काठमाडौं : नेकपा माओवादी केन्द्रले इलाम–२ को उपनिर्वाचनमा नेकपा एमालेका उम्मेदवार सुहाङ नेम्वाङलाई सघाउने भएको छ ।
माओवादीले यहाँबाट धीरेन्द्र शर्माको एकल नाम सिफारिस गरेको थियो । तर शर्मालाई नाम फिर्ता लिन लगाएर एमालेलाई सहयोग गर्ने माओवादीले निर्णय गरेको हो ।
इलाम–२ मा वैशाख १५ गते उपनिर्वाचन हुँदैछ । एमालेबाट सुहाङ, राष्ट्रिय स्वतन्त्र पार्टीबाट मिलन लिम्बु, राष्ट्रिय प्रजातन्त्र पार्टीबाट लक्ष्मी गुरुङ, एकीकृत समाजवादीले जीतबहादुर राई, जनमतबाट प्रेमदीप थाम्सुहाङ, पहिचानवादीबाट डगेन्द्रसिंह थेगिमले उम्मेवार बनेका छन् ।
काठमाडौं- लगानी बोर्ड नेपालको ५७औ बोर्ड बैठक बस्न लागेको छ । प्रधानमन्त्री पुष्पकमल दाहाल ‘प्रचण्ड’ को अध्यक्षतामा बोर्डको कार्यालय नयाँ बानेश्वरमा बैठक बस्न लागेको हो ।
आगामी बैशाख १६ र १७ गते हुन लागेका तेस्रो लगानी सम्मेलनको तयारीका सन्दर्भमा छलफल गर्न बैठक बस्न लागेको प्रधानमन्त्रीको सचिवालयले जनाएको छ ।
काठमाडौं - जनता समाजवादी पार्टी जसपा नेपालको केन्द्रीय कार्यकारिणी समितिको बैठक सुरु भएको छ । आज बिहान पार्टी केन्द्रीय कार्यालय ललितपुरको बालकुमारीमा सुरु भएको सो बैठकमा समानुपातिक सांसद चयनका विषयमा छलफल हुने बताइएको छ ।
सो पार्टीका केन्द्रीय प्रचार–प्रसार तथा प्रकाशन विभाग प्रमुख पूर्ण बस्नेतले समानुपातिक सांसद मञ्जु शर्मा अन्सारीको निधन भएपछि रिक्त रहेको स्थानमा जसपाले नयाँ सांसदको नाम सिफारिस गर्ने जानकरी दिए ।
साथै बैठकमा आगामी वैशाखमा हुन गइरहेको उपनिर्वाचनका साथै पार्टीको राष्ट्रिय महाधिवेशनलगायतका विषयमा पनि छलफल हुने उनले बताए ।
मुकुन्द लामिछाने/मध्यान्ह
काठमाडौं : राष्ट्रिय प्रजातन्त्र पार्टी (राप्रपा) ले कांग्रेसलाई साथ दिने भएको छ । नेपाली कांग्रेस संघीय संसदमा सबैभन्दा ठूलो दल हो भने अधिकांश प्रदेशसभामा पनि पहलो दल छ । पहिलो दल भएर पनि प्रमुख प्रतिपक्षमा पुगेपछि कांग्रेसले राप्रपाको साथ खोजेको थियो । निरन्तरको प्रयासपछि राप्रपाले कांग्रेसलाई साथ दिने निर्णय गरेको छ ।
बुधबार काठमाडौंमा राप्रपाको पदाधिकारी बैठक बसेको थियो । उक्त बैठकले प्रदेश सरकार निर्माणका क्रममा एमाले नेतृत्वको सत्ता गठबन्धनलाई समर्थन नगर्ने निर्णय गरेको छ । राप्रपाका प्रवक्ता मोहन श्रेष्ठका अनुसार, आफूहरुको समर्थनबिना सरकार नै नबन्ने परिस्थिति बनेमा समेत हाल कायम संघीय सरकार चलाइरहेको सत्ता गठबन्धनलाई समर्थन नगर्ने निर्णय भएको छ । अर्थात् प्रदेश सरकार निर्माणमा राप्रपाले कांग्रेस नेतृत्वमा बन्ने विपक्षी गठबन्धनलाई साथ दिनेछ ।
यो सँगै राप्रपाले राष्ट्रिय राजनीतिमा आफ्नो कित्ता फेरेको छ । ४ मंसिर २०७९ मा भएको आमचुनावमा चुनावी तालमेल गर्दै लामो समयदेखि एमालेसँग साझेदारीमा रहँदै आएको राप्रपाले बुधबार संघीय संसद र प्रदेश सभामा कांग्रेससँग सहकार्य गर्ने निर्णय लिएर कित्ता फेरेको हो ।
१० पुस २०७९ एमाले पहलमा प्रचण्ड प्रधानमन्त्री बन्दा राप्रपाले साथ दिएको थियो । राप्रपाका अध्यक्ष राजेन्द्र लिङ्देन उपप्रधानमन्त्रीसहित सरकारमा सहभागी भएका थिए । पछि प्रचण्डले कांग्रेससँग गठबन्धन गरेपछि एमालेसँगै राप्रपा पनि सरकारबाट बाहिरिएको थियो ।
गत २१ फागुनमा प्रधानमन्त्री प्रचण्डले कांग्रेससँगको गठबन्धन फेरेर फेरि एमालेसँग नयाँ समीकरण बनाएपछि राप्रपाले कुनै निर्णय लिएको थिएन । एमालेले आफू नेतृत्वको सत्ता गठबन्धनमै रहन गरिरहेको आग्रह अस्वीकार गर्दै आएको राप्रपाले केन्द्रीय कार्यसम्पादन समितिको बैठकबाट प्रदेश सरकारलाई पार्टीले समर्थन गर्नुपरेको खण्डमा परिस्थिति हेरेर मत दिने तर सरकारमा भने नजाने निर्णय गरेको थियो ।
तर बुधबार राप्रपाले सरकार बनाउन आवश्यकताअनुसार मत दिने, तर एमाले नेतृत्वको गठबन्धनलाई नदिने निर्णय गरेको छ । यो निर्णयसँगै राप्रपा कांग्रेसको कित्तामा पुगेको हो ।राप्रपाको यस्तो निर्णयसँगै संघीय सरकारमा प्रतिपक्षमा रहेका दलहरुको प्रदेश सभामा सरकार बन्ने अवस्थाको सिर्जना गरिदिएको छ ।
गण्डकी प्रदेश सरकार बनाउन राप्रपा निर्णायक दल रहेको छ । यो प्रदेशमा ठुलो दलको हैसियतमा कांग्रेस छ । कांग्रेसले नै सरकार निर्माणको पहल गरिरहेका बेला राप्रपाले एमाले नेतृत्वको गठबन्धनलाई मत नदिने निर्णय लिएको हो ।
बुधबारको निर्णयमा राप्रपा अडिग रहे गण्डकी प्रदेशमा सरकार बनाउने एमालेको सपना पूरा नहुन सक्छ । संघीय सत्ता गठबन्धनमा गण्डकी प्रदेशको नेतृत्व एमालेले लिने सहमति छ ।
गण्डकी प्रदेशका मुख्यमन्त्री सुरेन्द्र पाण्डेले राजीनामा दिएसँगै गण्डकीका प्रदेश प्रमुखले नयाँ सरकार गठनका लागि यही चैत २७ गतेसम्मको समय दिएका छन् । ६० सदस्यीय गण्डकी प्रदेश सभामा सरकार बनाउन आवश्यक ३१ मत आवश्यक पर्छ ।
संघीय सत्ता गठबन्धनमा रहेका दलहरु एमालेका २२, माओवादीका ८ जना सांसद छन् । तर गत चुनावमा संयुक्त चुनाव लडेका नेपाल समाजवादी पार्टीका फणीन्द्र देवकोटाले कांग्रेसका लागि फ्लोरक्रस गर्ने तयारी गरेको बताइन्छ । यसो भएको खण्डमा नयाँ गठबन्धनसँग २९ मत मात्रै हुनेछ ।
स्वतन्त्र चुनाव जितेका दिपक मनाङे यसअघि नेकपा एकीकृत समाजवादीमा प्रवेश गरेका थिए । तर हाल एकीकृत समाजवादी छाडेर कांग्रेस नेतृत्वको सरकारमा सहभागी भएर उनले आफूलाई कांग्रेसको कित्तामा प्रस्तुत गरेका छन् ।
कांग्रेससँग २७ सांसद छन् । राप्रपासँग दुई जना सांसद छन् । दिपक मनाङेको साथ पाउँदा कांग्रेसको पक्षमा ३० मत पुग्छ । फ्लोर क्रस गरेर नेसपाका फणीन्द्र देवकोटाले साथ दिए कांग्रेसको पक्षमा ३१ सांसद पुग्छ ।
त्यसपछि फ्लोरक्रस गरेका फणीन्द्र देवकोटाको पद गए पनि सरकार बनाउन आवश्यक ३० संख्या कांग्रेससँग रहनेछ । तर यसका लागि कांग्रेसले राप्रपाको साथै दिपक मनाङेको पनि विश्वास जितिरहनु आवश्यक हुन्छ ।
दिवाकर अधिकारी/मध्यान्ह
काठमाडौं : सभापति शेरबहादुर देउवाले राखेको प्रस्तावमा अरु नेताले असहमति जनाएपछि उपनिर्वाचनका लागि बुधबार पनि नेपाली कांग्रेसले उम्मेद्वार चयन गर्न सकेन । संसदीय बोर्डको बैठकमा सभापति देउवाले इलाम–२ मा डम्बर खड्का र बुझाङ (क) मा अभिषेक सिंहलाई उम्मेद्वार बनाउनेबारे प्रस्ताव गरेका थिए ।
तर सभापति देउवाको प्रस्तावमा अरु नेताहरुले असहमति जनाए । विशेषगरी महामन्त्रीद्वय गगन थापा र विश्वप्रकाश शर्माले असहमति जनाएको बैठकमा सहभागी एक नेताले बताए । ती नेताका अनुसार, महामन्त्रीहरु थापा र शर्माले इलाममा भेषराज आचार्यलाई टिकट दिनुपर्ने अडान राखेका थिए ।
सभापति देउवाले भने गत चुनावमा सुवास नेम्वाङसँग कडा प्रतिस्पर्धा गरेका खड्कालाई टिकट दिनुपर्ने प्रस्ताव गरेका थिए । ‘अस्ति थोरैले मात्रै हारेको हो, अब जित्छ’ देउवाको तर्क थियो । जिल्ला सभापति समेत रहेका खड्का एमालेका तत्कालीन उपाध्यक्ष एवं संविधानसभाका अध्यक्ष सुवास नेम्वाङसँग ११४ मतले पराजित भएका थिए ।
तर ३० हजार २० मत ल्याएर गत वर्षको आमनिर्वाचन जितेका नेम्वाङको निधन भएपछि आगामी १५ वैशाखमा उपनिर्वाचन हुँदैछ । उक्त उपनिर्वाचनका लागि २४ चैतमा उम्मेद्वारी दर्ता हुने कार्यतालिका निर्वाचन आयोगले सार्वजनिक गरेको छ । यो उपनिर्वाचनका लागि कांग्रेस इलामले खड्का र आचार्य सहित केशव थापा, नगेन्द्र कुमाल, रमेश लिङ्देन, चन्द्रमाया लिम्बु र शान्तिकला राईको नाम सिफारिस गरेको छ ।
सिफारिस भएका सात मध्ये अरु पाँच जनाले टिकट नपाउने लगभग पक्का जस्तो छ । किनकि सभापति देउवाले खड्का र संस्थापन इतर पक्षले आचार्यको अडान लिएको छ । महामन्त्री थापा र शर्माले आचार्यलाई टिकट दिदा उपनिर्वाचन जितिने तर्क गरेका छन् ।
स्रोतका अनुसार बझाङको प्रदेशसभाबारे भने धेरै मतभेद छैन । गत आमचुनाव जितेका सांसदकै छोराको नाम सिफारिस भएकाले उनकै संभावना बलियो छ । तर इलाममा भने नेताहरुको अडानका कारण कांग्रेसले उम्मेद्वार टुंग्याउन सकेको छैन ।
जबकी अरु दलहरुले भने उम्मेद्वार टुंग्याएर प्रचार अभियान नै थालिसकेको छ । राष्ट्रिय स्वतन्त्र पार्टी (रास्वपा) ले गत १७ फागुनमा आमसभा गरेरै मिलन लिम्बुलाई उम्मेद्वार घोषणा गरेको छ । त्यसअघि नेकपा एमालेले उम्मेद्वार टुंग्याएको थियो । एमालेले सुवासकै छोरा सुहाङलाई उम्मेद्वार बनाएको छ । सुहाङ चुनावी अभियानमा जुटिसकेको छ ।
राप्रपाले लक्ष्मी गुरुङ, नेकपा एकीकृत समाजवादीले जीतबहादुर राई र पहिचान पक्षधरहरुले थेकेन्द्रसिं थेगिमलाई साझा उम्मेद्वार बनाएको छ । थेगिमले बुधबार चुनावी सभा गरेको थियो । तर सरकारको नेतृत्व गरिरहेको नेकपा माओवादी केन्द्रसँगै कांग्रेसले भने अझै उम्मेद्वार समेत घोषणा गर्न सकेको छैन ।
धनकृष्ण वि.क/मध्यान्ह
बाजुरा : नेकपा एमाले जिल्ला कमिटी बाजुराले पार्टीको आठौं जिल्ला अधिवेशन आगामी जेठ १ देखि ३ गतेसम्म मार्तडीमा सम्पन्न गर्ने निर्णय गरेको छ ।
मार्तडी पार्टी कार्यालयमा बसेको १३ औं जिल्ला कमिटीको पूर्ण बैठकले पार्टीको आठौं जिल्ला अधिवेशन जेठ महिनामा सम्पन्न गर्ने निर्णय गरेको हो ।
यसअघिको बैठकले माघ २६ गते देखि २८ गते निर्वाचन क्षेत्र नं ‘क’को कोल्टीमा गर्ने र त्यसपछिको बैठकले माघ २६ देखि २८ सम्म नेकपा एमाले बाजुराको जिल्ला अधिवेशन गरिसक्ने बताए पनि सो अवधिमा जिल्ला अधिवेशन हुन नसकेको पार्टी सचिव काँसी वि.कले बताएका छन् ।
काठमाडौं - लुम्बिनी प्रदेश सभाको चौथो अधिवेशन आव्हान गरिएको छ । प्रदेश प्रमुख अमिक शेरचनले सभाको चौथो अधिवेशन चैत २२ गते बिहीबार दिउँसो ४ बजे बस्नेगरी आह्वान गरेका हुन् । सोही अह्वानपछि प्रदेश सभाले सूचना प्रकाशित गरेर अधिवेशन बोलाएको हो । यसअघि तेस्रो अधिवेशन ३ दिन मात्रै बसेर चैत १ गते आकस्मिक रुपमा अन्त्य गरिएको थियो । बिहीबारको सभा अल्पमतमा रहेका मुख्यमन्त्री डिल्लीबहादुर चौधरीले विश्वासको मत लिने वा सो सभालाई सम्बोधन गरेर राजीनामा दिने विषयमा केन्द्रित हुनेछ ।
प्रदेश सभाको तेस्रो अधिवेशन ६ महिनापछि फागुन १८ गते बोलाइएको थियो । त्यसको पहिलो बैठकमा ५ मिनेट सभामुख तुलाराम घर्तीले प्रदेश प्रमुख कार्यालयबाट आएका पत्र पढेर सुनाएर सकिएको थियो । १९ गते प्रधानमन्त्री पुष्पकमल दाहालको प्रदेश सभामा विशेष सम्बोधन भएर सकिएको थियो भने २० गते पनि मुख्यमन्त्री नबसेपछि दलका नेताहरु नबोली सकिएको थियो ।
सामान्य औपचारिकताका लागि ६ महिनापछि बसेको हिउँदे अधिवेशन चैत ४ गतेसम्मका लागि स्थगित गरिएको थियो । तर चैत ४ गते बोलाइएको बैठक मन्त्रिपरिषद बैठकले चैत १ गते नै स्थगित गर्ने निर्णयपछि २ गते स्थगित गरिएको थियो ।
काठमाडौँ- प्रधानमन्त्री पुष्पकमल दाहाल ‘प्रचण्ड’ले वैदेशिक रोजगारीमा रहेका तथा स्वदेशमै रहेका श्रमिकहरूको अधिकार संरक्षणका लागि सरकारले ऐतिहासिक पहलकदमी लिएको बताएका छन् । प्रधानमन्त्री प्रचण्डले मिटरब्याज लगायतका सामन्ती शोषणको चक्र अन्त्य गर्न पनि सरकार लागिपरेको बताए ।
राष्ट्रपति रामचन्द्र पौडेल समक्ष नेपाल सरकारको आर्थिक वर्ष २०७९÷०८० को वार्षिक प्रतिवेदन पेश गर्दै प्रधानमन्त्री ‘प्रचण्ड’ले सुशासनका कैयौँ मानकहरू स्थापित गर्न सरकार सफल भएको बताए । उनले भने, ‘नागरिकता, राहदानी, लाइसेन्स, विदेशमा अध्ययनका लागि लागि नो अब्जेक्सन लेटर लगायतका सेवाहरूका लागि घण्टौंसम्म लाइन लाग्नुपर्ने अवस्थाको अन्त्य गरिएको छ ।’ राज्यले नागरिकलाई प्रदान गर्दै आएका सेवाप्रवाह थप प्रभावकारी, झन्झटमुक्त र सहज बनाई राज्यबाट प्रवाह हुने सेवामाथि सबैको पहुँच पुर्याउन आफू नेतृत्वको सरकार प्रतिबद्ध रहेको प्रधानमन्त्री प्रचण्डले स्पष्ट पारे ।
गत शैक्षिक सत्रदेखि विद्यालयमा भर्नासँगै विद्यार्थीहरूका हातमा पाठ्यपुस्तक पुग्ने अवस्था सुनिश्चित भएको उल्लेख गर्दै प्रधानमन्त्री प्रचण्डले बाली लगाउने समयमा किसानलाई मल अभाव हुने विगतको अवस्था समेत अन्त्य गरिएको बताए । उनले भने, ‘मल खरिद एवं आपूर्ति व्यवस्थापनमा बजेटको अभाव हुन नदिनेगरी चालु आर्थिक वर्षका लागि समेत बजेट सुनिश्चित गरिएको छ ।’ संविधानले व्यवस्था गरेका मौलिक हकहरूको कार्यान्वयन तथा सङ्घीयता संस्थागत गर्न आवश्यक पर्ने कानुन तर्जुमाको प्रक्रियालाई तीब्ररूपमा अगाडि बढाइएको जानकारी दिँदै प्रधानमन्त्री प्रचण्डले सामाजिक न्याय स्थापना गर्न संविधानले निर्दिष्ट गरेका सिद्धान्त कार्यान्वयनलाई सरकारले प्राथमिकतामा राखेको बताए ।
वित्तीय सङ्घीयता कार्यान्वयनका लागि सरकारले पारदर्शी र वस्तुनिष्ठ आधारमा अध्ययन, अनुसन्धान र विश्लेषण गरी वित्तीय हस्तान्तरण गर्ने व्यवस्था गरेको बताउँदै प्रधानमन्त्री प्रचण्डले तीनै तहको कार्यविस्तृतीकरण परिमार्जन गरी स्पष्ट बनाउने विषयलाई पनि उच्च प्राथमिकतामा राखेर काम गरिरहेको जानकारी दिए । देशको समग्र विकासमा निर्णायक महत्त्व राख्ने जलविद्युत् क्षेत्रको विकासमा उल्लेखनीय सुधार भएको बताउँदै प्रधानमन्त्री प्रचण्डले यस अवधिमा विद्युत् उत्पादन र प्रशारण लाइन विस्तारसँगै अन्तरदेशीय विद्युत् व्यापारका लागि बलियो आधार तयार गर्न सरकार सफल भएको स्पष्ट पारे । सरकारले गरेका घनिभूत प्रयासका कारण देशको आर्थिक अवस्था लयमा फर्किएको उल्लेख गर्दै प्रधानमन्त्री प्रचण्डले अधिकांश आर्थिक सूचकाङ्कहरू सकारात्मक बन्दै गएको पनि बताए ।
सुर्खेत - कर्णाली प्रदेशका मुख्यमन्त्री राजकुमार शर्माले पनि राजीनामा दिने भएका छन् । आजै बस्ने प्रदेश सभा बैठकलाई सम्बोधन गरेर राजीनामा दिने उनको तयारी छ ।
सत्ता गठबन्धनमा भएको भागबन्डामा कर्णाली प्रदेशको मुख्यमन्त्री एमालेको भागमा परेको थियो । तर माओवादी केन्द्रका संसदीय दलका नेता समेत रहेका मुख्यमन्त्री शर्मा सरकार छाड्न तयार भएनन् । प्रदेश सभाबाट विश्वासको मत लिएपछि मात्र केन्द्रमा भएको सहमति कार्यान्वयन गर्ने माओवादी सांसदहरूको अडान थियो । तर प्रधानमन्त्री समेत रहेका माओवादी केन्द्रका अध्यक्ष पुष्पकमल दाहाल प्रचण्डले फोनमार्फत एमालेलाई नेतृत्व हस्तान्तरण गर्न निर्देशन दिए ।
प्रचण्डको फोनपछि मुख्यमन्त्री शर्माले एमालेका नेताहरूसँग समेत छलफल गरेका थिए । त्यसपछि मुख्यमन्त्री शर्मा राजीनामा दिन तयार भएका हुन् । प्रदेश सभाको बैठक अहिले ३ बजे बोलाइएको छ । सोही बैठकबाट विश्वासको मत लिने मुख्यमन्त्री शर्माको सोचमा रहेका शर्माले राजीनामा दिने तयारी गरेका छन् ।
पोखरा : गण्डकी प्रदेश प्रमुख डिल्लीराज भट्टले नयाँ सरकार गठनका लागि आह्वान गरेका छन् । संविधानको धारा १६८ को उपधारा (२) बमोजिम सरकार गठनका लागि दाबी पेस गर्न ७ दिनको समय दिइएको छ ।
बहुमत प्राप्त गर्न सक्ने दलले चैत २७ गते दिउँसो ३ बजेभित्र दाबी पेश गर्नुपर्नेछ । केन्द्रमा सत्ता गठबन्धन फेरिएपछि मुख्यमन्त्री पाण्डेले २२ फागुनमा माओवादी केन्द्रका मन्त्रीहरु बर्खास्त गरेका थिए । त्यसपछि २३ फागुनमा माओवादीले उनलाई दिएको समर्थन फिर्ता लिएको थियो । मुख्यमन्त्री पाण्डेले बुधबार बिहान राजीनामा दिएका थिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies