कोरोना भाइरसको विश्वव्यापी महामारी फैलिए सँगै फेक न्यूजको प्रकोप समेत फैलिएको छ । कोरोना भाइरससँग जोडेर बनाइएका फेक न्यूजले आम नागरिकमा मनोवैज्ञानिक त्रास सिर्जना गरेको छ । नेपालमा पनि फेक न्यूज र अफवाह फैलाउने कार्य भएको तथ्य नेपाल प्रहरीले सार्वजनिक गरेको छ । शनिबार मात्रै भक्तपुरबाट एक युवकलाई कोरोना भाइरसबारे अफवाह फैलाउने कार्यमा संलग्न भएको आरोपमा प्रहरीले नियन्त्रणमा लिएको छ । केही भ्वाइस मेल गरेर पनि अफवाह फैलाइएको पाइएको थियो । उक्त कार्यको नेपाली सेनाले खण्डन नै गरेको छ । सार्वजनिक भएका यी दुई तथ्य बाहेक आम सञ्चार माध्यममा समेत अफवाह फैलाउने प्रकृतिका सूचना सञ्चार भएको भन्दै सरोकारवालाहरुले आपत्ति जनाएका छन् ।
एकातर्फ कोरोना भाइरसको स्वास्थ्य संकटकाल र अर्कातिर अफवाहका कारण आम नागरिकमा बढी नै त्रसित देखिएका छन् । उत्तरी छिमेक चीनमा गएको नोभेम्बरबाटै संक्रमण देखिएको थियो । कोरोना भाइरसको संक्रमण नै चीनको हुपेई प्रान्तको वुहानबाट शुरु भएको थियो । तर, कोरोना भाइरसको संक्रमण एक जनामा मात्रै देखिएको थियो । ती संक्रमित पनि निको भइसकेका छन् । अहिले यूरोप, अमेरिका हुँदै दक्षिणी छिमेक भारतसम्म कोरोनाको प्रकोप भित्रिसकेको छ । आइतबार नेपालसँग सीमा जोडिएको बिहारमा पनि कोरोना भाइरसको संक्रमणबाट एक जनाको मृत्यु भएको छ ।
अतः नेपालमा कोरोना भाइरसको त्रास अझ बढी देखिएको छ । यस्तो बेलामा फेक न्यूज र अफवाह फैलाउने कार्यले अझ बढी त्रसित बनाउने नै भयो । तसर्थ, विश्व स्वास्थ्य संगठन (डब्लुएचओ) ले विश्व स्वास्थ्य संकटकाल नै घोषणा गरेको कोरोना भाइरसको संक्रमणजस्तो गम्भीर विषयमा अफवाह फैलाउनु आफैंमा आपराधिक विषय हो । यस्ता आपराधिक कार्य निरुत्साहित गर्नु सम्बन्धित सरोकारवालाहरुको दायित्व हो ।
भनिन्छ– महामारी विरुद्ध लड््न मनोवैज्ञानिक पक्ष बलियो हुनुपर्छ । तर, अफवाहले मनोवैज्ञानिक पक्षलाई कमजोर बनाउँछ । कोरोना महामारी रोकथामका लागि संसारभर युद्धस्तरमा काम भइरेहका हामीले पनि यसतर्फ सचेतता अपनाउनुपर्नेछ । त्यसका लागि मनोवैज्ञानिक रुपमा सचेत पंक्तिले मात्रै कोरोना महामारी विरुद्ध लड्न सक्ने भएकाले यसतर्फ उचित ध्यान दिनुपर्नेछ । आतंकित बनाउने फेक न्यूज र अफवाह फैलाउने कार्यलाई निरुत्साहित गर्दै सचेतता अपनाउने पंक्तिलाई भने प्रोत्साहन गर्नुपर्नेछ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies