– मुक्तान थेबा
(सन्दर्भः बाङ्गे सार्कीः ईतिहासले कहिल्यै नसम्झेका वा सम्झना नचाहेका एक गुमनाम देशभक्त सपुत । जो अङ्ग्रेजसामु आत्मसमर्पण गर्न चाहेनन् बरु आफु सेरिन तयार भए । विसं १८६६ तिर नेपाल जाने बाटो पहिल्याउन नसकेर अलमलिएर बसेको अङ्ग्रेज फौजलाई बाटो देखाउन अस्वीकार गर्दा बाङ्गे सार्की भारतको बेतियामा मारिएका थिए ।)
इतिहास–किर्तेहरूको जालसाजीमा परेपछि
धुर्तहरूले थापेको ढडियामा थुनिएपछि
तिम्रो नामजस्तै बाङ्गिँदो रहेछ बाङ्गे दाई
नत्र अंग्रेजसामु बिछट्ट गर्जेको तिम्रो हुङ्कार
र गिंडिएको तिम्रो शीर
किन भेटिएन त्यो इतिहासमा ?
किन ठहरिएनौ तिमी वीर–सपुत ?
र, ठडिएन तिम्रो सालिक ?
किनकि तिमी सार्की हौ– सार्की
एक अछूत, अछूतले देशभक्ति प्रदर्शन गर्न‘ अपराध हो
अछूतले छोएपछि देशभक्ति पनि अछूत हुन्छ
र त तिम्रो देशभक्ति ठहरिए–अछूत
अछ्ूतको देशभक्ति लेखिएको इतिहास पनि
अछूत हुन्छ, र त इतिहासको कुरुप अनुहारबाट
पखालियो तिम्रो बहादुरी
तिम्रो लागि तोकिएको काम–
कुहिएको सिनो तास्नु
खुरुखुरु छाला घोट्नु
कोमल पाउ टेक्ने
जुत्ता–चप्पल सिउनु
देशजस्तै रथको पाङ्ग्रा कस्नु
र साहेबहरूको स्वस्तिमा ढाड कुप्राउनु थियो
तर तिम्ले, आफ्नो शिरको नौवेद चढाएर
देशको शिर उभ्यायौ
र त्यसैको बक्सिस्, तिम्रो नाम गुमनाम राखेर
पागलझैँ बपौति इतिहास
एक्लै–एक्लै खित्काइरह्यो
अचेल म, आँखाको ढकनी खुल्लै राखेर निदाउँछु
घाम आकारको अराष्ट्रिय सपना देख्छु
सपनामा तिम्लाई देख्छु
तिम्रो बलिष्ठ शरीर
र स्वाभिमानी टाउको देख्छु
अङ्ग्रेजसामु चट्टानझैँ उभिएर
देशभक्ति सुनाइरहेको एउटा आगो देख्छु
कायर अङ्ग्रेजले गिँडेको तिम्रो टाउको देख्छु
तिम्रो रगत लतपतिएको बेतिया देख्छु
र देख्छु, तिम्रो बहादुरीको इतिहास लुकाएर
निर्बस्त्र
झुटो ईतिहासमा तोक हान्ने निर्लज्जा अनुहारहरू
बाङ्गे दाइ !
तिमी ती सब निर्लज्जाहरू कुल्चेर
निर्धक्क, एक्लै उभिएको
एउटा पहाड हौ– पहाड !!
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies