बिरामीको मन जित्दै डा. अशोक कुमार शाह

कृष्ण परियार/मध्यान्ह

सन्धीखर्क : सरकारी अस्पताल भन्नसाथ सेवा र सुविधाको विषयमा विभिन्न किसिमका टिप्पणी हुने गरेका छन् । कतिपय सरकारी अस्पतालमा बिरामीले भनेजस्तो उपचार नपाउने भएका कारण पनि सरकारी अस्पतालप्रति आममानिसको दृष्टिकोण नकारात्मक भएको पाइन्छ । सहजरुपमा उपचार नपाइने र चिकित्सकलाई पनि भेट्न मुस्किल पर्ने भएकाले बिरामीहरु निजी अस्पताल तथा क्लिनिकहरुमा धाउने गरेका छन् । तर पछिल्लो समय जिल्ला अस्पताल अर्घाखाँचीको हकमा भने यो अवस्था फेरिएको छ ।

पछिल्लो समय अर्घाखाँची अस्पतालमा बिरामीको संख्या ह्वात्तै बढेको पाइन्छ । केही समय पहिला सामुदायिक अस्पताल तथा निजी क्लिनिकहरुमा उपचार गराउनेहरु पनि अहिले  जिल्ला अस्पतालमै उपचारका लागी पुग्ने गरेका छन् । अस्पतालमा एमडीजीपी विशेषज्ञ डाक्टर २ जना भएपछि अहिले अपचारका लागि सजिलो हुने गरेको र सेवा लिन बिरामीहरु पनि धेरै आउने गरेको अस्पतालका प्रमुख चिकित्सक जगन्नाथ तिवारीले मध्यान्हलाई जानकारी दिए ।

जिल्ला अस्पतालमा ११ जना विशेषज्ञ डाक्टरहरुको दरबन्दी भएपनि ३ जनामात्र विशेषज्ञ डाक्टर रहेका छन् । जसमध्ये २ जना स्थायी र एक जना करारमा कार्यरत रहेको प्रमुख तिवारीले बताए । अझैपनि ९ जना डाक्टरको दरबन्दी भने खाली नै रहेको उनले बताए ।

निक साइमण्ड इन्स्टिच्युट काठमाडौंको आर्थिक सहयोगमा जिल्ला अस्पतालमा कार्यरत एमडीजीपी  विशेषज्ञ डाक्टर अशोक कुमार शाह पछिल्लो समय बिरामीहरुको मन जित्न सफल भएका छन् । सन्धीखर्क नगरपालिका ६ का दुर्गाप्रसाद भट्टराईले आफ्नी आमा सुन्तला देवी र छोरी बिरामी परेपछि जिल्ला अस्पतालमा उपचारका लागि आएको र डा. शाहलाई नै भेटेर उपचार गराएको बताए । भट्टराईले  जिल्लामा राम्रो डाक्टर आएकोमा खुसी व्यक्त गर्दै अहिले आमा र छोरीको स्वास्थ्य राम्रो भएको बताए ।

यस्तै भूमिकास्थान नगरपालिका २ की कमला बिरामी भएपछि धेरै अस्पताल तथा क्लिनिकहरुमा चेकजाँचका लागि पुगिन्, तर उनको समस्या कम भएन । पछिल्लो समय डाक्टर शाहाले चेकजाँच गरेपछि निको हुँदै गएको उनको अनुभव छ । निको हुन भने केही समय लाग्ने डाक्टरहरुले बताएको उनको भनाइ थियो ।

यसैगरी सन्धीखर्क नगरपालिका २ का जीवनारायण चुदालीले पनि जिल्ला अस्पतालमा आएपछि आफ्नो समस्या ठिक हुँदै गएको बताए । उनले भने, 'मेरो ज्यान दुख्ने समस्या थियो, पहिला काठमाडौंसहित धेरै स्थानमा चेकजाँच गराएँ तर केही कम भएन । अहिले जिल्ला अस्पतालका डाक्टर शाहाले चेकजाँच गरेपछि क्रमशः ठिक हुँदै गएको छ ।'

यी त केही प्रतिनिध पात्रहरु मात्र हुन् । जिल्ला अस्पतालमा उपचारका लागि आएका बिरामीहरु अहिले डा. शाहासँग नै चेकजाँच गराउनका लागि लाइनमा कुरेर बस्ने गरेका छन् । दैनिक एक सयदेखि एक सय ५० जनासम्म ओपीडीमा उपचारका लागि आउने गरेकोमा  पछिल्लो समय बढेर दैनिक तीन सयभन्दा बढी बिरामी उपचारका लागी जिल्ला अस्पतालमा आउने गरेका छन् ।  बालबालिका, ज्येष्ठ नागरिक,  मौसमी रुघाखोकी तथा दीर्घ रोगका बिरामी उपचारका लागि आउने गरेको र ओपीडीमा मात्र नभई इमर्जेन्सीमा समेत बिरामीको चाप बढेको अस्पतालले जनाएको छ ।  

अस्पतालमा केही समय पहिलादेखि बन्द रहेको सीएस सेवा अर्थात् शल्यक्रिया विधिबाट प्रसूति गराएर बच्चा निकाल्ने सेवा पनि अहिले नियमित भएको छ। अस्पतालमा प्रमुखको जिम्मेवारी सम्हालेर चिकित्सक जगन्नाथ तिवारी आएपछि यो सेवा  पुनः शुरु गरिएको हो । जटिल प्रकृतिका प्रसूतिलाई शल्यक्रियाका लागि बुटबल जानुपर्ने बाध्यता हटेको छ ।

दुई एमडीजीपी, एक विशेषज्ञ र पाँच मेडिकल अफिसरबाट सेवा पुनः सञ्चालन गरिएको हो । अस्पतालमा अहिले अत्याधुनिक उपकरणबाट अधिकांश रोगको जाँच  गरिने ल्याब सेवा सञ्चालन गरिएको छ । थाइराइड, फंगसन टेस्टदेखि लिएर सबै प्रकारका बायोकेमेस्टिक टेस्ट, डिजिटल एक्स–रे, डप्लर अल्ट्रासाउन्ड सेवा, फिजियोथेरापी सेवालगायत सेवा नियमित सञ्चालन भएका छन् । अन्य सामान्य शल्यक्रियालगायत  हाइड्रोसिल, हर्नियालगायत रोगको शल्यक्रिया पनि जिल्लामै हुने गरेको छ ।

५० बेड क्षमतामा सञ्चालनका लागि स्वीकृत प्राप्त जिल्ला अस्पतालमा अहिले ६० जनाको स्थायी दरबन्दीमा १७ जना कार्यरत छन् भने अन्य स्थायी दरबन्दी खाली रहेका छन् । अस्पतालमा १७ जना स्थायी र ७२ जना अस्थायी तथा करार कर्मचारी गरी जम्मा ८९ जना कर्मचारी कार्यरत रहेको अस्पतालका सूचना अधिकारी निम रानाले मध्यान्हलाई बताए ।

सुपर मादी जलविद्युत् आयोजना राष्ट्रिय प्रसारण लाइनमा जडान

कास्की : कास्कीको मादी गाउँपालिका वडा नं १ र २ मा निर्मित सुपर मादी जलविद्युत् आयोजनाबाट उत्पादित विद्युत् राष्ट्रिय प्रसारण लाइनमा जडान गरिएको छ ।

कुल ४४ मेगावाटको जलविद्युत् आयोजनाको निमार्ण सम्पन्न गरी आन्तरिक परीक्षण भई आयोजनास्थलबाट १९ किलोमिटर दूरीमा रहेको लेखनाथ सवस्टेशनमा जडान गरिएको कार्यकारी अध्यक्ष पुष्पज्योति ढुङ्गानाले जानकारी दिए ।

उनका अनुसार आयोजनाको बाँध, सुरुङमार्ग, विद्युत् गृहलगायत सम्पूर्ण क्षेत्रको काम सम्पन्न भइसकेको छ । आयोजना निर्माणमा रू आठ अर्ब ७० करोड खर्च भएको अध्यक्ष ढुङ्गानाले बताए । विसं २०७५ मङ्सिरदेखि निर्माण थालेको बताउँदै उनले २०७८ चैतदेखि विद्युत् उत्पादन गर्ने लक्ष्य राखिए पनि कोरोना महामारी तथा २०७८ असार १ मा मादी खोलामा आएको बाढीलगायत कारणले केही समय ढिलो भएको उल्लेख गरे ।

शुरुमा रू सात अर्ब ४७ करोड लागत भनिए पनि बाढी प्रकोप, बैंकको ब्याजदरमा आएको परिवर्तन, अर्थतन्त्रमा देखिएको तरलतालगायत कारणले उक्त लागत बढ्न गएको आयोजनाले जनाएको छ । आयोजनाका अनुसार बाढीका कारण रू एक अर्बभन्दा बढी नोक्सानी भएको छ । मुख्य सुरुङको लम्बाइ करिब छ किलोमिटर रहेको र कमजोर भौगोलिक अवस्थाका कारण करिब आठ सय मिटर पेनस्टक पाइप सुरुङभित्र जडान गर्दा करिब २५ करोड लागत थपिएको जनाइएको छ । 

आयोजनाका लागि रू दुई अर्ब १० करोड शेयर पुँजी रहेको छ । बाँकी सानिमा विकास बैंकको अगुवाइमा राष्ट्रिय वाणिज्य बैंक, कुमारी बैंक, कृषि विकास बैंक, एभरेष्ट बैंक, प्रभु बैंक र हाइड्रोइलेक्ट्रिसिटी इन्भेष्टमेन्ट एण्ड डेभलपमेन्ट कं लि.को लगानी रहेको अध्यक्ष ढुङ्गानाले जानकारी दिए ।

वार्षिक २४२ दशमलव ६५ गिगावाट घन्टा बिजुली उत्पादन हुने आयोजनाको सुपर मादी हाइड्रो पावर लिमिटेड प्रवर्द्धक एवं सिभिल ठेकेदार फेवा कन्ट्रक्सन प्रालि, हाइड्रो मेकानिकल ठेकेदार माछापुच्छ्रे मेटल एण्ड मेसिनरी प्रालि र इलेक्ट्रो मेकानिकल ठेकेदार एशिया प्यासिफिक पावर टेक प्रालि र परामर्शदाता सानिमा हाइड्रो एण्ड इञ्जिनियरिङ कम्पनी रहेका छन् । 

चलचित्र विकास बोर्ड सदस्यमा बुढाथोकी र अधिकारी नियुक्त

काठमाडौं : चलचित्र विकास बोर्डमा रिक्त रहेको सदस्य पदमा दुई चलचित्रकर्मी नियुक्त भएका छन् । रिक्त रहेका तीनमध्ये दुई पदमा निर्देशक केएल बुढाथोकी र निर्माता रवि अधिकारी नियुक्त भएका हुन् ।

शुक्रबार सदस्यको हैसियतले बोर्डमा पदभार ग्रहण गर्दै सदस्य अधिकारीले चलचित्र विकासका लागि काम गर्ने बताए । “पत्रकारिता र चलचित्र निर्माणबाट संगालेको अनुभवले यहाँ काम गर्नेछु, बाहिर हुँदा देखेको समस्यालाई समाधान गर्ने स्थानमा पुगेको छु”, सदस्य अधिकारीले भने । गत बुधबार बसेको मन्त्रिपरिषद्को बैठकले उनीहरुलाई दुई वर्षका लागि बोर्ड सदस्यमा नियुक्त गर्ने निर्णय गरेको थियो । 

नेपाल पत्रकार महासङ्घ दाङ शाखाका पूर्वअध्यक्षसमेत रहेका सदस्य बुढाथोकीले थारु भाषाको चलचित्र ‘भुइँयार’ र ‘लावाजुनी’को निर्देशन गरेका छन् । यस्तै चलचित्र पत्रकार सङ्घ नेपालको चितवन शाखाका निवर्तमान अध्यक्षसमेत रहेका अधिकारी विगत डेढ दशकदेखि मनोरञ्जन पत्रकारितामा सक्रिय छन्।

अधिकारीले ‘पञ्चायत’ र ‘बाबु कान्छा’ निर्माण गरेका छन् । बोर्डमा अझै एक सदस्य र केन्द्रीय चलचित्र जाँच समितिमा तीन सदस्य नियुक्त हुन् बाँकी छ ।

बेवारिसे मोटरसाइकलका धनी खोज्दै प्रहरी

झापाः जिल्ला प्रहरी कार्यालय झापाले लामो अवधिदेखि प्रहरी परिसरमा बेवारिसे अवस्थामा थन्क्याइएका मोटरसाइकलका हकदारको खोजी शुरु गरेको छ । कार्यालयले सार्वजनिक सूचना जारी गर्दै प्रहरीका विभिन्न परिसरमा दुई सय ३३ मोटरसाइकल बेवारिसे रहेको हुँदा त्यसको हकदाबी गर्न १५ दिनको म्याद दिएको जनाएको छ । 

पन्ध्र दिनभित्र हकदाबी गर्न कोही नआएमा कानुनबमोजिम लिलामी प्रक्रिया अघि बढाइने जिल्ला प्रहरी कार्यालयका सूचना अधिकारी खगेन्द्रप्रसाद रिजालले बताए । 

जिल्ला प्रहरी कार्यालय, जिल्ला ट्राफिक प्रहरी कार्यालय र इलाका प्रहरी कार्यालयमा बेवारिसे अवस्थामा यस्ता मोटरसाइकल सयौँको संख्यामा वर्षौंदेखि राखिँदै आएको छ । अधिकांश मोटरसाइकल चालू अवस्थामा छैनन् भने कतिपयको पार्टपुर्जा हराएका वा बिग्रिसकेका छन् । ब्लूबुक नभेटिएका, भारतबाट चोरी भएर आएका, चेसिस नम्बर र नम्बर प्लेट नभएकालगायतका मोटरसाइकल प्रहरीले नियन्त्रणमा लिने गरेको छ । सुरक्षितरुपमा भण्डारण नगरिएका कारण कैयौँ मोटरसाइकल लगातार घामपानी परेर कबाडी बनिसकेका छन् ।

मन्त्रिपरिषद्ले जारी गरेको सरकारी सम्पत्ति तथा जिन्सी मालसमान लिलाम बिक्रीसम्बन्धी कार्यविधि २०७९ परिच्छेद ३ को दफा २० अनुसार प्रहरीले स्वामित्व नखुलेका पुराना सवारीसाधन लिलाम बिक्री गर्न लागेको सूचना अधिकारी रिजालले बताए । लिलामी प्रक्रिया शुरु गरिएका अधिकांश मोटरसाइकल नेपाली नम्बरकै छन् । केही साधन भारतीय नम्बरका र केहीको नम्बर प्लेट नै पत्ता नलागेको अवस्था रहेको प्रहरीले जनाएको छ ।

गोरखा सेवा समाज कतारको अध्यक्षमा ओम गुरुङ

तिलु शर्मा पौडेल/मध्यान्ह

दोहा कतार, ११ चैत । गोरखा सेवा समाज कतारको १२ औं साधारण सभा सम्पन्न भएको छ । साधारण सभाको अवसरमा ‘आमा’  सेमिनारका साथै व्यक्तित्व तथा नेतृत्व विकास कार्यक्रम पनि सम्पन्न भएको छ ।

खुल्ला र बन्द सत्र गरी दुई चरणमा सम्पन्न साधरण सभाको खुल्ला सत्र समाजका अध्यक्ष रामजी खत्रीको सभापतित्व, गोरखा ग्लोबल समाजका उपाध्यक्ष श्रीकृष्ण भट्टराईको प्रमुख आतिथ्यता तथा मानव सेवा आश्रमका परिकल्पनाकार एवं अध्यक्ष रामजी अधिकारीको विशेष आतिथ्यता रहेको थियो ।

कार्यक्रममा कतारमा स्थापित विभिन्न संघ संस्थाका अध्यक्ष तथा प्रतिनिधिहरुको उपस्थिति रहेको थियो ।

साधारण सभाको बन्द सत्रबाट ओमराज गुरुङको अध्यक्षतामा नयाँ कार्यसमिति निर्विरोध निर्वाचित गरिएको छ । कार्यसमितिको वरिष्ठ उपाध्यक्षमा विमल न्यौपाने, उपाध्यक्षद्वय विकास श्रेष्ठ र सुजन धिताल, महासचिवमा अर्जुन संग्रौला, सचिवमा रुद्र भट्ट, कोषाध्यक्षमा राजेन्द्र पराजुली निर्वाचित भएका छन् । 

यस्तै, सदस्यहरुमा गोरखा नगरपालिका संयोजक उत्तम श्रेष्ठ, पालुङटार नगरपालिका संयोजक अशोक श्रेष्ठ, सिराञ्चोक गाउँपालिका संयोजक सूर्यबहादुर गुरुङ, अजिरकोट गाउँपालिका संयोजक रविन गुरुङ, आरुघाट गाउँपालिका संयोजक चन्द्र नेपाली चयन भएका छन् । 

त्यस्तै कार्यसमिति सदस्यहरूमा दिनेश थापा, चित्रबहादुर थापा, इन्द्रबहादुर नेपाली निर्वाचित भएका छन् ।

नवनिर्वाचित कार्यसमितिलाई निर्वाचन समितिका संयोजक राकेश श्रेष्ठले पद तथा गोपनीयताको शपथ गराएका थिए । शपथपछि बोल्दै नवनिर्वाचित अध्यक्ष गुरुङले कतारमा रहेका पीडित गोरखालीलाई सहयोग, जिल्लामा असहाय गरिबलाई विशेष शिक्षा, मानवीय सेवामा तल्लीन भएर लाग्ने र कतारमा रहेका गोरखालीबीच एकताबद्ध गर्ने प्रतिबद्धता जनाए ।

वार्षिक साधारण सभाको खुल्ला सत्रमा समाजका वरिष्ठ उपाध्यक्ष ओमराज गुरुङले स्वागत तथा कार्यप्रगति विवरण पेस गरेका थिए ।

कार्यक्रमको शुभारम्भमै नेपालबाट आमन्त्रित अतिथि अधिकारीले खाने बस्ने र सुत्ने तरिका नमिल्दा जीवनमा असहजता पैदा भइरहेको हुदाँ त्यस्ता समस्या निराकरणका उपाएका बारेमा जानकारी गराएका थिए ।

बाहिरबाट चिटिक्क देखिने मानिस भित्र खिटिक्क भएर मर्ने गरेको हुदाँ बस्दा ढाडलाई सिधा राख्नुपर्ने र मानसिक अवस्था बलियो बनाउन बस्दा गर्दन सिधा बनाउनुपर्ने उनको भनाइ थियो ।

मानव आश्रममा १ हजार ४ सय ५० भन्दा बढी बा–आमा र १ सय ५२ जना बच्चाहरूले आश्रय लिइरहेको बताउँदै उनले मानवतालाई केन्द्रमा राख्न आग्रह गरे ।

‘आमा’ सेमिनारमा बोल्दै अधिकारीले मनोरञ्जन भनेको मनको उत्तेजना रहेको बताउँदै अब मनोरञ्जन अर्थात् मनलाई माझ्नु पर्ने आवश्यकता औँल्याए । उनले भौतिकताले सुख दिने तर शान्ति नदिने भएकाले  अध्यात्ममा ध्यान दिन आग्रह गर्दै सेवा आश्रमले गरेका मानवीय कार्यको वृत्तचित्र देखाइएको उनले बताए ।

डेढ अर्ब बजेटमा १६ वटा जिल्लामा ‘मानव मन्दिर’ (घर) बन्दै गरेको बताउँदै उनले धन धेरै भएर होइन इच्छा कटौती गरेर गरिने सहयोगलाई ‘मानव सेवा’ भनिने धारणा राखे । 

मानव सेवा आश्रम (मानवता प्रबद्र्धन महाअभियान) गोरखा शाखाको निर्माण हुँदै गरेको मानवताको मन्दिर निर्माणका लागि आश्रमको अभिभावक संस्थासमेत रहेको समाजले १ कोठा निर्माणको लागि रु. पाँच लाख एघार हजार एक सय एघार आश्रमका अध्यक्ष अधिकारीलाई हस्तान्तरण गरेको थियो ।

सभामा कतारका लागि नेपाल सरकारका पर्यटन तथा संस्कृति मन्त्रालयका सद्भावना राजदूत टिबी कार्कीलगायत विभिन्न संघ संस्थाका अध्यक्ष तथा प्रतिनिधिहरुले शुभकामना मन्तव्य राखेका थिए । वक्ताहरूले सामाजिक तथा मानवीय क्षेत्रमा समाजले गरेका कार्यहरूको प्रशंसा गरेका थिए ।

कार्यक्रममा समाजका विविध गतिविधिमा विशेष योगदान पुर्‍याउने समाजका प्रमुख सल्लाहकार राकेश श्रेष्ठ र संरक्षक श्रीकृष्ण भट्टराईलाई दोसल्ला ओढाएर सम्मान गरिएको थियो ।

आफ्नो शुभकामना मन्तव्य राख्दै प्रमुख अतिथि भट्टराईले मानव सेवा र मानवीयतासहितको साधारण सभा गर्ने गोरखा समाजप्रति कृतज्ञता प्रकट गरे । महासचिव विकास श्रेष्ठले सहजीकरण गरेको खुल्ला सत्रको समापन गर्दै सभापति खत्रीले कार्यकाल सफल बनाउन सहयोग पुर्‍याउने सबैप्रति आभार व्यक्त गरेका थिए ।

धनुषामा ट्रक दुर्घटनाः ३ जनाको मृत्यु

धनुषा : धनुषाको मिथिला नगरपालिका–३ हरिहरपुरमा शनिबार बिहान दुईवटा ट्रक एकापसमा ठोक्किएर दुर्घटना हुँदा ३ जनाको घटनस्थलमै मृत्यु भएको छ ।

पूर्वबाट पश्चिमतर्फ आउँदै गरेको ना ६ ख ६५७८ नम्बरको ट्रक र विपरीत दिशातर्फ जाँदै गरेको प्रदेश १–०१–००१ख ९२९२ नम्बरको ट्रक ठोक्किएर दुर्घटना हुँदा सुनसरीका २८ वर्षीय चालक सागर चौधरी, सहचालक अर्जुन चौधरी र मोरङका ४४ वर्षीय लोकमान श्रेष्ठको मृत्यु भएको धनुषाका प्रहरी नायब उपरीक्षक वेदप्रसाद गौतमले जानकारी दिए ।

सो दुर्घटनामा सर्लाहीका २० वर्षीय नारायण श्रेष्ठ घाइते भएका छन् । घाइतेको ढल्केवर अस्पतालमा उपचार भइरहेको प्रहरीले जनाएको छ । रासस

नदी किनारका अनधिकृत बस्ती हटाउन काठमाडौं महानगरको निर्देशन

काठमाडौं : काठमाडौं महानगरपालिकाले नदी किनार, नदी उकास तथा नदी बहाव क्षेत्रमा बनेका अनधिकृत संरचना सात दिनभित्र हटाउन निर्देशन दिएको छ । 

महानगरले आज सूचना प्रकाशन गर्दै नदी बहाव, नदी उकास, नदी निकार र नदी करिडोरको सार्वजनिक क्षेत्रमा संरचना निर्माण तथा अनधिकृतरुपमा कब्जा गरी भोगचलन गरिरहेका सबै सरोकारवालालाई संचरना हटाउन निर्देशन दिएको हो । 

महानगरले पटकपटक अवगत गराउँदा पनि नहटेका संरचनालाई प्रचलित कानूनबमोजिम हटाउने र हटाउँदा लाग्ने खर्चसमेत सम्बन्धित पक्षबाट असुल्ने सूचनामा उल्लेख गरेको छ । 

कम्पनी रजिष्‍ट्रारको कार्यालयमा दलालको बिगबिगी

विनोद अधिकारी/मध्यान्ह 

काठमाडौं : काम लिएर कम्पनी रजिष्‍ट्रारको कार्यालय त्रिपुरेश्वर पुगेका सर्लाहीका विवेक यादवलाई एक हुल युवाहरु आएर घेरा हाले । 

कार्यालय छिर्न अवरोध गर्दै गेटमा घेरा हालेका युवाहरूले एकाएक सोध्न थाले, 'कम्पनी दर्ता गर्न आउनुभएको हो ? कम्पनी नवीकरण गर्नु छ ? हो भने शुरुमा हाम्रो सहयोग लिएर मात्र भित्र छिर्नुस् नत्र तपाईंको काम बन्दैन ।' यसो भनिरहँदा यादवले टुलुटुलु हेरिरहे । 

यादवले आफ्नो काम सकिएको र साथीलाई पर्खिरहेको बताएपछि ती युवाहरू अर्का सेवाग्राही तिर लागे । 

अर्का सेवाग्राहीलाई पनि उनीहरूले त्यसै भनिरहेका थिए । 'कम्पनी रजिष्‍ट्रारको गेट अगाडि बसेर ती युवाहरूको चर्तीकला धेरैबेर हेरें,' यादवले भने, 'कोही आए जालमा फसाउन सकिन्छ कि भनेर बसेका हुँदा रहेछन् ।' उनका अनुसार रजिष्‍ट्रार कार्यालयमा सेवा लिन पुग्ने धेरै सेवाग्राहीले दलालबाट सास्ती पाउँदै आएका छन् ।

सरकारी कार्यालयमा सर्वसाधारणहरु आफ्नो काम लिएर जाँदा त्यहाँका कर्मचारीहरुले केही नबोली जनताको काम गर्न सम्भव नभएको मोरङकी समिता लामा बताउँछिन् । 'नेपालका कयौं मानिस निरक्षर छन्, पढ्न लेख्न जान्दैनन् अनि प्रक्रिया पनि बुझ्दैनन्, यसैको फाइदा उठाउँदै काममा सुस्तता देखाउने, फाइल अड्काएर राखिदिने सरकारी कर्मचारीको दैनिकी नै हो,' लामाले मध्यान्हसँग दुखेसो पोखिन् । 

सेवा लिन पुग्ने सेवाग्राहीलाई कार्यालयको गेट बाहिरै रोकेर दलालले आफ्नो कब्जामा लिएर ठग्ने गरेका छन् । कब्जामा लिएपछि आफूले काम गरिदिने भन्दै पैसा लिएर सेवाग्राही ठग्ने दलालहरुको देशैभरिका सरकारी कार्यालयमा बिगबिगी छ । कम्पनी रजिष्‍ट्रारको कार्यालयमा कम्पनी दर्ता, नवीकरण तथा कम्पनीको विविध कामका लागि पुग्ने सेवाग्राहीहरुलाई फकाएर आफ्नो जालमा पारेपछि काम गरिदिएको बहानामा दलालले रकम लिने गर्छन् ।

रजिष्‍ट्रार कार्यालयका कर्मचारीहरुकै मिलेमतोमा काम हुने भएकाले दलालहरुको फाइल छिटो हेरिदिने र सर्वसाधारणलाई दुई-चार दिनसम्म अल्झाएर राख्ने सेवाग्राहीहरुको आरोप छ । 'सेवा लिन पुग्ने सेवाग्राहीलाई गेट बाहिरै दलालले घेरा हालेर ठगिहाल्छन्, यस्ता विषयमा गुनासो गर्दा पनि सुनुवाइ हुँदैन,' सेवाग्राहीहरुले दुखेसो व्यक्त गरे ।

ललितपुरका मदन विकका अनुसार कतिपय कर्मचारी दलालको सेटिङमा काम गर्न पल्किएका छन् । 'दलालमार्फत आएका सेवाग्राहीको काम छिटो गरिदिने यहाँका कर्मचारीको पुरानै परिपाटी रहेछ,' विकले भने, 'स्वतस्फूर्त सेवा लिन आएकालाई अल्झाउने र समयमा काम नगरिदिने तथा अनावश्यक हैरानी दिने काम कर्मचारीबाटै हुन्छ ।'

सरकारले बनाएको सम्पूर्ण ऐन कानूनभित्र रहेर डकुमेन्टहरु तयार गरेर लाँदा पनि प्रक्रिया नपुगेको भन्दै घुस नदिएसम्म जनताले दुःख पाउने गरेको सेवाग्राहीहरुको आरोप छ । 

अन्नपूर्ण पदमार्गमा तीन महिनामा साढे दुई हजार पर्यटक

लमजुङ : चक्रीय अन्नपूर्ण पदमार्गमा तीन महिनामा दुई हजार चार सय ७५ विदेशी पर्यटक आएका छन् ।

सन् २०२३ को जनवरीदेखि हालसम्म सो सङ्ख्यामा विदेशी पर्यटक आएका हुन्। अन्नपूर्ण संरक्षण क्षेत्र आयोजना (एक्याप) पर्यटक जाँच केन्द्र धारापानीका पर्यटन सहायक क्षेत्रबहादुर गुरुङका अनुसार यतिबेला दैनिक ४०/५० जना पर्यटक आउने गरेका छन् ।

‘यस पदमार्गमा यतिबेला कम कम नै पर्यटक आइरहेका छन्, विश्वमा देखा पर्दै गएको आर्थिकमन्दीका कारण हुनसक्छ,’ गुरुङले भने ।

कोरोना सङ्क्रमणपछि विगतमा आएकोझै पर्यटक हालसम्म आएका छैनन्। पर्यटकको कमीले पदमार्गका पर्यटन व्यवसायी चिन्तित छन् ।

‘जुर्मुराउँदै गरेको पर्यटन व्यवसाय कोरोना सङ्क्रमणले लामो समय ठप्प भयो, सबङ्क्रमण हटेयता विगतमा झै पर्यटक आउन सकेका छैनन्,’ व्यवसायी पञ्चबहादुर गुरुङले भने ।

हिमाली, पहाडका दृश्य, उच्च पहाड, मनाङवासीको रीतिरिवाज, प्राकृतिक सुन्दरता हेर्न र मनाङबाट थोराङ भञ्ज्याङ उक्लेर मुस्ताङ हुँदै पोखरा जान अन्नपूर्ण पदमार्गमा पर्यटक आउँछन् ।

मनाङका विभिन्न हिमाल तथा चुली चढ्न तथा हेर्न पर्यटक भित्रिन्छन् । अन्नपूर्ण पदमार्गको प्रवेशद्वार लमजुङ बेँसीसहर नगरपालिका–७ मनाङे चौतारा हो । यस पदमार्गमा लमजुङ, मनाङ, कास्की, मुस्ताङ र म्याग्दी जिल्ला जोडिएको छ ।

टोखा श्रष्टा सम्मान तथा विशेष कवि गोष्ठी सम्पन्न

काठमाडौं : 'टोखा श्रष्टा सम्मान तथा विशेष कवि गोष्ठी २०७९' सम्पन्न भएको छ । शुक्रबार टोखा नगरपालिका वडा नं. ९ को प्रायोजन/सहकार्य एवम् संसाक मासिकको आयोजनामा श्रष्ट सम्मान तथा विशेष कवि गोष्ठी वडा नं. ९ को सभाहलमा सम्पन्न भएको हो । 

टोखा न.पा. वडा  नं. ९ का वडाध्यक्ष रामभक्त घिमिरेको सभापतित्व तथा प्रज्ञा प्रतिष्ठानका पूर्वसचिव प्राज्ञ जगतप्रसाद उपाध्यायको प्रमुख आतिथ्यतामा सम्पन्न कार्यक्रम संसाक मासिकका अध्यक्ष उमेश पाण्डेले सञ्चालन गरेका थिए ।

वडा नं.९ का पूर्व वडाध्यक्ष तथा साहित्यकार जे.पी. नेपालको स्वागत मन्तव्यपछि प्रमुख अतिथि उपाध्यायले कार्यक्रमको समुद्घाटन गरेका थिए ।

टोखा नगरपालिकाका नगर प्रमुख प्रकाश अधिकारी र डा. शैलेन्दुप्रकाश नेपाल विशिष्ट अतिथि रहेको उक्त कार्यक्रममा टोखा नगरपालिकाभित्रका १० जना र टोखा नगरपालिका बाहिरका १० जना श्रष्टालाई टीकामाला, प्रमाणपत्र, दोसल्ला ओढाई नगदसहित सम्मान गरिएको थियो ।

कार्यक्रममा ४४ जना श्रष्टाले आ-आफ्ना कविता वाचन गरेका थिए । वाचक श्रष्टाहरूलाई समेत खादा ओढाई डायरी र नगद पुरस्कारसहित सम्मान गरिएको थियो ।

प्रमुख अतिथि तथा विशिष्ट अतिथिहरुले कवि तथा साहित्यकारहरू देशका गौरव भएको बताउँदै सम्मान तथा बधाई ज्ञापन गरेका थिए ।