नक्कली चिकित्सक प्रहरी नियन्त्रणमा

झापा : इलाका प्रहरी कार्यालय काँकडभिट्टाले नक्कली चिकित्सकको  भेषधारण गरेर काठमाडौँबाट झापा आएका दुई युवालाई आज बिहान नियन्त्रणमा लिएको छ । नियन्त्रणमा  पर्नेमा ३३ वर्षीय दिलकुमार श्रेष्ठ र २८ वर्षीय गणेश अधिकारी रहेका छन् । लकडाउनमा पनि ती युवा बा ६ च ७०१९ नम्बरको कारमा  धरान हुँदै आज बिहान काँकडभिट्टा आइपुगेको प्रहरीले जनाएको छ ।

जिल्ला प्रहरी कार्यालय झापाका प्रहरी उपरीक्षक कृष्णप्रसाद कोइरालाका अनुसार निःशुल्क स्वास्थ्य शिविर सञ्चालन गर्न आएको बताएका उनीहरुमध्ये एक जनाले डा विनोद श्रेष्ठ नामको नक्कली परिचय पत्र बोकेका थिए ।

काठमाडौँदेखि चिकित्सकको बहाना गरी सुरक्षा जाँच छल्दै काँकडभिट्टा आइपुगेका उनीहरुलाई प्रहरीले मेडिकल काउन्सिलको दर्ता नम्बरसमेत माग्दै सोधपुछ गरेपछि नक्कली चिकित्सक भन्ने पोल खुलेको थियो । दुबै जनालाई प्रहरीले आवश्यक अनुसन्धान अघि बढाउँदै तत्कालका लागि मेचीनगरको क्वारेन्टाइनमा पठाउने भएको छ भने सवारी साधन प्रहरी कार्यालयमै राखिएको छ ।  प्रहरी उपरीक्षक कोइरालाले नियन्त्रणमा लिइएका दुबै व्यक्ति लागू औषधको खोजीका लागि छटपटाउँदै आइपुगेको आशङ्का गरिएको बताएका छन् ।

जिल्ला कारागारभित्र क्वारेन्टाइन

चितवन : नवलपुर जिल्लाका कैदी बन्दीलाई चितवन कारागार ल्याइएपछि यहाँका कैदी बन्दी त्रासमा परेका छन् । नवलपुरमा हालसम्म कारागार रहेको छैन । 

कारागार कार्यालय चितवनका प्रमुख कमलप्रसाद काफ्लेका अनुसार कोरोना भाइरस जोखिम हुन नदिन लकडाउन गरिएपछि  नवलपुर जिल्ला अदालतबाट आदेश भइ ११ जना कैदी बन्दी यहाँ आएका छन् । उनले भने “करागारको क्षमता कम नै रहेको छ । विशेष परिस्थितिका कारण कैदीबन्दी ल्याइएको हो । अव नपठाउन अनुरोध गरेका छौ ।”

दुई सय ५५ जना क्षमता भएको यहाँको पुरुष बन्दी गृहमा ६६८ र  २५ जनाको क्षमता रहेको महिला गृहमा तीन आश्रित बालिकासहित ५८ जना रहेका छन् । साँघुरो ठाउँमा बाहिरबाट आउनेले रोग ल्याएमा सबै सङ्क्रमित हुने भएकाले सबै त्रासमा परेका हुन् । 

प्रमुख काफ्लेका अनुसार कारागारमा एक जना अहेबको दरवन्दि रहेको छ । कोरोना भाइरसको सम्भावित जोखिम हुन नदिन कैदी बन्दीका आफन्तलाई भेटघाट बन्द गरिएको छ । कारागार भित्रै १५ श्ययाको क्वारेन्टाइन स्थापना गरिएको छ । 

सर्वाेच्च अदालतले एक वर्षसम्म कैद तोकिएकालाई बाँकी समयको कैदको रकम भूक्तानी गरी छाड्ने आदेश गरेको छ । यस कारागारमा ३८ जना त्यस्ता कैदी रहेका छन् । ती मध्ये १६ जनाले मात्र सो सुविधा प्रयोग गरेका छन् । 

बढी मूल्य लिने व्यापारी पक्राउ

सिन्धुपाल्चोक : कोरोना भाइरस सङ्क्रमणबाट सुरक्षित रहन देश लकडाउनमा रहेको अवस्थाको मौका छोपी बजार भाउभन्दा बढी मूल्य लिई सामान बिक्री गर्ने व्यापारीलाई जिल्ला प्रहरी कार्यालय सिन्धुपाल्चोकले पक्राउ गरेको छ ।

कपिलवस्तु जिल्ला विजयनगर गाउँपालिका घर भई चौतारा साँगाचोकगढी नगरपालिका–७ मेलचौरस्थित जयमाता वनदेवी फ्यूल सेन्टरका ३६ वर्षीय महेशकुमार चौधरीलाई पक्राउ गरिएको हो । उनले हालको बजार मूल्य पेट्रोल प्रतिलिटर रु ९६ मा बिक्री गर्नुपर्नेमा रु ११० मा बिक्री गरी बिल नदिएकाले कालोबजार ऐनअन्तर्गत मुद्दा चलाइएको सूचना अधिकृत एवं प्रहरी नायब उपरीक्षक माधवप्रसाद काफ्लेले जानकारी दिए । 

त्यस्तै लकडाउनको उल्लङ्घन गरी यात्रु बोकेको तीन वटा बलेरो जीपलाई नियन्त्रणमा लिई चालकलाई सार्वजनिक अपराध ऐनअन्तर्गत मुद्दा चलाइएको छ । जीपमा रहेका २४ जना यात्रुलाई भने लामोसाँघुस्थित क्षेत्रीय क्वारेन्टाइनमा राखिएको छ । उनीहरु विभिन्न जिल्लाबाट मजदूरी गर्न आएका र बिनाअनुमति घर फर्कन लागेको प्रहरीले जनाएको छ । 

सशस्त्र प्रहरीद्वारा सय लिटर घरेलु मदिरा नष्ट

सहबान अन्सारी/मध्यान्ह

नवलपरासी : नवलपरासीको गुठी परसौनीमा सशस्त्र प्रहरीद्वारा अबैधरुपमा राखिएको मदिरा नष्ट गरिएको छ । सशस्त्र प्रहरी बोर्डर आउट पोष्ट गुठी परसौनीका सशस्त्र प्रहरी निरीक्षक  सुमन अधिकारीको नेतृत्वमा खटिएको गस्ती टोलीले सुस्ता गाउँपालिका वडा नं ५ बलिनगरमा गएराति  नेपालबाट भारततर्फ लग्दै गरेको अवस्थामा करिब एक सय लिटर अबैध घरेलु मदिराको साथै भारतीय नम्बर यु.पी.५६एच, ९२६८को मोटरसाइकल दशगजाबाट बरामद गरेको थियो ।

बरामद गरिएको मदिरा स्थानीय र पत्रकारहरुको रोहवरमा नष्ट गरिएको सशस्त्र प्रहरी निरीक्षक अधिकारीले बताए । लकडाउनको समयमा सीमा तस्करी तथा सीमा सुरक्षाको निगरानी पूर्णरुपले बढाइनुका साथै मानिसहरुलाई आवतजावतमा पूर्णरुपमा रोक लगाइएको सशस्त्र प्रहरीले जनाएको छ ।

कपिलवस्तुमा भिषण आगलागी : ४० घरगाेठ जलेर नष्ट

इमरान खान/मध्यान्ह            

कपिलवस्तु : कपिलवस्तु जिल्लाको विजयनगरमा भिषण आगलागी हुँदा ४० घरगोठ जलेर नष्ट भएको छ । गाउँपालिकाको वडा नं. १ गुगौलीमा शुक्रवार करिब अपरान्ह ४ बजेतिर आगलागी भएको हो । स्थानीय काशीराम यादवको घरबाट आगो लागेको प्रहरीले जनाएकोे छ । 

आगलागीबाट खाद्यान्न, लत्ताकपडा, भाँडाकुँडा र नगद गरी एक करोड भन्दा बढीको क्षति भएको प्रहरीले प्रारम्भिक अनुमान गरेको छ । आगलागीबाट मानवीय तथा चौपाया क्षति नभएको इलाका प्रहरी कार्यालय गणेशपुरका प्रहरी निरीक्षक मधु नेपालले जानकारी दिए । आगो किन र कसरी लागेको अझै खुल्न नसकेको र यसबारे अनुसन्धान भइरहेको प्रहरी निरीक्षक नेपालले बताए ।

लकडाउनमा बाल अधिकारप्रति अझ संवेदनशील बन्न अपिल

काठमाडौं : कोरोना भाइरस (कोभिड–१९)ले विश्वभरि महामारीको स्वरुप लिइरहेका बेला बालबालिकाको अवस्थाप्रति विशेष ध्यान दिन बालअधिकारको क्षेत्रमा कृयाशील संघ संस्थाहरुले संयुक्तरुपमा अपिल गरेका छन् ।

सरकारले कोरोना संक्रमण रोकथाम र नियन्त्रण गर्न लकडाउनको घोषणा गरेको अवस्थामा बालबालिकामाथि विभिन्न खालका जोखिम हुन सक्ने भन्दै अधिकारबादीहरुले बालबालिकाको संरक्षणको निम्ति अहिलेको समयमा राज्यका सबै निकाय अझ बढि जिम्मेवार हुनुपर्ने बताएका हुन् ।

पछिल्लो समयमा बालबालिकामाथि दुर्व्यवहारका घटना सार्वजनिक भइरहेको बताउँदै अपिलमा भनिएको छ, ‘यही १४ गते  कपिलवस्तुमा १३ वर्षकी बालिकामाथि छिमेकी युवकले बलात्कार गरेको थियो । पीडितआफैले निवेदनदिंदापनि यो विषयलाई प्रहरीले त्यती गम्भिरता लिएको देखिदैन । त्यस्तै ललितपुरमा १८ वर्षीया  किशोरिलाई जबरजस्ती करणी गरेको अभियोगमा एक जनालाई प्रहरीले पक्राउ गरेको थियो ।'

लकडाउनका कारण विद्यालयमा अध्ययनरत तथा एसईई परीक्षा एवं उच्च माध्यमिक परीक्षाको तयारीमा रहेका बालबालिकामाथि मनोसामाजिक तनाब समेत रहेकोले यो अवस्थामा सबै उत्तिकै संवेदनशील हुनुपर्ने बाल सहभागितामा कार्यरत संस्थाहरुको साझा समुह कन्सोर्टियम नेपालका अध्यक्ष किरण थापाले बताए ।

बाल हिंसाबिरुद्ध  क्रियाशील राष्ट्रिय कार्य समन्वय समूह (एनएसिजी नेपाल),महिला तथा बालबालिका बेचविखन विरुद्ध सहकर्मी समूह नेपाल( एटविन), बालगृहहरुको सञ्जाल (सिनेट नेपाल), सिआरसी एचआरटिएमसिसि कमिटी , यात्रामा रहेका बालबालिकाहरुको अधिकार संरक्षण अभियान, राष्ट्रिय बाल संरक्षण  सञ्जाल, बाल सहभागिताका लागि कार्यरत संस्थाहरुको साझा समूह (कन्सोर्टियम नेपाल), बालबालिक शान्ती क्षेत्र  राष्ट्रिय अभियान (सिजप), बालमैत्री स्थानीय शासन राष्ट्रिय मञ्च,  शिक्षा निगरानी समूह, समाहित शिक्षा मंच नेपाल, सिआरसि ओपिथ्रि अनुमोदनका लागि नागरिक टसमाजको राष्ट्रिय सञ्जाल, बालिका अधिकारको लागि राष्ट्रिय सञ्जाल,सामाजिक सुरक्षा नागरिक समाज सञ्जाल, नाओस र नाक्रो गरी १६ वटा संस्थाहरुले ऐक्यबद्धतासहित सो अपिल जारी गरेका हुन् ।

