काठमाडौं : गएको असार १० गते देखि सत्तारुढ नेपाल कम्युनिष्ट पार्टी (नेकपा) को स्थायी कमिटी बैठक शुरु भएको छ । असार १३ गते पछाडि दुई दिन स्थगित भएको बैठक आज पुनः बस्दैछ । यसअगाडि तीन दिन बसेको बैठक औपचारिकता र पार्टीभित्र सर्वसहमत विषयमा छलफल भएको थियो ।
तर, आजबाट शुरु हुने बैठकमा भने नेकपाभित्र देखिएको असन्तुष्टि पोखिन शुरु हुने देखिन्छ । किनभने, आजबाट स्थायी कमिटी बैठकमा कोभिड महामारी व्यवस्थापन सहित सरकारको समीक्षा हुँदैछ । आइतबार प्रधानमन्त्री केपी शर्मा ओलीले आफूलाई पदबाट हटाउन भारतीय दूतावास सक्रिय भएको बताएर पनि नेकपाभित्रको संघर्ष उत्कर्षमा पुगेको प्रष्ट संकेत दिएका छन् । यसअगाडि पुष्पकमल दाहाल प्रचण्डले असार १० गते नै प्रधानमन्त्री पद छोडेर गल्ती भएको महशुस भएको बताएका थिए ।
प्रधानमन्त्री पदबारे प्रचण्डले अभिव्यक्ति दिएको चार दिन पछि प्रधानमन्त्री ओलीले सार्वजनिक रुपमै अभिव्यक्ति दिएका हुन् । तर प्रधानमन्त्रीको अभिव्यक्ति प्रति नेकपाकै नेताहरू पनि सहमत छैनन्। ती नेताहरुको तर्क छ– यो सरकार नेकपाको दुई तिहाइ नजिकको जनमत प्राप्त भएकाले यस्तो अभिव्यक्तिमा सत्यता छैन, बरु आफ्नो पद सुरक्षित राख्ने उनको प्रयत्न हो ।
एक नेताले त नक्सा जारी गरेकाले नभएर हटाउन खोजिएको नभएर नेपालको नक्सा जारी गर्नुपर्ने भएकाले चाहिं यसअगाडि पदबाट हटाउने प्रस्ताव स्थगित गरिएको थियो । प्रधानमन्त्री ओलीले नेपालको नयाँ राजनीतिक नक्सा जारी गरिए बापत आफूलाई भारतीय दूतावासको सक्रियतामा हटाउन खोजिएको अभिव्यक्ति दिएका थिए ।
नेकपाको बैठक हेर्दा पनि प्रधानमन्त्री ओलीले पार्टीभित्र संघर्ष उत्कर्षमा पुगेको संकेत दिएका छन् । पहिलो दिन सरकारको बचाऊ गर्दै एक घण्टा लामो मन्तव्य राखेका प्रधानमन्त्री ओली त्यस यताको बैठकमा अनुपस्थित रहेका छन् । १२ असार शुक्रबारको बैठकमा प्रधानमन्त्री अनुपस्थित रहेपछि अष्टलक्ष्मी शाक्य र भीम रावलले चर्को आलोचना गरेका थिए । यसपछि असार १३ गतेको बैठकमा केहीबेर बसेर बाहिरिएका थिए ।
नेकपाभित्रको विवादकै कारण २५ वैशाख र ३१ वैशाखमा बोलाइएको स्थायी कमिटी बैठक अन्तिम समयमा स्थगित गरिएको थियो । दल विभाजन सम्बन्धी अध्यादेश ल्याएपछि नेकपाको सवै पार्टी संरचनामा प्रधानमन्त्री ओली अल्पमतमा परेका छन् । कार्यकारी अध्यक्ष प्रचण्ड, बरिष्ठ नेताद्वय झलनाथ खनाल र माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठ एउटा कित्तामा उभिएका छन् । उनीहरु निकटका २० स्थायी कमिटी सदस्यहरुले बैठक राख्न वैशाख १० गते लिखित माग राखेका थिए । सीमा समस्या र समाधानबारे भइसकेको नेकपाभित्र प्रधानमन्त्री पद नै छोड्न दबाव दिनेगरी सरकारको कामबारे समीक्षा हुँदैछ ।
