एकपछि अर्को राजनीतिक परिघटनाका कारण कोशी प्रदेशमा भित्रभित्रै बढिरहेको पहिचान पक्षधरहरुको असन्तुष्टि ओझेलमा परेको छ । स्वयं कोशीकै राजनीति पनि लयमा आउन सकेको छैन । प्रदेशसभाको निर्वाचन सम्पन्न भएको एक वर्षभित्रै कार्यबाहक सहित गरेर चार जनाले सभाको अध्यक्षता गरिसकेका छन् भने पाँच वटा सरकार बनिसकेको छ । गत वर्ष सभामुखमा निर्वाचित बाबुराम गौतम विवादमा पर्दै बाहिरिएपछि कार्यबाहक भएर इस्माइल मन्सुरी र सिर्जना दनुवारले कार्यबाहक भएर सभा चलाए । भर्खरै राप्रपाका अम्बरबहादुर बिष्ट सभामुख निर्वाचित भएका छन् । नेकपा एमालेका हिक्मत कार्की, नेपाली कांग्रेसका उद्धव थापा दुई–दुई पटक मुख्यमन्त्री भएर अहिले कांग्रेसकै केदार कार्कीको नेतृत्वमा प्रदेश सरकार चलिरहेको छ । तर यो सरकार बाँकी अवधि टिक्ने बलियो आधार छैन ।
सत्ता राजनीति यसरी गिजोलिदा प्रदेशको नामाकरणप्रति असन्तुष्ट पहिचान पक्षधरको आन्दोलन भित्रभित्रै बढिरहेको छ । उनीहरुले कोशी नाम स्वीकारेका छैनन् । आन्दोलनकै क्रममा गत वर्ष चैतमा पदम लिम्बुको मृत्यु भएको थियो । लिम्बुको मृत्युपछि प्रदेश सरकार विराटनगर केन्द्रित छ । आन्दोलनकारीको निशानामा केन्द्रिय नेतादेखि प्रदेशका मुख्यमन्त्री, मन्त्री र सांसदहरू छन् । मध्यपहाडी संकल्प अभियानका क्रममा कोशी प्रदेश प्रवेश गरेको एमाले टोली रोक्ने क्रममा पूर्वमन्त्री गोपाल किराँती सहित ठूलो संख्यामा आन्दोलनकारी गिरफ्तार भएका थिए । तर आन्दोलनकारीले ठूला दलका नेताहरू केन्द्रित आक्रमण रोकेका छैनन् । कतिसम्म भने एमालेका अध्यक्ष केपी शर्मा ओलीले पहिचान पक्षधरको संभावित अवरोधलाई ध्यान दिएर पाँचथरको चिवाभञ्ज्याङ पुग्न हेलिकोप्टर चढ्नु परेको थियो ।
पहिचान पक्षधर आन्दोलनको सवैभन्दा ठूलो असर भने प्रदेश सरकारलाई परिरहेको छ । लगातार परिवर्तन भइरहेको प्रदेश सरकार अहिले लगभग विराटनगर केन्द्रित छ । विराटनगर पेरिफेरिकै कार्यक्रमहरुमा समेत मुख्यमन्त्री र मन्त्रीहरू जान सकेका छैनन् । मुख्यमन्त्रीको कार्यालय परिसरलाई निषेधित क्षेत्र घोषणा गरेरै सुरक्षित गर्नु परेको छ । तर पहिचान पक्षधरको माग सम्बोधन गर्न उचित पहलकदमी लिएको देखिदैन । केन्द्रिय नेतृत्वले मात्रै पहिचान पक्षधरको माग सम्बोधन गर्न सक्ने भएकाले पनि प्रदेश सरकार आफै विराटनगरमा खुम्चिएर बस्नु परेको हुन सक्छ । त्यसो हुँदा कोशीले खेपिरहेको समस्याबारे केन्द्रित नेतृत्वले बेलैमा ध्यान दिन आवश्यक छ, जसले संभावित संकट समाधान गर्नेछ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies