कोरानो भाइरसको नयाँ भेरियन्ट ओमिक्रोनको संक्रमण बढिरहँदा मुलुकभर मौसममा पनि बदली आएको छ । जल तथा मौसम विज्ञान विज्ञागले सोमबारसम्म वर्षा हुने अनुमान गरेको छ । शनिबारबाटै हल्का वर्षा शुरु भएको छ । यो वर्षा देशभर हुने अनुमान गरिएको छ । पछिल्लो समय विभागको अनुमान प्रमाणित हुने गरेकाले सोमबारसम्म वर्षाका कारण उत्पन्न कठिनाइतिर केन्द्रीत हुन जरुरी छ । शनिबारबाटै हिमाली क्षेत्रमा हिमपात शुरु भइसकेको छ । उच्च पहाडी क्षेत्रमा अत्याधिक चिसो बढेको छ भने तराई मधेशका जिल्लाहरुमा शितलहरको समस्या छ । यसको अर्थ कोरोना महामारीसँगै चिसोको समस्या बढेको छ । कोरोना संक्रमणको लक्षण रुघाखोकी, ज्वरो लगायत भएकाले चिसोमा अझ नागरिकमा कठिनाइ पर्न सक्छ ।
सरकारले एउटा मात्रै समस्याको हल गर्न सकिरहेको छैन । यस्तोमा अब चिसो र महामारी दुवैबाट नागरिकको जीवनरक्षा चुनौती बनेको छ । अझ पुस अन्तिम सातादेखि उत्कर्षतिर बढिरहेको संक्रमण घट्न सकेको छैन । शनिबार अहिलेसम्मकै उच्च संक्रमण दर देखिएको छ । परीक्षण गरिएका मध्ये ५०.७ प्रतिशतमा संक्रमण पुष्टि भएको छ । २०,१८७ जनामा परीक्षण गराउँदा १०,२५४ जनामा संक्रमण पुष्टि भएको छ । मृत्यु हुने संख्या ठूलो संख्यामा बढेको छ । शुक्रबार तीन जनाको संक्रमण्बाट मृत्यु भएको थियो । तर शनिबार १६ जनाको संक्रमणबाट मृत्यु भएको स्वास्थ्य तथा जनसंख्या मन्त्रालयले जनाएको छ ।
तसर्थ नागरिकलाई यतिबेला राज्यको साथ सवैभन्दा धेरै आवश्यकता परेको छ । सामान्य अवस्थामा नागरिकले राज्यसँग ठूलो अपेक्षा राख्दैन । तर विशेष अवस्थामा राज्यको अनुभूति चाहन्छ । अहिले संक्रमण बढिरहेको राजधानी उपत्यकामा स्वास्थ्य उपचारको खाँचो धेरै छ । संक्रमित मध्ये आधा भन्दा धेरै राजधानी उपत्यकामा संक्रमित रहेकाले पनि राजधानीका अस्पताल र स्वास्थ्य उपचारको प्रबन्ध तयारी अवस्थामा राख्न जरुरी छ । शनिबार काठमाडौंमा ३,७६२, ललितपुरमा १,११० र भक्तुपरमा ४३४ जनामा संक्रमण पुष्टि भएको छ । देशभर सक्रिय संक्रमित संख्या ७२ हजार नाघेको छ । यी संक्रमितको संख्या हेरेर पनि अस्पताल र स्वास्थ्य उपचारबारे आवश्यक तयारी ढिलाइ गर्न हुन्न । चिसो जस्ता नियमित प्राकृतिक समस्याबाट नागरिकलाई जोगाउन नसक्नु त राज्यको गम्भीर अक्षमता हो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies