आबिद हुसेन/मध्यान्ह
बारा- बाराबाट प्रहरीले तस्करीको आशंकामा झण्डै दुई करोड रुपैयाँ मुल्यको सूर्तीसहित दुई वटा मालवाहक ट्रक नियन्त्रणमा लिएको हो । वीरगन्जबाट नारायणगढ तर्फ जाँदै गरेको दुईवटा ट्रकबाट प्रहरीले तस्करीको आशंकामा १ करोड ९७ लाख ३६ हजार ३ सय ७६ रुपैयाँ मुल्य बराबरको सूती बरामद गरेको हो ।प्रहरीले उक्त सुर्ती लोड गरिएको दुवै ट्रकपनि नियन्त्रणमा लिएको छ ।
बाराका प्रहरी प्रवक्ता प्रहरी नायब उपरीक्षक दधिराम न्यौपानेका अनुसार , आइतबार वीरगन्जबाट नारायणगढ तर्फ जाँदै गरेका ना ६ ख ७६७ र ना ८ ख ९४ नम्बरको ट्रक प्रहरी चौकी पथलैयाबाट खटिएकोे प्रहरी टोलीले पथलैयामा रोकेर चेकजाँच गरेकोे थियो । त्यसक्रममा ना ६ ख ७६७ नम्बरको ट्रकबाट १ करोड ३३ लाख ९९ हजार ८४८ रुपैयाँ मुल्यको ३ सय ५६ बोरा र ना ८ ख ९४ नम्बरको ट्रकबाट ६३ लाख ३६ हजार ५२८ रुपैयाँ मुल्यको ३२० बोरा सुर्ती बरामद भएको न्यौपानले जानकारी दिए । ट्रकमा लोड रहेको सुर्तीको बिलबिजक शंकास्पद भेटिएपछि नियन्त्रणमा लिइएको उनले बताए ।
सुर्तीसहित नियन्त्रणमा लिइएका दुवै ट्रक आवश्यक अनुसन्धानका लागि राजश्व अनुसन्धान कार्यालय पथलैयामा बुझाइएको प्रहरी नायब उपरीक्षक न्यौपानले जानकारी दिए ।
काठमाडौं - माओवादी केन्द्रका उपाध्यक्ष कृष्णबहादुर महरा पक्राउ परेपछि नेपाली काँग्रेसले सरकारलाई धन्यवाद दिएको छ । नेपाली कांग्रेसका महामन्त्री गगन थापाले सोमबारको प्रतिनिधिसभा बैठक बोल्दै महामन्त्री महरालाई पक्राउ गरेकोमा सरकारलाई धन्यवाद दिएका हुन् ।
‘केही समयअगाडि तत्कालीन प्रतिपक्षी नेकपा एमालेले जोडदार ढङ्गले उठायो । सुन तस्करी प्रकरणमा शक्तिशाली मान्छे संलग्न भएका छन् । त्यसैले प्रहरीको नियमित अनुसन्धानबाट उनीहरूमाथिको छानबिन सही टुङ्गोमा पुग्न सक्दैन ।’ उनले भने, ‘शक्तिशालीलाई लुकाउने प्रपञ्च भएको रहेछ भन्ने तत्कालीन प्रतिपक्षको आशङ्का सही साबित भयो । आयोगले प्रतिवेदन बुझाएको छ । भर्खर कृष्णबहादुर महरा पक्राउ पर्नुभयो भन्ने हामीले सुन्यौँ । सरकारलाई धन्यवाद छ ।’
सुन छानबिन आयोगले किटान गरेको एउटा मान्छे पनि छुट्न नहुने भन्दै सरकारलाई आफूहरूको पूर्ण साथ रहने थापाले बताए ।
कैलाली - आगलागीका कारण बन्द भएको कर्णालीको पुुल खुलेको छ । आगलागीबाट भएको क्षतिको परीक्षणपछि पुल सोमबार बिहानदेखि खुलेको हो ।
नेपालगञ्जस्थित सडक डिभिजन कार्यालय इन्जिनियर नीरज शाक्यले पुलको अवस्थाका बारेमा स्थलगत परीक्षणपछि विज्ञसँग छलफल गर्दा त्यसबाट आवागमन गर्न कुनै समस्या नहुने भएकाले यातायातका साधन सञ्चालनको अनुमति दिइएको बताए ।
गत सोमबार पुलमा आगो लागेको थियो । पुलमा गुडीरहेको ट्रकमा लागेको आगो पुलका १४ वटा सहारा लट्ठामा लाग्दा केही क्षति भएको थियो । विज्ञ टोलीले पुलको स्थलगत निरीक्षण गरेको थियो ।
मन्थली - जिल्ला अस्पताल रामेछापमा आइतबार सञ्चालित एक दिने निःशुल्क मुटुरोग विशेषज्ञ स्वास्थ्य शिविरबाट तीन सय ४३ जना लाभान्वित भएका छन ।
जिल्ला स्वास्थ्य कार्यालय रामेछापमा मेडिकल सुपरिटेन्डेन्ड डा केशव श्रेष्ठका अनुसार सहिद गङ्गालाल फाउन्डेसन नेपालको आयोजना, सहिद गङ्गालाल राष्ट्रिय हृदय केन्द्रको प्राविधिक सहयोग र रामेछाप नगरपालिका तथा जिल्ला अस्पतालको सहयोगमा शिविर सञ्चालन गरिएको हो । शिविरमा गङ्गालाल अस्पतालका विशेषज्ञ चिकित्सकले सेवा दिए ।
शिविरमा एक सय जनाको मुटुको भिडियो एक्सरे, एक सय १५ जनाको इसिजी र एक सय १८ जनाको मुटु परीक्षण गरिएको जिल्ला अस्पताल विकास समिति रामेछापका अध्यक्ष यम पाख्रिनले बताए । दश जना मुटुरोगीलाई भने थप उपचारका लागि गङ्गालाल अस्पताल सिफारिस गरिएको छ ।
शिविरको उद्घाटन नेपाली कांग्रेसका पूर्वमहामन्त्री डा सशाङ्क कोइरालाले गरेका थिए । उद्घाटनका क्रममा उनले यस्ता शिविरले धेरै नागरिकलाई फाइदा पुग्ने भएकाले देशभर सञ्चालन गर्नुपर्नेमा जोड दिए ।
कमल कुमाल/ मध्यान्ह
कालीकोट : कालीकोटका किशोर किशोरीहरु यौन तथा प्रजनन् स्वास्थ्यबारे खुलेर कुरा गर्न थालेका छन् । केही समयअघि यौन तथा प्रजनन् समस्याका बारेमा भन्न लजाउने कालिकोट ग्रामीण भेगका किशोर किशोरीहरु अहिले यसबारे खुलेर बोल्न थालेका हुन् । किशोर अवस्थामा यौन तथा प्रजनन् अवस्थामा हुने शारीरिक वृद्धि विकासका सवालमा लजाउने यहाँका किशोर तथा किशोरीहरु पछिल्लो समय खुलेरै आफ्नो समस्या भन्ने र कुरा राख्न थालेका छन् ।
विषेशगरी शारीरिक वृद्धि विकास हुने अवस्थामा विद्यार्थीहरु आफ्नो यौन तथा प्रजनन्का विषयमा लजाउन र डर मान्ने प्रवृत्ति रहेको थियो । रास्कोट नगरपालिका र सान्नी त्रिवेणी गाउँपालिकाका विद्यालयमाहरुमा किशोर किशोरीमैत्री छुट्टै कक्षको स्थापना गरी परामर्श दिन थालिएको छ । सो कारण पनि माध्यमिक र उच्च माध्यमिक तहमा अध्ययनरत किशोर किशोरी खुलेर यौन तथा किशोरावस्थामा शरीरमा हुने परिवर्तनका विषयमा कुरा गर्ने गर्दछन् ।
विषेशगरी रास्कोट रास्कोट नगरपालिका र सान्नी त्रिवेणी गाउँपालिकाका र नरहरीनाथ गाउँपालिकाले पछिल्लो समयमा माध्यामिक तथा उच्च माध्यमिक विद्यालयमा दिउँसोको खाजा खाने समयमा एक घण्टे प्रजनन् स्वास्थ्य सेवा दिन थालेपछि यहाँका किशोर–किशोरीमा परिवर्तन देखिएको हो ।
यौन तथा प्रजनन् अवस्थाका बारे किशोर किशोरीलाई छुट्टै कक्षमा राखी यौन तथा प्रजनन् शिक्षा दिन थालेपछि किशोर तथा किशोरीहरुले यौनका बारेमा खुलेरै समस्या राख्ने र बोल्ने गरेका बाल विवाह छिटो गरिने विवाह र जबरजस्ती गरिने विवाह न्यूनीकरण परियोजनाका फिल्ड सुपरभाइजर अक्कश रोका मगरले बताए । विविध कारणले यौन र प्रजनन्का समस्या अभिव्यक्त गर्न नसकेकालाई प्रोत्साहित गर्न छुट्टै कोठा, ट्वाइलेट र विद्यालय नजिकको स्वास्थ्य चौकीलाई छानेर केन्द्र स्थापना गरी कार्यक्रम चलाइएको उनले बताए ।
कतिपय कुरामा किशोर किशोरीले आफ्ना कुराहरु खुलेर राख्न नसक्दा विद्यालय पठनपाठनमा समस्या हुने र आफ्ना समस्याहरु भन्दैन्थ्ये । कक्षा स्थापना गरी प्रशिक्षण दिनाले अहिले खुलेरै कुरा गर्छन् । सो कार्यक्रमले किशोर–किशोरीमा सकारात्मक परिवर्तन ल्याएको छ । कार्यक्रमको शुरुमा चुनौती नआएका भने होइनन् । नरहरिनाथ–३ कुमालगाउँकी सन्तोषी बुढा सुरुवाती दिनमा किशोर किशोरीमैत्री कार्यक्रममा सहभागी हुँदा आमाले छोरी बिग्रिइ भनी गुनासो गरेको सम्झिन्छिन् । विषय अश्लीलजस्तो लागे पनि कार्यक्रमले सन्तोषीमा सकारात्मक प्रभाव परेपछि
आमा खुसी छन् । उनले भनिन्,‘शुरुमा मलाई गाली गर्ने आमा कार्यक्रमको सकारात्मक प्रभावबाट प्रभावित हुनुभएको छ ।’ कार्यक्रममा सहभागी युवा विकृतिमा लाग्लान् भनेर डराएका अभिभावकलाई नै कार्यक्रममा सहभागी किशोर, किशोरीले कुलतबाट छुटाएका उदाहरण यस गाउँमा रहेको छ ।
कार्यक्रममा सहभागी युवाको पहलमा जिल्लामा बाल विवाह रोकिएको छ । विद्यालय छोडेर कुलतउन्मुख भएका बालबालिका पनि फेरि विद्यालय फर्किन थालेका छन् । किशोर वयस्कमा हुने शारीरिक परिवर्तन र यौनका कुरा लुकाएर होइन, जानकारी गराएर गलत बाटोबाट सही मार्गमा हिँडाउँन सकिन्छ भन्ने प्रमाणित भएको सन्तोषीले बताइन् ।
निर्धक्क आफ्ना समस्या लिएर स्वास्थ्य चौकीको युवामैत्री कक्षमा जाने गरेको उनी बताउँछन् । ‘अधिकांश किशोरीको समस्या महिनावारी, तल्लो पेट दुख्ने, टाउको दुख्ने, रिङ्गटा लाग्ने लगायत हुन्छ, युवामैत्री स्वास्थ्य संस्थाको कक्षमा गइ परामर्श लिएपछि किशोरीमा खुसीसाथ जीवनयापन गर्ने शक्ति मिलेको अनुभव गरेकी छु’ उनले भनिन् ।
नरहरीनाथको नन्दादेवी माविका प्रधानाध्यापक रत्नसिंह साउँदले भने, ‘हामिले कक्षा कोठामा स्वास्थ्य विषय जति पढाएपनि खुलेर कुरा गरेनन् । अहिले छुट्टै कक्षा कोठा स्थापना गरी एउटै उमेर समुहका प्रशिक्षण राखेर क्लास दिँदा यौन तथा प्रजनन् अवस्थाका कुरा खुलेरै गर्न थालेका छन् ।’ हुरेण्डेक नेपालको सहजीकरण, पलान नेपालको सहयोगमा यो परियोजना सञ्चालनमा रहेको छ ।
मोरङ - तिमिल्सिना समाज नेपाल केन्द्रीय समितिले असहाय जेहेन्दार विद्यार्थीलाई गरिने छात्रबृत्ति दिन सुरु गरेको छ । कोशि प्रदेशबाट गरिएको उक्त कार्यक्रम देशै फैलाइने समाजका महासचिव होमप्रसाद तिमिल्सिनाले जानकारी दिए । कार्यक्रमको सुरु गर्न आयोजित कार्यक्रममा विभिन्न बिद्यालयका छात्रछात्रालाई छात्रवृत्ति वितरण गरियो ।
छात्रबृत्ति पाउनेमा उदयपुरकी पल्पसा तिम्सिना, पाँचथरकी दीक्षा तिम्सिना, झापाकी करुण तिम्सिना , मोरङकी बिमला तिम्सिना, भोजपुरकी सिम्रिका तिम्सिना, तेह्रथुमकी बविता तिम्सिना, सुनसरीकी करुणा तिम्सिना, धनकुटाकी आयुसा तिम्सिना र खोटाङका विवेक तिम्सिना रहेका छन् । कार्यक्रममा तिमिल्सिनाहरुको बिषय समेटेर प्रकाशित पुस्तक, इतिहास विगतदेखि वर्तमानसम्म नामक पुस्तकका खोजकर्ता दीपेन्द्रराज तिम्सिनालाई सम्मान समेत गरियो ।
तिमिल्सिना समाजका केन्द्रीय अध्यक्ष दीपक तिम्सिनाले खोजकर्ता लेखक तिम्सिनालाई प्रशंसा पत्र प्रदान गर्दै सम्मान गरेका थिए । तिमिल्सिना वंशको कुल प्रतिष्ठालाई उच्च राख्न अमुल्य योगदान गरेकोले स्रष्टा खोजकर्ता तिम्सिनालाई सम्मान गरेको तिमिल्सिना समाज प्रदेशका अध्यक्ष हरी तिम्सिनाले बताए ।
काठमाडौं : हिमोफिलियाका बिरामी उपचारभन्दा बाहिर रहेको तथ्याङ्कले देखाएको छ । २०७८ सालको राष्ट्रिय जनगणनाअनुसार ३ हजार हिमोफिलियाका बिरामी भए पनि ८ सय १४ जनाले मात्र नियमित उपचार गराइरहेको हिमोफिलिया सोसाइटी नेपालले जनाएको छ । सोसाइटीका अध्यक्ष मुकुन्द घिमिरेले अहिले ८ सय १४ जना सम्पर्कमा आई उपचार गराइरहेको जानकारी दिए । उनले हिमोफिलियाको उपचार महँगो हुँदा सर्वसाधारणको पहुँचभन्दा बाहिर रहेको बताए ।
रगत जमाउने आवश्यक तत्त्वको कमीका कारणले लामो समयसम्म रक्तस्राव भइरहने अवस्थालाई हिमोफिलिया भनिन्छ । यो एक वंशाणुगत समस्याका रूपमा देखिएको वीर अस्पतालका रगत रोग विशेषज्ञ डा. निरजकुमार सिंहले जानकारी दिए । 'मानव शरीरमा हुने रगतको १३ तत्त्वमध्ये कुनै एउटाको कमीका कारण हिमोफिलिया हुन्छ,' उनले भने, 'यो वंशाणुगत र कोषमा उत्परिवर्तन भएर पनि हुन्छ ।'
दुईतिहाइ वंशाणुगतबाट र एकतिहाइ उत्परिवर्तनबाट हुने गरेको विश्वका विभिन्न देशमा गरिएका अध्ययनहरूले देखाएको डा. सिंहले बताए । एकपटक हिमोफिलियाका बिरामीलाई उपचार गर्दा २५ हजार रुपैयाँ लाग्ने भएकाले सर्वसाधारण उपचारको पहुँचबाहिर रहेको उनको भनाइ छ ।
'यो रोगको उपचार महँगो रहेको छ,' रगत रोग विशेषज्ञ डा. सिंहले भने, 'हाम्रोजस्तो मुलुकका नागरिकको यसको उपचारमा सहज पहुँच छैन । खर्च धान्नै गाह्रो छ । सरकारले ठोस नीति बनाएर वा कुनै तरिकाले उपचारमा सहयोग गर्नुपर्छ ।' परीक्षण तथा उपचारमा लाग्ने ठूलो खर्च, राज्यपक्षबाट आवश्यकताअनुसारको बजेट विनियोजन नहुँदा हिमोफिलिया प्रभावित व्यक्तिको अवस्था दयनीय हुँदै गएको उनको भनाइ छ ।
वीर अस्पतालका रगत रोग विशेषज्ञ डा सिंहले हिमोफिलियाका बिरामीको पहिचान गरेर उपचारमा ल्याउनुपर्ने बताए । उनले राज्य अभिभावक बनेर बिरामीको उपचारमा सहयोग गर्नुपर्ने भनाइ राखे । 'एकपटक शरीरबाट रगत बग्यो भने कम्तीमा उपचार गर्नका लागि २५ हजार रुपैयाँ लाग्ने गर्छ,' उनले भने, 'महँगो उपचार भएकाले राज्यले नै उपचारमा सहयोग गर्नुपर्छ ।'
हिमोफिलिया प्रभावित व्यक्तिहरू चोटपटक लाग्न सक्ने स्थानबाट सकभर जोगिनुपर्ने हुन्छ । शरीरमा रगत जमाउने आवश्यक तत्त्वमध्ये कुनै तत्त्वको मात्रा १ प्रतिशतभन्दा कम भएका गम्भीर, १ देखि ५ प्रतिशतसम्म भएमा मध्यम र ५ प्रतिशतभन्दा माथि भएका अल्प हिमोफिलिया भएको मानिने डा. सिंहले जानकारी दिए ।
दीर्घकालीन उपचार छैन
हिमोफिलिया रगत बगेको बेला उपचार गरेर रगत बग्न कम गर्ने हो भन्दै यसको दीर्घकालीन उपचार सम्भव नभएको वीर अस्पतालका रगत रोग विशेषज्ञ डा. सिंहले बताए । 'रगत बग्न नदिनु नै यसको उपचार हो,' उनले भने, 'जुन रगत जमाउने आवश्यक तत्त्वको कमी हुन्छ । त्यही तत्त्वलाई रगत जमाउनका लागि प्रोटिन दिनुपर्ने हुन्छ ।'
हिमोफिलिया सोसाइटीका अध्यक्ष घिमिरेले राज्यले यस रोगबाट प्रभावित व्यक्तिको निदान, हेरचाह र उपचारका लागि भन्दै छुट्याउने गरेको रकम कम भएको बताए । समयमै रोग पहिचान हुन नसक्दा हेमोफेलिया भएका व्यक्तिहरूले दुःख पाएको, हेरचाह र उपचारमा समस्या भएको उनको भनाइ छ ।
वीर अस्पतालमा वंशाणुगत रोग विशेषज्ञ डा. निलम ठाकुरले वंशाणुगत रोग आफैँमा जटिल रहेकाले सरकारको यस्ता बिरामीको उपचारमा सहयोग गर्नुपर्ने बताइन् । 'हिमोफिलियाका बिरामी चोटपटकबाट बच्नुपर्ने हुन्छ । रक्तस्राव भएको खण्डमा औषधि लगाई आराम गर्नुपर्छ', उनले भनिन् ।
नेपालमा हिमोफिलियाका परीक्षण राष्ट्रिय जनस्वास्थ्य प्रयोगशाला, टेकु, त्रिवि शिक्षण अस्पताल महाराजगञ्ज र निजामती कर्मचारी अस्पताल नयाँ बानेश्वरमा मात्र गर्ने गरिएको छ ।
हिमोफिलिया प्रायःजसो पुरुषलाई बढी हुने बताउँदै महिला यसको वाहकका रूपमा रहेका डा. ठाकुरले उल्लेख गरिन् । उनका अनुसार यो रोगका कारणले जिउमा निलडाम देखिने, जोर्नी तथा मांसपेसीहरू सुन्निने र दुख्ने गर्छ । यस्ता व्यक्तिमा चोटपटक लागेर रगत बगेमा लामो समयसम्म रगत नरोकिने हुँदा यसको उपचार गर्दा रगत जमाउने प्रोटिन दिनुपर्ने उनले जानकारी दिइन् ।
रासस
टक्सार (भोजपुर) । धरानबाट भोजपुर घोरेटारतर्फ जाँदै गरेको यात्रुवाहक जिप दुर्घटनामा मृत्यु हुनेको सङ्ख्या आठ पुगेको छ । घटनास्थलमा नै सातजनाको मृत्यु भएको थियो भने थप एकजनाको धरानमा उपचारका क्रममा मृत्यु भएको प्रहरीले जनाएको छ ।
जिल्ला प्रहरी कार्यालय भोजपुरका प्रहरी प्रमुख प्रहरी नायव उपरीक्षक (डिएसपी) सुदीपराज पाठकका अनुसार मृतक सबैको सनाखत भएको छ । मृत्यु हुनेमा इटहरी–९ का चालक ४० वर्षीय मानबहादुर बस्नेत, भोजपुरको हतुवागढी गाउँपालिका(२ का ७० वर्षीया पर्वतमाया राई, सोही वडाका २३ वर्षीय चन्द्रप्रकाश राई, छ महिनाकी बालिका बिसाङ चाम्लिङ राई, हतुवागढी–५ की ३२ वर्षीया राजकुमारी राई, हतुवागढी–९ का ६८ वर्षीय पदमबहादुर थापा, ४५ वर्षीया कमला अधिकारी र हतुवागढी–५ का ४२ वर्षीय किशन राईको सनाखत भएको प्रहरी प्रमुख डिएसपी पाठकले जानकारी दिए । किशन राईको उपचारका क्रममा मृत्यु भएको हो ।
साथै दुर्घटनामा परी गम्भीर घाइते भएकालाई उद्धार गरी उपचारका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको छ । इलाका प्रहरी कार्यालय घोरेटारबाट सातजना र हसनपुरबाट पाँचजना गरी १२ जना प्रहरीको टोलीलाई तत्काल घटनास्थलमा पठाएर उद्धारको व्यवस्था मिलाइएको प्रहरी प्रमुख डिएसपी पाठकले जानकारी दिए। घाइतेको पनि विवरण लिने काम भइरहेको प्रहरीले जनाएको छ ।
धरानबाट भोजपुरको दक्षिणतर्फ आउँदै गरेको को१ज २५९३ नम्बरको जिप आज बिहान १०ः३० बजेतिर उदयपुरको बेलका–७ मैनामैनीमा दुर्घटना भएको थियो । जिपमा क्षमताभन्दा बढी यात्रु सवार रहेको देखिएकाले दुर्घटना भएको देखिएको प्रहरीको प्रारम्भिक अनुमान छ ।
जुम्ला । जुम्लाको तातोपानी गाउँपालिकाले श्रमदानबाट स्याउका बिरुवा उत्पादन गर्ने अभियान सुरु गरेको छ । यसका लागि गाउँपालिकाले प्रत्येक महिनाको दोस्रो शनिबार श्रमदान गर्दै आएको छ ।
पालिकाको आफ्नो परिसरमा बिरुवा उत्पादनको काम भइरहेको र यस कार्यलाई अभियानका रुपमा प्रभावकारी बनाइने पनि पालिकाले जनाएको छ । श्रमदानअन्तर्गत पालिका परिसरभित्र तत्कालका लागि ६५ वटा स्याउका बिरुवा रोपिएको र यो अभियानलाई अझै बढाउँदै लगिने बताइएको छ ।
पालिकाको श्रमदानबाट स्थानीय जातका स्याउका बिरुवा लगाउने काम सुरु भएको गाउँपालिकाका अध्यक्ष नन्दप्रसाद चौलागाईंले जानकारी दिए । पालिका परिसरको वातावरण हरियाली बनाउने र अबको पाँच वर्षपछि सेवा लिन आएका सेवाग्राहीलाई स्याउ टिपेर खानसक्ने गरी बिरुवा रोपिएको छ ।
अध्यक्ष चौलागाईंले भने, ‘हामीले विभिन्न क्षेत्रमा श्रमदान गरी काम गरिरहेका छौँ । श्रमदानले टुक्रे योजनामा लगानी गर्नुपर्ने रकम बचेको छ । यस पटकको श्रमदानबाट गाउँपालिका परिसरको जमिनमा स्याउका बिरुवा रोपिएको हो ।’
पहिलो चरणका स्याउका बिरुवा रोप्न उच्च अदालत सुर्खेत इजलास जुम्लाका न्यायाधीश जगदीश घिमिरे, जुम्ला जिल्ला अदालतका न्यायाधीश राजेशकुमार कटुवाल, गाउँपालिकाका अध्यक्ष चौलागाईं, उपाध्यक्ष रेवती रावल, वडा अध्यक्षहरु, कर्मचारी, शिक्षक र पत्रकारहरु उपस्थित भएका थिए ।
गाउँपालिकाले श्रमदान अभियानबाट बाढी पहिराले भत्केका तथा पुरिएका सिँचाइ कुलो, मठमन्दिर, प्रतीक्षालय र बाटोघाटो निर्माणको काम विगत नौ महिनादेखि गर्दै आएको छ । स–साना योजना श्रमदान अभियानमार्फत निर्माण तथा मर्मत गर्दा स्थानीय सरकारको रकम बचत भएको अध्यक्ष चौलागाईंको भनाइ छ ।
काठमाडौं । विनयतारा फाउन्डेसनले जनकपुरमा २०० बेडको क्यान्सर अस्पताल निर्माण प्रक्रिया थाल्ने भएको छ। मंगलबार काठमाडौंमा आयोजित पत्रकार सम्मेलनमा फाउन्डेसनका अध्यक्ष डा. विनय शाह, बोर्ड सदस्य डा. डेभिड एबुलाफिया र विनयतारा फाउन्डेसन नेपाल ट्रस्टका अध्यक्ष डा. वाइपी सिंहले उक्त घोषणा गरेका हुन्।
यही वर्षदेखि निर्माण थालनी हुने अस्पतालका लागि अनुमति लिने, आवश्यक जग्गाको किटान र सुरुवाती लगानीको जोहो भइसकेको उनीहरुले बताएका छन्।फाउन्डेसनले हाल जनकपुरस्थित कपिलेश्वर रोडमा २५ बेडको क्यान्सर सेन्टर सञ्चालन गरिरहेको छ। उक्त क्यान्सर सेन्टरलाई नै २०० बेडको सवैप्रकारका क्यान्सरको उपचार केन्द्रका रुपमा विस्तार गर्न लागिएको हो ।
‘मनलाई देशको माटोबाट अलग हुन नदिन उनले आफ्नो करियरको सुरुवातमै बिनयतारा फाउन्डेसन खोलेका हौं,’ सन् २००३ उच्च शिक्षा हासिल गर्नका लागि अमेरिका पुगेका डा शाहले भने, ‘म आज जे छु, त्यो नेपालले बनाएको हो। यहीँको सरकारी स्कुलमा पढें । सरकारी कोटामै एमबीबीएस गरें। अब यही देशको क्यान्सर उपचार केन्द्रमा केही गर्न चाहन्छौं।’
नेपालमा विश्वस्तरीय क्यान्सर उपचार केन्द्र बनाउने आफ्नो सपना रहेको उनले बताए। उच्चस्तरीय प्रविधिको साथै दक्ष चिकित्सकीय सेवा उपलब्ध गराउने तयारी रहेको उनको भनाइ छ । नेपालका साथै भारतको बिहारलाई समेत लक्षित गरेर जनकपुरमा क्यान्सर उपचार केन्द्रको बनाउने तयारी गरिएको उनले पत्रकार सम्मेलनमा बताए ।
हरेक वर्ष कम्तिमा २० हजार बिरामीलाई सेवा दिने लक्ष्यसहित अस्पताल बनाउन खोजिएको डा. शाह बताउँछन्। वरिष्ठ क्यान्सर सर्जन तथा विनयतारा ट्रस्ट नेपालका अध्यक्ष डा.वाइपी सिंहले नेपालमा विश्वस्तरीय उपचार सेवा दिने अस्पताल निर्माण गर्न क्रम अघि बढिसकेको बताए। त्यसका लागि स्वास्थ्य तथा जनसंख्या मन्त्रालयले अनुमति समेत दिइसकेको बताए।
फाउन्डेसनले यसअघि काठमाडौंको सिभिल अस्पतालमा बोनम्यारो प्रत्यारोपण केन्द्र निर्माणमा सहयोग गरेको थियो। त्यहाँका चिकित्सक तथा नर्सलाई अमेरिकामा तालिम दिनका लागि समन्वय र केही आर्थिक सहयोग गरेको डा. शाह बताउँछन् ।
त्यस्तै फाउन्डेसनले हरेक वर्ष विश्वका नाम चलेका चिकित्सकलाई जनकपुरमा ल्याएर ‘क्यान्सर कंग्रेस’ गर्ने गरेको छ। यसवर्ष मार्च १६ का लागि तय गरिएको छ। फाउन्डेसन अमेरिकामा क्यान्सर कन्फ्रेन्स र सीएमई कार्यक्रम गर्ने ठूलो संस्था मध्ये एक हो । कन्फ्रेन्स, सीएमई र सहयोगी दाताबाट प्राप्त रकमलाई कोष बनाएर नेपाल तथा दक्षिण एशियाको क्यान्सर क्षेत्रमा काम गरिरहेको हो।
फाउन्डेसन अमेरिकामा दर्ता भएको गैरनाफामुखी संस्था हो। जसले अमेरिकामा क्यान्सरसँग सम्बन्धित सीएमई र कन्फ्रेन्स,नेपालका साथै दक्षिण एशियामा क्यान्सर उपचार र सचेतनाका क्षेत्रमा काम गर्द आएको छ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies