काठमाडौं : ईपीएस कोरिया शाखाले लिने कोरियन भाषा परीक्षा सोमबारदेखि शुरु गरेको छ । राष्ट्रिय व्यावसायिक प्रशिक्षण प्रतिष्ठान, भैँसेपाटीमा परीक्षा शुरु भएको शाखाले जनाएको छ ।
परीक्षा एक दिनमा पाँच वटा सिफ्टमा लिइने व्यवस्था मिलाएको शाखाले जनाएको छ । ईपीएस कोरिया शाखाकी निर्देशक मैयाँ कँडेलले त्यसमा एक हजार जनाले परीक्षा दिन पाउने गरी व्यवस्था मिलाइएको जानकारी दिइन् । पहिलो सिफ्टमा करिब ४७ हजार पाँच सय १९ जनाले कोरियन भाषा परीक्षा दिने र शनिबार पनि परीक्षा दिने गरी व्यवस्था मिलाएको भन्दै कँडेलले अन्य सिफ्ट त्यसपछि तय गरिने बताइन् ।
परीक्षार्थीहरु परीक्षाको एक दिनअघि सिफ्टअनुसार ईपीएस शाखा, कार्यालय ग्वार्कोमा बायोमेट्रिक रजिस्ट्रेशन फिङ्गर प्रिन्ट दर्ताका लागि उपस्थित हुनुपर्ने व्यवस्था शाखाले गरेको छ । परीक्षा शुरु हुनुअघि एक घण्टा अगाडि परीक्षा हलमा ओरियन्टेसन शुरु हुने र निर्धारित समयमा उपस्थित नभए परीक्षामा सहभागी नगराइने व्यवस्था मिलाइएको पनि निर्देशक कँडेलले जानकारी दिइन् ।
परीक्षामा मोबाइल फोन, स्मार्ट वाचलगायतका कुनै पनि विद्युतीय सञ्चारका साधनहरु लैजान निषेध गरिएको छ । परीक्षामा चिट चोर्ने, नक्कल गरेकोलगायतका अवाञ्छित गतिविधि गरेको भेटिएमा परीक्षा रद्द गर्नुकासाथै चार वर्षसम्मका लागि परीक्षामा समावेश हुन निषेध गरिने कार्यालयले जनाएको छ । सन् २०२३ का लागि कोरियाको उत्पादनमूलक क्षेत्रतर्फ एक लाख ६३ हजार ६३५ जनाले आवेदन दिएका छन् ।
सर्लाही : सोमबार अपराह्न आफ्नै आँगनमा छोरा विनय कुमार महराका मलेसियाली रोजगारदाता हावर्ट ओवार्ड हालखबर बुझ्दै आइपुगेपछि उनका बुबा मिश्री महरा हर्षले पुलकित थिए । स्थानीय स्तरमा रंगरोगनको काम गर्ने ४० वर्षीय महराले हतार–हतार मोबाइल खोलेर मलेसियामा रहेको छोरासँग भिडियो कलमा जोडिए । स्थानीय भाषामा उनले भने, ‘तोहर मालिक हमार घरमे आईलेबानी ।’ अर्थात ‘तेरो मालिक हाम्रो घरमा आएको छ ।’
पहिलोपटक आफ्नो कम्पनीमा काम गर्ने कामदारको घर र परिवारको वास्तविक अवस्था बुझ्न आएका रोजगारदाता हावर्ट ओवार्डले लामो जिज्ञासा नराखी मिश्रीको सुत्ने, खाना पकाउने, गाईबस्तु तथा अन्न राख्ने सबै ठाउँ नियाले । आफूसँग भएको मोबाइल फोनले सबै ठाउँको तस्बिर लिए । टायलले छाएको साँघुरो घर भएका कारण उनी राम्रोसँग उभिन पनि पाएनन् ।
त्यसपछि हावर्डले मिश्रीलाई सोधे, ‘मलेसियामा तिम्रो छोराको तलब सुविधा वा अन्य विषयमा शिकायत केही छ भने भन, नेपालबाट मलेसिया जाँदा कति खर्च लाग्यो त्यो पनि सुनाउ ।’ जवाफमा मिश्रीले भने, ‘अहिलेसम्म कुनै शिकायत छैन, मलेसिया जाँदा कुनै खर्च लागेन सबै राम्रो छ । तर छोराले मलेसियामा ओभरटाइम गर्न पाएको छैन । ओभरटाइम मिलाइदिनु पर्यो ।’ जवाफमा हावर्टले भने, ‘ओभरटाइमको ग्यारेन्टी गर्न सकिँदैन, अरू समस्या भए भन्नुस् ।’ त्यस जवाफमा मिश्रीले कुनै प्रतिक्रिया जनाएनन् ।
मिश्रीसँग कुराकानी गरेपछि हावर्ट नजिकै रहेको अर्का कामदारको घर उमेश महराको घरमा गए । उमेशकी श्रीमतीले पनि रोजगारदाता हावर्टलाई आफ्ना श्रीमानको तलब बढाइदिन माग गरिन् । जवाफमा हावर्टले त्यसमा सहानुभूतिपूर्वक विचार गर्ने बताए ।
राजधानीमा रहेको एलायन्स ह्युमन रिसोर्स प्रा.लि.मार्फत मलेसियाको अत्याधुनिक फर्निचर उत्पादन गर्ने बेलायती लगानीको बीएसएसबी एसडीएन बीएचडी कम्पनीमा गएका हरिपुरका मात्रै ४७ जना कामदार छन् । उक्त कम्पनीले सोमबार हरिपुरबाट थप ७० जना छनोट गरेको छ । उनीहरु सबै स्वच्छ एवम् मर्यादित भर्ना प्रक्रियाबाट शून्य लागतमा मलेसिया जान लागेका हुन् ।
एलायन्स ह्युमन रिसोर्स प्रा.लि.का सञ्चालक रहेका नेपाल वैदेशिक रोजगार व्यवसायी संघका निवर्तमान महासचिव सुजित श्रेष्ठले मलेसियाली रोजगारदाताले कामदारका परिवारको अवस्था बुझ्न र कम्पनीको सामाजिक उत्तरदायित्व (सीआरएस) अन्तर्गत सहयोग पु¥याउने इच्छा व्यक्त गरेपछि आफूले भेटघाटको प्रबन्ध मिलाएको बताए । रोजगारदाता र कामदारका पारिवारिक सदस्यको भेटघाटले कामदार र रोजगारदाता दुवैलाई फाइदा पुग्ने श्रेष्ठको भनाइ छ ।
