१ वर्षदेखि बेपत्ता छिन् मालती

सहबान अन्सारी/मध्यान्ह

नवलपरासी : नवलपरासी (पश्चिम)को प्रतापपुर गाउँपालिकाकी एक युवती बेपत्ता भएको लामो समय भइसकेको छ । गत वर्ष (१८ पुस २०७६)को राति आफ्नै घरबाट हराएकी भनिएकी विवाहित युवतीको खोजीका लागि उनको माइती पक्ष अहिल प्रशासनसँग गुहार मागिरहेको छ । 

प्रतापपुर गाउँपालिका वडा नम्बर ६ माइती भइ वडा नम्बर ७ मा विवाह गरी गएकी मालती कोइरी १८ पुस २०७६ अगाडि माइती पक्षको सम्पर्कमा नै थिइन् । एकाएक १९ पुसमा बुवा श्रीकिशुन कोइरीले छोरी बेपत्ता भएको अपुष्ट खबर सुने । उनले छोरीका परिवार पक्षसँग छोरी कहाँछिन् भनेर सोधी–खोजी गरे । 

परिवारका सदस्यले राति घरबाट आफैं बेपत्ता भएको बताए । त्यसपछि माइती पक्ष र परिवार पक्ष समेतले खोजीका लागि भनेर प्रहरी प्रशासनमा खबर गरे । घरबाट निस्केर नजिकैको गण्डक नहरमा हाम फोलेकी हुनसक्ने आधारमा अनुसन्धान अगाडि बढाइयो । 

नहरमा हाम फालेको हुनसक्ने आशंकामा गण्डक नहरमा पानीको सतह कम गरी खोजी गरियो । स्थानीयहरुको दबाब पछि नेपाली सेनाको टोली समेत परिचालन गरी खोजी गरियो । बेपत्ता भएको १ हप्ता पछि (पुस २७ गते) सेनाको गोताखोर टोली नै परिचालन गरेर नदीमा गएर समेत खोजी गरियो । तर, मालती फेला परिनन् । 

बाबु श्रीकिशुन छोरीले आत्महत्या गरी होलिन् भनेर कल्पना समेत गर्दैनन् । ‘घरमा केही अनबन भएको, झगडा भएको भए पनि ऊ सहेर बस्ने खालकी हो,’ मालतीका बुवा श्रीकिशुन भन्छन्, ‘छोरी जिउँदी भए अहिलेसम्म कतै न कतैबाट केही न केही खबर आउँथ्यो होला !’

मालतीले आत्महत्या गरेको हुनसक्ने भनेर प्रहरीले अनुसन्धान अगाडि बढाएको थियो । पछि माइती पक्षले हत्या भएको हुनसक्ने आशंका व्यक्त गरेपछि हत्याको आशंकामा पनि अनुसन्धान अगाडि बढाइएको जिल्ला प्रहरी कार्यालय नवलपरासीका एक अधिकारी बताउँछन् । तर, मालतीको अवस्था अझै अज्ञात रहेको उनी बताउँछन् ।

मालतीका माइती पक्षलाई भने मालती बेपत्ता भएको घटनामा प्रहरीले गम्भीर रुपमा अनुसन्धान नगरेको लागेको छ । दम्पत्ति (श्रीमान्–श्रीमती)बीच झगडा हुँदा आफ्नी छोरीको हत्या गरिएको हुनसक्ने बुवा श्रीकिशुनको आशंका छ । 
जिल्लाको प्रतापपुर गाउँपालिका वडा नम्बर ६ की मालती कोइरीको १ वैशाख २०७५ मा प्रतापपुर गाउँपालिकाकै वडा नम्बर ७ का ३० वर्षीय दीपेन्द्र बर्मासँग विवाह भएको थियो । 

बुवा श्रीकिशुनका अनुसार विवाह पछि मालती र उनका श्रीमान्बीच सम्बन्ध त्यति राम्रो थिएन । श्रीमान्ले अनेक आरोप लगाएर मालतीमाथि हिंसा गर्ने गरेको माइती पक्षको भनाइ छ । प्रहरीले मालतीका श्रीमान्समेत परिवारका सदस्यलाई समेत अनुसन्धानको दायरमा ल्याउनुपर्ने उनीहरुको माग छ । 

परिवारका सदस्यले नै अपराध गरेको हुनसक्ने उनीहरुको दाबी छ । प्रहरीले परिवारका सदस्य समेतलाई नियन्त्रणमा लिएर घटनाको अनुसन्धान गरी मालतीको वास्तविकता पत्ता लगाउनुपर्ने माइती पक्षको भनाइ छ ।

प्रहरीको गोली लागेर लागू औषध कारोबारीको मृत्यु

महेन्द्रनगर : लागू औषध (ब्राउनसुगर)का कारोबारी समात्ने क्रममा कञ्चनपुर प्रहरीले गोली चलाएको छ । प्रहरीले चलाएको गोली लागेर एकजनाको मृत्यु भएको छ । 

लागू औषध तस्करलाई नियन्त्रणमा लिन खोज्दा तस्करी समूहका तर्फबाट गोली चलाइएपछि आफूहरुले पनि गोली चलाएको प्रहरीले जानकारी दिएको छ । गोली लागेर एकजनाको मृत्यु भएको र मृत्यु हुनेमा भारतीय नागरिक हुनसक्ने प्रहरीको भनाइ छ । 

गोली लागेर मृत्यु हुने व्यक्तिको पहिचान खुल्न नसकेको जिल्ला प्रहरी कार्यालय कञ्चनपुरका प्रमुख प्रहरी उपरीक्षक (एसपी) उमाप्रसाद चतुर्वेदीले बिहीबार बेलुकी जानकारी दिए । 

कञ्चनपुरको बेलौरी नगरपालिका–७ को सीमावर्ती क्षेत्रमा बिहीबार साँझ साढे ६ बजे दोहोरो मुठभेड हुँदा प्रहरीले गोली चलाएको एसपी चतुर्वेदीले जानकारी दिए । दोहोरो मुठभेडका क्रममा गोली लागेर घाइते भएका ती व्यक्तिलाई प्राथमिक स्वास्थ्य केन्द्रमा उपचारार्थ ल्याउने क्रममा मृत्यु भएको चतुर्वेदीले बताए । अन्य केही लागू औषध कारोबारी भने भारतर्फ भागेको उनले बताए । 

प्रहरीले गोली चलाउँदा तस्करहरु भारततर्फ भागेपनि ठूलो मात्रामा ब्राउनसुगर बरामद गरिएको एसपी चतुर्वेदीले बताए । ब्राउनसुगरका कारोबारी नेपालतर्फ आइरहेको सूचनाका आधारमा प्रहरी सीमा क्षेत्रमा पुगेको थियो । 

‘विकृति विसङ्गति न्यूनिकरणमा स्थानीय तहको भूमिका महत्वपूर्ण’

रमेश खत्री्/मध्यान्ह 
दार्चुला, १९ फागुन 

सुदूरपश्चिम प्रदेशका प्रहरी प्रमुख उत्तमराज सुवेदीले दार्चुलाको विकृति विसङ्गती न्यूनिकरणमा स्थानीय तहहरुको भूमिका पहिलो रहेको बताएका छन् । 

बुधबार दार्चुला सदरमुकाममा गरिएको अन्तरक्रिया कार्यक्रममा बोल्दै उनले पछिल्लो समय नयाँ पुस्ताले लागूऔषध दुव्र्यसन, साइबर अपराधका क्रियाकलापहरु र लागूपदार्थ दुव्र्यसनीमा लागेकाले यसको नियन्त्रणका लागि दार्चुला जिल्लाका स्थानीय तहहरु लगायत अन्य संघसंस्थाहरुले सक्रियता बढाउनु  आवश्यक रहेको प्रमुख सुवेदीले बताए । 

जिल्ला समन्वय समिति प्रमुख करविर बहादुर कार्कीले स्थानीय सरकारसँग हरेक अधिकारहरु भएकाले अबका दिनमा समाजमा हुने अपराध न्यूनिकरणका लागि जनचेतना मुलक कार्यक्रमहरु गरी कुसंस्कार कुरीतिहरुलाई कम गर्न सहज हुने बताए । 

प्रमुख जिल्ला अधिकारी शरदकुमार पोखरेलले जिल्लामा हुने आपराधिक क्रियाकलापहरुमा राजनीतिकरण हुने भएकाले अबका दिनमा अपराध तथा विकृतिहरुको न्यूनिकरणमा प्रहरी प्रशासनलाई निष्पक्ष ढंगबाट काम गर्न दिनु आवश्यक भएकोे बताए । 

जिल्ला प्रहरी कार्यालय दार्चुला र सुदुरपश्चिम प्रहरी कार्यालयको संयुक्त आयोजनामा प्रहरी साँझेदारी कार्यक्रम अन्तर्गत जिल्लामा रहेका सरोकारवाला निकायका पदाधिकारीहरुसँग अन्तरक्रिया कार्यक्रम गरिएको हो ।

कार्यक्रममा स्थानीय तहका जनप्रतिनिधिहरु, दार्चुला स्थिति कार्यालयका प्रमुख, विद्यालयका प्रध्यानाध्यापक, संचारकर्मी लगायत  स्थानीयबासीको सहभागिता रहेको थियो ।
 

स्व. धामीको अन्त्येष्टि सम्पन्न : शवयात्रमा हजारौं दार्चुलावासी सहभागी 

गणेश सिंह धामी/मध्यान्ह

दार्चुला : दार्चुला जिल्लाकै धार्मिक एवं सांस्कृतिक धरोहर मालिकार्जुन राष्ट्रिय धामका मुखिया, मालिकार्जुन विकास समितिका अध्यक्ष, मालिकार्जुन गाउँपालिका वडा नं. ३ का वडा अध्यक्ष,श्री मालिकार्जुन मा.वि. मड का विद्यालय व्यवस्थापन समितिका अध्यक्ष, मालिकार्जुन गाउँपालिकका कार्यवाहक अध्यक्ष समेतको जिम्मेवारी निर्वाह गरेका स्व. रुद्रे सिंह धामीको बैदिक बिधिपूर्वक अन्त्येष्टि सम्पन्न भएको छ ।

दार्चुलाको शैल्यशिखर नगरपालिका वडा न ९ मा रहेको गोकुलानन्द आर्यघाटमा मंगलबार दिउँसो स्व धामीको अन्त्येष्टि गरिएको हो ।  स्व.धामीको सोमबार विहान ५ बजे मालिकार्जुन गाउँपालिका वडा नम्बर ३ मड मल्लागाउँमा उनका निवासमा निधन भएको थियो ।

स्व. धामीको निधनले पुरै जिल्ला शोकमय भएको छ। उनले समाज प्रति गरेका हरेक कर्यहरु अबिस्मरणीय रहने दार्चुलावासीहरु बताउँछन् । स्व. धामीको अन्तिम संस्कार अघि शवयात्र गरिएको थियो । मालिकार्जुन मन्दिरदेखि गोकुले आर्यघाटसम्म करिव  २७ किलोमीटर लामो शवयात्रामा हजारौं सहभागी भएका थिए । 

शवयात्रा अवधि स्व. धामीको पार्थिव शरीरलाई अन्तिम दर्शनका लागि राखिएको थियो । स्व.धामी प्रति नेपाली कांग्रेसका जिल्ला सभापति ललित सिंह बोहरा,  बिक्रम सिंह धामी, मदन गिरी, जिल्ला समन्वय प्रमुख करबिर सिंह कार्की,  मालिकार्जुन गाउँपालिका अध्यक्ष नरेन्द्र सिंह धामी, नेपाल भारत मैत्री संघ दार्चुला अध्यक्ष उमेश सिंह खत्री लगायतले श्रद्धाञ्जली दिएका थिए । स्व. धामीको पार्थिव शरीरमा राष्ट्रिय झन्डा र नेपाली कांग्रेसको झन्डा ओडाएर सम्मान गरिएको थियो ।

ताप्लेजुङको दोभान बजारमा भीषण आगलागी : ३५ बढी घर जले

ताप्लेजुङ : ताप्लेजुङको दोभान बजारमा भीषण आगलागी हुँदा ३५ भन्दा बढी घर जलेका छन् । ताप्लेजुङको मेरिङ्देन गाउँपालिका ३ तथा जिल्लाकै दोस्रो ठूलो बजार दोभान बजारमा लागेको आगो अझै नियन्त्रणमा आउन सकेको छैन ।

दोभान बजारमा अहिले ३५ घर जलेर पूरै नष्ट भइसकेको जनाइएको छ । मंगलबार बिहान १० बजे विद्युत् चुहिएर आगलागी भएको हुन सक्ने प्रहरीले जनाएको छ ।

ताप्लेजुङको दमकल आगलागी क्षेत्रमा पुगेको र छिमेकी जिल्ला पाँचथरदेखि पनि आउँदै गरेको जिल्ला प्रहरी कार्यालयका प्रमुख बालरनसिंह राणाले जानकारी दिए । उनले भने, 'म पनि आगलागी क्षेत्रमा जाँदै छु । आगलागी भीषण छ भन्ने खबर आएको छ ।'

सुरक्षाकर्मी र स्थानीयवासीले आगो नियन्त्रण गर्ने पहल गरिरहेको कार्कीले जानकारी दिए ।

नवलपरासीमा सशस्त्र प्रहरीद्वारा १ लाख बढीको सामान नियन्त्रण

सहबान अन्सारी/मध्यान्ह 

नवलपरासी : नवलपरासीको सिमा क्षेत्रको विभिन्न स्थानबाट   करिब १ लाख ८५ हजार १ सय ७० रुपयाँ मुल्य बराबरको अबैध सामान सशस्त्र प्रहरीले नियन्त्रणमा लिएको छ ।

सशस्त्र प्रहरी बल नेपाल नं. २६  गण हेडक्वाटर पश्चिम नवलपरासीको मातहत सशस्त्र प्रहरी बोर्डर आउट पोष्ट गुठी परसौनी,बोर्डर आउट पोष्ट भुजहवा र सुरक्षा वेश  सेमरीबाट जिल्लाको  प्रतापपुर वडा नं. २  सिसहनिया, वडा नं. ६ कठहवा  र सरावल गाउँपालिका वडा नं.  ६ भटौलियामा सशस्त्र प्रहरीको मोबाईल तथा पैदल गस्ती टोलीले   भारतबाट नेपालतर्फ अबैधरुपमा ल्याउदै गरेको लत्ता कपडा, चिनी, ज्वेलरीका सामानहरु  नियन्त्रणमा लिएको हो ।

नियन्त्रणमा लिएको अबैध सामाहरु  आवश्यक कारवाहीको लागी महेशपुर भन्सार कार्यालयमा बुझाइएकोे सशस्त्र प्रहरी बल नेपाल नं. २६ गण हेडक्वाटर नवलपरासीका सुचना अधिकारी माधव रेग्मीले जानकारी दिए ।

रहेनन् मालिकार्जुन मन्दिरका मुखिया धामी

गणेश सिंह धामी/मध्यान्ह

दार्चुला : दार्चुलाको मालिकार्जुन गाउँपालिका–३ का वडा अध्यक्ष रुद्रे सिंह धामीको निधन भएको छ । एक्कासी बिरामी भएका उनको सोमबार बिहान ५ बजे ७८ वर्षको उमेरमा वडा नम्बर ३ मडमा आफ्नै घरमा मृत्यु भएको मालिकार्जुन गाउँपालिका अध्यक्ष नरेन्द्रसिंह धामीले जानकारी दिए ।

वडाध्यक्ष धामी देशकै सातौं धाम श्री शैल्यशिखर मालिकार्जुन धाम तथा धार्मिक पर्यटकीय गन्तब्य मालिकार्जुन मन्दिरका मुखियासमेत थिए । उनको सोमबारै अन्त्येष्टि गरिने भएको छ। 

वडाध्यक्ष धामी मालिकार्जुन विकास समितिका अध्यक्ष, श्री मालिकार्जुन मा।वि। मडका विद्यालय व्यवस्थापन समितिका अध्यक्ष, मालिकार्जुन गाउँपालिकाका कार्यवाहक अध्यक्ष समेतको जिम्मेवारी निर्वाह गरेका थिए । उनी २०७४ सालमा भएको स्थानीय तह निर्वाचनमा नेपाली कांग्रेसबाट उम्मेदवार बनेर निर्वाचित भएका थिए ।

उनको निधनमा गाउँपालिकाले शोक विज्ञप्ति जारी गर्दै सिङ्गो मालिकार्जुन गाउँपालिका स्तब्ध भएको जनाएको छ । उनको निधनमा गाउँपालिकाले दुई दिन फागुन १७ गते (आज) र १८  गते (भोलि) शोक बिदा दिनेसमेत निर्णय गरेको छ ।

विप्लव समूहका सप्तरी जनसत्ता प्रमुखसहित तीन पक्राउ

सप्तरी : नेत्रविक्रम चन्द समूहका सप्तरी जनसत्ता प्रमुखसहित तीन कार्यकर्तालाई सप्तरी प्रहरीले शनिबार पक्राउ गरेको छ । आर्थिक सहयोगको पत्रसहित सप्तरी जिल्ला जनसत्ता प्रमुख सप्तरी खड्क नगरपालिका-३ बनरझुल्ला टोलका ५२ वर्षीय आदर्श उपनामका रामनाथ मण्डलसहित तीन जना पक्राउ परेको जिल्ला प्रहरी कार्यालय सप्तरीले जनाएको छ ।     

जिल्ला प्रहरी कार्यालय सप्तरीका प्रहरी नायब उपरीक्षक तथा सूचना अधिकारी भुवनेश्वरप्रसाद साहका अनुसार पक्राउ पर्नेमा सिरहा/सप्तरी जिल्ला सदस्य राजविराज नगरपालिका-४ का उदय उपनामका उदयनाथ मण्डल र विष्णुपुर गाउँपालिका-१ का २५ वर्षीय रामकृष्ण मण्डल रहेका छन् ।     

 उनीहरुको साथबाट प्रहरीले जनविद्रोह लेखिएको किताब, वीर मधेशी लेखिएको किताब, युवा संगठन नेपालको साधारण सदस्यता ठेली, युवा संगठन नेपाल विशेष आर्थिक सहयोगको पत्र, अखिल नेपाल महिला सङ्घ क्रान्तिकारी लेखिएको आर्थिक सहयोगको पत्र, अखिल नेपाल किसान महासंघ केन्द्रीय समिति लेखिएको पर्चा, नेकपा जिल्ला सप्तरीको मिति २०७७ असार १६ गतेको पर्चालगायत चार थान मोबाइल बरामद गरेको बताइएको छ ।

सप्तरी जिल्लामा केही समयदेखि विभिन्न व्यवसायी, कार्यालय प्रमुख तथा जनप्रतिनिधिसँग चन्दा माग गर्ने, धाकधम्की दिने गरेको सूचनाका आधारमा अनुसन्धानपश्चात उनीहरूलाई पक्राउ गरिएको प्रहरीले जनाएको छ ।

हराएकी वृद्धाको शव एक महिनापछि फेला

कमल खड्का/मध्यान्ह

रोल्पा : दक्षिण रोल्पाको रुन्टीगढी गाउँपालिका वडा नं ६ मा मंगलबार एक वृद्धाको शव फेला परेको छ । ७० वर्षीया वृद्धा चैटी रावतको झुन्डिएको अवस्थामा शव भेटिएको हो ।

उनी गएको माघ ३ गते घरबाट घाँस काट्न  भनेर दिउँसो ४ बजे घर नजिकको जङगलमा निस्किएको परिवार स्रोतले  जनाएको छ । त्यसपछि उनका छोरा जितबहादुर रावतले  बेपत्ता भएको भनी खोजी कार्यमा सहयोगका लागि ईलाका प्रहरी कार्यालय होलेरी र स्थानीय सञ्चार माध्यममा समेत खबर गरेका थिए ।

खोज तलास गर्दा नभेटिएपछि एक महिनापछि  मात्र नजिकैको जंगलमा शव फेला परेको हो । घटनाबारे अनुसन्धान भइरहेको इलाका प्रहरी कार्यालय होलेरीका प्रहरी निरीक्षक शंकर खड्काले  जानकारी  दिएका छन् । 

१० वर्षीय बालक तीन दिनदेखि बेपत्ता

यामराज बिष्ट/मध्यान्ह 

दैलेख : दैलेखको ठाटीँकाँध गाउँपालिका ४ का १० वर्षीय बालक रवीन्द्र सिजापती तीन दिनदेखि बेपत्ता भएका छन् । सुर्खेत वीरेन्द्रनगर नगरपालिका ४ भैरवस्थानमा कोठा भाडामा बस्दै आएका उनी फागुन ८ गते शनिबारदेखि बेपत्ता भएका हुन् । दैलेख स्थायी घर भएका उनी पढाइको सिलसिलामा वीरेन्द्रनगरमा आफ्ना काका लिलाराम सिजापतीसँग बस्दै आएका थिए । 

बिहान ८ बजे साथीको साइकल पुर्‍याउन जान्छु भनेर गएका उनी दिनभर साथीको कोठामा बसेको र साँझ घर जान्छु भनेर फर्किदा बेपत्ता भएको उनका काका सिजापतीले बताए । बेपत्ता बालकलाई भेटाउनुहुनेले उनका परिवारको फोन नम्बर ९८६३४६४९९१ मा सम्पर्क गरिदिनहुन आग्रह गरिएको छ ।