काठमाडौं : सरकारले उद्धार र नियमित उडान शुरु गरेपछि स्वदेश फर्किन नेपाली नियोगहरुमा निवेदन दिएकामध्ये करिब आधा कामदार स्वदेश फर्किएको श्रम, रोजगार तथा सामाजिक सुरक्षा मन्त्रालयले जनाएको छ । मन्त्रालयले शुक्रवार जार्वजनिक गरेको विवरण अनुसार असोज ८ गतेसम्म वैदेशिक रोजगारीका क्रममा समस्यामा परी स्वदेश फर्किन नेपाली नियोगहरुमा निवेदन दिएका १ लाख ३९ हजार ६ सय ७४ जना मध्ये ६७ हजार ३ सय ७९ जना स्वदेश फर्किएका हुन् । त्यसमा यूएईबाट सबैभन्दा बढी कामदार स्वदेश फर्किएका छन् ।
फर्किनेमा वैदेशिक रोजगारीका क्रममा श्रम करार अवधि र भिसा सकिएका, गर्भवती, सुत्केरी, महिला, विरामी धेरै छन् । कोरोना भाइरस संक्रमणपछि सरकारले गत वर्ष चैत ९ गतेदेखि नियमिततर्फका अन्तर्राष्ट्रिय हवाई उडान बन्द गरेको थियो भने जेठ ३२ गतेपछि चार्टर हवाई उडान शुरु गरेको थियो । तर त्यो पर्याप्त हुन नसकेको विज्ञहरुले बताउँदै आएका छन् ।
प्रतिशतका हिसावले नियोगहरुमा निवेदन दिएकामध्ये स्वदेश फर्किनेको संख्या ४८ प्रतिशत भन्दा केही बढी छ । पछिल्लो एक हप्तामा सबैभन्दा बढी नेपाली कामदार स्वदेश फर्किन पाएका छन् । असोज १ गतेदेखि ८ गतेको बीचमा १० हजार ८२ जना कामदार स्वदेश फर्किएको मन्त्रालयले जनाएको छ । त्यसअघि ५७ हजार २ सय ९७ जना कामदार स्वदेश फर्किएका थिए ।
वैदेशिक रोजगार बोर्डले शुरुमा गरेको अध्ययन अनुसार हालसम्म स्वदेश फर्किएका कामदारहरुको संख्या करिब १७ प्रतिशत मात्र रहेको छ । नेपाली कामदारका प्रमुख गन्तव्य खाडीका देश र मलेसियामा कोरोना संक्रमण फैलिएपछि बोर्डले गरेको अध्ययनमा कम्तीमा ४ लाख ७ हजार स्वदेश फर्किने बाध्यतामा रहेको अनुमान थियो ।
अधिकांश कामदारले स्वदेश फर्किने जहाज टिकट नपाउने र पाएपनि अत्यन्तै महँगो भएका कारण खरिद गर्न नसकेर स्वदेश फर्किन नपाएको बताउने गरेका छन् । श्रम, रोजगार तथा सामाजिक सुरक्षा मन्त्री रामेश्वर राय यादवले श्रम स्वीकृति लिएर वैदेशिक रोजगारमा गएका कामदार अलेखवद्ध भएको भएपनि वैदेशिक रोजगार कल्याणकारी कोषको रकमबाट उद्धार गरिने बताउने गरेका छन् ।
विदेशमा अलपत्र परेका नेपाली श्रमिकहरुको उद्धारका लागि नेपाल सरकारले जारी गरेको निर्देशिकाको कार्यान्वयनमा समस्या रहेको विभिन्न देशमा रहेका राजदूतहरुको भनाइ छ । उनीहरुले निर्देशिका संशोधनको पटक–पटक माग गरिरहेका छन् । मन्त्रालयले निर्देशिका कार्यान्वयन समीक्षाको चरणमा रहेको बताएको छ ।
