प्रतिनिधिसभाका सभामुख कृष्णबहादुर महराले पदबाट राजनीनामा दिएका छन् । महराले उपसभामुख डा.शिवमाया तुम्बाहाम्फेलाई राजीनामा पत्र बुझाएका हुन् । अनुसन्धान प्रक्रियालाई सहज बनाउन र अनुसन्धान रहेसम्मका लागि भनि महराले पदबाट राजीनामा बुझाएका छन् । भाषा जे–जस्तो लेखिए पनि सभामुख महरालाई अब प्रतिनिधिसभाले चिन्दैन । उनी निवर्तमान सभामुख भइसकेका छन् भने उपसभामुखले कार्यबाहक जिम्मेवारी पाएकी छन् ।
सभामुख महराको राजीनामा प्रक्रियालाई अब अगाडि बढाइनेछ । राष्ट्रपतिबाट स्वीकृत भएपछि नयाँ सभामुख चयन प्रक्रिया संसदले अगाडि बढाउनेछ । नयाँ सभामुख चयन हुनेछ । बजेट अधिवेशनको समापनसँगै कजाखस्तान भ्रमण सकेर स्वदेश फर्किए लगत्तै महरालाई संसद सचिवालयमा काम गर्ने एक महिला कर्मचारीले बलात्कार प्रयासको आरोप लगाएकी थिइन् । ती महिलाले लगाएको आरोप सार्वजनिक भएको १८ घण्टा पनि नबित्दै सभामुख पदबाट महराले नैतिकताको आधारमा राजीनामा दिए । यसबीचमा सत्तारुढ दल नेपाल कम्युनिष्ट पार्टी (नेकपा)को आकस्मिक बैठक बोलाइएको थियो । अध्यक्षद्वय केपी शर्मा ओली र पुष्पकमल दाहालबीच छलफल भएपछि बोलाइएको सचिवालय बैठकले महरालाई सभामुख र सांसद पदबाट राजीनामा गर्न सुझाव दिएको थियो । नैतिकताका आधारमा सचिवालय बैठकले महरालाई राजीनामा गर्न सुझाव दिए पनि उनले सभामुख पदबाट मात्रै राजीनामा दिए ।
महराको राजीनामापत्रबारे प्रमुख प्रतिपक्षी दल नेपाली काँग्रेसले आशंका जनाएको छ । राजीनामा पत्र अपुरो भएको भन्दै पत्रकार सम्मेलनमार्फत् काँग्रेसले आपत्ति जनाएको हो । तर, संविधानविदहरु सहित नेकपाकै नेताहरुले समेत महराको सभामुख यात्रा टुंगिएको प्रतिक्रिया दिएपछि राजनीतिक बहसले मोड लिएको छ । अब नयाँ सभामुख को हुनेदेखि सम्मानित पद धारण गरेकाहरुको आँचरणबारे समेत सर्वाजनिक बहस हुनेछ । निश्चिय नै संविधान कार्यान्वयनको नेतृत्व गरिरहेकाहरुलाई यस्तो आरोप लाग्नुले महरा र नेकपाप्रति सामाजिक प्रतिष्ठा मात्रै नभएर अन्तर्राष्ट्रिय लज्जाको विषय समेत हो ।
यो प्रकरणबाट महरा निर्दोष सावित भएछन् भने पनि नेपालको राजनीतिक इतिहासमा लागेको दाग हट्ने छैन । चीर कालसम्म प्रकरण बहसमा रहनेछ । अन्तरराष्ट्रिय राजनीतिक परिदृष्यमा नेपालको नाम महरा प्रकरणबाट मुक्त हुन सक्ने छैन । यसको प्रष्ट सन्देश भनेको देश र समाजको नेतृत्व गर्नेहरुले आफ्नो आँचरणबारे सँधै चनाखो भएर समीक्षा गरिरहनु पर्नेछ । महरा प्रकरण एउटा नजीर बनेको छ । यो प्रकरण भविष्यका लागि समेत बलियो पाठ बनेको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies