केही दिन यता देशभर चिसो बढेर गएको छ । राजधानी उपत्यका, पहाडी तथा उच्च हिमाली र तराई क्षेत्रहरुमा चिसो बढेको छ । कोरोना कहरले हैरानीमा परेका नागरिकलाई फेरि न्यानो हुनुपर्ने समस्या थपिएको छ । चिसोले पनि कोरोनाले जुन उमेर समूह सताइएका थिए, फेरि चिसोले पनि त्यही उमेर समूहलाई सताउनेछ । अर्थात्, पाका उमेर समूहलाई चिसोबाट बचाउनुपर्नेछ । वर्षेनि त्यही उमेर समूह चिसो खप्न नसकेर जीवन गुमाउने गरेका छन् । कोरोना संक्रमणबाट बच्न संघर्षरत नागरिकलाई चिसोबाट बचाउनु फेरि पनि राज्यकै दायित्व हो ।
किनभने, न्यून आय भएका वर्गले चिसोबाट बढी प्रताडित हुने गर्छन् । उनीहरुसँग न्यानो लुगाको अभाव हुने भएकाले चिसोबाट जीवन रक्षामा राज्य नै अग्रसर हुनुपर्नेछ । तर, सरकारले कोराना महामारीबाट नागरिकको जीवन रक्षामा लिएको पहलकदमी आलोचित बन्दै आएको छ । लामो समय लकडाउन र त्यसपछिको निषेधाज्ञाले आर्थिक क्षेत्र धरासयी हुँदा रोजगार गुमाउने न्यून आय भएकाहरु नै थिए । तर, सरकारले उनीहरुका लागि विशेष कार्यक्रम ल्याउन नै सकेन । अहिले दिनहुँ संक्रमणबाट ज्यान गुमाउने नागरिकको संख्या बद्दै गएको छ ।
सरकारले नागरिकको जीवन रक्षाका लागि निशूल्क परीक्षण र उपचार समेत निर्णय गरेर राज्य विहीनताको अनुभूति दिलाएको थियो । नागरिक तहको विरोध र सर्वोच्च अदालतको फैसलाबाट सरकार निशुल्क उपचार गराउने निर्णयमा फर्किएको छ । लामो समय लकडाउन भइरहँदा संक्रमण फैलन नदिने र संक्रमितको उपचारका लागि आवश्यक तयारी समेत नगरेको आरोप सरकारलाई लागि रहेकै छ । यस्तो बेला बढ्दो चिसोबाट नागरिकको जीवन रक्षामा सरकारबारे प्रश्न उठाउनै पर्दैन भन्न सकिन्न ।
त्यसर्थ, अहिलेबाटै नागरिक तहबाट समेत खबरदारी जरुरी छ । र, सरकारले पनि नागरिकलाई न्यानो बनाउने व्यवस्था तत्काल थाले मात्रै भोलि उठ्न सक्ने संभावित आलोचनाबाट जोगिन सक्नेछ । अझ नागरिकले बाँच्न पाउने संवैधानिक व्यवस्थाको कार्यान्वयन पनि सरकारको बाध्यता हो । यसको अर्थ अनेक कारणले, विशेषगरी मानवताको दृष्टिले पनि सरकारले यसतर्फ बेलैमा पहल थाल्न जरुरी छ । सरकारले अघिल्ला वर्षहरु जस्तै आलोचना खेप्नुपर्ने र नागरिकको जीवन रक्षा हुनेगरीको तयारी थाल्नु ठूलो समस्या पनि होइन ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies