काठमाडौं : विदेशमा अलपत्र नेपालीहरुलाई स्वदेश फिर्ताका लागि दुई दिनदेखि स्थगित चार्टर उडान बुधबार (आज) देखि पुनः शुरु हुने भएको छ । जसअनुसार बुधबार ६ उडान हुनेछन् । बुधबार चीन, सिंगापुर र मलेसियनबाट नेपाली यात्रु ल्याउने तीनवटा उडान हुने छन् ।
बुधबारदेखि जुलाई २१ अर्थात साउन ६ गतेसम्म विभिन्न ६ देशबाट ४२ वटा उडान हुने छन् । त्यसमा हिमालय एयर र नेपाल एयरलाइन्सले समान १६ उडान भर्ने छन् भने एयर अरेबियाले २, फ्लाई दुबईले २, मलेसियाको मालिन्दो एयरले ४ र जजिरा एअरले २ वटा उडान भर्ने छन् ।
आगामी १५ दिनकोबीचमा साउदी अरबको दमाम र रियाद, यूएईको दुबई, सारजाह र अबुधाबी, कुबेत, कतार, बहराइन र मेलेसियाबाट नेपालीलाई स्वदेश ल्याईने संस्कृति, पर्यटन तथा नागरिक उड्डयन मन्त्रालयले जनाएको छ । जुलाई २१ पछि अवस्थाको विश्लेषण गरेर नियमित उडान गर्ने विषयमा छलफल भइरहेको बताइएको छ ।
गत जेठ ३२ गतेदेखि सरकारले विभिन्न देशबाट समस्यामा रहेका नेपालीको स्वदेश फिर्तीका लागि चार्टर उडानलाई अनुमति दिएपछि हालसम्म समस्यामा रहेका करिब २८ हजार नेपाली स्वदेश फर्किसकेका छन् ।
