जारकोटी यूवा वर्ष २१ का नवराज विक र सुस्मिता मल्ल बीचको प्रेम सम्वन्ध गतबर्षदेखि कै हो, भन्ने उनका दुबै पक्षका आफन्त र चौरजहारी नपाको इलाका प्रहरी कार्यालयलाई समेत राम्रो जानकारी छ । केही महिना पहिला प्रेमलाई विवाहमा परिणत गर्न नवराज आफ्नी प्रेमीलाई लिन चौरजहारी पुगेका र त्यहाको इलाका प्रहरीले थाहा पाएपश्चात केटाकेटी दुवैलाई राखी उमेर पुगेपछि विवाह गर्ने शर्त गराई आ–आफ्नो घरमा पठाएको रेकर्ड इलाकामा खोजे पाइन्छ ।
तर, विडम्वना दोस्रो पटक पनि प्रेमिकाले नै बोलाएपछि आफ्ना दौतर साथी लिएर प्रेम सम्वन्धलाई बैवाहिक सम्वन्धमा परिणत गर्ने सपना बोकेर गएका नवराजले आफ्नो मात्र ज्यान गुमाएनन्, आफूसँग गएका २ जनाले पनि ज्यान गुमाए भने ३ जना अझै वेपत्ता छन् ।
मारिएकाः ६ जना मारिनुमा (चौरजहारी वडा नं. ८ का का वडा अध्यक्षको नेतृत्वको ठुलो जत्थाले घेराबन्दी गरी कुटीकुटी विभत्स हत्या गरी भेरी नदीमा फालेका र ३ जना नवराव विक, टीकाराम नेपाली र गणेश बुढामगरको शव भेरी नदिमा भेटीए पनि ३ जना लोकेन्द्र सुनार, सञ्जु वि.क र गोविन्द शाहीको अझै सव भेटिएको छैन।) यो भन्दा ठुलो समाजमा अरु बर्बता के हुन सक्छ ?
सभामुख महोदय,
तत्कालीन व्यवस्थापिका संसदबाट जातीय भेदभाव तथा छुवाछुत कसुर र सजाय ऐन २०६८ जेठ १० गते पास भएकै दिन उत्सवको रुपमा मनाउनु पर्ने दिन जातकै कारण ६ जनाको सामुहिक हत्या गरियो । जहाँबाट उत्पीडनमा परेका वर्ग समुदायले अपनत्व गर्ने शासन सत्ता ल्याउनु पर्छ भनि सुनौला सपना बाडेर तत्कालीन माओवादी पार्टीले जनयुद्धको घोषण गरेको थियो, त्यो जनयुद्धमा शहीद भएको दलितको सपना यही थियो, सभामुख महोदय जातकै कारण मारिने ?
दुवैको हित्तचित्त मिलेर प्रेमिकाले लिन आउ भनि गरेको आग्रहमा जन्ती लिएर आफ्नी प्रेमीलाई बेहुली बनाई ल्याउँछु भन्नु, मन मिल्ने दौतरि सँगै बस्ने प्रण गर्नु महापाप हो, सभामुख महोदय ?
अन्तरजातीय प्रेमकै कारण जाजरको नवराव विक जस्ता कति दलित मारिनु पर्ने हो, धादिङ्गमा मारिका काभ्रेका अजित मिजार, जसको शरीर ४ वर्षदेखि शिक्षण अस्पताल महाराजगञ्जमा न्यायको प्रखाईमा छ ।
रुपन्देकी दलित महिलाको अन्तरजातीय विवाहकै कारण यही १० गते हत्या गरी रुखमा झुण्डाइएको छ । चिया पसलको चुलो छोएको निहुमा, दलित जनप्रतिनिधिले आत्मा सम्मानका लागि बोलेको निहुँमा र छोराले अन्तरजातीय विवाह गरेकै कारण बावुको हत्या हुन कहिलेसम्म ? अव कति अजित मिजारका जस्ता अन्तरजातिय प्रेमका कारण मारिएका मुर्दाले कति अस्पतालको शव हल भनु पर्दछ, कति दलित दलितलाई कुटीकुटी विभत्स हत्या गरी नदीमा बगाउनु पर्दछ, धनुकामा ४ जनाबाट बलाकृत भएकी १३ वर्षीया बालिका जसको गर्भमा ५ महिनाको बच्चा छ ।
मोरङ्गकी १४ बर्षिया बालिका बलात्कृत भइन्, पोखराका मोहान सुनारले भाईको किरिया गर्ने सार्वजनिक किरिया पुत्री भवन जातकै कारण उपयोग गर्न पाएनन् । जाजरकोटका वडा अध्यक्ष राकबहादुर सुनार जातकै कारण कुटिएर घाइते भई अस्पतालको शश्यामा छन् ।
यो सिङ्गो दलित मािथको आक्रमणले उग्र रुप लिएको छ । यी सबै घटनाको संपेषण गर्ने संयन्त्र मन्त्रालयमा छ कि छैन । हजुरको आशनमा पुग्यो पुगेन । पुगेको भए किन बोल्नु हुदैन ? अब बोलेर जवाफ दिनुहोस्, गृह मन्त्री ज्यू । धेरै अविलम्व नगरौ । ६० लाख दलितले तपाई जवाफ कुरेर बसेका छन् ।
अन्तर जातीय प्रेम गर्नुको सजाय मारिनु हो । यो जत्तिको मानव सभ्यताका लागि अमानवीयता र बर्बरता के हुन् ? हामीले ल्याएको कस्तो व्यवस्था ल्यायौं ? हामीले रगत बगाउनुको मूल्य यो थिएन र होइन पनि ।
सरकार अब जनतालाई शास्त्र घोटाउनु होइन, कानुन घोटाऊ । सामन्त घोटाउने होइन, समाजवाद घोटाऊ ।
बर्बता होइन, भातृत्व सिर्जना गर्न सिकाऊ । मानव मार्ने होइन, उसको जिउन पाउँने अधिकार छ भन्ने सिकाऊ ।
यो पनि स्मरण गराउँदछु सभामुख महोदय, आजको यो राष्ट्र निर्माणमा विसे नगर्चीदेखि १० वर्षे जनयुद्ध र २०६२/०६३ को १९ दिने जनआन्दोलन सफल पर्नेमा दलित समुदायको योगदान कम छैन । मलाई यो पनि स्मरण छ अधिकारको खोजी गर्दा गर्दा अधिकारको तिर्खा नमेटीए पछी यो समाजको बर्बतालाई सहन नसकि योगमाया जस्ता ५९ जनाले जल समादी लिएको पनि मेरै देश हो ।
२३८ वर्षे राजतन्त्र फालेर दलित र महिलाका हक संविधानमा व्यवस्था गरी कानुन बने । तर, यो कानुनलाई तोडमटोल गरी आफ्नो वर्ग, क्षेत्र, जात, धर्म र वर्ण अनुकुल बनाई व्याख्या गर्ने र बचाउ गर्ने जुन प्रवृति र परिपाटीको विकास भयो । यो संवौधानिक व्यवस्था भएको र संयुक्त राष्ट्र संघको पक्ष राष्ट्र भएको नेपालको खिलाफमा छ भन्ने हामी दलित समुदायको ठहर छ ।
अन्तमा, म यस गरिमामय सदनमा भन्न चाहन्छु– हामी ६० लाख दलित समुदाय न्यायका भोका छौं । न्यायकै तिर्खामा भएकाले हामीलाई सरकाले बुको सातु होइन , क्यूरिपाई भएको पानीको व्यस्था गरोस् । त्यो भनेको माथिको सबै घटनाको सत्यतथ्य छानविन र पीडितलाई न्यायको प्रत्याभुति दिनका लागि सरकारको तर्फबा निष्पक्ष र स्वतन्त्र प्रकृतिको उच्च स्तरीय न्यायिक छानविन समिति बनाइयोस् र जनताद्धारा अनुमोदित संसदबाट समेत उच्च स्तरीय संसदीय छानविन समिति गठन गर्न सभामुखबाट रुलिङ होस् भनि अनुरोध गर्दछु । धन्यवाद
(प्रतिनिधिसभा बैठकमा सांसद बिशुङ्केले राखेको मन्तव्य)