कामदारका परिवारका सदस्यहरूसँगको भेटघाटपछि रोजगारदाता हावर्टले सबै पक्षसँगको छलफलपछि आफ्नो कम्पनीमा कार्यरत कामदारका बालबालिका र परिवारलाई प्रत्यक्ष लाभ पुग्ने कार्यक्रम ल्याउने उल्लेख गरे । उनको कम्पनीमा विगत २१ वर्षदेखि नेपालीले काम गरिरहेका छन् । कम्पनीमा भियतनाम, बंगलादेश र म्यानमारबाट पनि कामदार गएको, तर नेपालीको मेहनत र लगनशीलताबाट आफू प्रभावित भइ उनीहरूको घर र परिवारलाई भेट्न आएको उनले बताए ।
त्यसअघि आयोजित कार्यक्रममा हरिपुर नगरपालिकाका प्रमुख गोपाल पन्जियारले पूर्णतया शून्य लागतमा कामदार लैजाने मलेसियाली कम्पनीको कार्यले आफ्नो नगरपालिकाका युवाहरूलाई आर्थिकरुपमा धेरै सहज भएको भन्दै शिक्षा तथा स्वास्थ्यका क्षेत्रमा सहयोग गरिदिन आग्रह गरे । उनले यसअघि कम्पनीमा काम गरेका नेपाली कामदारको लगनशीलता, इमानदारिताका कारण रोजगारदाता कम्पनीका सञ्चालक कामदारको घरदैलोमा आउने वातावरण बनेको भन्दै छनोट भएर जाने नयाँ युवाहरूले पनि लगनशीलता, इमानदारिता देखाउन जरुरी रहेको बताए ।
स्थानीय समाजसेवी उदय नारायण चौधरीले मलेसियामा कार्यरत नेपाली कामदारको पे रोल र अन्य सुविधा गोप्य राखिने गुनासो आइरहेको अवस्थामा रोजगारदा नै कामदारको घरदैलोमा पुगेर उनीहरूले पाउने सेवा सुविधा र शून्य लागतका विषयमा जानकारी गराउने कार्यले विपन्न अवस्थामा रहेका कामदारलाई फाइदा पुगेको बताए ।
म्यानपावर कम्पनीका सञ्चालक श्रेष्ठले मलेसियाली कम्पनीले शून्य लागतमा कामदार लैजाने भएकोले रोजगारीमा छनोट हुनका लागि आवेदन गरेकाहरूलाई कुनैपनि शीर्षकमा रकम नलिइने भएकाले छनोटका लागि कुनै दबाब नदिन र कसैको प्रलोभनमा नपर्न आग्रह गरे ।
कार्यक्रममा नगरपालिकाकी उपप्रमुख नीलमदेवी राय यादव, वडाध्यक्ष गजेन्द्र चौधरी, वडा अध्यक्ष प्रेमहरि श्रेष्ठ, वडा सदस्य नगेन्द्र महतो, वरिष्ठ प्रहरी नायव निरीक्षक अर्जुनकुमार साहलगायतको उपस्थिति रहेकोे थियो ।
काठमाडौं : प्रगतिशील वैदेशिक रोजगार व्यवसायी मञ्च नेपालले साउदी आईडीलगायतका समस्या समाधानका लागि महत्वपूर्ण भूमिका खेलेको भन्दै नेपाली वैदेशिक रोजगार व्यवसायी संघका साउदी संयोजक वैकुण्ठ पौडेल ‘वैभव’लाई सम्मान गरेको छ । मञ्चको कार्यालय पिंगलास्थानमा आइतबार एक संक्षिप्त कार्यक्रम गरी पौडेललाई सम्मान गरेको हो ।
मञ्चका अध्यक्ष जनक रावलले संघ कार्यसमितिमा रहेर पदीय दायित्वलाई कर्तव्य ठानी संघको गरिमा वृद्धिमा उल्लेखनीय भूमिका खेलेका कारण मञ्च सदस्यसमेत रहेका व्यवसायी पौडेललाई सम्मान गरिएको बताए । साउदी संयोजक पौडेलले लामो समयदेखि व्यवसायीले झेल्दै आएको साउदी आईडीको समस्यादेखि नेपाली दूतावास रियाद तथा कन्सुलर कार्यालय जेद्दासँग समन्वय गरी व्यवसायी तथा कामदारका समस्या समाधान गरी सहज परिस्थिति निर्माण गरेकोे अध्यक्ष रावलले बताए ।
कार्यक्रममा मञ्चका महासचिव मिलन कट्टेलले संयोजक पौडेल साउदी अरेबियाको वैदेशिक रोजगार प्रक्रियामा रहेका सबै प्रकारका जटिलताका विषयमा जानकार रहेकाले समस्याको समाधान हुने हुँदा व्यवसायीलाई सहज भएको धारणा राखे ।
मञ्चको सम्मानले आफूलाई कामदार र व्यवसायीका समस्या समाधानका लागि अझ धेरै चनाखो हुन प्रेरणा मिलेको भन्दै पदीय जिम्मेवारीको अवस्थामा नरहेको स्थितिमा पनि आफ्नो क्षमताले भ्याएसम्म व्यवसायी तथा कामदारका समस्या समाधानका लागि दत्तचित्त भएर लागिपर्ने प्रतिबद्धता जनाए ।
मञ्चका अध्यक्ष रावलको अध्यक्षतामा भएको कार्यक्रममा संघका प्रथम उपाध्यक्ष डिक बहादुर खत्री (कुमार), द्वितीय उपाध्यक्ष सञ्जु गुरूङसहित मञ्चका पदाधिकारी तथा सदस्यहरूको उपस्थिति रहेकोे थियो ।
खोटाङ : जिल्ला प्रहरी कार्यालय खोटाङले बैंकिङ कसुर तथा वैदेशिक रोजगारसम्बन्धी ठगी गर्ने व्यक्तिलाई पक्राउ गर्न थालेको छ । विभिन्न समयमा विविध बहाना बनाएर लिएको रकम नतिर्ने तथा विदेश पठाइदिन्छु भन्दै रकम लिएर विदेश नपठाउने व्यक्तिलाई प्रहरीले पक्राउ गर्न थालेको हो ।
बैंकिङ कसुर तथा वैदेशिक रोजगारसम्बन्धी ठगी मुद्दाका पीडक पक्राउ अभियान शुरु गरिएको महिनादिनमै सात जना पक्राउ परेको जिल्ला प्रहरी कार्यालय खोटाङका प्रमुख प्रहरी नायब उपरीक्षक पुरुषोत्तम खड्काले जानकारी दिए । ‘पीडितले दिएको जाहेरीको आधारमा आरोपितलाई विभिन्न ठाउँबाट पक्राउ गरेर कारबाहीको प्रक्रिया अगाडि बढाएका छौँ । उनीहरुले पीडितबाट एक लाख २५ हजारदेखि रु ३५ लाख २५ हजारसम्म ठगी गरेको पाइएको छ,’ उनले भने, ‘पक्राउ परेकामध्ये केहीले सम्बन्धित व्यक्तिलाई आफूले लिएको पैसाको साँवा÷ब्याज फिर्ता गरेका छन् । फिर्ता गर्न नसकेकालाई पुर्पक्षका लागि जिल्ला कारागार पठाउनेछौँ ।’
गत पुस १७ गतेदेखि माघ मसान्तसम्ममा विभिन्न ठाउँबाट पक्राउ परेका आरोपितलाई जिल्ला अदालतबाट म्याद थप गरेर हिरासतमा राखिएको जनाइएको छ । पक्राउ पर्नेमा बैंकिङ कसुरसम्बन्धी ठगीको आरोपमा छ जना र वैदेशिक रोजगारसम्बन्धी ठगीको आरोपमा एक जना रहेको जिल्ला प्रहरी कार्यालय खोटाङका प्रवक्ता बेनु कार्कीले जानकारी दिए ।
बैंकिङ कसुरसम्बन्धी ललितपुर महानगरपालिका–१४ थसिखेल निवासी सुनिता खड्कालाई गत पुस १७ गते पक्राउ गरिएको प्रहरीले जनाएको छ । खड्काले दिक्तेल रुपाकोट मझुवागढी नगरपालिका–१ दिक्तेलकी निर्मला भुजेलको ३५ लाख २५ हजार रकम विभिन्न बहानामा ठगी गरेको पाइएको छ । खड्काले आफूले लिएको रकम फिर्ता गर्न तथा धरौटी रकम बुझाउन नसकेपछि माघ–३ गते पुर्पक्षका लागि कारागार पठाइएको प्रहरीले जनाएको छ । सस्तोमा घडेरी दिलाइदिन्छु भन्दै ठगी गर्ने खड्कालाई अदालतले दश लाख धरौटी तोकेको छ ।
यस्तै, युवराज बस्नेतको जाहेरीले गत माघ–९ गते काठमाडौं महानगरपालिका–७ काठमाडौंबाट पक्राउ परेका कल्याण खत्रीलाई बैंकिङ कसुरसम्बन्धीकै अर्को मुद्दामा बिहीबार गौशाला पठाइएको प्रनाउ खड्काले जानकारी दिए । आरोपित कल्याणले बस्नेतको चार लाख २० हजार रकम लिएर फिर्ता नगरेको जनाइएको छ ।
बस्नेतकै जाहेरीको आधारमा कल्याणका बुबा मोहनकुमार खत्रीलाईसमेत प्रहरीले पक्राउ गरेको छ । गत माघ ११ गते नवलपारासीको सुनवल नगरपालिका–१२ भूमहीबाट पक्राउ परेका मोहनकुमारले समय समयमा विभिन्न व्यक्तिबाट तीन करोड ४० लाख रकम लिएर फिर्ता नगरेको जनाइएको छ ।
दिक्तेलस्थित प्रहरी हिरासतमा रहेका मोहनकुमारलाई जिल्ला अदालत खोटाङको प्रक्रिया पूरा गरेर झापाको बिर्तामोड पठाउने तयारी गरिएको प्रहरीले जनाएको छ । मोहनकुमारविरुद्ध विर्तामोडबाट ठगी मुद्दासम्बन्धी नै पक्राउ पुर्जी आएको जनाइएको छ । पक्राउ परेकामध्ये मोरङको बेलबारी नगरपालिका–१ बेलबारीका सुवास न्यौपाने र दिप्रुङ चुइचुम्मा गाउँपालिका–४ छोरम्बुस्थित याङ्सोलाका चण्डीकुमार राईले रकम फिर्ता गरेको प्रनाउ खड्काले जानकारी दिए ।
खगेन्द्र राईको जाहेरीले गत पुस १९ गते पक्राउ परेका न्यौपानेले १५ लाख तथा समिर राईको जाहेरीले माघ १६ गते पक्राउ परेका चण्डीकुमारले एक लाख २५ हजार रकम फिर्ता गरेका हुन् । यस्तै, युवराज आचार्यको जाहेरीले गत माघ २७ गते पक्राउ परेका सिन्धुली जिल्लाको दूधौली नगरपालिका–११ राजावास बस्ने उपेन्द्र साह सुरीले दुई लाख ३४ हजार पाँच सय ५० ठगी गरेको जनाइएको छ । उनलाई हिरासतमा राखेर अनुसन्धान गर्ने काम भइरहेको प्रहरीले जनाएको छ ।
वैदेशिक रोजगारसम्बन्धी ठगी मुद्दामा दिक्तेल रुपाकोट मझुवागढी नगरपालिका–२ सोल्मास्थित तालखर्क घर भइ भक्तपुर जिल्लाको सूर्यविनायक नगरपालिका–२ बालकोट बस्दै आएका प्रेम पुरी पक्राउ परेका छन् । दिक्तेल रुपाकोट मझुवागढी नगरपालिका–४ खाल्लेका ईन्द्रबहादुर खड्का ‘माइकल’ सहित छ जनाको जाहेरीमा गत माघ २१ गते पक्राउ परेका पुरीले रु आठ लाख ९५ हजार ठगी गरेको आरोप छ ।
विभिन्न समयमा विदेश पठाइदिन्छु भन्दै धरौटीबापत लिएको रकम फिर्ता नगरेपछि कारबाहीको लागि प्रहरीमा उजुरी दिएको माइकलले बताए । पक्राउ परेका पुरीलाई हिरासतमा राखेर कारबाहीको प्रक्रिया अगाडि बढाइएको प्रहरीले जनाएको छ । दश स्थानीय तह रहेको जिल्लामा सबैभन्दा बढी वैदेशिक रोजगारसम्बन्धी ठगीका घटना बढिरहेको पाइएको छ । विदेश पठाउने नाममा ठगी गर्ने एजेन्ट जिल्ला बाहिरका हुँदा ठगी वापतको रकम फिर्ता गराउन समस्या हुने गरेको सुरक्षित आप्रवासन परियोजना सामीका कार्यक्रम संयोजक सन्तोषकुमार राईले जानकारी दिए ।
यसैबीच, फरार प्रतिवादी पक्राउ अभियान शुरु गरेको जिल्ला प्रहरी कार्यालय खोटाङले गत साउनदेखि हालसम्म ९८ जनालाई पक्राउ गरिसकेको जनाइएको छ । अभियानका क्रममा ३० वर्षअघिदेखि फरार रहेका प्रतिवादीसमेत पक्राउ गरिएको प्रनाउ खड्काले जानकारी दिए ।
काठमाडौं : नेपाल वैदेशिक रोजगार व्यवसायी संघले आगामी मार्च महिनाको पहिलो हप्ता यूएईमा हुने रोजगार मेला ‘जव फेयर’लाई बृहत्तररुपमा सफल बनाउन सल्लाहकार समिति, मूल समिति र ५ वटा उपसमिति गठन गरेको छ । संघका अध्यक्ष राजेन्द्र भण्डारीको अध्यक्षतामा फागुन २ गते बसेको संघ कार्यसमितिको बैठकले उक्त निर्णय गरेको हो ।
यसअघि फागुन ३ गते यूएईमा सम्पन्न गर्ने गरी निर्णय गरिएको जव फेयर आवश्यक तयारी नपुगेको भन्दै करिब तीन हप्ताको समय लम्ब्याएर फागुन १९ गते अर्थात मार्च २ तारिकमा गर्ने गरी नयाँ निर्णय गरिएको हो ।
संघका महासचिव तथा प्रवक्ता मेघनाथ भुर्तेलका अनुसार जव फेयरका लागि पूर्वअध्यक्षहरु, संघका वर्तमान अध्यक्ष र सम्पूर्ण शुभेच्छुक संघ संस्थाका अध्यक्ष रहेको सल्लाहकार समिति गठन गरिएको छ । संघले प्रथम उपाध्यक्ष तथा अन्तर्राष्ट्रिय कोअर्डिनेटर डिक बहादुर खत्रीको संयोजत्वमा मूल समिति गठन गरेको छ । मूल समितिमा द्वितीय उपाध्यक्ष सञ्जु गुरुङ, तृतीय उपाध्यक्ष रोशन कटुवाल, सचिव कर्णराज कटुवाल सदस्य रहेको मूल समिति गठन गरेको छ । महासचिव मेघनाथ भुर्तेल मूल समितिको सदस्य सचिव रहेका छन् ।
त्यसैगरी कोषाध्यक्ष सरिता घले संयोजक रहेको आर्थिक उपसमिति गठन गरिएको छ । आर्थिक उपसमितिमा कार्यसमिति सदस्यद्वय सोम बहादुर तामाङ र कैलाश पठाक सदस्य रहेका छन् । संघको कार्यसमिति सदस्य बैकुण्ठ प्रसाद पौडेल संयोजक रहेको प्रचारप्रसार उपसमिति गठन गरिएको छ । उक्त उपसमितिमा कार्यसमिति सदस्द्वय विक्रम श्रेष्ठ र तोरण कुमार कार्की सदस्य रहेका छन् ।
संघले कार्यसमिति सदस्य देवेन्द्र नारायण श्रेष्ठको संयोजकत्वमा प्रेस छपाइ उपसमिति गठन गरेको छ । उक्त उपसमितिमा कार्यसमिति सदस्यद्वय अनिल कुमार राई र देउमान नेङमाङ सदस्य रहेका छन् । त्यस्तै कार्यसमिति सदस्य नारायण भुषाल संयोजक रहेको भ्रमण व्यवस्थापन उपसमिति गठन गरिएको छ । उक्त उपसमितिमा कार्यसमिति सदस्यद्वय आनन्द कोइराला र देवीमाया थापा सदस्य रहेका छन् । जव फेयरको आन्तरिक व्यवस्थापन उपसमिति संयोजकमा कार्यसमिति सदस्य राजेन्द्र बस्नेत रहेका छन् । उक्त उपसमितिमा कार्यसमिति सदस्यद्वय चन्द्र बहादुर लिम्बू र सुर्य कुमार श्रेष्ठ सदस्य रहेका छन् ।
यूएईमा रोजगार मेलाको समय आउन दुई हप्ता र केही दिनमात्रै बाँकी रहेकाले सबै संयोजक र सदस्यहरुलाई आफ्नोतर्फको जिम्मेवारीको कामलाई प्राथमिकतामा राखेर अघि बढाउन बैठकले निर्देशन दिएको पनि महासचिव भुर्तेलले बताए ।
यूएईको होटल मरिनामा हुने तय भएको जव फेयरमा श्रम, रोजगार तथा सामाजिक सुरक्षा मन्त्रालय, वैदेशिक रोजगार बोर्ड सचिवालय र यूएईस्थित नेपाली दूतावासको सहकार्य रहने संघले बताएको छ । जव फेयरमा यूएईस्थित रोजगारदाताहरु, सबै स्टेटका चेम्बरहरु, इन्डियन इन्भेष्टमेन्ट ग्रुप, सबै बिजनेस कम्युनिटी, एचआर एशोसिएसन र आधिकारिक नेपाली चेम्बरहरुलाई सहभागी गराइने तयारी रहेको पनि महासचिव भुर्तेलले जानकारी दिए ।
यूएईमा नेपाली कामदारका लागि धेरै क्षेत्रमा रोनगारीको सम्भावना भएपनि बिचौलियाहरुका कारणले समस्या रहेकोले रोजगारदाताहरुसँग नेपाली म्यानपावर व्यवसायीहरुको प्रत्यक्ष सम्बन्ध स्थापित गर्न जव फेयर आयोजना गरिएको संघका प्रथम उपाध्यक्ष, अन्तर्राष्ट्रिय कोअर्डिनेटर तथा रोजगार मेला संयोजक खत्रीले बताए । उनले आगामी एक दशकका लागि प्रभाव छोड्ने गरी व्यापक सहभागितामा जव फेयर हुने उल्लेख गरे ।
नेपालले १७ वर्षअघि २००७ को जुन ६ तारिकमा दुबईको ग्रान्ड हयात होटलमा जव फेयर गरेपनि त्यसलाई निरन्तरता दिन सकेको छैन । त्यतिबेला २६ कम्पनीले स्टल राखेर आ–आफ्ना सूचनाहरु प्रवाह गरेका थिए भने वैदेशिक रोजगार विज्ञ डा. गणेश गुरुङले नेपालमा उपलब्ध अदक्ष, अर्धदक्ष तथा दक्ष कामदारहरुको बारेमा विस्तृत जानकारी गराएपछि नेपालमा कामदारहरु अदक्ष मात्र उपलब्ध छन् भन्ने यूएईका रोजगारदाताहरुको सोचाइ नै परिवर्तन भएको थियो ।
पछिल्ला महिनाहरुमा यूएई धेरै नेपाली कामदार जाने श्रम गन्तव्य मुलुकको शीर्ष स्थानमा रहेको छ । माघ महिनामा म्यानपावर कम्पनीमार्फत १० हजार ८ सय ६१ जना कामदार गएका थिए भने रिइन्ट्री र अन्य माध्यमबाट गरी १७ हजार बढी नेपाली उक्त मुलुकमा रोजगारीका लागि गएका छन् । यूएई र नेपाल सरकारबीच यसअघि भएको सम्झौताअनुसार नेपाली कामदारको खर्च रोजगारदाताले नै व्यहोर्नुपर्ने व्यवस्था छ । सम्झौतामा कामदारले कुनै पनि शुल्क भुक्तानी गर्नु नपर्ने भएपनि रोजगारदाताको कमीकमजोरीका कारण कतिपय अवस्थामा शुल्क तिरेर जाने गरेका छन् ।
भरत प्रधान/रासस
लिस्बन : वैदेशिक रोजगारीका सिलसिलामा पोर्चुगल आएका नेपालीले राहदानी नवीकरण तथा नयाँ राहदानी बनाउन नपाउँदा समस्यामा परेका छन् ।
विभिन्न मुलुक हुँदै पोर्चुगल आएका नेपालीले नयाँ राहदानी बनाउन र नवीकरण गर्न बनाउन नपाउँदा समस्यामा परेका हुन् । राहदानीको समस्याले गर्दा विशेषतः पोर्चुगल बसाइको वैधानिकताका लागि यहाँको अध्यागमन निकाय एकीकरण, आप्रवासन र शरणमा बायोमेट्रिकको तयारीमा रहेका नेपालीहरू बढी मारमा परेका छन् ।
पोर्चुगलमा नेपाली दूतावास स्थापनाका लागि राजदूत नियुक्त भइसकेको भए पनि दूतावास कहिलेसम्म आउने भन्ने तिथिमिति तय भइसकेको छैन । राहदानीलगायतका कागजातसम्बन्धी समस्यामा परेका नेपालीहरूले दूतावास आउन ढिलाइ भए पनि तत्काल राहतका लागि घुम्ती टोलीसम्म पनि नआएको भन्दै गुनासो गरेका छन् ।
राहदानीको म्याद सकिनै लागे पनि नयाँ राहदानी बनाउन नपाउँदा आफू समस्यामा परेको फ्रान्स हुँदै २० महिनाअघि पोर्चुगल आउनुभएका पोखराका रवि थापाले बताए ।‘मेरो राहदानीको म्याद सकिन अब डेढ महिनामात्रै बाँकी छ, मेरा धेरै साथीहरूको पनि राहदानीको म्याद सकिन लागेको छ । हामी यहाँको वैधानिक बसाइका लागि बायोमेट्रिकको पर्खाइमा छौँ । तर राहदानी बनाउन नसक्दा समस्यामा परेका छौँ’, थापाले भने । राहदानी बनाउनका लागि जोखिम मोलेरै भए पनि स्पेनको मेड्रिडस्थित रहेको नेपाली दूतावास जाने तयारी गरेको उनले बताए ।
स्याङ्जाका युवराज रोकाको समस्या पनि उस्तै छ । क्रोसिया हुँदै डेढ वर्षअघि पोर्चुगल आएका रोकाको राहदानीको म्याद सकिन दुई महिनामात्रै बाँकी छ । हाल मदेइरामा कार्यरत रहेका उनी राहदानीको म्याद सकिन थालेपछि चिन्तित छन् । राहदानी बनाउन ढिलाइ भए यहाँको कागजी प्रक्रियामा समस्या हुने रोकाले बताए । ‘सरकारले छिट्टै टोली पठाइदिए त हामीजस्ता समस्यामा परेकालाई ठूलै राहत हुने थियो’, रोकाले भने ।
थापा र रोकाको जस्तै समस्या दाङका जनप्रसाद पुनको पनि छ । पुन पनि राहदानीको म्याद सकिन लागेपछि तनावमा परको छन् । ‘धेरै अघिदेखि टोली आउने भन्ने सुनेको हो, मजस्ता धेरै साथी राहदानी बनाउनका लागि टोलीको पर्खाइमा छौँ’, पुनले भने । ‘टोली नआउने हो भने त हामी समस्यामा पर्छौ, टोली नआउने नै भए त स्पेन, फ्रान्ससम्म धाएर भए पनि राहदानी त बनाउनैपर्छ, तर ती मुलुकसम्म धाउन पनि वैधानिक कागजात नहुँदा जोखिम मोल्नुपर्ने बाध्यता छ’, पुनले अगाडि थपे ।
विगत लामो समयदेखि परिवारसहित पोर्चुगल बस्दै आएका गोरखाका दिनेश श्रेष्ठले पनि राहदानीको म्याद गुज्रेका कारण धेरै सास्ती खेप्नुपरेको सुनाए । दुई छोराछोरी र आफ्नो गरी तीन जनाकै राहदानी बनाउनुपर्ने भए पनि नेपाली दूतावास रहेको छिमेकी मुलुक धाउनैपर्ने बाध्यता भएको उनले बताए । छोराको रेसिडेन्सी कार्डको म्याद सकिएर तीन पटकसम्म समय लिएर नवीकरण गर्न आप्रवासी मामिला हेर्ने सरकारी कार्यालय धाए पनि राहदानीको म्याद नै नभएको भन्दै कार्डसमेत नवीकरण गर्न नसकेको पीडा श्रेष्ठले सुनाए ।
‘टोलीको आशमा बस्दा बाबुको कार्डसमेत नवीकरण गर्न सकिनँ, त्यसैले नयाँ राहदानी बनाउनका लागि अहिले स्पेन आएको छु । यहाँ आएर राहदानीसम्बन्धी सबै काम सकाएँ, दुःख पाए पनि अब राहदानी बन्ने ढुक्क भयो’, श्रेष्ठले भने ।
लिस्बनमा रहेको अवैतनिक नेपाली महावाणिज्य दूतावासको कार्यालयले दिएको तथ्यांकानुसार राहदानी नवीकरण तथा नयाँ राहदानी बनाउने नेपालीको संख्या दुई हजार छ सयभन्दा बढी छ । जसअनुसार दुई हजार ९७ जनाको नवीकरण, चार सय ५० जनाको हराएको र ६५ जना बालबालिकाको नयाँ राहदानी बनाउनुपर्ने आवेदन छ । विशेषगरी पोर्चुगल बसाइको वैधानिकताका लागि यहाँको अध्यागमन कार्यालय एकीकरण, आप्रवासन र शरणमा बायोमेट्रिकको तयारीमा रहेका नेपालीले राहदानी बनाउन नपाउँदा बढी समस्यामा परेको पोर्चुगलका लागि अवैतनिक नेपाली महावाणिज्यदूत मकरबहादुर हमालले बताए ।
‘हामीले तत्कालको समस्या समाधानका लागि फ्रान्सस्थित दूतावासबाट घुम्ती टोली ल्याउन पहल गरिरहेका छौँ, टोली आउने/नआउनेबारे अहिलेसम्म आधिकारिक जानकारी आइसकेको छैन । तर तत्काल टोली नआउने हो भने त यहाँको वैधानिक बसाइका लागि बायोमेट्रिकको तयारीमा रहेका धेरै नेपालीलाई सस्या हुने अवस्था छ’, महावाणिज्यदूत हमालले भने ।
राहदानी नवीकरण तथा नयाँ राहदानी बनाउन भन्दै धैरै नेपाली दैनिकजसो महावाणिज्य दूतावासको कार्यालय धाउने गरेको र कार्यालय परिसरमा भीडभाड नै लाग्ने गरेको उनले सुनाए ।
गैरआवासीय नेपाली संघ पोर्चुगलका अध्यक्ष उमेश खड्काले राहदानीसम्बन्धी समस्या समाधानका लागि घुम्ती टोली ल्याउन पहल भइरहेको बताए । ‘घुम्ती टोलीका लागि फ्रान्सस्थित नेपाली दूतावास र मन्त्रालयमा पटक–पटक अनुरोध गरेका छौँ, तत्कालको राहतका लागि दुई साताका लागि भए पनि टोली ल्याउने हाम्रो पहल जारी छ’, खड्काले भने ।
विभिन्न मुलुक हुँदै पोर्चुगल आउने नेपालीको सङ्ख्या बढेसँगै राहदानीलगायतका कागजातसम्बन्धी समस्या पनि बढ्दै गएको छ । पोर्चुगलमा नेपाली दूतावास खुलिनसकेका कारण राहदानी बनाउन छिमेकी मुलुक स्पेन, फ्रान्स, बेल्जियम र डेनमार्कस्थित रहेको नेपाली दूतावाससम्म पुगेर राहदानी बनाउन सकिने व्यवस्था छ । तर राहदानीविहीन नेपालीहरू राहदानी बनाउन स्पेन, फ्रान्स, बेल्जियम र डेनमार्कमा रहेका नेपाली दूतावाससम्म धाउनका लागि वैधानिक कागजात छैन ।
पोर्चुगलमा रहेका नेपालीको समस्याका विषयमा आफू जानकार रहेको र राहदानी बनाउने सन्दर्भमा जतिसक्दो छिटो टोली आउने तयारीमा रहेको फ्रान्सको पेरिसस्थित नेपाली दूतावासका नियोग उपप्रमुख सीता बस्नेतले बताइन् । ‘दूतावासबाट पोर्चुगल जाने यसअघि नै हाम्रो कार्यतालिकामा थियो, तर कर्मचारी अभावका कारण त्यो सम्भव भएन’, बस्नेतले भनिन् ।
राहदानीसम्बन्धी देखापरेको समस्याका सन्दर्भमा परराष्ट्र मन्त्रालय र राहदानी विभागलाई यसअघि नै पत्राचार गरी जानकारी गराइसकेको उनले बताइन् । ‘हामीले पोर्चुगललाई विशेष प्राथमिकतामा राखेर काम गरिरहेका छौँ, आवश्यक प्रक्रियाका लागि मन्त्रालयको निर्देशनको पर्खाइमा छौँ’, बस्नेतले भनिन् । विभागबाट निर्देशन आएलगत्तै टोलीे लिस्बन आउने उनको भनाइ छ ।
पछिल्लो समय रोजगारीका सिलसिलामा पोर्चुगल आउने नेपालीको सङ्ख्या बढ्दै गएको छ । पोर्चुगलमा नेपालीको यकिन तथ्यांक नभए पनि अनुमानित ५० देखि ६० हजार हाराहारीमा रहेको अनुमान छ । यसअघि गत वर्ष पनि फ्रान्सस्थित नेपाली दूतावास र राहदानी विभाग काठमाडौंको टोली आएर राजधानी लिस्बनमा करिब एक महिनासम्म राहदानीसम्बन्धी सेवा प्रदान गरेको थियो । उक्त घुम्ती सेवाबाट दुई हजार तीन सय आठ नेपालीको प्रत्यक्ष दर्ता प्रणालीमार्फत विद्युतीय राहदानीका लागि आवेदन संकलन गरिएको थियो ।
काठमाडौं : वैदेशिक रोजगार बोर्डको ‘सफ्टवेयर’ अझै सञ्चालन हुन सकेको छैन । बोर्डको सचिवालयबाट वैदेशिक रोजगारीमा गई मृत्यु भएका तथा अङ्गभङ्ग भएका कामदार र परिवारलाई प्रदान गरिने आर्थिक सहायता वितरणमा प्रयोग हुने सफ्टवेयरमा केही दिनयतादेखि समस्या आएको थियो ।
उक्त सफ्टवेयरमा समस्या आएपछि काममा समस्या उत्पन्न भएको वैदेशिक रोजगार बोर्डका प्रवक्ता तथा सूचना अधिकारी टीकाराम ढकालले जानकारी दिए । उनले भने, “सम्पूर्ण ‘डाटा’ र ‘डकुमेन्ट’सहित अपलोड गरिएका कागजातले गर्दा मेमोरी भरिएर सफ्टवेयरमा समस्या आएको हो, समस्या समाधानका लागि प्राविधिकले प्रयास गरिरहेका छन्, १५ वर्षदेखिको डाटा र डकुमेन्ट भएकाले मेमोरी भरिएको हो ।”
वैदेशिक रोजगारीमा गई मृत्यु भएका तथा अङ्गभङ्ग भएका कामदार र परिवारका ‘अफलाइन’मा निवेदन लिएको भए पनि भुक्तानी सफ्टवेयरबाट हुने भएकाले दिन नसकिएको प्रवक्ता ढकालले बताए । उनका अनुसार सफटवेयरले काम नगरे पनि उद्धारसहितका आकस्मिकलगायत काम अफलाइनमार्फत पत्र पठाएर सञ्चालन भइरहेको छ ।
बोर्ड सचिवालयको सफ्टवेयर fewims.feb.gov.np को सर्भरमा केही दिनदेखि समस्या आएको र सफ्टवेयर सञ्चालन हुन अझै केही दिन लाग्ने बोर्डले जनाएको छ ।
काठमाडौं : अमेरिका लैजाने प्रलोभनमा पारेर ११ जना भारतीयलाई काठमाडौंमा बन्धक बनाउने ९ जनालाई प्रहरीले सार्वजनिक गरेको छ । पक्राउ पर्नेमा ८ जना भारतीय नागरिक र एक जना नेपाली नागरिक रहेका छन् । बुधबार राति पक्राउ परेका उनीहरुलाई जिल्ला प्रहरी परिसर काठमाडौंले बिहीबार पत्रकार सम्मेलन गरेर सार्वजनिक गरेको हो ।
प्रहरीले बन्धक बनाउने गिरोहका चरण जित सिंह, अशोक कुमार, अब्दुल रहिम, इन्दु सिंह यादव, निपुन गुप्ता, मनिष कुमार मल्होत्रा, रवि मिवदे र राम चन्द्र शर्मालाई सार्वजनिक गरेको छ । प्रहरीका अनुसार यादव बन्धक प्रकरणका मुख्य योजनाकार हुन् । नेपाली नागरिकको भने नाम खुलाइएको छैन । उनले नक्कली कागजात बनाएर भारतीयहरुलाई सहयोग गर्ने गरेको प्रहरीको दाबी छ ।
गिरोहले विभिन्न देशका नागरिकलाई युरोप, अमेरिका, अष्ट्रेलिया, क्यानडालगायतका देशमा पठाउने प्रलोभनमा पारेर नेपाल ल्याइ बन्धक बनाउने गरेको प्रहरीले जनाएको छ । पक्राउ परेका भारतीयहरुले बन्धक बनेकाहरुका परिवारलाई भ्रममा पार्न मेक्सिकोको भाषा, संस्कृति, संगीत आदिसँग मिल्ने खालको कृत्रिम वातावरण सिर्जना गरी भिडियो कलमार्फत आफन्तलाई देखाएर ठूलो रकम माग गर्ने गरेकोे खुलेको प्रहरीले बताएको छ ।
नेपालीसहित विश्वका विभिन्न देशका नागरिकलाई मेक्सिको, ग्वाटेमाला, पानामा सिटी हुँदै अवैधानिकरुपमा अमेरिकासम्म पुर्याउने गरेकोे यसअघि पटक–पटक सार्वजनिक भएको थियोे । भारतीयहरुले बन्धक बनाएका भारतीय नागरिकका परिवारका सदस्य अमेरिकाको दक्षिणी छिमेकी देश मेक्सिको पुगेकाले भारतीय रुपैयाँ ४० लाख भारतमा रहेका एजेन्टहरुलाई दिन बाध्य पारेको अनुसन्धानबाट खुलेको प्रहरीले बताएको छ ।
प्रहरीले पक्राउ परेकाहरुबाट मेक्सिको र ब्राजिलको समय निर्धारण गरिएको घडी, विभिन्न देशका मुद्रा, विभिन्न एयरलाइन्सका नक्कली बोर्डिङ पास, पीडितहरुको पासपोर्ट, शारीरिक यातना दिन प्रयोग हुने पाइपलगायतका सामान बरामद भएको बताएको छ । उनीहरुविरुद्ध मानव बेचबिखन तथा ओसारपसार र अपहरण तथा शरीर बन्धक कसुरमा अनुसन्धान गरी मुद्दा चलाउने प्रहरीले बताएको छ ।
यसैबीच वैदेशिक रोजगारीका लागि रुस पठाइदिन्छु भन्दै ठगी गर्ने व्यक्ति पक्राउ परेका छन् । एक लाख ६५ हजार ठगी गरेको अभियोगमा उदयपुरको उदयपुरगढी गाउँपालिका–९ ध्वासे फूलबारी घर भइ हाल काठमाडौंको स्वयम्भू बस्दै आएका ३० वर्षीय मिलन तामाङलाई प्रहरीले पक्राउ गरेको हो ।
तामाङले दुई जनालाई वैदेशिक रोजगारीका लागि रुस पठाइ कन्स्ट्रक्सनमा मासिक एक लाख रुपैयाँ तलबमा काम लगाइदिन्छु भन्दै प्रलोभनमा पारी पीडितबाट पटक–पटक गरी उक्त रकम ठगी गरेको प्रहरीले बताएको छ ।
उनलाई काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरी टोलीले सामाखुसीबाट पक्राउ गरेको हो । तामाङलाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको प्रहरीले जनाएको छ ।
काठमाडौं : रोजगार अनुमति प्रणाली (ईपीएस) कार्यालयले ७ फागुनदेखि कोरियाली भाषा परीक्षा शुरु गर्ने भएको छ ।
एक सूचना जारी गर्दै ईपीएस कोरिया शाखाले उत्पादनमूलकतर्फ जाने श्रमिकहरुको कोरियन भाषा परीक्षा शुरु हुने र परीक्षा हुनुभन्दा एक दिनअघि ग्वार्कोस्थित ईपीएस कोरिया शाखामा परीक्षार्थीले बायोमेट्रिक (फिंगरप्रिन्ट) दर्ता गर्नुपर्ने हुँदा त्यसका लागि २ घण्टा अगावै परीक्षा केन्द्रमा पुगिसक्नुपर्ने बताएको छ ।
सक्कल राहदानी र प्रवेशपत्र नभएकाहरु परीक्षामा सामेल हुन नपाउने भन्दै शाखाले परीक्षामा चिट, कपी गरेको तथा अन्य अवाञ्छित गतिविधि गरेको भेटिएमा परीक्षा रद्द गरी आगामी ४ वर्षसम्मका लागि परिक्षामा सहभागी हुन नपाउने गरी निलम्बन गर्ने बताएको छ ।
परीक्षामा उत्पादनमूलकतर्फ १ लाख ६५ हजार र सिप बिल्डिङतर्फ २१ हजार २ सय ५४ जना परीक्षार्थी रहेको शाखाले जनाएको छ ।
काठमाडौं : माघ महिनामा ७ सय ४१ म्यानपावर कम्पनीले कामदारको श्रम स्वीकृति लिएकोमा नीलकमल ह्युमन रिसोर्स प्रा.लि. धेरै कामदार पठाउने म्यानपावर कम्पनीको शीर्ष स्थानमा रहेको छ । माघमा ६ दर्जन बढी म्यानपावर कम्पनीले सयभन्दा बढी कामदार वैदेशिक रोजगारीमा पठाउन श्रम स्वीकृति लिएका छन् ।
माघमा सय बढी कामदार पठाउने म्यानपावर कम्पनी :
नीलकमल ह्युमन रिसोर्स प्रा.लि.– ७३९
एसओएस मेनपावर सर्भिस प्रा.लि.– ७१०
एयर किङ्स प्लेसमेन्ट प्रा.लि.– ५४७
दि रिभर ओभरसिज प्रा.लि.– ५१४
इम्पावर ह्युमन रिसोर्स म्यानेजमेन्ट प्रा.लि.– ४५२
सपोर्ट ह्युमन रिसोर्स प्रा.लि.– ३८३
साउण्डलाइन्स रिक्रुटमेन्ट प्रा.लि.– ३७८
गल्फ मेनपावर सर्भिस प्रा.लि.– ३४१
अल जारफा ह्युमन रिसोर्स कन्सल्ट प्रा.लि.– ३२२
ट्रेण्ड वे इन्टरनेशनल प्रा.लि.– ३०२
ग्रेस ओभरसिज प्रा.लि.– २९६
नाइस रिक्रुटमेन्ट एजेन्सी प्रा.लि.– २८९
इन्टरनेशनल मेनपावर रिक्रुटमेन्ट प्रा.लि.– २७६
अल जाहरा ह्युमन रिसोर्स कन्सल्ट्यान्टसी प्रा.लि.– २७४
लिंक इन्टरनेशनल प्लेसमेन्ट प्रा.लि.– २७०
टार्गेट कन्सल्ट्यान्ट ह्युमन रिसोर्स प्रा.लि.– २६५
हामदान ग्लोबल प्रा.लि.– २६५
बेष्ट रिक्रुटमेन्ट सर्भिस प्रा.लि.– २६२
अलस्कील इन्टरनेशनल ह्युमन रिसोर्स प्रा.लि.– २५४
प्याराडाइज इन्टरनेशनल प्रा.लि.– २४१
जब सिकर म्यानपावर प्रा.लि.– २४०
ओेशो रिक्रुटिङ एजेन्सी प्रा.लि.– २३८
अमिटी ग्लोबल इम्प्लोइमेन्ट प्रा.लि.– २३०
इन्डेक्स रिक्रुटमेन्ट प्रा.लि.– २०६
पर्फेक्ट रिक्रुटिङ सर्भिस प्रा.लि.– २०२
अल सेक्योर मेनपावर रिक्रुटमेन्ट प्रा.लि.– २०१
वर्ल्ड वाइड इम्प्लोइमेन्ट कन्सल्ट्यान्ट प्रा.लि.– १९९
ब्राइट फ्युचर एचआर सोलुसन प्रा.लि.– १७०
शिखर इन्टरनेशनल मेनपावर सर्भिस प्रा.लि.– १६९
अञ्जली ओभरसिज सर्भिस प्रा.लि.– १६७
नौकरी नेपाल रिक्रुटमेन्ट सर्भिस प्रा.लि.– १६५
स्टाइरिस एचआर सर्भिस प्रा.लि.– १६३
मास ह्युमन रिसोर्स प्रा.लि.– १६१
एशिया पावर रिक्रुटमेन्ट कन्सल्टयान्ट प्रा.लि.– १५९
गोर्खा ह्युमन रिसोर्स प्रा.लि.– १५७
एमबी ह्युमन रिसोर्सेज प्रा.लि.– १५६
मोभिरा रिक्रुटमेन्ट कन्सल्ट्यान्सी सर्भिस प्रा.लि.– १५२
अक्सफोर्ड इन्टरनेशनल प्रा.लि.– १५१
लगिङ इन्टरनेशनल ओभरसिज रिक्रुटमेन्ट प्रा.लि.– १५०
शिवाकोटी मेनपावर सर्भिस प्रा.लि.– १४६
मदरल्याण्ड ओभरसिज प्रा.लि.– १४५
आरोही एचआर सोलुसन प्रा.लि.– १४४
मोन्टेज ओभरसिज प्रा.लि.– १४१
सदिक्षा ओभरसिज प्रा.लि.– १३९
सान नेपाल प्रा.लि.– १३७
अलआक्समाक्स कम्पनी प्रा.लि.–१३७
बेबी एन्जल्स इन्टरनेशनल प्रा.लि.– १३५
पायोनियर ओभरसिज सर्भिस प्रा.लि.– १३५
आकर्षण इन्टरनेशनल प्रा.लि.– १३३
रोटरी ओभरसिज प्रा.लि.– १३३
स्काई वे म्यानेजमेन्ट प्रा.लि.– १३१
भिक्टोरी नेपाल प्रा.लि.– १३१
लक्की एचआर सोलुसन प्रा.लि.– १३०
आयुश इन्टरनेशनल ओभरसिज सर्भिस प्रा.लि.– १३०
राज ग्रुप अफ कम्पनी प्रा.लि.– १२७
साहिद ओभरसिज प्रा.लि.– १२६
सगरमाथामा इन्टरनेशनल इम्प्लोइमेन्ट प्रा.लि.– १२३
थ्री ब्रदर्स ह्युमन रिसोर्स प्रा.लि.– १२३
ट्रष्ट नेपाल ओभरसिज प्रा.लि.– १२३
फजल इन्टरनेशनल प्रा.लि.– १२२
कतार इन्टरनेशनल मेनपावर प्रा.लि.– ११८
ब्राइट स्टार ह्युमन रिसोर्स प्रा.लि.– ११६
पिरामिड इन्टरनेशनल इम्प्लोइमेन्ट सर्भिस प्रा.लि.– ११३
वाईके मेनपावर एजेन्सी प्रा.लि.– ११०
वाहा मेनपावर सर्भिस प्रा.लि.– १०७
बज्र ह्युमन रिसोर्सेज प्रा.लि.– १०५
एचएमटी ओभरसिज प्रा.लि.– १०२
एससीसी म्यानपावर कम्पनी प्रा.लि.– १०१
सेन्टर क्यापिटल सर्भिस प्रा.लि.– १०१
कान्तिपुर मेनपावर सर्भिस प्रा.लि.– १०१
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies