एजेन्सी : कंगोको एउटा चर्चमा भएको बम विस्फोटमा कम्तिमा १० जनाको मृत्यु भएको छ । घटनामा ३९ जना घाइते भएका छन् ।
घाइतेहरुको अवस्था गम्भीर रहेकाले मृतकको संख्या बढ्न सक्ने अनुमान गरिएको छ ।
युगान्डासँगको सीमावर्ती सहर कसिन्दीस्थित उक्त चर्चमा आइतबारको प्रार्थना सभा भइरहेको बेला विस्फोट भएको हो ।
आईएसआईएससँग आबद्ध सशस्त्र समूह अलाइड डेमोक्राटिक फोर्सेज–एडीएफले विस्फोटको जिम्मेवारी लिएको छ ।
कंगो र युगान्डाका सेनाले एडीएफविरुद्ध सैन्य अभियान चलाउँदै आएको कसिन्दी क्षेत्रमा विस्फोट भएको हो ।
२०१९ मा आईएसआईएससंग आबद्धता जनाएको समूहलेसयौं निर्दोष गाउँलेको हत्या गरेको आरोप लाग्दै आएकोे छ ।
अप्रिलयता मात्रै एडीएफले ३ सय ७० सर्वसाधारणको हत्या गरेको छ । अन्य सयौं मानिसको अपहरण गरेको राष्ट्रसंघले जनाएको छ ।
एजेन्सी : संघीय उड्ययन प्रशासन (एफएए) को कम्प्युटरमा समस्या आएका कारण बुधबार अमेरिका भरका उडानहरु ठप्प भएका छन् । अमेरिकी फ्लाइट ट्रयाकिङ वेबसाइट (फ्लाइटअवेयर)का अनुसार कम्प्युटरमा समस्या भएपछि पूर्वी क्षेत्रमा एक हजार भन्दा बढी उडानहरू ढिलो भएका हुन् ।संयुक्त राज्य अमेरिकाको आन्तरिक तथा बाह्य गरी करिब १०० भन्दा बढी उडान रद्द भएका छन् ।
ढिलाई भएका अधिकांश उडानहरू रूरूमा पूर्वी क्षेत्रका केन्द्रित भएपनि पछि उनीहरू पश्चिमतर्फ लागेका फ्लाइटअवेयरले जनाएको छ । अमेरिकी वायुसेवा कम्पनीहरूले कम्प्युटरमा आएको प्राविधिक समस्यापछि उडानमा ढिलाइ भएको सूचना जारी गरेका छन् । एफएएले आफ्नो ‘नोटिस टु एयर मिसन सिस्टम’लाई पुनः स्थापित गर्न काम गरिरहेको बताएको छ ।
एफएएले भनेको छ, “हामी अन्तिम प्रमाणिकरणका लागि परीक्षण गरिरहेका छौं र सिस्टमलाई ‘रिफ्रेस’ तथा ‘रिलोड’ गरिरहेका छौं । “राष्ट्रिय वायुसेवा प्रणाली एक्कासी प्रभावित हुन पुगेको छ । एफएएले केही लाइनले काम गर्न थालेका छन्, तर ‘राष्ट्रिय हवाई क्षेत्र प्रणाली’ सञ्चालन सीमित भएको छ । यातायात मन्त्री पीट बटिजिगले ट्वीटरमा एक विज्ञप्ति जारी गर्दै भन्नुभएको छ, “म एफएएसँग सम्पर्कमा छु र स्थितिबारे जानकारी लिइरहेको छु ।
युनाइटेड एयरलाइन्सले सबै आन्तरिक उडानमा अस्थायी रूपमा ढिलाइ गरेको र एफएएबाट थप जानकारी पाएपछि अद्यावधिक जारी गर्ने बताएको छ । एफएएले ‘नोटिस टु एयर मिसन सिस्टम’को रूपमा चिनिने प्रणालीलाई पुनः स्थापना गर्न काम गरिरहेको बताएको छ ।
एजेन्सी : पेरुमा सरकार विरोधी प्रदर्शनले हिंसात्मक रुप लिँदै गएपछि एक जना प्रहरी अधिकृतको ज्युँदै जलाएर हत्या गरिएको छ । पूर्व राष्ट्रपति पेड्रो कास्टिलोलाई अपदस्थ गरेपछि भड्किएको हिंसात्मक प्रदर्शनमा ४७ जना मारिएका छन् ।
एक जना सहकर्मीका साथ गस्तीमा रहेका २९ वर्षीय जोसे लुइस सोनको क्विस्पेलाई सोमबार राति बोलिभिया र टिटिकाका तालको सिमानामा रहेको सहर जुलियाकामा भीडले आक्रमण गरेर उनीहरूको गाडीमा आगो लगाएको थियो ।
करिब तीन सय ५० जना आक्रमणकारीले आफूहरूमाथि आक्रमण गरेका सोनका सहकर्मी रोनाल्ड विलासान्टे टोकले बताएका छन् । गम्भीर घाइते भएका उनले आफ्ना साथीको अवस्थाबारे आफूलाई जानकारी नभएको बताए । लिमास्थित अस्पतालमा उनको उपचार भइरहेको छ ।
एजेन्सी : पेरुका राष्ट्रपति डिना बोल्वार्टेमाथि सरकार विरोधी प्रदर्शनमा दमन गरेको अभियोगमा अनुसन्धान थालिएको छ । गत डिसेम्बरदेखि भएका सरकार विरोधी प्रदर्शनमा कम्तीमा ४० जना मारिएपछि राष्ट्रपतिको भूमिकालाई लिएर छानबिन थालिएको हो ।
प्रदर्शनकारी र सुरक्षाकर्मीबीच सोमबार भएको झडपमा १८ जनाको मृत्यु भएपछि मङ्गलबार हिंसात्मक प्रदर्शन दबाउन सरकारले दक्षिणी पुनो क्षेत्रमा निषेधाज्ञा ९कफ्र्यु० आदेश जारी गरेको छ ।
अपुरिमक, ला लिबर्टाड, पुनो, जुनिन, अरेक्विपा र अयाकुचो क्षेत्रमा सरकार विरोधी प्रदर्शनका क्रममा भएका दमनमा राष्ट्रपतिको भूमिकालाई लिएर अनुसन्धान भइरहेको सरकारी अभियोजन कार्यालयले जनाएको छ । डिसेम्बर ७ मा पूर्वराष्ट्रपति पेड्रो कास्टिलोका समर्थकहरूले बोल्वार्टेविरुद्ध आन्दोलन गर्दै आएका छन् ।
जारी विरोध प्रदर्शन दबाउन राज्यशक्तिको प्रयोग हुँदा कैयौँ नागरिकको मृत्यु भएकामा पेरुस्थित राष्ट्रसङ्घीय कार्यालयले गहिरो चिन्ता व्यक्त गरेको छ । हिंसात्मक गतिविधि परित्याग गर्न सम्बद्ध पक्षलाई आग्रह गर्दै राष्ट्रसङ्घले शान्तिपूर्ण विरोध गर्ने अधिकार एवम् आधारभूत मानव अधिकारको सम्मान गर्न आग्रह गरेको छ ।
पेरुका प्रभावशाली क्याथोलिक गिर्जाघरका नेताहरूले देशमा भड्किएको हिंसालाई मुलुक युद्धको अवस्थामा पुगेको टिप्पणी गरेका छन् । राज्य बर्बर बनेको आरोप लगाउँदै उनीहरूले संयमित हुन सम्बद्ध पक्षसँग अनुरोध गरेका छन् । पुनाको क्षेत्रीय सरकारले तीन दिनको शोकको घोषणा गर्दै राष्ट्रपति बोल्वार्टेलाई पदत्याग गर्न आह्वान गरेको छ ।
एजेन्सी : ब्राजिलका पूर्वराष्ट्रपति जैर बोल्सोनारोका समर्थकको भिड राष्ट्रपति भवन र संसदमा प्रवेश गरेको छ । बोल्सोनारोका हजारौँ समर्थक संसद् भवन, सर्वोच्च अदालत र राष्ट्रपति भवनमा प्रवेश गरेका हुन् । उनीहरूले देशको सर्वोच्च लोकतान्त्रिक संस्थामा तोडफोड समेत गरेका छन् ।
ब्राजिल फुटबल टिमको जर्सी लगाएका हजारौँ प्रदर्शनकारीले हातमा झण्डा लिएर संसद् भित्र प्रवेश गरेका र उनीहरुले सभामुखको कुर्सीमा चढेर प्रदर्शन गरेका बीबीसीले जनाएको छ । कतिपय संसद्को छतमा चढेका छन् । यस्तै, कतिपयले तोडफोड गरेका छन्, संसद्को झ्याल फुटाइएको छ ।
ब्राजिलका राष्ट्रपति लुला डा सिल्भाले घटनाको भर्त्सना गर्नु भएको छ । गएको अक्टोबरमा भएको राष्ट्रपतीय चुनावमा बोल्सोनारोलाई लुला डा सिल्भाले पराजित गर्नु भएको थियो । त्यसपछि बोल्सोनारोका समर्थकले चुनावी परिणामहरू अस्वीकार गर्दै आएका छन् ।
यसैबीच घटनाको अमेरिकी राष्ट्रपति जो बाइडेन र विदेशमन्त्री एन्टोनी ब्लिन्केनले पनि भर्त्सना गर्नु भएको छ । यसअघि अमेरिकामा सन् २०२१ को जनवरी ६ तारिखमा यस्तै घटना भएको थियो । तत्कालीन अमेरिकी राष्ट्रपति डोनाल्ड ट्रम्पका समर्थकले अमेरिकी क्यापिटलमा प्रवेश गरेर हिंसा मच्चाएका थिए ।
एजेन्सी : गत वर्ष सरकारविरुद्ध देशव्यापी प्रदर्शनका क्रममा सुरक्षा बलका एक सदस्यको हत्या गरेको अभियोगमा इरानमा दुई जनालाई फाँसी दिइएको छ ।
मोहम्मद महदी करामी र सैयद मोहम्मद होसेनीले आफ्नो सजायको विरुद्धमा अपिल गरेका थिए ।
गत नोभेम्बर ३ मा राजधानी तेहरान नजिकै सडक अवरुद्ध गरेर भईरहेको प्रदर्शनमा एक सुरक्षाकर्मीको हत्या भएको थियो ।
करामीले ति सुरक्षाकर्मीमाथि रडले प्रहार गरेको र हुसैनीले थुप्रै पटक छुरा हानेको स्वीकारेको दावी अदालतको फैसलामा गरिएको छ ।
तर झुटो बयान दिएर यातना दिइएको भन्दै उनीहरुलाई झुण्ड्याएर मृत्युदण्ड दिइएको हो ।
इरानमा चर्किएको आन्दोलनका क्रममा मृत्युदण्ड दिइएका आन्दोलनकारीको संख्या अहिलेसम्म चार पुगेको छ । साथै सयौं जना विरुद्ध मुद्दा चलिरहेको छ ।
इरानको यस कदमको अन्तर्राष्ट्रिय समुदायले निन्दा गरेका छन् । बेलायतका विदेशमन्त्री जेम्स चतुराईले मृत्युदण्डलाई ‘घृणित’ भएको बताएका छन् ।
गत सेप्टेम्बरमा नैतिकता पुलिसद्वारा हिजाब अर्थात हेडकार्फ, ‘अनुचित रूपमा’ लगाएको आरोपमा पक्राउ परेकी २२ वर्षीया युवती महसा अमिनीको हिरासतमा मृत्यु भएपछि लिपिक प्रतिष्ठानविरुद्ध प्रदर्शनहरू भड्किएका थिए ।
एजेन्सी : अमेरिकी प्रतिनिधि सभाले नयाँ सभामुख चयन गरेको छ ।
१५औँ चरणको मतदानपछि शनिबार बिहान कंग्रेस सदस्य एवं रिपब्लिकन नेता केभिन म्याकार्थी सभामुखमा निर्वाचित भएका हुन् ।
यससँगै प्रतिनिधिसभामा विगत केही दिनदेखि जारी राजनीतिक गतिरोध अन्त्य भएको विश्वास गरिएको छ ।
५७ वर्षीय केभिन म्याकार्थीले प्रतिनिधि सभामा डेमोक्रयाटिक पार्टीकी ८२ वर्षीया न्यान्सी पेलोसीको स्थान लिएका छन् ।
नोभेम्बर ८ मा भएको मध्यावधि निर्वाचनमा ४ सय ३५ सदस्यीय प्रतिनिधिसभामा रिपब्लिकन पार्टीले २२२ सिट जितेको थियो ।
एजेन्सी : ‘अर्थोडक्स’ क्रिसमसको समयसँग जुध्नेगरी राष्ट्रपति भ्लादिमिर पुटिनले घोषणा गरेका ३६ घण्टे युद्धविरामको प्रस्ताव युक्रेनको अस्वीकार गरेको छ ।
युक्रेनी सेनाको अग्रतालाई रोक्ने र रुसी सैनिकलाई युद्धमोर्चानजिक पुग्न दिने प्रयास स्वरूप मस्कोद्वारा युद्धविराम घोषणा गरिएको युक्रेनको दाबी छ ।
युक्रेनी राष्ट्रपति भोलोदोमिर जेलेन्स्कीले पूर्वी डोन्बास क्षेत्रमा युक्रेनी फौजलाई अगाडि बढ्नबाट रोक्ने तथा आफ्ना थप फौज एवं उपकरणहरू ल्याउने उद्देश्यका साथ पुटिनले युद्धविरामलाई अगाडि सारेको आरोप लगाएका हुन् ।
युक्रेनी विदेशमन्त्री दिमित्रो कुलेबाले अधिनस्थ क्षेत्रबाट रुसी फौजहरू फिर्ता नभएसम्म अस्थायी युद्धविराम नहुने बताएका छन् ।
अमेरिकाका राष्ट्रपति जो बाइडनले भने पुटिनले केही राहत खोज्ने प्रयत्न गरेको टिप्पणी गरेका छन् ।
मस्कोको समय अनुसार शुक्रवार राति १२ बजेबाट युद्धविराम शुरू हुनेछ ।
रुसी ‘अर्थोडक्स’ गिर्जाघरका प्रमुख प्याट्रिआर्क किरिलले गरेको अपिल अनुसार आफूले सेनालाई युद्धविराम गर्न आदेश दिएको पुटिनले बताएका छन् । रुसी अर्थोडक्स गिर्जाघरले जनवरी सात तारिखमा क्रिसमस मनाउने गरेको छ ।
एजेन्सी : अमेरिकी संसद्को तल्लो सदन हाउस अफ रेप्रिजेन्टेटिभ्स, तीन चरणको मतदानबाट पनि नयाँ सभामुख चयन गर्न असफल भएको छ ।
संसद्मा विपक्षी रिपब्लिनकन पार्टीको बहुमत भए पनि सो पार्टीका नेता केभिन म्याकार्थीले आफनै दलका सांसदको मत प्राप्त असफल भएका हुन् ।
तीन चरणको प्रयासमा पनि म्याकार्थीले आफ्नै संसदीय दलका सांसदको समेत विश्वास जित्न नसकेपछि संसद्को बैठक अर्को दिनसम्मका लागि स्थगित गरिएको छ ।
पहिलो दुई चरणको मतदानमा १९ जना रिपब्लिकन सांसदले म्याकार्थीको विपक्षमा मतदान गरेका थिए । तेस्रो चरणमा जाँदा यो संख्या २० पुगेको थियो ।
४ सय ३५ सदस्यीय तल्लो सदनमा रिपब्लिकनका २ सय २२ र डेमोक्रयाटका २ सय १२ सांसद छन् । एक स्थान रिक्त छ ।
सभामुख निर्वाचित हुन सामान्य बहुमत अर्थात २ सय १८ मत पाउनु आवश्यक हुन्छ ।
आफनो दलको २२२ मत हुँदा–हुँदै पनि दलभित्रकै २० जना कट्टरपन्थी सांसदका कारण ५७ वर्षीय म्याकार्थी राष्ट्रपति र उपराष्ट्रपति पछिको तेस्रो शक्तिशाली पद पाउनबाट वञ्चित हुनुपरेको हो ।
डेमोक्रयाटिक पार्टीले संसदीय दलका अध्यक्ष हकिम जेफ्रिजलाई उम्मेदवार बनाएको थियो । अन्तिम चरणको मतदानमा म्याकार्थीको २०२ मतविरुद्ध जेफ्रिजले २१२ मत पाए पनि सभामुख निर्वाचित भने हुन सकेनन् ।
सभामुख निर्वाचित हुन बढी मत मात्रै ल्याएर हुँदैन ५० प्रतिशतभन्दा बढी मत अर्थात् बहुमत ल्याउनु आवश्यक पर्छ ।
अमेरिकामा सभामुख चयन नहुँदासम्म सांसदहरुले शपथग्रहण नपाउने व्यवस्था छ ।
अमेरिकी राजनीतिक इतिहासमा नवनिर्वाचित संसद्को पहिलो बैठकले सभामुख छान्न नसकेको घटना करिब एक सय वर्षपछि भएको हो ।
एजेन्सी : युक्रेनले आफ्नो एक क्षेप्यास्त्र हमलामा परेर अधीनस्थ डोनेस्क क्षेत्रको पूर्वी भागमा झण्डै चार सय रुसी सैनिकहरूको मृत्यु भएको दाबी गरेको छ । आक्रमणमाा करिब तीन सय सैनिक घाइते भएका छन् ।
रुसको रक्षा मन्त्रालयले भने ६३ जना सैनिकहरू मारिएको पुष्टि गरेको छ । सैनिकहरू अस्थायी रुपमा तैनाथ भएको बेला आक्रमण भएको रुसको भनाइ छ ।
डोनेस्कको अधिनस्त क्षेत्रमा रहेका रुस समर्थित अधिकारीले म्याकिइभकामा नयाँ वर्षको दिन मध्यरातको दुई मिनेटपछि क्षेप्यास्त्र प्रहार भएको जनाएका छन् । दुबैतर्फको दाबीको स्वतन्त्र पुष्टि भने हुन सकेको छैन ।
युक्रेनले क्षेप्यास्त्र रुसी फौजहरू रहेको ठानिएको म्याकिइभका सहरको एक सीपमूलक विद्यालय भवनलाई लक्षित गरी प्रहार गरेको बताइएको छ ।
सैनिक मारिएको भवन लगभग पूरै ध्वस्त भएकोे बताइएको छ । गोलाबारूद समेत त्यसै भवनमा राखिएको कारण क्षति ठुलो भएको बताइएको छ ।
आक्रमणमा अमेरिकाले उपलब्ध गराएको एमएलआरएस हाइमार्स भनिने क्षेप्यास्त्र प्रयोग भएको रुसको दाबी छ । युक्रेनले सो क्षेप्यास्त्रको प्रयोगको विषयमा कुनै पुष्टि गरेको छैन ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies