काठमाडौँ : चार देशीय महिला टी–ट्वान्टी क्रिकेट सिरिजमा नेपाल नामिबियासँग २३ रनले पराजित भएको छ । यसअघि नेपाल आफ्नो पहिलो खेलमा पनि नामिबियासँग ६ विकेटले पराजित भएको थियो ।
नामिबियाले दिएको १२६ रनको लक्ष्य पछ्याउने क्रममा नेपालले निर्धारित २० ओभरमा ५ विकेट गुमाएर १०२ रन मात्रै बनाउन सक्यो । नेपालका लागि ओपनर साना प्रविनले सर्वाधिक ३१ रन बनाइन् । यसैगरी कप्तान इन्दु बर्मा र पूजा महतोले समान १५ रन जोडे । कविता जोशी १७ रनमा नटआउट रहँदा अन्य खेलाडीले राम्रो प्रदर्शन गर्न सकेनन् ।
त्यसअघि टस हारेर पहिला ब्याटिङको निम्तो पाएको नामिबियाले निर्धारित २० ओभरमा आठ विकेट गुमाउँदै एक सय २५ रन बनाएकाे थियाे । नामिबियाका लागि यास्मिन खानले ४५ रन बनाइन् । विल्का म्वाटिलले २०, अर्रास्टा डियर्गार्डले १६ तथा कप्तान सुने विटम्यानले १५ रन बनाइन् ।
नेपालका लागि ईश्वरी विष्टले सर्वाधिक तीन विकेट लिइन् भने रचनाकुमारी चौधरीले दुई तथा रिया शर्मा र इन्दु बर्माले समान एक-एक विकेट लिए ।
