ताप्लेजुङ : भनिन्छ जहाँ इच्छा, त्यहाँ उपाए । ताप्लेजुङको मैवाखोला गाउँपालिका अध्यक्ष विजय प्रकाश वनेमले पनि इच्छा राखेर उपाए निकालेका छन् ।
जब मानिसहरू शिक्षित हुँदैनन् तबसम्म संसार अध्यारो नै हुन्छ । शिक्षा भनेको मानसिक चेतना वा विकास हो । जबसम्म मानसिक विकास हुँदैन, तबसम्म भौतिक विकास हुन सक्दैन भन्दै मैवाखोला गाउँपालिकाका अध्यक्ष वनेमले आफ्नो पालिकामा शैक्षिक क्षेत्रको विकास गर्ने लक्ष्य बोकेर हिँडिरहेका छन् ।
शैक्षिक विकास तथा सुधारका लागि १२ करोड रूपैयाँ पालिकाबाट छुट्याइएको उनले बताए ।
उनले आफ्नो पालिकाभित्र रहेको २८ वटा विद्यालयका सम्पूर्ण प्रधानाध्यापक तथा पालिकाका अधिकृत बिष्णु थापा, पालिका शिक्षा अधिकृत लक्ष्मी गुम्देल, प्राविधिक सहायक अजुन घिमिरे, राष्ट्रिय शिक्षा अभिभावक कार्यक्रमका अभिषेक घिमिरे, छेणुप लामा, दिनेश थापा लगायतको उपस्थितिमा एक कार्यक्रम आयोजना गरी उक्त योजना सार्वजनिक गरेका हुन् ।
यतिबेला ताप्लेजुङको मैवाखोला गाउँपालिकाले शैक्षिक सुधार तथा विकास अभियान अन्तर्गत ‘अभिभावक जागरण अभियान’ कार्यक्रम प्रत्येक विद्यालयमा सुरू भइरहेको छ । शैक्षिक क्षेत्रमा हुँदै आएको विकृति, जागिर बचाउ, भत्ता पचाउ जस्ता अभियान बोकेर विद्यालय छिर्ने शिक्षकहरूलाई खबरदारी गर्दै अध्यक्ष वनेम आफू स्वयम् प्रत्येक विद्यालयमा धाइरहेका छन् ।
यो योजनामा उनले शिक्षकलाई मात्र हैन अभिभावकलाई पनिसँगै जोडेका छन् । बालबालिकाको शिक्षामा अभिभावकलाई जिम्मेवार बनाउने उद्देश्यले यस अभियानले जोडेको देखिन्छ । यो अभियान नेपालमा सुरुवाती चरणमा छ भन्दा फरक नपर्ला ।
विस्तारै उदाउँदै गरेको यो अभियानलाई गाउँपालिकाका प्रत्येक अभिभावक, विद्यार्थी, शिक्षक, राजनीतिज्ञ लगायतले मन पराएका पनि छन् ।
गाउँपालिकाका अध्यक्ष वनेम भन्छन्,‘हामी शिक्षा क्षेत्रमा छिट्टै फड्को पार्ने छौं । शिक्षामा सुधार ल्याउन जरूरी थियो, अब आउँछ पनि ।’ यस्ता कार्यमा सबै सरोकारवालाहरुको भूमिका महत्वपूर्ण रहनेछ । यो अभियान अन्तर्गत गाउँपालिकाका ६ वटै वडाका विद्यालयका अभिभावक, शिक्षकलगायत सरोकारवालाहरुलाई सहभागी गराइरहेका छन् । विद्यार्थीको सिकाइ क्रियाकलापमा शिक्षक, विद्यार्थी, अभिभावक, नागरिक अगुवा, स्थानीय सरकार, विद्यालय व्यवस्थापन समिति लगायत सबैको उत्तिकै भूमिका रहने भएकोले सबै विद्यालयमा कार्यक्रम महत्वपूर्ण र सक्रिय सहभागिता हुन अध्यक्ष वनेमले सम्पूर्ण पालिकाबासिलाई आग्रह गरेका छन् ।
सँगै बालबािलकाहरूको क्षमता विकास तथा शारीरिक, मानसिक वृद्वि विकासका लागि स्मार्ट एसेम्लीको पनि सुरूवात भइसकेको छ ।
