सोनितराज ढुंगेल / मध्यान्ह
सर्लाही , ८ कार्तिक । स्थायी राजधानी सर्लाही संघर्ष समितिको आयोजनमा "प्रदेश २ को मध्य भूभाग सर्लाहीमा राजधानीको सम्भावना, चुनौती र तपाई-हाम्रो भूमिका" विषयक सर्वपक्षीय सर्वदलीय अन्तरक्रिया कार्यक्रम सम्पन्न भएको छ । संघर्ष समितिका संयोजक चन्द्रभुषण साहको अध्यक्षतामा भएको कार्यक्रमलाई सम्बोधन गर्ने क्रममा सबै वक्ताहरुले उक्त अभियानलाई आ-आफ्नो स्थान र स्तरबाट सहयोग गर्ने प्रतिबद्धताका साथै अभियान सफलताको शुभकामनासमेत व्यक्त गरेका थिए । अन्तरक्रिया कार्यक्रम सम्पन्न भए लगतै प्रदेश २ को बीचभाग सर्लाहीमा राजधानीका लागि संकल्प यात्रा तथा दीप प्रज्वलन कार्यक्रमसमेत आयोजन गरिएको थियो ।
कार्यक्रमलाई सम्बोधन गर्ने क्रममा संयोजक साहले मुलुकमा आम नेपाली जनताको लामो संघर्ष, त्याग र बलिदानबाट संघीय लोकतान्त्रिक गणतन्त्र आईसकेको छ। तर यसलाई ठोस संस्थागत ढंगबाट अभ्यास गर्ने महत्वपूर्ण कडीको रुपमा रहेको प्रदेशहरुको स्थायी राजधानी तोक्ने सवालमा देशको ७ ओटा मध्य ६ ओटा प्रदेशले आ-आफ्नो स्थायी राजधानी तोकिसक्दा समेत प्रदेश नं. २ को सरकार आफ्नो कानमा तेल हालेर सुतिरहेको आरोप लगाए । ‘ यो पछौटेपनको विडम्बनापूर्ण यथार्थ सिङ्गो २ नं. प्रदेश र हामी सारा प्रदेशवासीहरुको अपमानको विषय हो,’ साहले भने ‘ यसका लागी तपाई-हामीले प्रदेशको सारा विधायकगण, मुख्यमन्त्री तथा मन्त्रीगण सबैमा सशक्त खबरदारी गर्न अपरिहार्य छ ।’ प्रदेश नं. २ को पूर्वी जिल्ला सिरहा- सप्तरी र पश्चिमी जिल्ला बारा-पर्साको बीच मध्य भूगोलमा अवस्थित सर्लाही एउटा पुरानो विरासत बोकेको स्थान भएको दावी गर्दै साहले अगाडी भने, ‘यो स्थान प्रदेशको अन्य स्थानको तुलनामा धार्मिक, भाषिक एवं सांस्कृतिक विविधताले पनि भरिपुर्ण छ। यहाँ मधेशी, मुस्लिम, थारू, खस-बाहुन, क्षेत्री, दलित, मगर, भोटे, तामाङ्ग लगायतका आदिवासी जनजातिहरुकोसमेत उल्लेख्य बाहुल्यता छ । समग्रमा हेर्दा यसलाई एउटा मिनी नेपालको रुपमासमेत लिन सकिन्छ । सामाजिक सद्भाव र शक्ति सन्तुलनको हिसाबलेसमेत यो स्थान स्थायी राजधानीको लागीि उपयुक्त हो।”
सर्लाहीमा स्थायी राजधानी निर्माण भएमा प्रदेश नंबर २ को साथसाथै सिङ्गो मुलुकको पनि आर्थिक समृद्धि र विकासमा महत्वपूर्ण योग्दान पुग्ने संयोजक साहको ठहर छ । उनले यस न्यायोचित अभियानमा लाग्न सबै प्रदेशवासीहरुलाई आग्रह समेत गरेका छन । कार्यक्रममा ईश्वरपुर नगरपालिका नगर प्रमुख मनोज देवकोटा, उपप्रमुख एकावती देवी चौधरी, नेपाली कांग्रेस ईश्वरपुरका नगर सभापति बेचु प्रसाद तिमलसिना, जनता समाजवादी ईश्वरपुर नगर समितिका संयोजक पंची महतो, नेकपाका नगर संयोजक रामपृत राय यादव, नेकपाका प्रदेश नं. २ को कार्यसमिति सदस्य सुशिल थपलिया, विभिन्न वडाका वडा अध्यक्षहरु, युवा, विद्यार्थि, उद्योग वाणिज्य संघका प्रतिनिधि, नागरिक अगुवा,बुद्धिजीवी, पत्रकार, समाजसेवी लगायत विभिन्न राजनैतिक दलका प्रतिनिधिहरुको समेत उपस्थिति रहेको थियो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies