काठमाडौं : बेलायतको राजपरिवारका २ सदस्यहरूले आगामी महिना नेपालको भ्रमण गर्ने भएका छन् ।
बेलायती राजपरिवारकी डचेस सोफी र राजकुमार एडवर्ड आगामी फेब्रुअरी महिनाको पहिलो हप्ता नेपाल भ्रमणमा आउन लागेका हुन् । यो उनीहरूको सन् २०२५ को पहिलो अन्तर्राष्ट्रिय भ्रमण हुने छ ।
बेलायती राजपरिवारको आधिकारिक वेबसाइटका अनुसार एडिनबर्गका ड्युक र डचेसले फेब्रुअरीको पहिलो हप्ता दक्षिण एसियाली राष्ट्रको राजकीय भ्रमणको क्रममा नेपालको भ्रमण गर्ने छन् ।
महारानी एलिजाबेथ द्वितीय र राजकुमार फिलिपका कान्छा छोरा प्रिन्स एडवर्डले २ फेब्रुअरीमा डीओएफईको अन्तर्राष्ट्रिय पुरस्कार फाउन्डेसनको अध्यक्षको रूपमा भारतको भ्रमण गर्दै छन् । त्यसपछि शाही जोडी ४ फेब्रुअरीमा नेपालको ५ दिने भ्रमणका लागि काठमाडौं आइपुग्ने छन् ।
बेलायती शाही जोडीको दक्षिण एसिया भ्रमणको विवरण गोप्य राखिएको भए पनि ड्युक र डचेस अफ एडिनबराले ७ फेब्रुअरीमा पोखराको ब्रिटिस गोर्खा क्याम्पमा नयाँ गोर्खा भर्तीहरूको प्रमाणीकरण समारोहमा भाग लिने छन् ।
पोखरामा रहँदा उनीहरूले नयाँ भर्ती भएका गोर्खा सैनिक र उनीहरूका परिवारका सदस्यहरूलाई भेट्ने छन् ।
हालैका वर्षहरूमा ब्रिटिस गोर्खाहरू बेलायतमा मात्र नभई साइप्रस, म्यासेडोनिया, रोमानिया, जर्मनी, जापान, पपुवा न्युगिनी, अस्ट्रेलिया र न्युजिल्यान्डमा पनि तैनाथ गरिएका छन् । गोर्खाहरूले २०० वर्षभन्दा बढी समयदेखि बेलायती सेनामा सेवा गर्दै आएका छन् । उनीहरूले साहसी र दृढ लडाकुका रूपमा ख्याति कमाएका छन् ।
आफ्नो ५ दिने भ्रमणको क्रममा शाही परिवारका सदस्यहरूले उच्चस्तरीय नेपाली सरकारी अधिकारी र गोर्खा सैनिकका परिवारहरूलाई भेट्ने कार्यक्रम छ । उनीहरूले नेपालमा बेलायतद्वारा वित्त पोषित विकास परियोजनाहरूको पनि निरीक्षण गर्ने छन् ।
एडवर्ड र सोफीलाई सगरमाथा क्षेत्रको पर्वतीय उडानका लागि लैजाने तयारी भइरहेको छ । उनीहरू अन्नपूर्णको फेदको अन्वेषण गर्न घान्द्रुक क्षेत्रमा पनि पदयात्रा गर्ने छन् ।
नेपालको परराष्ट्र मन्त्रालयले पनि बेलायती राजपरिवारका सदस्यहरूको भ्रमणको पुष्टि गरेको छ । काठमाडौंस्थित बेलायती दूतावाससँग परामर्श गरेपछि मात्र उनीहरूको भ्रमण कार्यक्रमको विवरण प्रकाशन गरिने मन्त्रालयले जनाएको छ ।
यसअघि राजकुमार ह्यारीले २०१६ मार्चमा ११ दिनको नेपाल भ्रमण गरेका थिए । त्यस क्रममा उनले काठमाडौं, बर्दिया र पोखरा भ्रमण गरेका थिए । राजकुमार फिलिपले सन् २००० मा पनि नेपालको भ्रमण गरेका थिए ।
.jpg)
