काठमाडौं : निर्वाचन आयोगका अनुसार स्थानीय तहका ४१ पदका लागि हुन लागेको उपनिर्वाचनमा ३७६ जना उम्मेदवार छन् । त्यसमध्ये २० वटा राजनीतिक दलका उम्मेदवार १७६ जना छन् भने १०२ जना स्वतन्त्र उम्मेदवार छन् । 

यो स्वतन्त्र उम्मेदवारको संख्या एक चौथाइभन्दा बढी हो । कुल उम्मेदवार ३७६ मा दलीय उम्मेदवार ७२ दशमलव ८७ प्रतिशत र स्वतन्त्र उम्मेदवार २७ दशमलव १३ प्रतिशत छन् । 

२०७९ सालको चुनावमा स्वतन्त्र उम्मेदवारहरू विभिन्न पालिकामा विजयी भएका थिए । निर्वाचन आयोगका अनुसार त्यसबेला देशभर ३८५ स्वतन्त्र उम्मेदवार निर्वाचित भएका थिए । काठमाडौं महानगरपालिकासहित धरान उपमहानगरपालिका, धनगढी उपमहानगरपालिका र जनकपुर उपमहानगरको प्रमुख पदमा स्वतन्त्र उम्मेदवार निर्वाचित भएका थिए ।

स्वतन्त्र उम्मेदवारी दिएर पनि चुनाव जित्न सकिने र काम गर्न सकिने अवस्थाको आँकलन गर्दै स्वतन्त्र उम्मेदवारी दिने क्रम बढ्दा दलीय उम्मेदवारीकै हाराहारीमा स्वतन्त्र उम्मेदवारी परेको हो । 

३ वटा स्थानीय तहमा प्रमुखसहित स्थानीय तहका ४१ पदको उपनिर्वाचनमा एक चौथाइभन्दा बढी स्वतन्त्र उम्मेदवार प्रतिस्पर्धामा उत्रिएका हुन् । सबैभन्दा बढी स्वतन्त्र उम्मेदवार कीर्तिपुर नगरपालिका प्रमुखमा छन्, जहाँ प्रमुख राजनीतिक दलहरूका उम्मेदवारसहित २० जनाले प्रतिस्पर्धा गर्दै छन् । २० जना उम्मेदवारमध्ये स्वतन्त्र उम्मेदवारको संख्या ११ छ ।

मोरङको ग्रामथान गाउँपालिका प्रमुखको पदका लागि १६ जनाले प्रतिस्पर्धा गर्दै छन्, जहाँ १ जना मात्र स्वतन्त्र उम्मेदवार छन् । 

निर्वाचन आयोगका अनसार विभिन्न स्थानीय तहमा रिक्त रहेका वडा अध्यक्ष पदमा पनि स्वतन्त्र उम्मेदवारहरू छन् । ७ वटै प्रदेशका ३३ वटा वडामा वडा अध्यक्ष चयन हुने छन् । कीर्तिपुर नगरपालिका र सप्तरीको डाक्नेश्वरी नगरपालिकामा २÷२ वटा वडामा उपनिर्वाचनबाट अध्यक्ष चयन हुँदै छन् । 

निर्वाचन आयोगकी प्रवक्ता नीता पोखरेल अर्यालका अनुसार रुकुमपूर्वको पुथा उत्तरगंगा गाउँपालिका– २ को वडा अध्यक्ष निर्विरोध चयन भइसकेका छन् । ओखलढुंगा र कैलाली जिल्लाका जिल्ला समन्वय समिति प्रमुख पदमा १÷१ जना निर्विरोध निर्वाचित भइसकेका छन् । 

यस पटकको मतदानबाट निर्वाचित भएका जनप्रतिनिधिहरूको कार्यकाल अढाई वर्षको हुने छ ।