जारी अपिलमा अगाडि भनिएको छ, ‘बाल गृहमा रहेका बालबालिका, बेचबिखन विरुद्धको पुन: स्थापन गृह, शरणार्थी शिविरमा रहेका बालबालिका, सडक बालबालिका, अपांगता भएका, श्रममा रहेका बालबालिकाहरुको सर्वोतम हितलाई ध्यानमा राखी सामाजिक सुरक्षाको विशेष व्यवस्था मिलाउनु पर्दछ ।’

विज्ञप्तिमा गर्भवती, सुत्केरी महिलाहरु तथा नवजात शिशुहरुको स्वास्थ्य उपचार एवं आवश्यक भ्याक्सिनहरुको सर्वशुलभताको लागि आवश्यक व्यवस्था गरिनु पर्ने उल्लेख गर्दै बालसुधार गृहमा रहेका बालबालिकाहरुका सम्बन्धित अभिभावकले सम्पर्क गरि लैजान सकिने निर्णय गरिएतापनि सम्बन्धित अभिभावकसम्म सञ्चार नपुगेको र बालबालिका लैजान चाहने अभिभावकहरुले लकडाउनका कारण असम्भव रहेको अवस्थामा आवश्यक व्यवस्था मिलाउन समेत आग्रह गरिएको छ ।

यस्तै, अपिलमा संचार माध्यमहरुबाट बालबालिकाहरुको लागि सन्देशमूलक तथा ज्ञानवर्द्धक कार्यक्रमहरु सञ्चालन गर्न पहल गरिदिन र खासगरी लकडाउनको अवस्थामा पनि बाल हिंसा तथा यौन दूर्ब्यबहारको घटनाहरु आइ रहेको अवस्थामा सम्बन्धित सुरक्षाकर्मीहरुमा आवश्यक निर्देशन जारी गरिदिन समेत आग्रह गरिएको छ ।

शान्ति समाजद्धारा राहत वितरण : प्रेस स्वतन्त्रताको संरक्षण र पत्रकार सुरक्षाको माग

काठमाडौं : मानव अधिकार तथा शान्ति समाज रुपन्देही शाखाले वुटवल ११ स्थित हात्तिसुड सुकुम्बासी टोलका विपन्न परिवारलाई चामल, तेल, नुन, आलु, सोयाविन, साबुन, चाउचाउ, मास्कसहित ५० हजार मुल्यको राहत सामग्री सहयोग गरेको छ। शुक्रबार समाजका केन्द्रिय वरिष्ठ उपसभापति गोविन्द खनाल, रुपन्देही शाखा सभापति डिपी खनाल, सचिव अर्जुन ज्ञवाली, सह सचिव कपिल ज्ञवाली, सदस्य कृष्ण पाण्डे सम्मिलित टोलिले उक्त बस्तिमा गई टोल बिकास संस्था मार्फत ७० परिवारलाई राहत सामग्री  बितरण गरेको हो । 

समाजले एक बिज्ञप्ति जारी गर्दै दक्षिणी सीमानामा अलपत्र सयौ नेपालीलाई नेपाल प्रवेश गर्न नदिएको घटनाको शान्ति निन्दा पनि गरेको छ । यस्तो आपराधिक नीतिलाई तत्काल सच्याउन आग्रह गर्दै  समाजले सीमानामा अलपत्र परेका नेपालीहरुलाई तत्काल देश प्रवेश गराई क्वारेन्टाइनमा राख्ने लगायत आवश्यक उपचारको व्यवस्था गर्न सरकारसंग आग्रह गरेको छ ।

विज्ञप्तिमा कोभिड १९ परीक्षणको दायरालाई व्यापक रुपमा बिस्तार गर्न र त्यस्तो परीक्षण सबैतिर निशुल्क हुनुपर्ने सुनिश्चित गर्न र अति विपन्न , विपन्नवर्गलाई यथोचित राहत उपलब्ध गराउन , आम नागरिकलाई सुपथ मुल्यमा सहज तवरमा जीवन यापन गर्ने सामग्री उपलब्ध गराउने व्यवस्था गर्न र देशभरका निजी लगायत सम्पूर्ण अस्पताल , स्वास्थ्य संस्थाहरु अनिवार्य रुपमा सञ्चालन गर्न, स्वास्थ्यकर्मीहरुलाई आवश्यक सुरक्षात्मक बस्त्र , औजार उपलब्ध गराउन, स्वास्थ्यकर्मीहरुको मनोबल बढाउन र स्वास्थ्यकर्मीहरुलाई प्रोत्साहन गर्न पनि  सरकार समक्ष आग्रह गरिएको छ । 

समाजका महासचिव सुशिल बस्नेतद्वारा जारी बिज्ञप्तिमा हालै स्वास्थ सामग्री खरिदमा व्यापक भ्रष्टाचार पर्दाफास भएको सन्दर्भमा उच्च स्तरीय तवरमा छानविन गरी मूल दोषीमाथि कारबाही सुनिश्चित गर्न सरकारसंग आग्रह गर्र्दै सो प्रकरणमा सरकारको उच्च नेतृत्व उदासिन रहने हो भने संलग्नता पनि उच्च नेतृत्वकै मानिने अवस्था सिर्जना हुन सक्ने इंगित गरिएको छ  । 

केही अनलाइनहरु सरकारले बन्द गर्न कदम चालेको सन्दर्भमा शान्ति समाजको ध्यानाकर्षण भएको भन्दै विज्ञप्तिमा अगाडि भनिएको छ - 'दर्ता भई कानुन सम्मत तवरले सञ्चालन भइरहेका सञ्चारमाध्यमहरुले कानुन उल्लंघन गरेको भए कानुन सम्मत प्रक्रिया अघि बढाउनु स्वभाविक हुन सक्छ तर ब्लक बन्द गर्ने सरकारी कदम अस्वभाविक एवं आपत्तिजनक छ । संकटको यस्तो बेला सबै सञ्चारमाध्यमहरु अझ जिम्मेवार , मर्यादित ढंगले प्रस्तुत हुनुपर्ने अपेक्षा रहेको छ भने संकट समाधानका लागि सरकार– सञ्चार जगतबिच अझ बढी सहकार्य आवश्यक छ । तर उच्चस्तरीय संलग्नताको आधारसहित भ्रष्टाचारका समाचारहरु प्रकाशित हुन थालेपछि सरकार तिल्मिलाएको देखिन्छ । विपतकालीन अवस्थामा शक्तिको दुरुपयोग गर्दै सञ्चार जगतमाथि सरकारको वक्र दृष्टि प्रहारको शान्ति समाज निन्दा गर्दछ । साथै जस्तोसुकै अवस्थामा पनि प्रेस स्वतन्त्रताको संरक्षण र पत्रकारहरुको सुरक्षा सुनिश्चित हुनुपर्ने तर्फ शान्ति समाज सरकारको ध्यानाकर्षण गराउँछ ।'

समाजसेवी यादवद्वारा राहत सामग्री बितरण

सहबान अन्सारी/मध्यान्ह

नवलपरासी : नवलपरासीको प्रतापपुर गाँउपालिका वडा नं ६ मा बिपन्न परिवारलाई राहत सामग्री बितरण गरिएको छ । विश्वब्यापी रुपमा फैलिएको कोरोना रोकथाम ,नियन्त्रणको लागि नेपाल सरकारले घोषणा गरेको लकडाउनको कारण कामकाज प्रभावित भएकोले गरीव एवं बिपन्न परिवारलाइ भएको समस्यालाइ मध्यनजर गर्दै राहत उपलब्ध गराइएको समाजसेवी उमेश चन्द्र यादवले बताए । 

राहत सामग्री स्वरुप यादवले ब्यक्तिगत लगानीमा करिब २० घर दुरीलाई प्रति धुरी  १० किलोको हिसाबले चामल, साबुन र माक्स  उपलब्ध गराएका हुन् ।साथै आवश्यकता अनुसार आउने दिनहरुमा बिपन्न परिवारको लागी  थप  सहयोग गर्ने पनि यादवले बताए ।

लकडाउनको दोस्रो हप्ता शुरु भएपनि यहॉ गााउँपालिकाबाट कुनै किसिमको राहत उपलब्ध नभएको हुँदा बिपन्न परिवारलाई  छाक टार्न निकै कठिनाईको सामना गर्नु परेको छ ।

शुद्धोधन गाउँपालिकाद्वारा १० लाखको राहत बजेट विनियोजन

इमरान खान/मध्यान्ह   

कपिलवस्तु : कपिलवस्तु जिल्लाको शुद्धोधन गाउँपालिकाले क्वारेन्टाईनमा रहेको व्यक्तिहरुको सेवा सुविधा र अति विपन्न गरिब परिवारलाई राहत वितरण गर्न दश लाख रकम विनियोजन गरेको छ । जनताको अवश्यकतालाई मध्यनजर गर्दै गाउँपालिकाको आकस्मिक बैठकबाट सो निर्णय गरिएको गाउँपालिकाका प्रमुख सल्लाहकार प्रितम पाण्डेले जानकारी दिए । 

राहत वितरणका लागि अहिले प्रत्येक वडामा तथ्यांक संकलन तीव्र रुपमा भइरहेको पनि सल्लाहकार पाण्डेले बताए । पाण्डेले सरकारले जारी गरेको लकडाउनमा दिनरात खटेको प्रशासन निकाय, स्वास्थ्य क्षेत्रमा काम गरिरहेका स्वास्थकर्मी र संचारकर्मीलाई विशेष धन्यवाद व्यक्त गरे । 

यस्तै उक्त राहत निश्पक्ष रुपमा वितरण गरिने शुद्धोधन गाउँपालिकाका अध्यक्ष निसार अहमद खाँले जानकारी दिए । अहिलेको विषम परिस्थितिमा गाउँपालिकामा रहेका विभिन्न क्वारेन्टाइन र गरिब घरपरिवारलाई खाद्यान्नलगायत सेवा सुविधामा विशेष रुपले ध्यान दिएर आफूहरुले काम गरिरहेको पनि अध्यक्ष खाँले बताए ।

प्रहरी हिरासतमै एक थुनुवा झुण्डिएको अवस्थामा फेला

कपिलवस्तु : कपिलवस्तुमा प्रहरी हिरासतमै गएराति एक थुनुवा झुण्डिएको अवस्थामा फेला परेका छन् । ईलाका प्रहरी कार्यालय पिपरामा आफ्नै छोरीको जवरजस्ती करणी मुद्दा अन्तर्गत थप अनुसन्धानका लागि थुनामा रहेका वाणगंगा नगरपालिका ८ का ३८ वर्षीय पुरुष झुण्डिएको अवस्थामा फेला परेका हुन् ।

थुनुवा कक्षसँगै रहेको शौचालयको भेन्टिलेशनमा तन्नाले बांधेर झुण्डिएको अवस्थामा उनको शव फेला परेको प्रहरीले जनाएको छ । घटनाको बारेमा अनुसन्धान गर्न जिल्ला प्रहरी कार्यालयवाट प्रहरी नायब उपरीक्षक सुनिल मल्लको टोली पुगेको छ ।