सुरेन्द्र दास/मध्यान्ह
सिरहा : आइतबार सिरहाका प्रमुख जिल्ला अधिकारीको कार्यकक्षमा अनौठो दृष्य देखियो । सदाझैं प्र जि अ प्रदिपराज कँडेल काममा ब्यस्त थिए । प्र जि अ कंडेलका सामुन्ने बसेका थिए प्रेस संगठन नेपालका केन्द्रिय सदस्य सन्तोष बराइली ।
यस्तैमा एक बृद्धाको प्रबेश हुन्छ । चाउरिएका गाला , सेतै फुलेको कपाल । दुबै हात जोडेर प्र जि अ कँडेललाई नमस्कार गर्छिन् । उनलाई प्र जि अ कंडेल सोफामा बस्न आग्रह गर्दै समस्या राख्न अनुरोध गर्छन् ।
ती बृद्धाको समस्या थियो जेलमा रहेको छोरा छुटाउने । बृद्धा थिइन् शहिद रामस्वरुप पासवानकी अर्धागिंनी सनैचरी पासवान । तत्कालिन नेकपा एमालेका जिल्ला नेता रामस्वरुप २०४६ सालमा आन्दोलनका क्रममा मारिएका थिए ।
उनीहरुका एकमात्र छोरा राजन पासवान अपहरण काण्डमा सिरहा कारागारमा कैद भुक्तान गरिरहेका छन् । पुनरावेदन अदालत राजविराजले राजनलाई अपहरणमा दोषी ठहर गर्दै ९ वर्ष सजाय तोकेकोमा ५ वर्ष कैद भुक्तान गरिसकेका छन् ।
‘नेताहरुले आधा कैद मिनाहा हुन्छ सिडियोसँग आग्रह गर्नु भनेकाले हजूरलाई समस्या राख्न आएको’ सनैचरीले प्र जि अ कँडेलसँग भनिन्, ‘एउटै छोरो हो हजूर कमाएर खुवाउने कोही छैन ।’
७२ बर्षीया सनैचरी सरकारले दिने वृद्धभत्ताले गुजारा चलाईरहेकी छन् । तर अपहरण अभियोगमा कैद मिनाहा नहुने कानूनी ब्यवस्था भएको प्र जि अ कँडेल संझाउँछन् । बलिन्द्र आँशु पुछिरहेकी सनैचरीको दर्दनाक अवस्थाले प्र जि अ कंडेललाई स्तब्ध बनाउनु स्वभाविक थियो ।
यस्तैमा प्र जि अ कँडेलले १० किलो चामल , दाल र केही थान साबुन अनि खाने तेल सनैचरीलाई हस्तान्तरण गर्छन् र जिविका चलाउन अति समस्या पर्यो र केही सारोगारो पर्दा सिधै आफुलाई सम्पर्क गर्न आग्रह गर्छन् । राहत बोकेर छोरा नछुट्नेमा स्पष्ट भएपछि मलिन अनुहारमा सनैचरी कार्यकक्षबाट बाहिरिन्छिन् ।
विपन्न वर्गका धेरैलाई प्र जि अ कंडेलले प्रशासन कार्यालयमै राहत वितरण गर्दै आएका रहेछन् । सिरहामा प्रमुख जिल्ला अधिकारी बनेर आएको २ महिनाको समयावधीमा करिब १ हजार बिपन्न घरपरिवारलाई प्रजिअ कँडेलले राहत वितरण गरिसकेको जानकारी दिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies