजेन्द्र भट्टराईले बताए ।
हस्तान्तरण कार्यक्रममा सन्धिखर्क नगरपालिकाका उपप्रमुख मिश्रा आचार्य, प्रमुख प्रशासकीय अधिकृत खुम लाल भुसाल, वडा अध्यक्षहरु, कार्यपालिका सदस्यहरु, नगरपालिका कृषि विकाश शाखाका प्रमुख राजेन्द्र भट्टराई, विभिन्न शाखाका प्रमुखहरु लगायतको उपस्थिति रहेको थियो । अनुदानमा कृषि सामग्री पाएपछि किसानहरु हर्षित भएका छन् । हस्तान्तरण कार्यक्रममा बोल्दै नगरपालिकाका प्रमुख प्रशासकीय अधिकृत भुसालले किसानहरुको माग अनुसार नगरपालिकाले सामग्री हस्तान्तरण गरेको बताए ।
कृष्ण तिवारी/मध्यान्ह
रौतहट : पूर्वमन्त्री मोहम्मद आफताब आलमलाई जन्मकैदको फैसला भएको छ । कांग्रेस नेता तथा पूर्वसांसद समेत रहेका आमलाई बिहीबार रौतहट जिल्ला अदालतले जन्मकैद (२० वर्ष) को फैसला गरेको हो ।
बिहीबार न्यायाधीश मातृकाप्रसाद आचार्यको इजलासले आलमलाई जन्मकैदको सजाय सुनाएको हो ।
रौतहटको राजपुरमा २०६४ चैत २७ गते रौतहटको राजपुरमा बम बिस्फोटमा घाइते भएकाहरुलाई इँटाभट्टामा हालेर हत्या गरेको आरोपमा उनलाई अदालतले सजाय सुनाएको हो ।
अदालतले मोहम्मद अफताब आलमका भाइ ममताभ आलमलाई पनि जन्मकैदको सजाय सुनाएको छ ।
ओबराज शाही/मध्यान्ह
हुम्ला : नेपाल रेडक्रस साेसाइटी जिल्ला शाखा हुम्लाको १८औं अधिवेशनकाे उद्घाटन सत्र सम्पन्न भएको छ । ६ महिना अवधि पूरा भएलगत्तै अधिवेशन गर्नुपर्ने भएपनि केन्द्रकाे निर्णय नआउँदा नाै महिनामा अधिवेशन गर्नुपरेको रेडक्रस साेसाइटी जिल्ला सचिव अर्जुन बाेहराले बताए ।
सचिव बाेहराका अनुसार जिल्लामा रहेका १२ वटा उपशाखा प्रमुखहरुकाे सहभागितामा १८औं जिल्ला अधिवेशन हुन लागेको हो । बिहीबार पाल रेडक्रस साेसाइटी हुम्लाका सभापति गणेश महतकाे अध्यक्षमा उद्घाटन सत्र सम्पन्न भएकाे हो । उद्घाटन सत्रमा नाै महिनामा भएका कामकाे प्रतिवेदन पनि पेस गरिएकाे थियाे ।
अधिवेशनमा सिमकाेट गाउँपालिका उपाध्यक्ष सुशीला राेकाया, जिल्ला समन्वय समितिकी कावा प्रमुख सरिता रावत, अधिवेशन गराउन आएका निर्वाचन अधिकृत रामलाल आचार्य, सिमकाेट गाउँपालिकाका वडा १ देखि ८ सम्मका अध्यक्ष, जिल्लाका सरकारी संस्थाका प्रमुख प्रतिनिधि, सुरक्षाकर्मीका प्रमुख र सञ्चारकर्मीहरुकाे सहभागिता रहेकाे थियाे ।
अधिवेशनले सभापति, दुई उपसभापति मन्त्री, उपमन्त्री, काेषाध्यक्ष र उपकाेषाध्यक्ष गरी सात पदाधिकारीसहित १७ जनाकाे कार्यसमिति छनाेट गर्ने छ ।
काठमाडौं : नक्कली भुटानी शरणार्थी प्रकरणमा सर्वोच्च अदालतले एमाले नेता टोपबहादुर रायमाझीसहित ७ जनालाई रिहा गर्न अस्वीकार गरेको छ ।
न्यायाधीशद्वय कुमार रेग्मी र टेकप्रसाद ढुंगानाको संयुक्त इजलासले रायमाझीसहित ७ जनालाई थुनामै राख्न आदेश दिएको हो ।
जिल्ला अदालत काठमाडौं र उच्च अदालत पाटनले पुर्पक्षका लागि थुनामा राख्न आदेश दिएपछि थुनामा रहेका १० जनाले सर्वोच्च अदालतमा पुनरावेदन गरेका थिए ।
सर्वोच्चले ३ जनालाई मात्र धरौटी र साधारण तारेखमा छाड्न आदेश दिएको छ । आङटावा शेर्पा र गोविन्दकुमार चौधरीलाई धरौटीमा छाड्न तथा शमशेर मियाँलाई साधारण तारेखमा छाड्न सर्वोच्चले आदेश दिएको छ ।
थुनामै रहनेहरुमा तत्कालिन गृहसचिव टेकनारायण पाण्डे, तत्कालिन गृहमन्त्री रामबहादुर थापा बादलका सल्लाहकार इन्द्रजित राई, भुटानी शरणार्थी प्रकरणका मुख्य आरोपी केशव दुलाल, सानु भण्डारी, सागर राई र सन्देश शर्मा रहेका छन् ।
काठमाडौं : सरकारले विद्यमान कानुन र संरचनाबाट सहकारीको समस्या समाधान गर्न सम्भव नभएको निष्कर्ष निकालेको छ ।
मन्त्रिपरिषद्को बिहीबार बसेको बैठकले सामान्य र नियमित प्रक्रियाबाट सहकारी सम्बन्धी समस्या समाधान नहुने निष्कर्ष निकालेको हो ।
बैठकले सहकारी पीडितको समस्या सम्बोधन गर्न फास्ट ट्र्याकबाट कानून बनाउने निर्णय गरेको छ ।
सञ्चार तथा सूचना प्रविधि मन्त्री तथा सरकारकी प्रवक्ता रेखा शर्माले यस सम्बन्धमा छिटोभन्दा छिटो आवश्यक कानून तयार गर्न प्रक्रिया अघि बढाइने निर्णय भएको जानकारी दिइन् ।
मन्त्रिपरिषद्को बैठकमा सहकारीको समस्यासम्बन्धी विषयमा गम्भीर छलफल भएको उनले स्पष्ट पारिन् । फास्ट ट्र्याकबाट कानून बनाउने र आवश्यक परे छुट्टै संरचना पनि बनाएर सहकारीको समस्या सम्बोधन गर्नुपर्छ भनेर छलफल भएको उनले बताइन् ।
सत्येन्द्र प्रताप सिंह/मध्यान्ह
रौतहट : रौतहटमा करिब ९ महिनाको अवधिमा सवारी दुर्घटनामा परेर ४१ जनाले ज्यान गुमाएका छन् । जिल्लाको विभिन्न पालिकामा ४ सय ९६ वटा सवारी दुर्घटनामा महिला, पुरुष, बालबालिका गरी ४१ जनाको मृत्यु भएको हो ।
जिल्लामा भएका दुर्घटनाहरुमा ७ सय ८५ जना घाइते भएको जिल्ला ट्राफिक प्रहरी कार्यालय रौतहटका प्रमुख प्रहरी निरीक्षक सुशील आचार्यले जानकारी दिए । अघिल्लो आर्थिक वर्षमा ६ सय ४५ सवारी दुर्घटना हुँदा ५० जनाको मृत्यु भएको थियो ।
यस्तै गत साउनदेखि वैशाख १० गतेसम्म नियमविपरीत चलेका १६ हजार ९ सय ९१ सवारी साधनलाई कारबाही गर्दा १ करोड ५६ लाख ६३ हजार रुपैयाँ राजस्व संकलन गरिएको प्रहरी निरीक्षक आचार्यले जानकारी दिए ।
काठमाडौं : काठमाडौं महानगरपालिकाले संस्थागत विद्यालयलाई नेपालीपन झल्कने गरी नाम परिवर्तन गर्न सूचना जारी गरेपछि हालसम्म दुई सय तीन संस्थागत विद्यालय सम्पर्कमा आएको महानगरले जनाएको छ । तीमध्ये केहीले यसअघिकै अहिलेकै नाम उचित भनेका छन् भने केहीले नयाँ नाम प्रस्ताव गरेको महानगरअन्तर्गत शिक्षा विभागका निमित्त प्रमुख सरस्वती पोखरेलले जानकारी दिए ।
