नासाले मंगल ग्रहमा उडायो सानो हेलिकप्टर

एजेन्सी : अमेरिकी अन्तरिक्ष एजेन्सी (नासा) ले सानो आकारको हेलिकप्टर मंगल ग्रहमा सफल उडान गरेको छ ।

इन्जेन्युएटी नामको ड्रोन एक मिनेटभन्दा कम समय हावामा अडिएको थियो। तर नासाले त्यसलाई एउटा विमानमार्फत् अर्कै विश्वबाट पहिलो पटक नियन्त्रित र सञ्चालित उडान गरिएको बताएको छ।

मंगल ग्रहमा रहेको स्याटेलाइटले पठाएको सूचनापछि हेलिकप्टर उडेको पुष्टि भएको हो ।

आउँदा दिनहरुमा मंगलग्रहमा थप परिस्कृत र ठूलो आकारको विमान उडाउने योजना रहेको नासाले जनाएको छ ।

हालको हेलिकप्टरमा प्रयोग भएको प्रविधिको परीक्षण तथा त्यसको क्षमता थाहा पाउनका लागि इन्जिनियरहरुले इन्जेनुएटीलाई थप माथि उड्न आदेश दिने छन् ।

नासाले गएको फेब्रुअरीमा नासामा पठाएको अन्तरिक्ष यानमा सो हेलिकप्टर पठाइएको थियो । उक्त हेलिकप्टरलाई नासाको पर्सिभिअरन्स रोभरले बोकेर मङ्गल ग्रह पुर्‍याएको हो ।

रुसद्वारा चेक गणतन्त्रका २० कुटनीतिज्ञ निष्काशित

एजेन्सी : रुसले चेक गणतन्त्रका २० जना कुटनीतिज्ञलाई देश निकाला गरेको छ । 

गत शनिबार चेक गणतन्त्रले स्क्रिपाल घटनामा रसियाली एसभिआर र जिआरयू गुप्तचर एजेन्टका नाममा १८ जना रसियाली कुटनीतिज्ञ संलग्न रहेको भन्दै उनीहरुलाई देश छाड्न आदेश दिएपछि दुबै देशबीच आरोप प्रत्यारोप जारी छ । 

सन् २०१४ मा चेक गणतन्त्रको स्क्रिपालस्थित सैनिक शिविरमा बिस्फोटमा रसियाको संलग्नता रहेको चेक गणतन्त्रको दाबी छ । यस घटनामा दुई जनाको मृत्यु भएको थियो । 

यसैबीच प्रहरीले बिस्फोटमा संलग्न रहेको आशंका गरिएका दुई जना रसियालीको खोजी गरिरहेको जनाएको छ । ती दुई व्यक्तिले नै पूर्व रसियाली डबल एजेन्ट सर्गेई स्क्रिपाललाई सन् २०१८ मा लन्डनमा घातक विष–आक्रमण गर्न पासपोर्ट प्रयोग गरेको प्रहरीको भनाइ छ । 

चेक सञ्चार माध्यमले ती दुई रसियालीहरु अलेक्जान्डर मिशकिन र अनातोली चेपिगोभ रहेको जनाएका छन् । स्क्रिपाल आक्रमण पश्चात् सार्वजनिक गरेको बिस्फोट स्थल र तस्वीरका भिडियो फुटेजमा आधारित रहेर चेक सञ्चार माध्यमले यस्तो घोषणा गरेका हुन् ।

तर रसियाले आइतबार उक्त दाबी कपोलकल्पित रहेको जनाएको छ । चेक गणतन्त्रको उक्त दाबी र कारबाही लगत्तै रसियाले मस्कोस्थित चेक गणतन्त्रको राजदूतावासमा कार्यरत २० जना कर्मचारी कुटनीतिज्ञलाई सोमबारसम्म देश छाड्न आदेश दिएको छ । 

पछिल्ला दिनहरुमा रसिया र पश्चिमी मुलुकहरुबीच कैयौं विषयलाई लिएर मतान्तर चुलिएको छ । खासगरी युक्रेनको सीमा क्षेत्रमा रुसी सैनिक परिचालन बढाइएको, अमेरिकी राष्ट्रपति निर्वाचनमा हस्तक्षेप गरेको तथा अन्य आक्रामक कारबाहीहरु गरेको पश्चिमी मुलुकहरुको आरोप छ । 

अमेरिकाद्धारा पाकिस्तानमा आधारित अन्तर्राष्ट्रिय मानव तस्करी सञ्जालमाथी प्रतिबन्ध

वासिंटन डीसी : संयुक्त राज्य अमेरिकाले पाकिस्तानमा आधारित अन्तर्राष्ट्रिय मानव तस्करी सञ्जालमाथी प्रतिबन्ध लगाएको छ। अमेरिकी अर्थ मन्त्रालयले पाकिस्तानमा आधारित सञ्जालमाथी सन् २०१५ देखी मानव तस्रकी गरी प्रवासीको संख्यामा बढाईदिएको र त्यसरी आउने कतिपयले राष्ट्रिय सुरक्षा खतरा निम्त्याउँने जोखिम समेत रहेको जनाउँदै प्रतिबन्धको घोषणा गरेको हो।

पाकिस्तानी नागरिक अबिद अली खानले संचालन गरेको आबिद अली खान ट्रान्स्नेशनल अपराधिक संगठनमा सुचिकृत गर्दै अमेरिकी अर्थ मन्त्रालयले प्रतिबन्धको घोषणा गरेको हो।

उक्त गिरोहले दक्षिण अमेरिकी र मध्य अमेरिकी देशहरूमार्फत तस्करी गरेको र त्यसरी अमेरिका प्रवेश गर्ने व्यक्तिहरुसंग मार्ग अनुसार २० हजार देखी ४० हजार अमेरिकी डलरसम्म असुल्ने गरेको अर्थ मन्त्रालयले जनाएको छ।

संगठनमा अफगानका नागरिक रेदी हुसेन खाल गुल, पाकिस्तानी शकील करीम र मोहम्मद चौधरी इकराम वाराइच लगायतका गिरोहहरुको समेत संलग्नता रहेको अमेरिकी अर्थ मन्त्रालयले लगाएको प्रतिबन्धको सूचीमा उल्लेख गरिएको छ। स्रोतः हिन्दुस्तान टाइम्स– 

उपयुक्त स्वास्थ्य उपचार नपाए नाभाल्नीको केही दिनमै मृत्यु हुने चिकित्सकको भनाइ

एजेन्सी : चिकित्सकले रुसी विपक्षी नेता एलेक्सी नाभाल्नीको केही दिन भित्रै मृत्यु हुनसक्ने बताएका छन् । नाभाल्नीको उपचारमा संलग्न चिकित्सकहरुले उपयुक्त स्वास्थ्य उपचार नपाए जेलमा रहेका नाभाल्नीको केही दिन भित्रै मृत्यु हुनसक्ने बताएका हुन् ।

पछिल्लो पटक गरिएको रगत परीक्षणको नतिजाले कुनै पनि बेला नाभाल्नीको कार्डिक अरेस्ट वा किड्नी फेलियर हुन सक्ने देखिएको चिकित्सकको भनाइ छ । नाभाल्नीलाई गएको फेब्रु्अरीमा जेल सजाय भएको थियो । उनी १८ दिनदेखि भोकहड्तालमा छन् ।

नाभाल्नीका व्यक्तिगत चिकित्सक एनास्टासिया भासिलिभासहित चार चिकित्सकले जेल पदाधिकारीलाई पत्र लेखेर तत्काल आफूहरुलाई भेटका लागि अनुमति प्रदान गर्न माग गरेका छन् ।

जेल पदाधिकारीलाई लेखेको पत्र भासिलिभाले ट्वीटरमा पोष्ट गरेकी छन् । चिकित्सकले आफूहरुलाई नाभाल्नीको तत्काल स्वास्थ्य जाँच गर्नका लागि स्वीकृति प्रदान गर्न माग गरेका हुन् । ४४ वर्षीय नाभाल्नीमाथि गएको अगस्टमा विष आक्रमण भएको थियो ।

उनी जर्मनीमा उपचार गराएर पाँच महिनापछि रुस फर्किएका थिए । उनलाई रुस फर्किए लगत्तै विमानस्थलबाट पक्राउ गरिएको थियो । राष्ट्रपति भ्लादिमिर पुटिनका कट्टर आलोचक मानिने नाभाल्नीको हत्या प्रयास सत्ता पक्षबाटै भएको आरोप लाग्दै आएपनि रुसले भने सो आरोप अस्वीकार गर्दै आएको छ ।

भारतले पूर्वी लद्दाखको बाँकी क्षेत्रहरूमा पनि सैन्य संलग्नता त्याग्न चीनलाई भारतको आग्रह

नयाँ दिल्ली : भारतले पूर्वी लद्दाखको बाँकी इलाकाहरूमा पनि शान्ति सुरक्षा सुनिश्चित गर्न चिनियाँ सेनालाई आह्वान गरेको छ।साप्ताहिक प्रेस ब्रीफिंङमा भारतीय विदेश मन्त्रालयका प्रवक्ता अरिन्दम बागचीले बाँकी क्षेत्रबाट पनि सैन्य संलग्नता त्याग्न र शान्ति शान्ति र द्विपक्षीय सम्बन्ध अगाडी बढाउन चीनसंग आग्रह गरेका हुन। 

उनले गत मार्च १२ मा दुई देशका सैनिक अधिकारीहरुले गरेको समन्वय परामर्शमा ११ औं बैठक बोलाउने कुरामा सहमति भएको जानकमारी दिँदै सो क्षेत्रमा चिनियाँ संलग्नता हट्नुपर्ने बताएका हुन। उक्त क्षेत्रमा दुई देश गत एक बर्ष देखि जारी सैन्य टकराव हटाउन सैन्य र राजनैतिक स्तर मा भएको वार्तापछि गत महिना सबैभन्दा विवादास्पद क्षेत्रमा शान्ति कायम गर्न भारत र चीन सहमत भएका थिए।

दुई देशबीचको जारी सैन्य तनाव कम गर्न उल्लेखनीय भूमीका खेलेको श्रेय भारतीय सेना प्रमुख जनरल मनोज मुकुन्द नारावने तथा संकटमा उचित भूमिका खेल्दै सहमतिको नतिजा निकाल्न सफल भएको भन्दै राष्ट्रिय सुरक्षा सल्लाहकार अजीत डोभालको नीतिको प्रशंसा गरिएको छ। स्रोतः एएनआई

राउल क्यास्ट्रोद्वारा क्युबन कम्युनिष्ट पार्टीको नेताबाट राजीनामाको घोषणा

एजेन्सी : क्युबन कम्युनिष्ट पार्टीको नेताबाट राउल क्यास्ट्रोले राजीनामाको घोषणा गरेका छन् । ८९ वर्षका क्यास्ट्रोले पार्टीको कंग्रेसमा आफूले नेतृत्व युवा पुस्तालाई हस्तान्तरण गर्ने बताएका हुन् ।

आफूले पूरै लगन र साम्राज्यवादी भावना विपरित रहेर नेतृत्व हस्तान्तरणको निर्णय लिएको राउल क्यास्ट्रोले बताएका छन् । योसँगै क्यास्ट्रो परिवारको विगत ६ दशक देखिको सत्ता नेतृत्व अन्त्य हुने भएको छ ।

उनको ठाउँ लिने व्यक्ति पार्टीको चार दिने कंग्रेसको अन्तिम दिन मतदानबाट चयन हुने छन् । योसँगै उनका दाइ फिडेल क्यास्ट्रो र उनको औपचारिक नेतृत्वको लहर अन्त्य हुने अपेक्षा छ ।

सन् १९५९ को क्रान्तिपछि क्युवामा क्यास्ट्रो परिवार सत्तामा रहँदै आएको छ ।

राजकुमार फिलिपको अन्तिम संस्कार आज

काठमाडौं : ९९ वर्षको उमेरमा निधन भएका महारानी एलिजाबेथ द्वितीयाका पति प्रिन्स फिलिपको आज अन्तिम संस्कार गरिँदैछ ।

अन्तिम संस्कारका लागि आवश्यक तयारी भइरहेको बेलायती सञ्चारमाध्यमले जनाएका छन् ।

अन्तिम संस्कारको औपचारिक शाही समारोह ब्रिटिश समयानुसार दिउँसो ३ बजे (नेपाली समयानुसार साँझ ७ः४५ बजे) विन्डसर कासल परिसरमा रहेको सेन्ट जोर्जेज् च्यापलमा हुनेछ ।

राजकुमार फिलिपको शव विन्डसर कासलस्थित प्राइभेट च्यापलमा राखिएको छ ।

राजकुमार फिलिपको अन्तिम संस्कारमा कोरोनाभाइरससम्बन्धी प्रतिबन्धहरूका कारण सामाजिक दूरी कायम गर्दै ३० जना मात्र सहभागी हुन पाउने छन् ।

अमेरिकाको इन्डियानापोलिसमा बन्दुकधारीले गोली चलाउँदा ८ जनाको मृत्यु

एजेन्सी : अमेरिकाको इन्डियानापोलिस शहरमा बिहीबार अबेर साँझ एक व्यक्तिले अन्धाधुन्ध चलाएको गोली लागेर कम्तीमा आठ जनाको मृत्यु भएको छ । 

अन्तर्राष्ट्रिय विमानस्थल नजिकैको फेडेक्सको कार्यालयमा भएको उक्त गोलीकाण्डमा अरु धेरै व्यक्ति घाइते भएको प्रहरीले जनाएको छ । प्रत्यक्षदर्शीहरुले एक व्यक्तिले स्वचालित बन्दुकबाट गोली चलाएको र धेरै राउन्ड फायर गरेको बताएका छन् ।

प्रहरीले गोली चलाउने व्यक्ति पनि मारिएको बताएका छन् । 

एक प्रत्यक्षदर्शी जेरेमी मिलरले स्थानीय विस–टिभीलाई प्रतिक्रिया दिँदै एक व्यक्तिले स्वचालित राइफलबाट गोली चलाएको देखेको बताएको अन्तर्राष्ट्रिय सञ्चारमाध्यमले उल्लेख गरेका छन् ।

प्रहरी प्रवक्ता जेनी कूकले पत्रकारहरुसँग कुरा गर्दै प्रहरी तत्कालै घटनास्थलमा पुगेको र कारबाही थालेको बताएका छन् ।

प्रहरीले उक्त गोलीकाण्डमा धेरै व्यक्तिलाई गोली लागेको र घाइतेहरुलाई तत्कालै अस्पताल पुर्‍याइएको जनाएको छ । 

फेडेक्सका एक प्रवक्ताले कार्यालयमा गोली चलेको र आफूहरुले प्रहरीलाई मद्दत गरिरहेको जानकारी दिएका छन् । 

'म्यानमारमा जारी आन्दोलनमा ५१ बालबालिका मारिए'

एजेन्सी : म्यानमारमा जारी आन्दोलनका क्रममा सुरक्षाकर्मीको ज्यादतीबाट कम्तीमा ५१ बालबालिकाको मृत्यु भएको विवरण सार्वजनिक भएको छ ।

आन्दोलनका क्रममा सुरक्षाकर्मीहरुको तर्फबाट भएको हिंसामा परी अप्रिल १३ तारिखसम्ममा ५१ बालबालिकाको मृत्यु भएको संयुक्त राष्ट्रसंघले जनाएको हो ।

आन्दोलनमा लागेको आरोपमा झण्डै एक हजार बालबालिकालाई सुरक्षाकर्मीहरूले नियन्त्रणमा लिएको पनि राष्ट्रसंघले जनाएको छ । हिंसा रोक्न र शान्तिको बाटो रोज्न राष्ट्रसंघले पटक पटक आग्रह गरेपनि हिंसात्मक घटनाहरू भइरहेको भन्दै राष्ट्रसंघका प्रवक्ता स्टेफन डुजार्रिकले चिन्ता व्यक्त गरेका छन् ।

पछिल्लो संसदीय निर्वाचनको नतिजाप्रति असन्तुष्टि जनाउँदै म्यानमारको सेनाले फेब्रुअरी १ तारिखमा सत्ता नियन्त्रणमा लिएको थियो । सत्ता हातमा लिएकै दिनदेखि सेनाको कदमको विरोध गर्दै म्यानमारमा प्रदर्शन भइरहेको छ ।

म्यानमारमा जारी आन्दोलनका क्रममा अहिलेसम्म ७०७ जनाको मृत्यु भएको छ । राष्ट्रसंघलगायतका विश्वव्यापी संस्था र विभिन्न देशहरुले म्यानमारलाई प्रजातान्त्रिक प्रक्रियामा फर्काउन पटक पटक आग्रह गर्दै आएपनि सेनाले भने अटेर गरिरहेको छ ।

अमेरिकामा अश्वेत युवालाई गोली हान्ने प्रहरी अधिकृतविरुद्ध हत्या अभियोगमा मुद्दा दर्ता

अमेरिकाको मिनेसोटामा एक अश्वेत युवामाथि पक्राउको क्रममा गोली प्रहार गर्ने श्वेत प्रहरी पक्राउ परेकी छन् । उनीमाथि हत्या अभियोगमा मुद्दा दर्ता भएको छ ।

मिनेसोटाको ब्रूक्लीन सेन्टरमा आइतबार प्रहरीको गोली लागेर गम्भीर घाइते भएका २० वर्षे युवा डन्टे राइटको उपचारको क्रममा ज्यान गएको थियो ।

राइटलाई गोली प्रहार गर्ने महिला प्रहरी अधिकारी किम पोटरमाथि हत्या अभियोगमा मुद्दा दर्ता भएको अमेरिकी सञ्चार माध्यमले जनाएका छन् । पक्राउ परेकी पोटरलाई हेनेपिन काउन्टी जेलमा राखिएको छ ।

प्रहरी अधिकारी पोटरले दुर्घटनाबस राइटमाथि गोली प्रहार गरेको बताएकी छन् । टेजरको साटो बन्दुक उठाएकाले राइटको ज्यान जाने दुर्घटना भएको उनले बताएकी छन् ।