१२ वर्ष अगाडि भएको हत्या आरोपमा पूर्व मन्त्री एवम् रौतहट–२, बाट निर्वाचित प्रतिनिधिसभा सदस्य मोहमद अफताव आलम पक्राउ परेका छन् । कोजाग्रत पूर्णिमाका अवसरमा काँग्रेसले वर्षेनि गर्दै आएको चियापान कार्यक्रम अन्तर्गत गौंरतर्फ जाँदै गर्दा प्रहरी प्रधान कार्यालयबाट गएको सादा पोशाकका प्रहरी टोलीले आलमलाई पक्राउ गरेको हो । पक्राउ पछि प्रहरीले आलमलाई हिरासतमा राखेर अनुसन्धान प्रक्रिया अगाडि बढाएको छ । आलमले २०६४ को संविधानसभा निर्वाचनको अघिल्लो दिन बम बिस्फोटबाट मृत्यु भएका र घाइतेहरुलाई ईटा भट्टीको आगोलमा हालेर हत्या गरेको आरोप लागेको छ । त्यो १२ वर्ष अगाडिको आरोप विरुद्ध अहिलेसम्म प्रहरीले अनुसन्धान प्रक्रिया अगाडि बढाएको थिएन ।
तर, महान्याधिवक्ताको कार्यालयबाट पत्र गएपछि प्रहरीले अनुसन्धान प्रक्रिया अगाडि बढाएको छ । त्यो विभत्स हत्यामा आलम संलग्न भएको भन्दै २०६५ मै जाहेरी परेको थियो । जाहेरी अनुसार, आलमले निर्वाचनका क्रममा बम बिस्फोट गराउने योजना बनाएका थिए । तर, बम बनाउँदै गर्दा नै बिस्फोट भयो । दुई जनाको घटनास्थलमै मृत्यु भयो भने थुप्रै घाइते भए । त्यसपछि यो प्रकरण लुकाउन आलमले मृतक र घाइतेहरुलाई बोरामा हालेर आफन्तकै ईटाभट्टाको आगोमा लगाइदिएका थिए । मृतकका आफन्तले प्रहरी विरुद्ध जाहेरी दिए पनि प्रहरीले समेत अनुसन्धान प्रक्रिया अगाडि बढाएन । यसको ओपन सक्रेट विषय भने राजनीतिक दबाव नै थियो ।
यतिसम्म कि छोराको हत्या गरियो भन्दै प्रहरीमा जाहेरी दिनेलाई समेत गोली प्रहार गरी हत्या गरिएको थियो । अहिलेको प्रहरी नेतृत्वले भने सक्रियता देखायो र लुकेका थुप्रै पाटो उजागर समेत गरिदिएको छ । तर, रौतहट काँग्रेस नेतृत्वले भने विज्ञप्ती जारी गरेर निशर्त रिहाइको माग गरेको छ । त्यहाँका काँग्रेसले आन्दोलन समेत गरेको छ । प्रहरीले आलम निर्वाचित क्षेत्रमा प्रहरी बढाएको छ । यसबारे काँग्रेसले अपराधको पक्षमा बोल्यो भनेर आलोचना शुरु भएको छ ।
देशकै पुरानो र विधिको शासनको पक्षमा लड्दै आएको काँग्रेसलाई आलमको प्रकरणमा सघाउन आग्रह गर्नेहरु पनि देखिएका छन् । धेरैले काँग्रेस नेतृत्वले यो अनुसन्धान प्रक्रियालाई कसरी लिन्छ भन्ने संशयले हेरेको छ । किनभने अहिलेसम्म आलम जोगिएको पनि काँग्रेसका केही नेतृत्वको राजनीतिक बलमा हो भन्ने अनुमान गर्न सकिन्छ । तर, विधिको शासनमा विश्वास गर्ने काँग्रेसले यो तथ्य भुल्न हुन्न । यदि, आलमले अपराध गरेको प्रमाणित भए सजाय भोग्नेछन् । होइन भने उनी छुट्नेछन् । राजनीतिक यात्रालाई जारी राख्नेछन् । यी फैसला गर्ने न्यायालयलाई साथ दिनु भनेको न्यायको पक्षमा काँग्रेस उभिनु पनि हो ।