प्रमुख पोखरेलका अनुसार नाम परिवर्तका लागि कामपाले गत चैत २१ गते सार्वजनिक सूचना गरेको थियो । सूचनामा विदेशी नाम भएका संस्थागत विद्यालयलाई नेपालीपन झल्कने गरी नाम राख्न भनिएको थियो ।
शिक्षा नियमावली, २०५९ (संशोधनसहित) को नियम १५४ (१) तथा काठमाडौं महानगरपालिका विद्यालय शिक्षा व्यवस्थापन नियमावली, २०७४ को नियम ७० मा नेपालीपन झल्कने गरी विद्यालयको नामकरण गर्नुपर्ने व्यवस्था बमोजिम महानगरले सो सूचना जारी गरेको थियो ।
सूचनामा एक हप्ताको समय दिइएको भए पनि नाम परिवर्तनका लागि संस्थागत विद्यालय आउनेक्रम जारी रहेकोले सूचना प्रकाशित भएको ३५ दिनसम्म पनि विद्यालयको आग्रहलाई स्वीकार गर्ने निर्णय भएको उनले जानकारी दिए । अहिले महानगर पाँच सयभन्दा बढी निजी विद्यालय रहेका सञ्चालनमा छन् ।
तोकिएको समयसम्म पनि सम्बन्धित विद्यालयले नाम परिवर्तनका लागि आलटाल गरे कानूनअनुसार कारबाही गर्ने कामपाले चेतावनीसमेत दिएको छ ।
पिन्टु यादव/मध्यान्ह
सप्तरी : जिल्ला विपद् व्यवस्थापन समिति सप्तरीको टोली मनसुनजन्य विपद् जोखिम स्थलहरुको पहिचान गर्न बलान बिहुल गाउँपालिका पुगेको छ । टोलीले उक्त गाउँपालिकाअन्तर्गतका दुई वटा वडामा निरीक्षण गरी मनसुनजन्य विपद् न्यूनीकरण गर्न आवश्यक रहेको निष्कर्ष निकालेको छ ।
मनसुनको बेला जिल्लाको पश्चिमीभागमा रहेको बलान बिहुल गाउँपालिकाका किसानहरुको टाउको दुखाइ बन्छ- बलान खोला । सिंचाइको आधुनिक व्यवस्था नरहेकाले सुख्खा बनेको यहाँका खेतीयोग्य जमिन मनसुनजन्य विपद्को उच्च जोखिममा रहेको पाइएको छ । वर्षेनी गाउँमा र खेतीयोग्य जमिनमा बलान खोलाको बाढी पसेर क्षति पुर्याउँदा समेत सरकारले दिगो समाधान गर्न ठोस योजना बनाउन सकेको छैन ।
यसको दिगो समाधान गर्न तीनै तहका सरकारले तदरुकता देखाउन जरुरी रहेको समितिको भनाइ छ । सरकारको दीर्घकालीन योजनाबाट मनसुनजन्य वर्षाले खोलामा आउने अत्यधिक बाढीलाई गाउँ र खेतीयोग्य जमिनमा पस्नबाट बचाउन सकिन्छ । यसबाट स्थानीय किसानहरुको खेती बालीलगायत घरमा क्षति नपुग्ने समितिले बताएको छ ।
समितिले जिल्लाको बलान खोलाबाट भइरहेको परम्परागत सिंचाइलाई व्यवस्थित गरी आधुनिक बनाउन सके त्यहाँका खेतीयोग्य जमिन र गाउँ मनसुनजन्य विपद्को कम जोखिममा पर्ने आंकलन गरेको छ ।
सप्तरीका प्रमुख जिल्ला अधिकारी किरण थापाको नेतृत्वमा समितिले बलान बिहुल गाउँपालिका अन्तर्गत मनसुनजन्य विपद् जोखिम स्थलहरुको निरीक्षण गर्ने क्रममा यस्तो आंकलन गरिएको राष्ट्रिय अनुसन्धान विभागका उपअनुसन्धान निर्देशक सुरेन्द्र कोइरालाले जानकारी दिए ।
गाउँपालिकाको वडा नम्बर १ मा पर्ने मल्हनिया गाउँ मनसुनजन्य विपद्को जोखिममा रहेको निरीक्षण टोलीले निष्कर्ष निकालेको छ । बलान खोलाको पानी वर्षेनी त्यहाँका खेतीयोग्य जमिन र बस्तीमा पस्दा स्थानीयहरु मारमा पर्ने गरेका छन् । बलान खोलाको करिब आठ सय मिटर बाँध भत्किएर गएकाले त्यसको पुनःनिर्माण पनि गर्नुपर्ने टोलीले औंल्याएको छ ।
गत वर्ष बलान खोलाको स्पर बाँध भत्केर जाँदा गाउँपालिकाको वडा नम्बर ४ बेल्ही गाउँमा बाढी पसेको थियो । सो गाउँमा बाढी पस्दा केही घरहरू डुबानमा परेको थियो ।
जिल्ला विपद् व्यवस्थापन समितिका संयोजक प्रजिअ थापाको नेतृत्वमा गएको निरीक्षण टोलीमा सुरक्षा निकायका प्रमुखहरुको सहभागिता रहेको थियो ।त्यस्तै बलान बिहुल गाउँपालिकाका अध्यक्ष खेमचन्द्र यादव, गाउँपालिकाको विभिन्न वडाका वडाध्यक्षहरु तथा स्थानीयहरुको सहभागितामा मनसुनजन्य विपद् जोखिम न्यूनीकरणका लागि जोखिम क्षेत्र पहिचान गरिएको हो ।
सत्येन्द्र प्रताप सिंह/मध्यान्ह
रौतहट : रौतहटको बौधिमाई नगरपालिकामा हात्तीपाइले राेग निवारणसम्बन्धी एकदिने अभिमुखीकरण तालिम सम्पन्न भएको छ । नगरपालिका स्वास्थ्य शाखाकाे आयाेजनमा हात्तीपाइले रोग निवारणसम्बन्धी अभिमुखीकरण तालिम नगरपालिकाकाे सभा हलमा सम्पन्न भएकाे हो । जिल्लामा हात्तीपाइले रोगविरुद्ध औषधि सेवन अभियान सञ्चालन हुने भएकाले तालिमको आयोजना गरिएको हो ।
बौधिमाई नगरपालिकाका प्रमुख प्रदिप यादवको प्रमुख आतिथ्यतामा भएको कार्यक्रममा विशिष्ट अतिथि नगरपालिकाका निमित्त प्रमुख प्रशासकीय अधिकृत प्रमाेद यादव तथा लेखा प्रमुख अरबिन्द यादव रहेका थिए ।
हातीपाइले राेगले कयौंको ज्यान समेत जाने गरेकाले याे अभियान समयमा सञ्चालन गरी हातीपाइले राेगमुक्त नगरपालिका बनाउने उद्देश्यले कार्यक्रम सञ्चालन गरिएको हो ।
कार्यक्रममा स्वास्थ्य सहसंयाेजक राकेश यादवले हात्तीपाइले राेगका लक्षण नदेखिए पनि शरीरमा हात्तीपाइले राेगकाे परिजिवी हुन सक्ने बताए । याे राेग लागिसकेपछि पुरै निकाे पार्न नसकिने जानकारी दिँदै यादवले वैशाख १६ गतेदेखि अभियानका रूपमा घर-घरमा गइ हात्तीपाइले रोगबाट ग्रसित भएकाहरुलाई औषधि खुवाउन लागिएको बताए ।
कार्यक्रममा स्वास्थ्य शाखा प्रमुख तारकेश्वर पटेल, स्वास्थ्य शाखा प्रमुख राकेश यादव, शिक्षकहरू, वडाध्यक्षहरू, कार्यपालिका सदस्य, सशस्त्र प्रहरी, नेपाल प्रहरी, सञ्चारकर्मीलगायतको उपस्थिति रहेको थियो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies