वीरगन्ज : वीरगन्ज महानगरपालिकाले महिला स्वास्थ्य स्वयंसेविकाहरूलाई स्मार्ट मोबाइल फोन वितरण गरेको छ । सोमबार महानगरपालिकामा आयोजना गरेको कार्यक्रममा नगरप्रमुख राजेशमान सिंहले महिला स्वास्थ्य स्वयंसेविकालाई स्मार्ट फोन वितरण गरेका हुन् ।
महानगरका १ देखि १६ वडासम्मका ४२ जना महिला स्वास्थ्य स्वयंसेविकालाई १÷१ थान मोबाइल फोन वितरण गरिएको स्वास्थ्य महाशाखाका प्रमुख राजु साहले जानकारी दिए ।
महानगरमा ३२ वडामा १९८ जना महिला स्वास्थ्य स्वयंसेविका छन् । पहिलो चरणमा १ देखि १६ नम्बर वडाका ४२ जना स्वयंसेविकालाई मोबाइल फोन वितरण गरिएको हो ।
बाँकी १७ देखि ३२ नम्बर वडाका महिला स्वास्थ्य स्वयंसेविकालाई एक हप्तापछि मोबाइल फोन वितरण गरिने छ ।
महिला स्वास्थ्य स्वयंसेविकाबाट प्रवाह भइरहेको स्वास्थ्य सेवालाई अझ प्रभावकारी बनाउनका लागि मोबाइल फोन वितरण गरिएको साहले बताए ।
प्रमुख सिंहले सीमित श्रोत साधन र न्यून पारिश्रमिकका बाबजुद पनि महिला स्वास्थ्य स्वयंसेविकाले उत्कृष्ट सेवा प्रदान गरिरहेको भन्दै प्रशंसा गरे ।
