काठमाडौं : वैदेशिक रोजगारीका लागि कतार र न्युजिल्याण्ड पठाइदिन्छु भनि रकम ठगी गरेको उजुरीका आधारमा प्रहरीले तीन जनालाई पक्राउ गरेको छ । प्रहरीले विनोद चौरेललाई वैदेशिक रोजगारीका लागि कतार पठाइदिन्छु भनि २ लाख ७० हजार रुपैयाँ लिएर ठगी गरेको उजुरीका आधारमा काठमाडौंको टोखा बस्ने रोशनी राणालाई पक्राउ गरेको छ । उनलाई प्रहरीले काठमाडौंको बुढानिलकण्ठको फैकाबाट पक्राउ गरेको हो ।
त्यसैगरी वैदेशिक रोजगारीका लागि न्युजिल्याण्ड पठाइदिन्छु भनि रकम ठगी गरेको उजुरीका आधारमा प्रहरीले लमजुङ दोर्दी घर भइ हाल काठमाडौंको चण्डोल बस्ने रेशम गुरुङ र रोशनी गुरुङलाई पनि पक्राउ गरेको छ । गुरुङद्वयले सुरेन्द्र गिरीलाई वैदेशिक रोजगारीका लागि न्युजिल्याण्ड पठाइदिने र त्यसका लागि १३ लाख रुपैयाँ लाग्छ भनि १२ लाख ७० हजार रुपैयाँ लिइ सम्पर्कविहीन भएको प्रहरीले बताएको छ ।
गुरुङद्वयले गिरीलाई मासिक १ लाख ५० हजार रुपैयाँ तलब हुन्छ भनि विश्वास दिलाइ उक्त रकम हात पारेको प्रहरीले बताएको छ । प्रहरीले दुवै जनालाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको बताएको छ ।
क्वालालम्पुर : मलेसियाका व्यापारिक समूहहरुले आगामी मार्च १ बाट शुरु हुने अवैधानिक अवस्थामा रहेका आप्रवासी कामदार स्वदेश फिर्ता कार्यक्रमलाई ध्यानमा राख्दै विदेशी कामदारको नयाँ भर्नामा रहेको प्रतिबन्ध हटाउन माग गरेका छन् ।
मलेसियाली मुस्लिम रेस्टुरेन्ट ओनर्स एशोसिएसनका अध्यक्ष जवाहर अली तैब खानले अवैधानिक कामदारको घर फिर्ताको कार्यक्रमले वर्षौंदेखि मलेसियामा काम गरिरहेका जनशक्तिको अभाव हुने भएकाले सरकारले नयाँ विदेशी कामदार ल्याउने प्रक्रियालाई पनि सहज बनाउनुपर्ने माग गरे ।
मलेसियाको एसएमई एशोसिएसनका अध्यक्ष डिङ हङ सिङले कागजविहीन कामदारहरुलाई स्वदेश फर्काउने कामले धेरै रोजगारदाताहरुले अनुभवी कामदारको अभावको सामना गर्न सक्ने बताए । त्यसबाट प्लान्टेशन र उत्पादन क्षेत्रका एसएमई (साना र मझौला उद्यमहरु) प्रभावित हुन सक्ने उनले बताए । उनले सरकारले स्वदेश फर्काउन लागेका अवैधानिक अवस्थामा रहेका विदेशी कामदारहरुलाई अध्यागमन शिविरमा थुन्नु उचित नभएको पनि बताए ।
क्वालालम्पुर र सेलान्गोर इन्डियन चेम्बर अफ कमर्स एण्ड इन्डस्ट्रीका अध्यक्ष निवास रागावनले उद्योगको आवश्यकताका आधारमा विदेशी कामदारको आपूर्तिका लागि अनुमति दिनुपर्ने बताए । मलेसियाली उत्पादक संघका अध्यक्ष सोह थियान लाइले सरकारले मार्च १ देखि अवैधानिक अवस्थामा रहेका विदेशी कामदार फर्काउनुअघि नयाँ कामदार भर्नाको सुनिश्चितता गर्नुपर्ने माग गरे ।
विज्ञहरुले भने गैरकानूनीरुपमा विदेशी कामदार आउनुको मुख्य कारण आउटसोर्सिङ नीति जिम्मेवार रहेकोे भन्दै आउटसोर्सिङ प्रणालीमा पुनर्विचार गर्नुपर्नेमा जोड दिएका छन् ।
काठमाडौं : नेपाल वैदेशिक रोजगार व्यवसायी संघको आयोजनामा आगामी मार्च महिनाको पहिलो हप्ता यूएईमा हुने रोजगार मेला ‘जव तथा बिजनेश फेयर’मा ५ दर्जन बढी वैदेशिक रोजगार व्यवसायीले भाग लिने भएका छन् ।
आइतबारसम्म ६० भन्दा बढी व्यवसायीले रोजगार मेलाका लागि स्टल बुकिङ गरेको रोजगार तथा बिजनेस मेलाका लागि संघले प्रथम उपाध्यक्ष तथा अन्तर्राष्ट्रिय कोअर्डिनेटर डिक बहादुर खत्रीको संयोजत्वमा गठन गरेको मूल आयोजक समितिका सदस्य कर्णराज कटुवालले जानकारी दिए ।
मेलामा भाग लिन व्यवसायीहरुले ९६ हजारको हाराहारीमा शुल्क बुझाएका छन् । यूएईको होटल मरिनामा हुने तय भएको जव फेयरमा श्रम, रोजगार तथा सामाजिक सुरक्षा मन्त्री शरतसिंह भण्डारी, सचिव केवलप्रसाद भण्डारी, वैदेशिक रोजगार बोर्डका कार्यकारी निर्देशक डा. द्वारिका उप्रेती सहभागी हुने तय भएको पनि कटुवालले जानकारी दिए ।
यूएईस्थित नेपाली दूतावासको सहकार्य रहने जव फेयरमा यूएईस्थित रोजगारदाताहरु, सबै स्टेटका चेम्बर, इन्डियन इन्भेष्टमेन्ट ग्रुप, सबै बिजनेस कम्युनिटी, एचआर एशोसिएसन र आधिकारिक नेपाली चेम्बरहरुलाई सहभागी गराउने तयारी रहेको संघका महासचिव तथा सदस्य सचिव मेघनाथ भुर्तेलले जानकारी दिए ।
यूएईमा नेपाली कामदारका लागि धेरै क्षेत्रमा रोजगारीको सम्भावना भएपनि बिचौलियाहरुका कारण समस्या रहेकाले रोजगारदाताहरुसँग नेपाली म्यानपावर व्यवसायीहरुको प्रत्यक्ष सम्बन्ध स्थापित गर्न जव फेयर आयोजना गर्न लागिएको संघले बताएको छ । मेला मूल आयोजक समितका संयोजक खत्री तथा संघका यूएई संयोजक नारायण भुसाललगायत व्यवसायी तयारीका लागि यूएई पुगिसकेका छन् ।
नेपालले १७ वर्षअघि २००७ को जुन ६ तारिकमा दुबईको ग्रान्ड हयात होटलमा जव फेयर गरेको थियो । उक्त जव फेयरका कारण नेपालमा कामदारहरु अदक्ष मात्र उपलब्ध छन् भन्ने यूएईका रोजगारदाताहरुको सोचाइ नै परिवर्तन भएको थियो । पछिल्ला महिनाहरुमा यूएई धेरै नेपाली कामदार जाने श्रम गन्तव्य मुलुकको शीर्ष स्थानमा रहेको छ ।
यूएई र नेपाल सरकारबीच यसअघि भएको सम्झौताअनुसार नेपाली कामदारको खर्च रोजगारदाताले नै व्यहोर्नुपर्ने व्यवस्था छ । सम्झौतामा कामदारले कुनै पनि शुल्क भुक्तानी गर्नु नपर्ने भएपनि रोजगारदाताको कमीकमजोरीका कारण कतिपय अवस्थामा कामदारहरु शुल्क तिरेर जाने गरेका छन् ।
म्यानपावर कम्पनी र रोजगारदाता कम्पनीको प्रत्यक्ष सम्पर्कको अभावका कारण बिचौलियाले फाइदा लिएको र उनीहरुलाई कामदार भर्ना प्रक्रियाबाट पन्छाएर म्यानपावर कम्पनी र रोजगारदाताको प्रत्यक्ष सम्बन्ध स्थापित गर्नका लागि जव फेयर आयोजना गर्न लागिएको संघको भनाइ छ । संघले बृहत् रुपमा कार्यक्रम सफल बनाउन सल्लाहकार समिति, मूल समिति र ५ वटा उपसमिति गठन गरिसकेको छ ।
काठमाडौं : भारतीयहरुले सहजरुपमा पहुँच पाएको अन्तर्राष्ट्रिय श्रम बजार नेपालीका लागि भने दुर्लभ बनेको छ । युद्ध पूर्णरुपमा समाप्त नहुँदै ठूलो संख्यामा कृषि कामदार इजरायल पठाएको भारतले केही दिनअघि ठूलो संख्यामा कामदार पठाउने विषयमा ताइवानसँग पनि सम्झौता गरेकोे छ ।
अर्थतन्त्र पूर्णतया रेमिट्यान्सका भरमा अढ्याइरहेको नेपाल सरकार र वैदेशिक रोजगारका विषयमा नीतिगत निर्णय गर्ने श्रम, रोजगार तथा सामाजिक सुरक्षा मन्त्रालय भने सम्भावना रहेका इजरायल र ताइवान वा युरोपेली क्षेत्रमा नयाँ श्रम गन्तव्य खोज्नुभन्दा परम्परागत श्रम गन्तव्य मलेसिया र खाडी मुलुकमा कामदार पठाएको संख्या गनेर बेहोसीमा नै रमाइरहेको जस्तो अवस्थामा देखिएको छ ।
