ब्राजिलमा कोरोना खोपको परीक्षणमा सहभागी व्यक्तिको मृत्यु

एजेन्सी : ब्राजिलमा कोरोना खोपको चिकित्सकीय परीक्षणमा सहभागी एक जनाको मृत्यु भएको छ । ब्राजिलको स्वास्थ्य मन्त्रालयका अनुसार अक्सफोर्ड विश्वविद्यालय र औषधि निर्माता कम्पनी एस्ट्राजेनेकाले संयुक्त रुपमा बनाइरहेको कोरोना खोपको परीक्षणमा सहभागी एक जनाको मृत्यु भएको हो ।

सीएनएन ब्राजिलका अनुसार मृत्यु हुने व्यक्ति रियो डि जेनेरियोका २८ वर्षीय व्यक्ति हुन् । उनको मृत्यु कोरोना भाइरसको संक्रमणबाट सिर्जित जटिलताका कारण भएको पनि दाबी गरिएको छ ।

ब्राजिलमा तेस्रो चरणको चिकित्सकीय परीक्षण गरिरहेको साओपाउलोको संघीय विश्वविद्यालयका अनुसार यस घटनाको छानबिनका लागि बनाइएको स्वतन्त्र समितिले परीक्षण जारी राख्न सुझाव दिएको छ ।

सहभागीको मृत्यु भए पनि ब्राजिलले चिकित्सकीय परीक्षण जारी राख्ने बताएको छ । चिकित्सकीय परीक्षणको सुरक्षाका बारेमा चिन्ता गर्नुपर्ने अवस्था नरहेको अक्सफोर्ड विश्वविद्यालयले जनाएको छ ।

एस्ट्राजेनेकाले भने यसबारेमा कुनै प्रतिक्रिया दिएको छैन । ब्राजिलका ६ सहरका करिब ८ हजार जनालाई कोरोना खोपको पहिलो डोज दिइएको छ । तीमध्ये केहीलाई दोस्रो डोज पनि दिइएको विश्वविद्यालयले जनाएको छ ।

अक्सफोर्ड विश्वविद्यालय तथा एस्ट्राजेनेकाले विकास गरेको खोप कोरोना भाइरसविरुद्ध प्रभावकारी र सुरक्षित साबित हुने विश्वको पहिलो खोप बन्ने अपेक्षा छ ।

राष्ट्रसंघका महासचिवद्वारा यमनमा युद्धविरामका लागि आग्रह

एजेन्सी : संयुक्त राष्ट्रसंघका महासचिव एन्टोनियो गुटर्रेसले यमनमा युद्धविरामका लागि विशेष आग्रह गरेका छन् । उनले यमनमा युद्धरत पक्षहरुलाई युद्धविराम गरेर शान्ति वार्ताका माध्यमबाट थप निकासका लागि तयार रहन आग्रह गरेको समाचारमा जनाइएको छ ।

जनाइएअनुसार संयुक्त राष्ट्रसंघका महासचिव एन्टोनियो गुटर्रेसले यहाँका युद्धरत पक्षहरुलाई आवश्यक मात्रामा युद्ध विराम गर्नुपर्नेमा जोड दिनुभएको बताइएको छ । संयुक्त राष्ट्रसंघको सुरक्षा परिषदको एक उच्चस्तरीय बैठकमा आफ्नो विचार राख्दै महासचिव गुटर्रेसले यमनको आर्थिक अवस्था नाजुक हुदै गएको र यहाँका कतिपय स्थानहरुमा नागरिकलाई अहिले पनि मानवीय सहायताको खाँचो परेको भन्दै राष्ट्रव्यापी रुपमा युद्ध विराम गर्नुपर्ने बताएका हुन् ।

महासचिव गुटर्रेसले सो बैठकमा भनेका थिए, 'अब यमनमा तत्कालै देशव्यापी रुपमा युद्धविराम गर्नुपर्ने आवश्यकता छ र यहाँका युद्धरत पक्षहरुलाई शान्तिका लागि वार्ताको टेबलमा बस्न आग्रह गर्दछु ।'

उनले हिंसा गरेर नभई यमनमा राजनीतिक माध्यमबाट राजनीतिक समाधान खोज्ने पक्षमा संयुक्त राष्ट्रसंघ रहेको धारणा पनि महासचिव एन्टोनियो गुटर्रेसले राखेका थिए । उनले यसअघि पनि केही महिना मात्र अघि यहाँका युद्धरत पक्षलाई हिंसा रोकेर शान्तिपूर्ण रुपमा समस्याको समाधान खोज्नका लागि तयार रहन भनेका थिए ।

आफूले यस विषयमा पहल जारी राखेको पनि उहाँले सो बैठकमा जानकारी गराएका थिए । आफूले आफ्ना दूतलाई यमनमा युद्धरत पक्षहरुसँग निरन्तर सम्पर्कमा रहेर शान्ति वार्ताको पक्षमा काम गर्न आफूले भनेको पनि उनले बताए ।

यमन सन् २०१५ देखि गृहयुद्धको चपेटामा फसेको छ । यहाँका हाउथी विद्रोही र यहाँको सरकारलाई समर्थन गर्ने फौजको यहाँ संघर्ष जारी छ ।

भारतमा दैनिक संक्रमितको संख्या घट्दो

एजेन्सी : भारतमा कोरोनाभाइरसबाट दैनिक सङ्क्रमितहरुको सङ्ख्या घट्दै गइरहेको छ । कोरोनाभाइरसको महामारी शुरु भएदेखि बृद्धि हुँदै गइरहेको दैनिक सङ्ख्यामा केही समयदेखि कमी हुँदै आइरहेको हो । दैनिक झण्डै एक लाखसम्म सङ्क्रमितहरु भेटिएको भारतमा अहिले दैनिक ५० हजारको हाराहारीमा झरेको तथ्याङ्मा देखिएको छ । 

केन्द्रीय स्वास्थ्य तथा परिवार कल्याण मन्त्रालयले बुधबार दिएको जानकारी अनुसार भारतमा पछिल्लो २४ घण्टामा थप ५४ हजार ४४ जना सङ्क्रमित भएका छन् । सोही अवधिमा कोरोनाका कारण ७१७ जनाको मृत्यु भएको पनि मन्त्रालयका अधिकारीहरुले जानकारी दिएका छन् । 

भारतमा अहिलेसम्म कुल सङ्क्रमितहरुको सङ्ख्या ७६ लाख ५१ हजार १०८ पुगेको मन्त्रालयले जनाएको छ । कुल सङ्क्रमित मध्ये सात लाख ४० हजार ९० जना अझै पनि सङ्क्रमित अवस्थामै रहेको पनि तथ्याङ्कमा देखिएको छ । 

भारतमा सङ्क्रमित अवस्थामै रहेकाहरुको संख्यामा पनि पछिल्ला केही हप्तादेखि कमी आएको छ । लामो समयसम्म दैनिक झण्डै १० लाख मानिस सङ्क्रमित अवस्थामै रहने गरेकोमा अहिले सात लाखको हाराहारीमा झरेको हो । सङ्क्रमित भएर पनि निको भइसकेकाहरुको कुल सङ्ख्या ६७ लाख ९५ हजार १०५ पुगेको मन्त्रालयले जनाएको छ । 

त्यसैगरी भारतमा कोरोनाका कारण कुल मृतकको सङ्ख्या एक लाख १५ हजार ९१४ रहेको अधिकारीहरुले जानकारी दिएका छन् । भारतका प्रदेशहरु मध्ये कोरोनाबाट सबैभन्दा बढी महाराष्ट्र प्रदेश प्रभावित भएको छ । महाराष्ट्रमा मात्रै अहिले पनि एक लाख ७४ हजार ७५५ जना सङ्क्रमित अवस्थामै रहेका छन् । 

अर्मेनिया-अजरबैजान युद्ध : ७२९ अर्मेनिया सैनिकको मृत्यु

एजेन्सी : सीमा क्षेत्रलाई लिएर भएको अजरबैजानसँग भएको भिडन्तको क्रममा मृत्यु हुने अर्मेनियाका सैनिकको संख्या ७ सय २९ पुगेको छ । सोमबार भएको भिडन्तमा मात्रै १९ सैनिकको मृत्यु भएको हो ।

अर्मेनियाको रक्षा मन्त्रालयले मृत्यु हुनेको संख्या बढ्नसक्ने भन्दै संख्या यकिन हुन अझै बाँकी रहेको जनाएको छ । अजरबैजानले भने अहिलेसम्म भिडन्तमा मृत्यु हुनेको संख्या सार्वजनिक भएको छैन ।

भिडन्त सकिएपछि हताहतीको जानकारी सार्वजनिक गरिने अजरबैजानले बताउदै आएको छ । दुई देशबिच मानवीय सहायताका लागि युद्धविरामको सहमति भएपनि त्यसको पालना भएको छैन ।

दुई देशबीच नागोर्नो–काराबाख क्षेत्रलाई लिएर केही समयदेखि भिडन्त भइरहेको छ । सोही क्षेत्रलाई लिएर सन् १९९० को दशकको सुरुमा भएको सीमा भिडन्तमा दशौँ हजार मानिसको मृत्यु भएको थियो ।

बाइडेनले कोरोना भाइरस सामु आत्मसमर्पण गरे : ट्रम्प

एजेन्सी : अमेरिकी राष्ट्रपति डोनाल्ड ट्रम्पले डेमोक्रेटिक प्रतिस्पर्धी जो बाइडेनले विज्ञान र विज्ञको कुरा सुन्ने भन्दै आलोचना गरेका छन् । नभाडामा आइतबार भएको चुनावी सभालाई सम्बोधन गर्दै उनले बाइडेनले कोरोना भाइरस सामु आत्मसमर्पण गरेको बताएका हुन् ।

राष्ट्रपति ट्रम्पले आफुले पूर्ण रुपमा वैज्ञानिकको कुरा सुनेको भए देश डिप्रेशनको ठूलो समस्यामा पुग्ने स्थिती रहेको पनि उल्लेख गरेका छन । बाइडेनले बैज्ञानिकको कुरा सुनेर अमेरिकामा लकडाउन चाहेको आरोप ट्रम्पको छ ।

ट्रम्पले ह्वाइट हाउस कोरोना भाइरस टास्क फोर्सका विज्ञ डा. एन्थोनी फाउचीको पनि आलोचना गरे । फाउचीको कुरा सुनेको भए धरै व्यक्तिको ज्यान जाने उनको दावी छ ।

ट्रम्पले फाउचीसहितका विज्ञ तथा वैज्ञानिकहरुलाई ‘इडियट’ समेत भनेका छन् । चुनावी सभामा विज्ञ तथा विज्ञान र उनीहरुलाई सुन्नेको आलोचना तथा व्यंग्य गरेका ट्रम्पका अधिकांश समर्थकले मास्क समेत लगाएका थिएनन् ।

कोरोना महामारीका कारण विश्वमै सबैभन्दा बढी प्रभावित भएको अमेरिकामा ८२ लाख ८ हजार भन्दा धेरै संक्रमित भएका छन् । मृत्यु हुनेको संख्या दुई लाख २० हजार नाघेको छ । नोभेम्बर तीनमा हुने चुनावका लागि कोरोना भाइरसविरुद्धको प्रयास नै प्रमुख मुद्दा बनेको छ ।

पाकिस्तानमा गुडिरहेको बस पहिरोमा पर्दा १६ जनाको मृत्यु

एजेन्सी : पाकिस्तानमा गुडिरहेको बस पहिरोमा पर्दा १६ जनाको मृत्यु भएको छ । उत्तरी पाकिस्तानको गिलगित बल्टिस्तान क्षेत्रमा गुडिरहेको बस पहिरोमा पुरिएर दुर्घटना भएको हो ।

पूर्वी रावलपिण्डीबाट स्कर्डु जिल्लातर्फ गइरहेको बस माटोको ढिस्कोले पुरिदा बसमा सवार सबैजनाको मृत्यु भएको हो । बसमा महिला, बालबालिका र केही सुरक्षाकर्मीहरु चढेका थिए । लगातारको वर्षाका कारण सो क्षेत्रमा पहिरो गएको प्रहरीले जनाएको छ ।

कोरोना संक्रमण दर घटेपछि भारतका चार राज्यमा आजबाट विद्यालय खुले

एजेन्सी : भारतका चार वटा राज्यमा आजदेखि विद्यालय खुलेका छन् । कोरोना भाइरसको संक्रमण दर केही कम भएपछि पञ्जाब, उत्तर प्रदेश, सिक्किम र हिमाञ्चल प्रदेशमा विद्यालय खुलेका हुन् ।

उत्तर प्रदेश र पञ्जाबमा कक्षा ९ देखि १२ सम्मका विद्यार्थी विद्यालय गएका छन् । स्वास्थ्य मापदण्ड पूरा गरेर कक्षाका ५० प्रतिशत विद्यार्थीलाई मात्रै अध्यापन गर्ने व्यवस्था ति राज्यमा मिलाइएको छ ।

त्यस्तै एउटा सिटमा एक जना मात्रै राखेर दैनिक तीन घन्टा मात्रै कक्षा सञ्चालन हुने व्यवस्था गरिएको छ । हिमाञ्चल प्रदेशमा पनि कक्षा १० देखि १२ सम्मका विद्यार्थीलाई विद्यालय खुला गरिएको छ । सिक्किम सरकारले जाडोको बिदा र शनिबारको बिदा समेत कटाएर नयाँ शैक्षिक क्यालेन्डर तयार गरेको छ ।

मुम्बईमा सोमबारदेखि रेल सेवा समेत सञ्चालनमा आएको छ । आठ महिनादेखि बन्द रहेको रेल सेना सञ्चालनमा आएको हो । रेल सेवा बिहान साढे ८ बजेदेखि बेलुका साढे ८ बजेसम्म रेल चल्ने व्यवस्था मिलाइएको छ ।

केही दिनयता भारतमा कोरोना संक्रमण दर घटेको छ । दुई साता अघिसम्म दैनिक करिब एक लाख संक्रमित हुँदै आएका भारतमा अहिले त्यो संख्या झण्डै ५० प्रतिशतले घट्न थालेको छ ।

पछिल्लो २४ घण्टामा ५५ हजार ३५ जनामा संक्रमण देखिएको छ । योसँगै भारतमा संक्रमितको संख्या ७५ लाख ४७ हजार नाघेको छ । कोरोनाले मृत्यु हुनेको संख्या १ लाख १४ हजार नाघेको छ ।

कम्बोडियामा बाढीका कारण २६ जनाको मृत्यु

एजेन्सी : वर्षासँगैको बाढीका कारण कम्बोडियामा कम्तिमा २६ जनाको मृत्यु भएको छ । बाढीवाट २६ हजार भन्दा बढी मानिस घरबारविहीन भएका छन् । भिषण वर्षाका कारण २५ वटा भन्दा बढी सहरका भौतिक संरचनामा क्षति पुगेको छ ।

बाढीबाट करिब २ लाख ५० हजार मानिस प्रभावित भएको कम्बोडिया सरकारले जनाएको छ । बाढी प्रभावित क्षेत्रमा राहत, पुनर्स्थापना र उद्धारको कार्य जारी रहेको बताइएको छ । बाढीले हजारौं हेक्टरमा लगाइएको कृषि उत्पादन समेत नष्ट गरेको छ ।

वर्षा अझै केही दिन लम्बिने भन्दै सरकारले सर्वसाधारणलाई सुरक्षित रहन अपील गरेको छ । अगस्ट र अक्टोबरमा आउने बाढीका कारण कम्बोडियामा हजारौं मानिस प्रभावित हुने गरेका छन् ।

रेम्डिसिभिर औषधिले संक्रमितको स्वास्थ्यमा खासै सुधार ल्याउन सकेन : डब्लुएचओ

एजेन्सी : रेम्डिसिभिर नामक औषधिले परीक्षणमा कोरोना संक्रमित बिरामीको स्वास्थ्यमा त्यसले खासै कुनै सुधार ल्याउन नसकेको विश्व स्वास्थ्य संगठन ‘डब्लुएचओ’ले जनाएको छ ।

कोरोना संक्रमितको उपचारमा प्रभावकारिताबारे गरिएको क्लिनिकल परीक्षणमा औषधिले खासै सुधार ल्याउन नसकेको देखिएको हो । डब्ल्यूएचओले यो नतिजाले कोरोनाको उपचारमा विद्यमान उपलब्ध औषधिहरूको प्रयोगको आशामा धक्का लागेको जनाएको छ ।

सो परीक्षणमा रेम्डिसिभिर तथा अन्य तीन औषधिको अस्पतालमा भर्ना भएका ११ हजार बिरामीमा प्रयोग गरिएको थियो । तर ती कुनै पनि औषधिले बिरामीको जीवित रहने सम्भावना वा उनीहरूलाई भेन्टिलेटर आवश्यक पर्ने नपर्ने अनि कति लामो समय अस्पतालमा बस्नुपर्ने भन्नेबारे खासै प्रभाव नपारेको बताइएको छ ।

रेम्डिसिभिर औषधि निर्माता कम्पनी गिलियड साइन्सेसले प्रतिक्रिया दिँदै उक्त परीक्षणको आँकडा मिल्दो नदेखिने दाबी गरेको छ । सो अध्ययनबाट कुनै निष्कर्ष निकाल्न सकिनेमा पनि उसको भनाइ छ ।

अमेरिकी राष्ट्रपति डोनल्ड ट्रम्पले कोभिड उपचारका लागि लिएका औषधिमध्ये रेम्डेसिभिर पनि एक थियो । अमेरिकामा गरिएका परीक्षणमा रेम्डिसिभिरमा संक्रमणबाट निको पार्ने क्षमता भएको स्पष्ट आधार पाइएको अमेरिकी स्वास्थ्य अधिकारीले बताएका थिए ।

इबोलाको उपचारको लागि तयार गरिएको यो औषधिले शरीरमा भाइरसलाई बढ्न चाहिने एन्जाइमलाई निष्क्रिय बनाउने गर्दछ ।

फ्रान्समा आतंकवादी आक्रमण, पैगम्बरको कार्टुन देखाउने शिक्षकको टाउको काटी हत्या

एजेन्सी : फ्रान्समा फेरि आतंकवादी आक्रमण भएको आशंका गरिएको छ । विद्यार्थीलाई पैगम्बर मोहम्मदको कार्टुन देखाउने एक शिक्षकको राजधानी पेरिसमा टाउको काटी हत्या गरिएको हो ।

ती शिक्षकले आफ्ना विद्यार्थीलाई फ्रान्सको चर्चित व्यग्य पत्रिका चार्ली हेब्दोमा छापिएको पैगम्बर मोहम्मदको कार्टुन देखाएको बताइएको छ । उनीमाथि स्थानीय समय अनुसार शुक्रबार साँझ पाँच बजे आक्रमण भएको हो । मृत्यु हुने शिक्षकको नाम खुलाइएको छैन ।

प्रहरीले आक्रमणकारीको गोली हानी हत्या गरेको छ । उनलाई गिरफ्तार गर्ने प्रयास गरे पनि सफल नभएपछि प्रहरीले गोली हानिएको प्रहरीले जनाएको छ । घटनास्थल पुगेका राष्ट्रपति इमानुएल म्याक्रोनले ‘इस्लामिक आतंकवादी हमलाको संज्ञा दिएका छन् ।

शिक्षकले ‘अभिव्यक्ति स्वतन्त्रता’ पढाएकै कारण हत्या गरिएको उनको दावी छ । घटनाको फ्रान्सको आतंकवाद विरोधी समूहले अनुसन्धान गरिरहेको छ ।

उनीहरुले यसलाई सन् २०१५ मा चार्ली हेब्डो पत्रिकामा आक्रमण गरेर पत्रकारसहित ११ जनाको हत्या गरेको घटनासँग जोडेर अनुसन्धान थालेका हुन् । तीन साताअघि पनि सो पत्रिकाको तत्कालीन कार्यालयअघि दुई जना संचारकर्मीमाथि आक्रमण भएको थियो ।