काठमाडौं : प्रधानमन्त्री केपी शर्मा ओलीले नेपालमा जनशक्ति र क्वारेन्टाइनको पर्याप्त सुविधा नभएको भन्दै विदेशमा रहेका नेपालीहरूको तत्काल उद्धार गरी स्वदेश फर्काउन नसकिने बताएका छन् । यसअघि प्रतिनिधिसभा अन्तर्गतका विभिन्न समिति, सर्वोच्च अदालतले उपयुक्त प्रवन्ध गरी विदेशमा रोजगारी गुमाई वा अन्य कारण अलपत्र परेका नेपालीहरुलाई स्वदेश ल्याउन नेपाल सरकारलाई निर्देशन दिएका थिए ।
सोही अनुसार उपप्रधानमन्त्री एवं रक्षा मन्त्री ईश्वर पोखरेलको संयोजकत्वमा रहेको नोभल कोरोना भाइरस रोकथाम तथा नियन्त्रण उच्चस्तरीय समन्वय समितिले विदेशमा रहेका नेपालीहरुलाई फर्काउने तयारी गरिरहेको खबर सार्वजनिक भएका बेला प्रधानमन्त्री ओलीले भने तत्काल विदेशमा रहेका नेपाली कामदार वा अन्य नागरिकलाई व्यवस्थापनको समस्या देखाएर फर्काउन नसकिने बताएका हुन् ।
मंगलबार सरकारको आर्थिक वर्ष २०७७/०७८ को नीति तथा कार्यक्रममाथि संसदमा उठाइएका प्रश्नहरुको जवाफ दिँदै प्रधानमन्त्री ओलीले समस्यामा परेका नेपाली नागरिकहरूलाई स्वदेश फर्काउने विषयमा छलफल भइरहेको तर नेपालको क्षमतालाई ध्यानमा राखिएको बताए ।
उनले भने, ‘कतारले नेपालबाट १०० जना लैजानु र हामीले कतारबाट पौने चार लाख नेपालीहरुलाई ल्याएर व्यवस्थापन गर्नु एउटै विषय होइन । विदेशमा ४० देखि ४५ लाख नेपाली रहेका छन् । हामीसँग ४/५ वटा मात्र जहाज रहेका छन् । उनीहरुलाई कसरी फिर्ता ल्याउने हो, मेरो त गणित अलिक कमजोर छ, तपाईहरु नै हिसाव लगाउनुहोस् ।’
विदेशमा रहेका नेपालीहरूलाई ल्याउनुपर्छ भन्न सजिलो तर उनीहरुलाई ल्याउने तयारी गर्न गाह्रो भएको भन्दै प्रधानमन्त्री ओलीले भने, ‘व्यवस्थापन गर्ने जनशक्ति उतै छ, विदेशमा रहेका मान्छेलाई यहाँ ल्याउने सेन्टिमेन्टमा क्वारेन्टाइनको व्यवस्था नगरी ह्वारह्वारी ल्याउने र कोरोना मात्र फैलाई देश नै सोत्तर बनाउन चाहँदैनौं ।’
केही दिन पहिले संसदको अन्तर्राष्ट्रिय सम्बन्ध समितिको बैठकमा जानकारी दिँदै परराष्ट्र मन्त्री प्रदीप ज्ञवालीले करिब ६ लाख नेपालीको उद्धार गर्नुपर्ने र करिब आधालाई तत्काल उद्धार गर्नुपर्ने जानकारी दिएका थिए ।
यूएईलगायत केही मुलुकहरुले विमान नै चार्टर गरेर रोजगारी गुमाएका नेपालीलाई ल्याइदिन खोजेको तर नेपाल सरकारले विमान अवतरणको अनुमति दिने अवस्था नरहेको जानकारी दिएका बताएका थिए । हाल कुवेत सरकारले सञ्चालन गरेको आममाफीमा सहभागी भएका करिब ३ हजार नेपाली कुवेत सरकारले सञ्चालन गरेका घर फिर्ती केन्द्रहरुमा रहका छन् । उनीहरुले आफुहरुको मृत्यु नकुर्न नेपाल सरकारलाई पटक पटक ध्यानाकर्षण गराएका छन् ।
नेपाल वैदेशिक रोजगार व्यवसायी संघले जेठ महिनाको पहिलो हप्तासम्म कोरोना भाइरस (कोभिड–१९) को कारणले वैदेशिक रोजगारीमा रहेकामध्ये करिब साढे ४ लाख नेपालीले रोजगारी गुमाउने अवस्था देखिएको र उनीहरुलाई तत्काल स्वदेश फर्काउनुपर्ने स्थिति रहेको बताएको छ ।
प्रमुख प्रतिपक्षी नेपाली काँग्रेसले पनि विदेशमा रहेका नेपालीहरुलाई स्वदेश फर्काउन पटक पटक माग गर्दै आएको छ । प्रधानमन्त्री ओलीले मंगलबार संसदमा दिएको जवाफले विदेशमा रोजगारी गुमाएका कामदार वा अलपत्र अन्य व्यक्तिहरुले स्वदेश फर्किन अझै केही समय कुर्नुपर्ने आँकलन गरिएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies