काठमाडौं : कतारमा पछिल्लो ९ महिनामा १ सय ९ जना नेपालीहरुको ज्यान गएको छ । त्यसमध्ये १८ जनाले कोरोनाका कारण ज्यान गुमाएका छन् । उनीहरुसहित थप १२ जना गरी ३६ जनाको कतारमै अन्त्येष्टी गरिएको छ ।
कतारस्थित नेपाली दूतावासका द्वित्तीय सचिव भुवनप्रसाद भट्टले परिवारको सहमतिमा कतारमा अन्त्येष्टी गरिएको जानकारी दिएका छन् । भट्टका अनुसार लकडाउन यता ७५ वटा शव नेपाल पठाइ सकिएको र ४ जनाको शव कतारको शव गृहमा रहेको छ । दूतावासले कोरोनाका कारण असहज परिस्थितिमा परेका र नेपाल फर्कनै पर्नेहरूलाई उद्धार गर्ने नेपाल सरकारको निर्णय बमोजिम कतारबाट सहजिकरण उडान भइरहेका जनाएको छ ।
शनिबार दोहाबाट नेपाल एयरलाइन्सले ४६ औँ सहजिकरण उडान गरेको छ । उक्त उडानमार्फत ३ महिलासहित १ सय ४७ जना नेपाली आएका छन् । दूतावासका द्वित्तीय सचिव प्रवीण भट्टराईले कोरोनाका कारण असहज परिस्थितिमा परेका र नेपाल फर्कनै पर्नेहरूलाई उद्धार गर्ने क्रम जारी रहने बताए ।
यसैबीच कतारमा हवाई टिकटको व्यवस्थापन गर्न नसकेका तर तुरुन्त घर फर्किनु पर्ने समस्यामा रहेका ७ नेपाली श्रमिकहरुलाई गैर आवासीय नेपाली संघ (एनआरएनए)को पहलमा स्वदेश फिर्तीका लागि निःशुल्क हवाई टिकट सहयोग गरेको छ ।
गैर आवासीय नेपाली संघ राष्ट्रिय समन्वय परिषद कतार र नेपाली व्यवसायी संघ कतारद्वारा पहिलो चरणमा ५५ जनाका लागि हवाई टिकट उपलब्ध गराउने योजना अनुसार फर्काइएका छन् । त्यसमा मानसिक सन्तुलन गुमाएका धनुषाका विनोद महरा, दुबै मिर्गौला गुमाएका सर्लाहीका हसामुद्धीन लेहेरीका साथै सुनसरीका सद्धाम खान, सिरहाका जितेन्द्र कामती, तेह्रथुमका अमृता कान्दङ्वा, सर्लाहीका राम बाबू टमाटा र खोटाङका आश कुमार राईलाई हवाई टिकट उपलब्ध गराई नेपाल पठाइएको एनआरएनए कतारका अध्यक्ष एवं स्वदेश फिर्तिका लागि आर्थिक सहयोग तथा उद्धार समितिका संयोजक मोहमद मुक्तदा मुसलमानले जानकारी दिए ।
अध्यक्ष मुसलमानले समस्यामा रहेकालाई स्वदेश फिर्तिका लागि सहजिकरणमा भूमिका निभाउने नेपाली नियोग र स्वदेश फिर्तिका लागि आर्थिक सहयोग तथा उद्धार समितिका सदस्य तथा सहजिकरण, सहयोग र बिदाई गर्न सक्रिय नेपाली दूतावास कतारका द्वितीय सचिव प्रविन भट्टाराई, एनआरएनए आईसीसी मनार्थ परिषद सदस्य विमल सुवेदी, एनआरएनए एनसीसी कतारका सल्लाहकारहरु चमक पोखरेल तथा मो. अजिज अलीप्रति आभार प्रकट गरे । यसरी हालसम्मा ३० जनालाई टिकट उपलब्ध गराइ सकेको पनि अध्यक्ष मुसलमानले बताए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies