काठमाडौं : जनता समाजवादी पार्टी (जसपा) नेपालले मधेश केन्द्रित र पहिचान पक्षधर साना राजनीतिक दलहरूसँग सहकार्यको प्रयास गरेको छ । विचार मिल्ने दलसँग एकता गर्ने र तत्काल एकता सम्भव नभएका राजनीतिक दलसँग सहकार्य गर्नेगरी जसपा नेपालले उपाध्यक्ष राजकिशोर यादवको नेतृत्वमा अन्तरपार्टी समन्वय समिति नै बनाएर गतिविधि अगाडि बढाएको छ ।
जसपा नेपाल हाल प्रतिनिधिसभामा ५ सिटसहितको दलको हैसियतमा छ । २०७९ सालको आमनिर्वाचनबाट उपेन्द्र यादव नेतृत्वको जसपा नेपालले प्रतिनिधिसभामा १२ सिटसहितको उपस्थिति जनाएको थियो । तर, अशोककुमार राईले ७ जना सांसद लिएर पार्टी फुटाएपछि यादव शक्तिहीन जस्तो भएका छन् ।
तर, फेरि शक्ति आर्जन गर्ने प्रयासमा यादव मधेश केन्द्रित दलहरूसँग एकताको प्रयासमा लागेका देखिन्छन् । यही योजनाअन्तर्गत उपाध्यक्ष राजकिशोर यादवको नेतृत्वमा अन्तरपार्टी समन्वय समिति नै बनाएर गतिविधि अगाडि बढाइएको हो ।
कुनै बेला मधेशको एकछत्र नेतृत्वमा रहेका यादव पछिल्लो समय राजनीतिको मुख्य बहसमा कतै छैनन् । यसको कारण आफूसँग कम शक्ति रहेकोमा यादव ‘कन्भिन्स्ड’ छन् ।
उपाध्यक्ष राजकिशोर यादव संसद्मा हुने प्रतिनिधित्वले पार्टीको हैसियतलाई अर्थ राख्ने बताउँछन् । तथापि, राजनीतिमा कहिले कम र कहिले राम्रो शक्ति हुनु स्वाभाविक रहेको बताउँछन् । २०८४ सालमा हुने निर्वाचनबाट जसपा नेपाललाई फेरि मधेशको बलियो शक्तिको रूपमा स्थापित गर्नेगरी पार्टी अगाडि बढेको उनको भनाइ छ ।
यसका लागि पहिचान पक्षधरसँग सहकार्य तथा एकताका लागि छलफल गर्न अन्तरपार्टी समन्वय समिति बनाएर गतिविधि अगाडि बढाइएको हो ।
अन्तरपार्टी समन्वय समितिले विभिन्न दलका नेताहरूसँग संवाद अगाडि बढाएको छ । यही शिलशिलामा हालै राष्ट्रिय मुक्ति पार्टी नेपाका अध्यक्ष राजेन्द्र महतोसँग समेत छलफल भएको छ ।
देशले प्राप्त गरेको परिवर्तन पनि गुम्ने अवस्था आएको र त्यसको रक्षा गर्न आवश्यक रहेको भन्दै पहिचान पक्षधर दलहरूका बीच सहकार्यको आवश्यकता रहेको प्रस्ताव उपेन्द्र यादवले राजेन्द्र महतो समक्ष गरेका हुन् ।
जसपा नेपालमा महासचिव रामकुमार शर्मा देशले प्राप्त गरेको परिवर्तन पनि गुम्ने अवस्था आएको र त्यसको रक्षा गर्न आवश्यक रहेकाले राजनीतिक दलहरूका बीचमा संवाद अगाडि बढाइएको बताउँछन् । पहिचान पक्षधर दलहरूका बीचमा सहकार्यको आवश्यकता रहेको महासचिव शर्माको भनाइ छ ।
उनी भन्छन्, ‘देशमा गणतन्त्र छ तर आफूलाई ठूला दल भन्नेहरूले बहुदललाई मास्दै २ दलको देश बनाउन लागेका छन् । यो देशका लागि चिन्ताको विषय हो । यस कारण प्राप्त उपलब्धिको रक्षाका दलहरूका बीचमा कुराकानी भइरहेको छ ।’
जसपा नेपालका नेताहरूका अनुसार पहिचान पक्षधर राजनीतिक दलका नेताहरूसँग कुराकानी भइरहेको छ । सम्भव भएका दलका नेताहरूसँग छलफल गर्दा देशको वर्तमान अवस्थाको बारेमा रहेको सोच, अगाडि बढ्ने योजना र सहकार्यको विषयमा संवाद भइरहेको छ । यसरी विचार मिल्ने दलसँग एकता र तत्काल एकता सम्भव नहुने दलसँग सहकार्य गरेर अगाडि बढ्नेगरी राजनीतिक संवादमा जुटेको नेताहरू बताउँछन् ।
सत्तारुढ २ दल नेपाली कांग्रेस र नेकपा एमालेले संविधान संशोधनको विषयमा छलफल चलाइरहेका छन् । मधेश केन्द्रित दलहरूले संविधान निर्माणकै समयदेखि संविधानमा संशोधनको माग गर्दै आएका छन् ।
ठूला दलहरूले संविधान संशोधनको विषयमा छलफल अगाडि बढाएकाले पनि मधेश केन्द्रित र पहिचान पक्षधर राजनीतिक दलहरूका बीचमा सहकार्य आवश्यक रहेको जसपा नेपालका नेताहरू बताउँछन् ।
