सत्ता गठबन्धनको बैठक बालुवाटारमा बस्दै  

काठमाडौं : सत्तारूढ पाँच दलीय गठबन्धनको बैठक प्रधानमन्त्रीनिवास बालुवाटारमा सुरु भएको छ ।  बैठक प्रधानमन्त्री शेरबहादुर देउवाको उपस्थितिमा सुरु भएको हाे ।

बैठकमा यही माघ १२ गते हुन लागेको राष्ट्रिय सभा निर्वाचनको रणनीतिका विषयमा छलफल हुने नेताहरूले बताएका छन् । राष्ट्रिय सभा निर्वाचनमा सत्ता साझेदार दलहरूले गठबन्धन गरेका छन् ।

प्रमुख प्रतिपक्षी नेकपा एमालेले संसदमा विरोध जनाउँदै आएको छ । साथै प्रमुख प्रतिपक्षी एमालेले स्थानीय तहलाई जनप्रतिनिधिविहीन बनाउन खोजिएको आरोप लगाएको छ ।

सरकार संचालनमा सहयोग गर्ने उद्देश्यले सत्ता गठबन्धन दलका शीर्ष नेताहरूले कांग्रेस नेता  पौडेलको संयोजकत्वमा उच्चस्तरीय राजनीतिक समन्वय समिति गठन गरेका छन् ।

लिपुलेक प्रकरणमा बोल्यो कांग्रेस

काठमाडौं : सत्तारुढ दल नेपाली कांग्रेसले लिपुलेक प्रकरणमा मुख खोलेको छ । कांग्रेसले भारतीय प्रधानमन्त्री नेरेन्द्र मोदीले लिपुलेक क्षेत्रमा भारत सरकारले सडक बनाइरहेको भनेर दिएको अभिव्यक्तिप्रति ध्यानाकर्षण भएको जनाएको छ । शुक्रबार पार्टीका महामन्त्रीद्वय गगन थापा र विश्वप्रकाश शर्माले साँच बुँदे धारणा सार्वजनिक गर्दै एकपक्षीय रुपमा नेपाली भूमिमा सडक निर्माणलगायतका भारतीय पक्षको गतिविधि आपत्तिजनक रहेको बताएका हुन् ।

‘नेपाल–भारत संयुक्त आयोगमा दुई देश बीचको सबै प्रश्नमा कुटनैतिक संवादबाट समाधानमा पुग्ने गरी भएको सहमति विपरीत लिपुलेकमा सडक निर्माण भनेर आएको विषय गम्भीर छ, आपत्तिजनक छ र अविलम्ब यो रोकिनुपर्छ’, विज्ञप्तिमा भनिएको छ ।

पार्टीले विगतदेखि नै यो विषयमा स्पष्ट धारणा राख्दै आएको र यो विषयमा पार्टी प्रष्ट र दृढ रहेको जानकारीसमेत उनीहरुले गराएका छन् । ‘नेपाली कांग्रेसले विगतदेखि नै संस्थागत रुपले राख्दै आएको निम्न धारणा र अडानमा पार्टी प्रष्ट र दृढ रहेको व्यहोरा सार्वजनिक रुपले पुनः दोहो¥याउन चाहन्छ’, महामन्त्रीद्वयले भनेका छन् ।

त्यस्तै गगन र विश्वप्रकाशले भनेका छन्, ‘नेपालको संसदले सर्वदलीय एकता साथ संविधान संशोधन मार्फत पारित गरेको नेपालको नक्सा सुगौली सन्धि पछिको नेपाल थियो, हो र त्यसको कार्यान्वयन हुनुपर्छ भन्ने बिषय राजनैतिक दलहरू एवं नेपाल सरकार समेतको साझा अभिमत हो भन्ने विषयमा नेपाली कांग्रेस प्रष्ट छ ।’

यस्तै दुई राष्ट्रबीचको सीमा सम्बन्धी कुनैपनि प्रश्नको हल ऐतिहासिक तथ्यका आधारमा हुनुपर्ने भन्दै १८१६ को सुगौली सन्धिको दस्तावेज दुवै राष्ट्रको साझा स्विकारोक्तिको तथ्य हो भन्नेमा कांग्रेस स्पष्ट रहेको उल्लेख गरिएको छ ।

