शुसिला गौतमका तीन दर्जन भन्दा बडी गीत सार्वजनिक भैसकेका छन् भने ती गीतहरु मध्ये अधिकांश चर्चित र लोकप्रिय मानिन्छ । लोक दोहरीको क्षेत्रमा पछिल्लो समय चर्चामा रहेकी गायिका शुसिलाले आफ्नो गीतमा मोडलिङ पनि गर्छिन् । गुल्मी शान्तिपुरकी बासिन्दा हाल बुटवलमा बसेर आगामी दिनमा कस्ता खाले गीतसंगीत लिएर स्रोता, दर्शकमाझ प्रस्तुत हुने भन्ने सोचमा रहेकी छन् । गायनबाट अभिनयमा प्रवेश गरेकी शुसिलाले आफ्नो बाहेक अन्य विभिन्न चर्चित गीतमा मोडलिङ समेत गरेकी छन् । शुसिला आफ्नो सिर्जनालाई सुन्दर बनाउन शब्द संकलन, संगीत सिर्जनामा पनि स्वयंलाई सकृय बनाउँदै छिन् । एक दशकदेखि दोहरी क्षेत्रमा आफ्नो पृथक पहिचान बनाउँदै गरेकी गायिका शुसिला गौतमले मध्यान्ह दैनिकका लागि सानु श्रेष्ठसँग गरेको संक्षिप्त कुराकानीः
सन्चै हुनुहुन्छ ?
भौतिक शरीर सन्चो भएपनि मन सन्चो छैन । कोराना भाइरसका कारण झण्डै वर्षदिन घरमा नै पट्यार लाग्दो दिनहरु काटिरहेकी छु । यो अवधिमा त केही सिर्जनाहरु बाहिर आउँथे होला ।
सिर्जनाका लागि त उपयुक्त समय हो नि ?
प्रतिस्पर्धाको जमना छ अरुको भन्दा केही फरक त हुनै पर्छ भन्ने मान्यताका कारण राम्रो सिर्जनाको आशमा सोचनी काम भैरहेको छ । तर, अझै माहोल बनिसकेको छैन । गीत बनाएरमात्र भएन भिडियो चाहियो । होडबाजीको समय छ राम्रै बनाउनु प¥यो राम्रो बनाउँदा खर्च पनि राम्रै हुन्छ । सुन्ने गीतको भन्दा पनि हेर्ने गीतको चलनका कारण गीत तयार पारेर स्रोता, दर्शकसम्म पु¥याउँदा आर्थिकरुपले अलि गाह्रो हुन थालेको छ ।
कस्तो खालको भाका ल्याउने बिचार गर्नुभएको छ ?
भाका त दोहरी नै हो । तर, भिन्न खालको स्वाद दर्शक, स्रोतालाई दिऊँ भन्ने सोच बनाको छु यो पटक ।
भन्नाले ...?
प्रायः भिडियोमा केटा, केटी टहलिने वा नाच्ने हुन्छ । मेरो अब आउने भिडियो अलि पृथक हुनेछ । गीत, संगीतको पाटो त छँदैछ भिडियो भित्र गीत सुहाउँदो कथा समावेश हुने छ जसले हेर्ने र सुन्नेलाई छुट्टै आनन्द दिलाउनेछ ।
चलेको गायिका यत्तिका समय हराउँदा कस्तो प्रतिक्रिया आइरहेको छ ?
आफ्ना स्रोताहरुले खोजी गर्नु त खुशीकै कुरा हो । चहाँदा चहाँदै पनि काम गर्ने वातावरण अझै सहज बनिसकेको छैन । स्टेज प्रोगामहरु सून्य जस्तै छ । हामी कलाकारको आर्थिकरुपले ठूलो स्रोत भनेकै स्टेज कार्यक्रम र विदेशमा हुने प्रोगाम हो, दुबै नभएपछि के हुन्छ । शुभचिन्तक स्रोताहरुले सोधिरहनु हुन्छ तपाईंको नयाँ सिर्जना कहिले आउँछ भनेर । छिट्टै आउँछ भन्ने गरेको छु ।
यात्रा लामै भयो गीत, संगीतमा ?
भर्खर जस्तो लाग्छ । तर, एक दशक नै नागि सक्यो । समय वितेकै पत्तै नहुने ।
मोडलिङ गरेको पनि देखिन्छ कत्तिको नाच्नु हुन्छ ?
खासै नाच्न त आउँदैन । अर्को कुरा गाउँले चेली भएर पनि नाच्न जानिएन भने त लाजमर्दो हुन्छ कि ।
दोहरीमात्र गाउनु हुन्छ कि अरु पनि.. ?
गाउन त अरु भाकाका गीत पनि गाउँछु । तर, लोकदोहोरी गीत नै बढी गाउन मन लाग्छ ।
विशेष गरी दोहरी क्षेत्रमा विकृति बढ्यो भन्छन् नि ?
बास्तविक शब्दलाई बिगारेर दर्शकलाई मनोरञ्जन दिने प्रयास गरिन्थ्यो र छाडा लाग्थ्यो अहिले त्यस्तो हुँदैन । आफ्नो मौलिक शैलीमा नै प्रस्तुत हुनु पर्ने कुरा गायक, गायिकाले बुझिसक्नु भएको छ । स्टेज प्रोगामहरुमा कलाकारहरु आफ्नो प्रस्तुति दिनेक्रममा भल्गर्स शब्द र दृश्यले अडेन्सलाई विकृति लाग्नु स्वभाविक हो । क्षणिक मनोरञ्जनका लागि त्यसो गरिनु हुँदैन ।
कत्तिको सन्तुष्ट हुनुहुुन्छ ?
यो क्षेत्रमा गर्नु पर्ने धेरै बाँकी भएपनि अहिले आफ्नो कामबाट सन्तुष्ट नै छु ।
मोफसलमा बस्नुहुन्छ, काम गर्न कत्तिको सहज हुन्छ ?
सिर्जना भन्ने कुरा जहाँ बसेर गरेपनि उस्तै हो । तर, त्यो सिर्जनाको फिन्सिङ चाहिँ केन्द्रमा नपुगी हुँदैन । किन कि मोफसलमा भनेको जस्तो रेकर्डिङ स्टुडियो बनिसकेको छैन । काठमाडौं नै बस्ने भएपनि लकडाउन यता म बुटवल बसेर गीतसंगीतको क्षेत्रमा काम गरिरहेको छु । जतिसुकै राम्रो सिर्जना भएपनि त्यसले मागेको बाजाहरु प्रयोग गर्न राजधानी नै पुग्नु पर्ने बाध्यता छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies