भिडियोमा ‘देउता भाकी’

काठमाडौं : गणेश घिमिरेको शब्द, स्वरूपराज आचार्यको स्वर, सूर्य दयालुको संगीत रहेको गीत ‘देउता भाकी’को भिडियो सार्वजनिक भएको छ ।

भिडियोमा गीतकार घिमिरे र उनकी श्रीमती सुनिता घिमिरेको सथामा पुष्प खडका, केकी अधिकारी, नवराज डोटेल, सुजिता सञ्जेल, ओम ज्ञवाली, जुना ज्ञवाली, कृष्ण खनाल, इन्द्रप्रसाद सन्जेल, सरस्वती सन्जेल, माधव ज्ञवाली, रविना केसी, ऐश्वर्या घिमिरे, स्वजल ज्ञवाली, युजन ज्ञवाली, सुप्रिम डोटेल, श्रेयान्स डोटेल, रोशनी सापकोटा, गुरु पुस्कर खतिवडा, नितेश घिमिरे लगायतको अभिनय छ ।

बुद्ध थापाको छायाँकन रहेको भिडियोलाई जीवन शाहीले निर्देशन गरेका हुन् ।

सांगीतिक भ्रमणका लागि पदम राई कोरिया जाने

काठमाडौं : विगतमा दर्जनौं गीत स्रोतामाझ पुगेको भएपनि ‘के गुलियो छ र सखर चिनी’ बोलको गीत र भिडियोले गायक पदम राईलाई चर्चाको शिखरमा पुर्‍याउन ठूलो मद्दत गरेको थियो ।

‘यसो हेरे पूर्वतिर’ले चर्चा बटुलिरहेको अवस्थामा ‘जागिर खान्छु सरकारी अड्डामा’ सार्वजनिक भएपछि थप चर्चामा रहन सफल गायक राईको हालै बजारमा आएको ‘बाटो घुमाउरो’ बोलको भिडियो आम स्रोता, दर्शकको रुची बनेपछि गायक पदम राई स्थानीय स्तरमा आयोजना हुने स्टेज कार्यक्रममा मात्र नभइ विदेशमा रहेका नेपालीहरुको समेत रुचीको गायक बनेका छन् । 

एकपछि अर्को सफलता चुमिरहेका गायक पदम राई ‘ताप्लेजुङ आइडल २०६९’ हुन् । ताप्लेजुङ जिल्ला, नाङ्खोल्याङ गाउँपालिकाका स्थानीय बासिन्दा गायक राईले सांगीतिक प्रस्तुतिका क्रममा विभिन्न मुलुकको भ्रमण गरिसकेका । उनी यही २९ सेप्टेम्बर २०२३ मा न्यू भिजन ग्रुपले दक्षिण कोरियामा आयोजना गर्ने ‘न्यु भिजन सांगीतिक सौगात भाग २’मा सहभागिता जनाउन असोज १० गते त्यसतर्फ प्रस्थान गर्दैछन् ।

इन्सेक कल्चर एण्ड वल्फेर सेन्टर, बुसन, साउल लगायतका स्थानमा आफ्नो धमकेदार सांगीतिक प्रस्तुति दिइसकेपश्चात उतैबाट साताव्यापी सांगीतिक कार्यक्रमका लागि हङकङ जाने र फर्केलगतै पूर्वी नेपालको धनकुटा, पाँचथर र सुनसरीमा आयोजना हुने सांगीतिक कार्यक्रममा व्यस्त रहने गायक राईले बताए ।

संगीत क्षेत्रमै आफ्नो व्यावसायिकता अघि बढाउने अठोटका साथ यस क्षेत्रमा सक्रिय लोकप्रिय गायक पदम राईसँगै कोरियामा हुने सांगीतिक कार्यक्रममा प्रकाश सपुत, रचना रिमाल, पूर्ण लिम्बू, अर्जुन सुब्बा, हेमन्त गुरुङ आदिको प्रस्तुति रहने छ ।

‘युवा सर्ट फिल्म प्रतिस्पर्धा’ सम्पन्न

काठमाडौंः चलचित्रको प्राज्ञिक अध्यापन गराउँदै आएको अस्कर फिल्म कलेजले ‘युवा सर्ट फिल्म प्रतिस्पर्धा’ सम्पन्न गरेको छ । 

बीस वर्षमुनिको उमेर समूहमा लक्षित प्रतिस्पर्धामा सजिल बस्नेतले तयार गरेको ‘बबल’ पहिलो, क्षितिज जैसवालले निर्देशन गरेको ‘वैराग्य’ले दोस्रो र देव तामाङले निर्देशन गरेको ‘खोक्रो’ तेस्रो घोषित भएका छन् । उनीहरूले क्रमशः एक लाख, रु. ५० हजार र रु. २५ हजार नगद पुरस्कार प्राप्त गरेको निर्णायकमध्येका एक मनोजबाबु पन्तले जानकारी दिए । 

निर्देशक नीरञ्जनराज भेटवाल र छायाँकार उज्जल बस्ताकोटीसहितको निर्णायक मण्डलले प्राप्त पच्चीस छोटा चलचित्रमध्ये छानिएका सातमध्ये विषयवस्तुको छनोट, कथाभन्ने शिल्प, प्राविधिक पक्ष, दृश्य भाषाजस्ता पक्षलाई आधार बनाएर विजेता छनोट गरिएको निर्णायक पन्तले बताए । 

यस्तै निराकारभक्त राईले तयार गर्नुभएको ‘द पोयट’ लाई निर्णायकले विशेष पुरस्कार (स्पेसल मेन्सन अवार्ड) प्रदान गरेका थिए । कलेजका प्रधानाध्यापक रामराजा दाहालले चलचित्र निर्माणमा प्रतिभाको पहिचान गरी विशेष अवसर प्रदान गर्नका लागि प्रतिस्पर्धा आयोजना गरिएको जानकारी दिए ।  

उनले भने, ‘चलचित्र सिर्जनात्मक विधा भएको र युवाको मस्तिष्क सिर्जनशील हुने भएकाले लक्षित प्रतिस्पर्धा गरिरहनेछौँ ।’ विजेतालाई एक कार्यक्रमको आयोजना गर्दै पुरस्कार प्रदान गरिएको थियो । 

‘संघर्षबिनाको जीवन सार्थक हुन सक्दैन’

व्यावसायिकरुपले विगत डेढ दशकदेखि सौन्दर्य कलामा लागिरहेका मेकअप आर्टिष्ट अनिमेश गुरुङ गोरखा, आपुन अजिरकोट गाउँपालिका–५ का स्थानीय बासिन्दा हुन् । दर्जनौं कन्टेष्ट एवम् फेशन शोमा आफ्नो श्रृंगारकला प्रस्तुत गरिसकेका मेकअप आर्टिष्ट अनिमेश सानै उमेरदेखि स्वाबलम्बी बन्ने चाहनाले आज एक कुशल मेकअप आर्टिष्टको रुपमा समेत परिचित छन् । दुई हजारभन्दा बढी म्युजिक भिडियोमा श्रृंगारको काम गरिसकेका अनिमेशले जय शम्भो, आधा पेज, बीच बाटो, निशाफ, उल्झन, धनवान, ज्याकपट, कोशेली, च्याम्पियनलगायतका नेपाली र एक दर्जन बढी भोजपुरी चलचित्रमा मेकअप आर्टिष्टको रुपमा काम गरिसकेका छन् । अनिमेश स्पर्श म्युजिक भिडियो अवार्ड २०२३, विराट म्युजिक एण्ड फिल्म अवार्ड २०७८ मा ‘उत्कृष्ट मेकअप आर्टिष्ट अवार्ड’, हालै सम्पन्न दोस्रो म्युजिक खबर तीज म्युजिक अवार्डलगायतका सम्मानबाट सम्मानित भएका छन् । अहिलेका ब्यस्त मेकअप आर्टिष्ट अनिमेश गुरुङसँग मध्यान्ह दैनिकका लागि सानु श्रेष्ठले गरेको कुराकानीको सम्पादित अंश :

कसरी लाग्नु भयो सौन्दर्यकलामा ?

सानो छँदा यही क्षेत्रमा काम गर्ने भन्ने कुनै बिचार थिएन । समय बित्दै गएपछि आफ्नै हातमा केही न केही सीप भए जीवनयापनमा सहज हुने ठानेर यो व्यवसाय रोजेको हुँ । आफ्नै पौरखमा बाँच्न सकिने, कसैको अण्डरमा बस्नु नपर्ने, आत्मिय व्यवहारको वातावरण, आफ्नो इच्छाको मालिक बन्न पाइने, असाध्यै ठूलो शैक्षिक योग्यताको पनि आवश्यकता नपर्ने भएकाले यो पेशाप्रति आकर्षित हुन पुगें ।

यो स्थानमा पुग्न कत्तिको दुःख गर्नु पर्‍यो ?

कामप्रतिको लगनशीलता र मिहेनतबिना कुनै पनि काममा सफलता हासिल गर्न सकिन्न । त्यसैले कामप्रतिको इमान्दारी र संघर्षलाई मैले निरन्तरता दिएका कारणले गर्दा नै आज यो स्थानमा पुग्न सफल भएको हुँ । मलाई लाग्छ संघर्षबिनाको जीवन सार्थक हुन सक्दैन ।

तपाईं त कला क्षेत्रमा काम गर्ने मेकअप आर्टिष्ट, आम महिलाहरुमा सौन्दर्यकलाको ज्ञान कत्तिको पाउनु हुन्छ ?

सौन्दर्य ज्ञानको आवश्यकता महसुस भएको धेरै भएको छैन । पहिले अहिलेको जस्तो शिक्षित थिएनन् महिलाहरु । खेती किसानीमा संलग्न महिलाहरु बढी भएकाले सौन्दर्य ज्ञान र चासो थिएन । अहिले त्यो अवस्था छैन । गाउँकाहरु पनि शहरीया जीवनशैली जीउन थालिसकेका छन् । डिजिटल प्रविधिको विकाससँगै मानव जातिको जीवनशैलीमा पनि व्यापक परिवर्तन आएको देखिन्छ । अहिलेका दिदीबहिनीहरुमा सौन्दर्यकलाको राम्रो ज्ञान भएको पाएको छु ।

यो पेशाबाट सन्तुष्ट हुनुहुन्छ ?

कुनै पनि काम अरुले गरेको सजिलो लाग्छ । तर त्यही काम आफूले गर्नुपर्दा गाह्रो हुन्छ । त्यसैले आफूले गरेको कामबाट सन्तुष्ट हुन जान्नुपर्छ र सिक्नुपर्छ । अहिले आर्थिकरुपले पनि राम्रो छ । समय परिवर्तनसँगै सामाजिक पहिचान, व्यक्ति स्वयंमा आत्मनिर्भर र आत्मविश्वास साथै आफ्नो सीप र कलामार्फत फिल्मी पात्र हुन् या आम मानिसलाई सजाउँदा उहाँहरुमा देखिने उत्साह र खुसीले साँच्चै सन्तुष्टि मिलेको महसुस हुन्छ ।

यो क्षेत्रमा महिलाभन्दा पुरुष बढी हुनुको कारण ?

पहिले यो महिलाले मात्र गर्ने काम भन्थे । समय परिवर्तनसँगै मानव सोचमा पनि परिवर्तन आएको छ । विगतमा महिलाले यो गर्न हुन्न त्यो गर्न हुन्न भन्ने खालका अड्चन र रुढीबाडीको सामना गर्नुपथ्र्यो । अहिले महिलाहरु आफू खुसी जुनसुकै व्यवसाय गर्न सक्छन् र सक्षम पनि छन् । तपाईंले भन्न खोज्नुभएको फिल्मी क्षेत्रमा महिला मेकअप आर्टिष्टको कमीको बारेमा हो भने पहिला धेरै नै हुनुहुन्थ्यो, बिस्तारै महिलाको संख्या घटेर पुरुषको संख्या बढेको हो । महिला दिदीबहिनीहरु फिल्मी क्षेत्रमा भन्दा ब्युटीपार्लरप्रति आकर्षित भएको पाउँछु म । 

उहाँहरु आफ्नो व्यवसायबाट खुसी भएको देख्नु हुन्छ ?

जहाँसम्म सौन्दर्यकला व्यवसायको कुरा छ, यस क्षेत्रमा काम गरिरहेका दिदी बहिनीहरुको विगत र वर्तमानमा आमुल परिवर्तन भएको छ । जीवनशैलीमा खुसीयाली छाएको पाउँछु म । 

सौन्दर्यकला व्यवसायप्रति तपाईंकोे धारणा ?

मेकअप आर्टिष्ट पेशा एक यस्तो माध्यम हो जसमा विविध विषय वस्तुहरु मिश्रितरुपमा रहेका हुन्छन् । यस अन्तर्गत स्किन, हेयर, मेकअप, नेलदेखि लिएर सौन्दर्यसँग सम्बन्धित अनेकन विषयहरु पर्दछन् । त्यसैले यो पेशा संवेदनशील छ । आफ्नो उत्तम करियर निर्धारण गर्ने थलो पनि हो । जहाँ सौन्दर्यका कुरा उठ्छन् त्यहाँ मेकअप आर्टिष्टको आवश्यकता पर्छ नै वा श्रृंगार कलाको । सिनेमाका कलाकार हुन् वा आम मानिस मेकअपबिनाको सौन्दर्य सोच्न पनि मुस्किल हुन्छ ।

सुटिङमामात्र मेकअप गर्नु हुन्छ कि बाहिर पनि ?

सुटिङमा कलाकारहरुको मेकअप गर्नेमात्र होइन विभिन्न संस्थाले आयोजना गर्ने फेशन शो, विवाह आदि शुभ कार्यहरुमा मेकअप आर्टिष्टको रुपमा काम गर्दै आइरहेको छु ।

ब्युटीपार्लरमा गरिने र फिल्मी श्रृंगारमा के भिन्नता छ ?

सौन्दर्यसम्बन्धी सम्पूर्ण समस्याको समाधान गर्नुका साथै एउटा साधारण महिलाको शिरदेखि पाउसम्म हरेक श्रृंगार ब्युटीसियनले गर्नुपर्ने हुन्छ । फिल्ममा विषयवस्तु र पात्रको चरित्रअनुसारको भेषभुषा सुहाउदो मेकअप गर्नुपर्ने हुन्छ ।

बबिता श्रेष्ठको ‘राजै’ सार्वजनिक

काठमाडौं : महिला म्युजिक भिडियो निर्देशनमा एकछत्र राज गर्न सफल बबिता श्रेष्ठ निर्देशित पछिल्लो म्युजिक भिडियो ‘राजै’ सार्वजनिक भएको छ । नेहार बुढाथोकीको शब्द, रेजिना रिमाल र नेहार बुढाथोकीको स्वर समेटिएको ‘राजै’का निर्माता राजेन्द्र पुरी हुन् । 

मायाप्रेममा आधारित भिडियोमा सागर लम्साल ‘बले’, ललना चिमरिया, राजकुमार शाह, आर्यन पुडासैनी, दिपेश श्रेष्ठ आदिको अभिनय रहेको छ । भिडियो उत्सव दाहालले खिचेका हुन् । 

‘चौथो प्रियसी धमका २०२३’ बरदुबईमा हुँदै

काठमाडौं : ‘चौथो प्रियसी धमका २०२३’ यूएईको बरदुबईमा हुने भएको छ । प्रियसी म्युजिक प्रालिको आयोजनामा असोज १४ गते विविध कार्यक्रमसहित बरदुबईको याक एण्ड यति एभरेष्टमा प्रियसी धमका २०२३ आयोजना गर्न लागिएको हो ।

नेपाली कला संस्कृति, भाषा, सम्पदा संरक्षण, प्रवद्र्धनका लागि उक्त कार्यक्रम गर्न लागिएको दुबईस्थित आयोजक समितिकी पूर्णिमा घिसिङले जानकारी दिइन् । उनले कार्यक्रमको तयारी अन्तिम चरणमा पुगेको पनि बताइन् । यसअघि प्रियसी धमका थाइल्याण्ड, सिंगापुर र मलेसियामा पनि आयोजना गरिएको थियो ।

उनका अनुसार नेपालबाट राष्ट्रिय स्तरका कलाकारदेखि प्रवासी नेपाली कलाकारहरुको बेजोड सांगीतिक प्रस्तुति रहने छ । कार्यक्रममा नेपालबाट चर्चित लोक तथा दोहोरी गायिका टीका पुन, मोडेल तथा गायक दुर्गेश थापा, हाँस्य कलाकार तथा मोडेल सागर लम्साल ‘बले’,  बालकलाकार जेभिन श्रेष्ठ, जिभेस श्रेष्ठ, मौलिक थाली नृत्यांगना एलिजिबा पुर्जा पुन, आधुनिक गायक नरेश बुढाथोकी, मोडेल रचना गौतम, गायक तथा सर्जक डि.आर सुजन, कृष्ण जोशी लगायतका कलाकारको उपस्थिति रहने भएको छ ।

यस्तै प्रवासी नेपाली कलाकारहरु बाबुराम परियार, लोक दोहोरी गायक कमल परियार, लोक दोहोरी गायक प्रकाश पुरी, गायक नीर तामाङ आदिको  प्रस्तुति रहने बताइएको छ । आयोजक समितिमा गीतकार राजेन्द्र पुरी, म्युजिक भिडियो निर्देशक बबिता श्रेष्ठ, मोडल अमन श्रेष्ठ, बिकेश श्रेष्ठ रहेका छन् ।

पदम राई र अञ्जु पन्तको स्वरमा ‘बाटो घुमाउरो’

काठमाडौं : गायक पदम राई र गायिका अञ्जु पन्तकोे स्वरमा आधुनिक गीत ‘बाटो घुमाउरो’ एक कार्यक्रम बीच सार्वजनिक गरिएको छ ।

दिपक शर्माको शब्द, संगीत रहेको गीतको भिडियोमा पदम राई, एलिशा राई, सरोज राना, बिना राउत, सुरेश देओल, प्रिन्सिका श्रेष्ठको अभिनय रहेको छ । गायक पदम राईको युट्युब च्यानलबाट सार्वजनिक भिडियोका निर्देशक गम्भिर बिष्ट हुन् ।

नेपाली सांगीतक क्षेत्रमा जमेका पवन

तिलु शर्मा पौडेल/मध्यान्ह

दोहा, कतार : नेपाली सांगीतक क्षेत्रमा दैनिक नयाँ नयाँ कलाकारको प्रवेश भइरहेको छ । कलाकार भन्ने बित्तिकै हामीले नाच्ने र गाउने मान्छे भनेर चिन्छौं र आम बुझाइ पनि त्यही छ । कलाकार भनेको पर्दामा देखिने व्यक्ति मात्र नभइ एउटा सिर्जनासँग जोडिने र हरेक पाटोमा आफ्नो कामको दख्खल राख्ने व्यक्तिलाई भनिन्छ । एउटा गीतको अडियो तथा म्युजिक भिडियो तयार हुँदा पर्दामा देखिने भन्दा पर्दा पछि बसेर काम गर्ने व्यक्तिको धेरै ठूलो मिहिनेत र योगदान हुने गर्दछ ।

यस्तै पर्दा पछाडि रहेर निरन्तर नेपाली गीत संगीतमा आफ्नो कर्म इमानदारितापूर्वक गरिरहेका व्यक्ति हुन्, पवन विश्वकर्मा (विश्व) । पहलमान विश्वकर्मा र माता हिरा विश्वकर्माको कोखबाट ज्येष्ठ सुपुत्रका रुपमा विसं २०५७ असार २० गते बागलुङको काठेखोला गाउँपालिका–४ तङ्ग्राममा जन्मिएका हुन् पवन । कुशल ध्वनि संयोजक तथा संगीतकारका रूपमा नेपाली संगीत क्षेत्रमा स्थापित पवनका एक भाइसमेत छन् । २०७३ सालबाट साइनोमा आफ्नै दाइ पर्ने कमल विश्वकर्माको प्रेरणाले नेपाली गीतसंगीत क्षेत्रमा होमिएका उनले करिब पाँच सयभन्दा बढी गीत मिक्सिङ गरिसकेका छन् । उनले ध्वनि मिश्रण गरेका झरनाको चिसो पानी, तिमीलाई हेर्ने बानी पर्‍यो, खेल मेरी दर्कादारी गीतहरूले मिलियन क्लब नाघेका छन् ।

गीतसंगीतमै केही गर्ने लक्ष्यका साथ अगाडि बढेका पवन मिहिनेतका साथ आफ्नो कर्म गरे सफलता मिल्ने विश्वास गर्छन् । उनले ध्वनि मिश्रण, संगीत संयोजनका अलावा गीत लेखन पनि गर्छन् । बीबी अनुरागी, श्याम स्वतः रसाइलीलाई आफ्नो आइडल मान्ने पवनले मध्यान्हसँग कुरा गर्दै ‘सांगीतिक क्षेत्रमा मार्ग निर्देशन गर्ने पहिलो व्यक्ति नै कमल विश्वकर्मा रहेको बताए ।

उनले ‘उहिलेका भाका’ तीज गीतको उत्कृष्ट ध्वनि मिश्रण विधाबाट शिव शक्ति म्युजिक अवार्डसमेत जितेका छन् । थुप्रै अवार्ड समारोह तथा कम्पनीहरूबाट सम्मान पाइसकेका उनको चर्चा भने संगीत क्षेत्रमा खासै हुँदैन । आफू मिडियामा जानुपर्ने हो या मिडिया आफू कहाँ आउनुपर्ने हो भन्ने बुझ्न नसकेको उनी बताउँछन् । आफूले गरेका कामहरूले बजारबाट राम्रो रेस्पोन्स पाइरहे पनि पर्दा पछाडि बसेर काम गर्ने भएको हुँदा फराकिलो रूपमा परिचित हुन नसकेको उनी स्वीकार्छन् ।

कामलाई भगवान ठान्ने पवनले गीतसंगीतमा संगत गरेर धेरै राम्रा र उधारा मान्छे कमाएको बताए । धन कमाउन नसके पनि नाम पनि उधारोमा कमाएको अनुभव उनी सुनाउँछन् । अति सामान्य परिवारमा जन्मिएर गीतसंगीतको महत्वपूर्ण हिस्सा बनेर काम गरेको छु भन्ने सकारात्मक बुझाइले नै नयाँ नयाँ काम गर्ने जाँगर चल्ने गरेको उनी बताउँछन् ।

बजारमा निकै प्रतिस्पर्धा रहेको स्वीकार्दै हरेक पटक नयाँपन दिनुपर्ने थप चुनौती बढेको उनको अनुभव छ । हाल उनी म्युजिक नेटवर्क नेपाल स्टुडियोमा आवद्ध रहेर काम गरिरहेका छन् । उनलाई हरेक क्रियसनमा गायक तथा संगीतकार योगेस काजी शाहले साथ दिँदै आएका छन् । नसा नसामा नेपाली गीतसंगीत बोकेका पवन उदाउँदो तारा हुन् । एक हजारभन्दा बढी गीतको रेकर्डिङ गरिसकेका पवनले दर्जनौं गीतको संगीत संयोजन पनि गरिसकेका छन् ।

हेटौंडामा तीज महोत्सव : नवीनको गीतमा झुमे दर्शक

हेटौंडा : हरेक वर्ष हरितालिका तीजको अवसरमा आयोजना हुँदै आएको तीज गीत प्रतियोगिता एवम् महोत्सव यो वर्ष पनि हेटौंडाको पशुपति मन्दिर परिसरमा सम्पन्न भएको छ । नेशनल गोल्ड टेलिभिजन र हेटौंडा एफ एमले संयुक्तरुपमा आयोजना गरेको तीज गीत प्रतियोगिता एवम् तीज महोत्सवमा हजारौं दशर्कहरुको सहभागिता रहेको थियो ।

निराहार व्रत बसी नाचगान गरेर रमाउने महिला दिदिबहिनी घामको प्रवाह नगरी दिनभरी नाचिरहेका देखिन्थे । यो राष्ट्रिय स्तरको तीज गीत प्रतियोगितामा १० प्रतियोगी समूहले भाग लिएका थिए । जसमध्ये सानो पोखरा आमा समूह ५ प्रथम, हजुरआमा समूह द्वितीय, दियालो समूह तृतीय र सामना बनस्पती समूह सान्त्वना स्थान हासिल गर्न सफल भए ।

कार्यक्रममा प्रमुख निर्णायकको रुपमा गायक तथा संगीतका नवीन पौडेल रहेका थिए भने अन्य निर्णायकहरुमा राजु लामा, बिन्दु परियार, मिनाश्री लुङ्गेली र गीता भट्टराई रहेका थिए । कार्यक्रमका प्रमुख अतिथि बागमती प्रदेश सरकारकी सामाजिक विकास मन्त्री कुमारी मोक्तान रहेकी थिइन् ।

विभिन्न झाँकीसहित आयोजना गरिएको प्रतियोगिता एवम् महोत्सवमा विभिन्न कलाकारले आ-आफ्नो प्रस्तुति दिएका थिए । निर्णायक एवम् गायक नवीन पौडेलको प्रस्तुतिले सबैलाइ लोभ्याएको थियो । उनले 'मन परेरै हो मन परेरै हो मैले तिमीलाई हेरेको मन परेरै हो', 'हरहर बासना अगरबत्तीको', 'के सम्झनु छ र जान्न म त त्यो घर', 'लेउ खुकुरी लेउ जनता लेउ खुकुरी लेउ भ्रष्टाचारीजतिलाई पुर्‍याइदिउँ छेउ'लगायतका गीत प्रस्तुत गर्दा उपस्थित सबै दर्शकले व्यापक साथ दिएका थिए । आयोजक संस्थाका प्रमुख उज्ज्वल चौलागाईंका अनुसार दर्शकहरुको अत्यन्तै माग भएकाले यो वर्ष पनि लगातार गायक नवीन पौडेललाई आमन्त्रण गरिएको हो । 

कार्यक्रममा गायिका बिन्दु परियारले 'पर्ख पर्ख मायालु'लगायतका आफ्ना चर्चित गीतहरु प्रस्तुत गरेकी थिइन् । त्यसैगरी गायिका मिनाश्री लुङ्गेलीले 'स्याउ फल्यो जुम्लामा', 'सुनको चुरा छ', 'पूर्व घुम्न जाम', गीता भट्टराईले 'ए ठूले', 'बाच्छीले धान खायो', हेटौंडा आइडलका विजेता दिपेश श्रेष्ठ, भ्वाइस अफ किड्सका विता जेनिश उप्रेतीलगायतले आ-आफ्नो प्रस्तुति प्रस्तुत गरेका थिए । यस्तै हास्यकलाकार एवम् जादुगर राजेन्द्र गिरी 'गुन्द्रुके' र मिना गिरीले पनि प्रस्तुति दिएका थिए ।

चुडामणि र मेलिनाको 'मुखले ठिक्क बनाउने' सार्वजनिक

बिन्द्र राई/मध्यान्ह

उदयपुर : चुडामणि मगर र मेलिना राईको स्वरमा रहेको 'मुखले ठिक्क बनाउने' बोलको म्यूजिक भिडियो सार्वजनिक भएको छ । भद्र नकलको शब्द र संगीत रहेको उक्त गीतको भिडियोमा टम्पसेर राई र अञ्जली अधिकारीले आफ्नो नृत्य कला प्रस्तुत गरेका छन् ।

तारावीर पाण्डेले निर्देशन गरेको म्युजिक भिडियोको छायाँकन मुकेश हुमागाईंले गरेका हुन् । म्युजिक भिडियोमा विकास धमलाको सम्पादन र कलर रहेको छ भने कुमार सानु पुनको एरेन्ज रहेको छ ।

त्रियुगा नगरपालिका १४ धापखर्क स्थायी घर भएका गायक मगर हाल वैदेशिक रोजगारीको सिलसिलामा मलेसियामा रहेका छन् । मलेसियामा कामको व्यस्तताको बाबजुद पनि सांगीतिक क्षेत्रमा सक्रिय छन् । मगरको वीर गोर्खाली, कान्छीको जवानी, उदायो बिहानी, भुललगायतका म्युजिक भिडियो यसअघि नै बजारमा आइसकेका छन् ।