यस्तै कालापानीबाट भारतीय सैनिक फिर्ता हुनुपर्ने पनि माग गरिएको छ ।  दुई राष्ट्र बीचको सीमा सम्बन्धी कुनैपनि प्रश्नको हल ऐतिहासिक तथ्यका आधारमा हुनुपर्ने स्पष्ट गर्दै विश्व र गगनले भनेका छन्, ‘१८१६ को सुगौली सन्धिको दस्तावेज दुवै राष्ट्रको साझा स्विकारोक्तिको तथ्य हो भन्नेमा हामी प्रष्ट छौं ।’

निर्वाचन आयोगले दलहरूसँग भन्यो : माघ पहिलो हप्ताभित्रै निर्वाचन मिति घोषणा गर्नुपर्छ

काठमाडौं : निर्वाचन आयोगले माघको पहिलो हप्तामै स्थानीय तह निर्वाचनको मिति घोषणा गर्नुपर्ने बताएको छ ।

आयोगले बोलाएको सर्वदलीय बैठकमा आयोगका पदाधिकारीले वैशाखमा स्थानीय तहको चुनाव गराउनका लागि १२० दिनको समय चाहिने भन्दै त्यसका लागि सरकारले मिति घोषणा गर्नुपर्ने बताएको हो । 

निर्वाचन ऐनमा स्थानीय तहका पदाधिकारीको पदावधि गणना पहिलो चरणको निर्वाचन भएको मितिबाटै गणना हुने भन्दै आयोगले प्रस्ताव गरेको मितिमै चुनाव गराउने गरी आयोगले तयारी गरिरहेको आयोगका प्रवक्ता शालिग्राम पौडेलले बताए ।

आयोगले वैशाख १४ र २० मा स्थानीय चुनाव गर्न सिफारिस गरेपनि सरकारले भने अहिलेसम्म कुनै निर्णय गरेको छैन ।

यस्तै बैठकमा सहभागी विभिन्न दलका नेताहरूले स्थानीय तहको चुनावबारे सरकारले छलफल गरेर चाँडै निष्कर्षमा पुगोस् भन्ने आफूहरुको धारणा रहेको बताएका थिए ।

दलहरुले मतदानका लागि योग्य सबैलाई सक्केसम्म मतदाता नामावलीमा समेट्न पनि आयोगलाई सुझाव दिएका छन् ।

एमालेको अनुशासन आयोगमा सम्पत्ति विवरण बुझाउन निर्देशन

काठमाडौं : नेकपा (एमाले)को केन्द्रीय अनुशासन आयोगले पार्टीको केन्द्रीय कमिटी, निकाय, संघीय सांसद, प्रदेशसभा सदस्य, स्थानीय तहका प्रमुख–उपप्रमुखलाई आफ्नो व्यक्तिगत सम्पत्ति विवरण भरेर अनिवार्यरूपमा बुझाउन निर्देशन दिएको छ ।

आयोगका अध्यक्ष केशव बडालले जारी गरेको अन्तरपार्टी निर्देशन–१ मा पार्टीको १०औं राष्ट्रिय महाधिवेशनबाट पारित विधानको धारा ७९ र आयोगको कार्यसम्पादन नियमावलीको नियम ६ बमोजिम पार्टीबाट निर्वाचित गाउँपालिकाका अध्यक्ष र उपाध्यक्षसमेतलाई यही पुस १४ गतेदेखि गणना हुने गरी ६० दिनभित्र आयोगसमक्ष उक्त विवरण पेश गर्न निर्देशन दिइएको हो ।

आयोेगले पार्टीभित्र अनुशासन पालनाका लागि आचारसंहिताको मस्यौदा पनि तयार गरिरहेको छ । आयोगका सचिव भरत पहारीले तयार गरेको उक्त मस्यौदामाथि थप छलफल गरेर पारित गरिने जनाइएको छ ।

संक्रमण बढदो क्रममा रहेपनि राष्ट्रिय सभा निर्वाचन तालिकामा फरक पर्दैन : आयोग

काठमाडौं : निर्वाचन आयोगले कोरोना संक्रमण बढदो क्रममा रहेपनि राष्ट्रिय सभा सदस्यको निर्वाचन तालिकामा फरक नपर्ने जनाएको छ ।

आयोगले स्वास्थ्य मापदण्ड अपनाएर राष्ट्रिय सभा सदस्यको मतदान माघ १२ गते नै गर्ने जानकारी दिएको हो ।

राष्ट्रिय सभाको मतदानका लागि मतदाता संख्या सीमित रहेकाले आवश्यक स्वास्थ्य मापदण्ड अपनाएर निर्धारित कार्यक्रमबमोजिम नै मतदान हुने आयोगले प्रस्ट पारेको छ ।

आवश्यक परे आयोगको प्रदेशस्थित कार्यालय र निर्वाचन अधिकृतले स्वास्थ्य मापदण्डबारे स्थानीयस्तरको कोभिड व्यवस्थापन संयन्त्रसँग सहयोग र सुझाव लिने आयोगको तयारी छ ।

आयोगले हाल आठ मतदानस्थलमा १४ वटा मतदान केन्द्र तोकेको छ । प्रत्येक मतदानस्थलमा दुुई–दुुईवटा मतदान केन्द्र रहनेछन् । सातवटै प्रदेशका आठ मतदानस्थलमा १४ मतदान केन्द्र तोकिएका छन् ।

प्रदेश १ मा भने प्रदेश सभा सदस्य र स्थानीय तहका प्रमुख र उपप्रमुखका लागि छुट्टाछुट्टै ठाउँमा दुईवटा मतदानस्थल रहनेछन् ।

राष्ट्रिय सभाको १९ सदस्यका लागि माघ १२ गतेका लागि तय गरिएको मतदान सातवटै प्रदेशमा हुनेछ । सातवटै प्रदेशमा कुल दुुई हजार २५ जना मतदाता छन् ।

५ सय ३२ प्रदेश सभा सदस्य र एक हजार ४ सय ९३ स्थानीय तहका प्रमुख र उपप्रमुख राष्ट्रिय सभा सदस्यको मतदाता छन् ।

निर्वाचन आयोगले बोलायो सर्वदलीय बैठक

काठमाडौं : निर्वाचन आयोगले सर्वदलीय बैठक बोलाएको छ । स्थानीय तहको चुनावलगायतका विषयमा छलफल गर्न बैठक आयोगले बैठक बोलाएको हो ।

आयोगका प्रमुख आयुक्त दिनेश थपलियाका अनुसार बैठक शुक्रबार बिहान ११ बजे बस्नेछ । बैठकमा स्थानीय तहको निर्वाचनका साथै राष्ट्रियसभा निर्वाचन र मतदाता नामावली अद्यावधिकबारे पनि छलफल हुने बताइएको छ ।

बैठकमा संघ र प्रदेशमा प्रतिनिधित्व गर्ने करिब १६ राजनीतिक दललाई बलाइएको छ । 

आउँदो वैशाखमा पालिकाका जनप्रतिनिधिहरूको समय अवधि सकिने भएकाले त्यसअघि चुनाव गर्न आयाेगले दलहरूको ध्यानाकर्षण गराउँदै आएको छ । 

आयोगका पदाधिकारीले गएको ९ गते प्रधानमन्त्री शेरबहादुर देउवालाई भेटेर वैशाख १४ र वैशाख २२ गते पालिकाको चुनाव गर्न प्रस्ताव गरेका भए पनि सरकारले अहिलेसम्म कुनै निर्णय गरेको छैन ।

नेपाली कांग्रेस लहान २४ द्वारा बधाई तथा सम्मान कार्यक्रम

राजेन्द्र महतो/मध्यान्ह

सिरहा : नेपाली कांग्रेस लहान नगरपालिका वडा न. २४ ले कांग्रेसको १४ औं महाधिवेशन अन्तर्गत विभिन्न तहको अधिवेशनबाट निर्वाचित पदाधिकारी तथा सदस्यहरुलाई बधाई तथा सम्मान गरेको छ ।

मंगलबार सिरहाको लहान न पा २४ स्थित मानिकदह झुट्कीमा एक समारोहबीच बधाई तथा सम्मान कार्यक्रम गरिएको हो ।

कार्यक्रममा प्रमुख अतिथि केन्द्रीय सदस्य एवं सांसद् पदम नारायण चौधरी, अतिथि प्रदेश २ प्रदेशसभा सदस्य शारदा खातुन, उमेस यादव, उपसभापति राम सुन्दर चौधरी, क्षेत्रीय सभापति  महेस चौधरी, पूर्व क्षेत्रीय सभापति अछमितलाल चौधरी, नगर सभापति रासलाल राय, लहान नपाका सम्पूर्ण  ईकाइ सभापति, नेपाली कांग्रेसका नेता राज कुमार राउतलगायत कांग्रेस लहान नगरपालिका वडा नं २४ का सम्पूर्ण ज्येष्ठ नागरिकलाई बधाई तथा सम्मान गरिएको  नेपाली कांग्रेस वडा कार्यसमिति लहान न पा-२४ सिरहाका सहसचिव सुदिप महतोले मध्यान्हलाई बताए ।

कार्यक्रममा उपस्थित भएका सम्पूर्ण नेपाली कांग्रेसका नेताहरुले माघ १५ मा हुन लागेको सिरहा जिल्ला अधिवेशनमा जिल्ला सभापति पदका उम्मेद्वार राम सुन्दर चौधरीलाई समर्थन गर्ने सहसचिव महतोले बताए ।

नेपाली कांग्रेस विपन्न, गरिब र दलित समुदायको पार्टी हो : सभापति पन्थी 

सुमन महतारा/मध्यान्ह

गुल्मी : नेपाली कांग्रेस गुल्मीका सभापति खिलध्वज पन्थीले नेपाली कांग्रेस विपन्न, गरिब र दलित समुदायको पार्टी भएको बताएका छन् ।

मंगलबार जिल्लाको मालिका गाउँपालिका वडा नम्बर ८ मर्भुङ्गमा ‘गुल्मी कांग्रेसको अठोट: सवल वडा सक्षम टोल’ भन्ने मुख्य नारासहित गुल्मी कांग्रेसको अभियानको शुभाराम्भ गर्दै सभापति पन्थीले नेपाली कांग्रेस विपन्न, गरिब र दलित समुदायको पार्टी भएको बताएका हुन् । 

'अहिले हाम्रो समाजमा दलितको श्रम, सीप र रगत चल्छ । पानी नचल्ने अपराध गर्न कसैलाई छुट छैन,' पन्थीले भने । पटक–पटक मन्त्री बन्दा खोलामा एउटा पुल बनाउन नसक्नेले गफ मात्र सुनाएको भन्दै उनले प्रतिपक्षको गफ र प्रलोभनमा नपर्न आग्रह गरे । उनले आफ्नो पहलमा तम्घास सिमलटारी सडकखण्डमा पक्की पुल बन्न लागेको बताए ।

अभियानको शुभारम्भ कार्यक्रममा गुल्मी निर्वाचन क्षेत्र नम्बर २ अन्तर्गत प्रदेश सभा ’ख’ का सभापति रेखाकुमार जिसीले मालिका गाउँपालिका पूर्णरुपमा असफल भएको बताए । चुनावमुखी योजना र बजेटको भ्रममा नपर्न जिसीले आग्रह गरे । उनले अहिले निर्वाचित जनप्रतिनिधिहरुले ४ वर्षसम्म मनपरी दास बनाएर अहिले प्रलोभनमा पार्न थालेको भन्दै त्यसको अन्त्य गर्न सबैलाई आग्रह गरे ।

त्यस्तै मालिका गाउँपालिकाका सभापति उपेन्द्र अर्यालले कम्युनिष्टहरुले भोट किनेर चुनाव जितेको आरोप लगाए । उनले स्थानीय तहको निर्वाचन नजिक आएको कारणले विभिन्न प्रलोभन देखाएर कम्युनिस्टहरुले दास बनाएकोले त्यसबाट उम्किन आवश्यक रहेको बताए । 

कार्यक्रममा नेकपा एमाले र नेकपा माओवादी केन्द्र परित्याग गरी दर्जनौं कार्यकर्ताहरु नेपाली कांग्रेस प्रवेश गरेका थिए । कार्यक्रममा नेपाली कांग्रेसका क्षेत्रीय सचिव लालमणी भण्डारी, मालिका गाउँपालिका सभापति उपेन्द्र अर्याल, उपसभापति दिपक भण्डारी, क्षेत्रीय सदस्य ओमप्रकाश अर्याल साथै वडा सभापति लगायतको उपस्थिति रहेको थियो ।

अभियानको लागि जिल्लाका ९३ वटै वडामा जिल्ला तहका नेताहरुलाई प्रतिनिधिकारुपमा खटाएर एकैसाथ अभियानको शुभारम्भ गरिएको छ ।

नेकपा एमालेको प्रदेश अधिवेशन सर्‍यो

काठमाडौं : नेकपा एमालेको प्रदेश अधिवेशन सरेको छ । कोरोना महामारीको तेस्रो लहर शुरु भएको भन्दै नेकपा एमालेले प्रदेश अधिवेशन माघको अन्तिम साताका लागि सारेको हो । 

मंसिरको अन्तिम साता भएको एमाले केन्द्रीय बैठकले माघ ८ गते एकैदिन प्रदेश अधिवेशन गर्ने निर्णय गरेको थियो । तर कोरोना संक्रमण तीव्र गतिमा फैलँदै गएका कारण प्रदेश अधिवेशन माघको २८ र २९ का लागि सारिएको एमालेले जानकारी दिएको छ । 

साथै अधिवेशन सार्नुको अर्को कारण कतिपय जिल्लामा अधिवेशन हुन नसकेको कारण समेत रहेको एमालेले जनाएको छ । यससम्बन्धी निर्देशन समेत प्रदेशमा गइसकेको पार्टीले जनाएको छ । 

त्यस्तै अधिवेशन हुन बाँकी जिल्ला अधिवेशनहरु माघ २२ गतेसम्म सम्पन्न गर्न निर्देशन समेत दिइएको छ । 

एमालेको ६३ जिल्लामा शुरु भएको अधिवेशन अझै सकिएको छैन । हालसम्म ५२ जिल्लाको नेतृत्व टुंगिएको छ । 

अधिकांश जिल्लामा सहमतिमा नेतृत्व चयन भएको छ भने सहमति हुन नसकेका जिल्लामा निर्वाचनमार्फत नेतृत्व चयन हुँदै छ ।

राष्ट्रिय सभा निर्वाचन : उम्मेद्वारको अन्तिम नामावली प्रकाशन, चुनाव चिह्न प्रदान

काठमाडौं : राष्ट्रिय सभा सदस्य चुनाव अन्तर्गत उम्मेदवारकाे अन्तिम नामावली प्रकाशन भएकाे छ ।

उम्मेदवारलाई चुनाव चिन्ह पनि प्रदान गरिएकाे निर्वाचन आयाेगले जनाएकाे छ । माघ १२ गते हुने राष्ट्रिय सभा सदस्य चुनावका लागि मनोनयन दर्ता गरेका उम्मेदवारको अन्तिम नामावली प्रकाशन गरेर आयाेगले आइतबार चुनाव चिन्ह प्रदान गरेकाे हाे ।

राष्ट्रिय सभा सदस्य चुनावका लागि १९ पदमा ९ दलका ४३ जनाले उम्मेदवारी दिएका छन् ।  तोकिएका मतदान केन्द्रमा माघ १२ गते बिहान ९ बजेदेखि दिउँसाे ३ बजेसम्म मतदान हुनेछ । साे चुनावबाट ७ महिला, ३ दलित, २ अपांगता भएका व्यक्ति वा अल्पसंख्यक र सात अन्य समूहका उम्मेदवार निर्वाचित हुनेछन् ।

फागुन २० गते रिक्त हुने १९ सदस्य पदका लागि राष्ट्रिय सभा सदस्यकाे चुनाव हुन लागेको हो । एमालेका ८, एकीकृत समाजवादीका ४, नेकपा माओवादी केन्द्रका ४, कांग्रेसका ३ र १ जना मनाेनीतकाे कार्यकालय फागुन २० मा सकिँदैछ । राष्ट्रिय सभा सदस्यको पदावधि सकिनु ३५ दिन अगावै निर्वाचन गरिसक्नुपर्ने संवैधानिक व्यवस्था छ ।