भारतले ताइवानसँग सेमिकन्डक्टर उत्पादनका क्षेत्रमा ठूलो संख्यामा कामदार पठाउन सम्झौता गरेको छ । सेमिकन्डक्टर उत्पादनका लागि प्रसिद्ध ताइवानमा हाल ७ लाख विदेशी कामदार रहेका छन् । ताइवानमा हाल भियतनाम, इन्डोनेशिया, फिलिपिन्स र थाइल्याण्डबाट ठूलो संख्यामा विदेशी जाने गरेका छन् । ताइवानले सेमिकन्डक्टरसहित भवन निर्माण र केयर गिभरका क्षेत्रमा विदेशी कामदार प्रयोग गरिरहेको छ ।
ताइवानको श्रम मन्त्रालयका अनुसार पुनर्निर्माण, निर्माण र कृषि क्षेत्रमा विदेशी कामदारको माग उच्च रहेकोे छ । ताइवानमा नेपालबाट भने सीमित संख्यामा सुरक्षागार्डको रोजगारीमा कामदारहरु गएका छन् । भारतले पहिलोपटक पाइलट प्रोजेक्टअन्तर्गत केही कामदार पठाउने र त्यसपछि ठूलो संख्यामा कामदार पठाउने तयारी गरिरहेको भारतीय सञ्चारमाध्यमहरुमा समाचार छ ।
ताइवानपछि रोजगारीको राम्रो सम्भावना भएको, तर नेपाल कामदार पठाउने विषयमा अलमलिएको क्षेत्र हो इजरायल । गाजा क्षेत्रमा इजरायल–हमासबीच लडाइँ चलिरहेका बेला पनि ठूलो संख्यामा भारतीयहरुले इजरायलमा रोजगारीका लागि आवेदन गरेका छन् । अघिल्लो वर्ष इजरायल र भारतबीच भएको सम्झौताअनुसार ४२ हजार भारतीय इजरायलको निर्माण र नर्सिंङ क्षेत्रमा गएका थिए ।
यसका अतिरिक्त भारतले अर्को युद्धरत मुलुक रुसमा पनि कृषि कामदार पठाउने विषयमा गहन छलफल गरिरहेकोे भारतीय सञ्चारमाध्यमहरुले उल्लेख गरेका छन् । नेपालका म्यानपावर कम्पनीबाट इजरायलको कृषि क्षेत्रमा कामदार पठाउन पाउनुपर्ने निजी क्षेत्रको माग छ । सरकारीस्तरमा ठूलो संख्यामा कामदार जान नसकेको इजरायलमा निजी क्षेत्रलाई कामदार पठाउने अवसर नदिँदा नेपालीले पाउने सम्भावित रोजगारीका अवसर गुमिरहेको धेरैको टिप्पणी छ ।
तिलु शर्मा पौडेल/मध्यान्ह
दोहा, कतार : नेपाली दूतावाससँगको सहकार्यमा कतारस्थित नेपालका बैंक तथा रेमिट्यान्स कम्पनीहरूले रेमिट्यान्ससम्बन्धी सूचना तथा जानकारी दिने उद्देश्यले दूतावासमा "डिजिटल डिस्प्ले बोर्ड" राखेका छन् । कतारका लागि नेपाली राजदूत डा. नरेश विक्रम ढकालले बिहीबार उद्घाटन गरेको बोर्डमा सेवाग्राहीहरूले आफूले कमाएको रकम भरपर्दो मध्यमबाट परिवारसम्म पुर्याउने रेमिट्यान्सको विषयमा सम्पूर्ण जानकारी दिइएको छ ।
रिया मनि ट्रान्सफर, आइएमई रेमिट तथा पे, प्रभु मनि ट्रान्सफर, सिटी एक्सप्रेस मनि ट्रान्सफर, जिएमई रेमिट्यान्स, ईसेवा मनि ट्रान्सफर, नबिल बैंक, सिद्धार्थ बैंक, ग्लोबल आइएमई बैंक, हिमाल रेमिट, नेपाल इन्भेस्टमेन्ट मेगा बैंक, प्रभु बैंक र एमरेष्ट बैंकले गरेको डिस्प्लेमा रेमिट्यान्स भनेको के हो ? औपचारिक माध्यम भनेका के-के हुन् ? कतारमा औपचारिक माध्यमबाट रेमिट्यान्स गर्ने माध्यमहरू के-के हुन् ? औपचारिक माध्यमबाट पैसा पठाउँदा के-के फाइदाहरू हुन्छन् ? जस्ता विषय र यसका लाभहरू तथा दूतावासका केही सूचनालाई समेत प्रस्टाइएको छ ।
उद्घाटन पश्चात बैंक तथा रेमिट्यान्स कम्पनीका प्रतिनिधिहरूसँगको अन्तरक्रियामा राजदूत ढकालले नेपालको अर्थतन्त्र धानेको रेमिट्यान्सलाई अझै सरल र व्यवस्थित कसरी गर्न सकिन्छ भन्ने विषयमा सुझाव संकलन गरेका थिए । रोजगारीको सिलसिलामा कतारमा रहेर पनि वैधानिक तरिकाबाट नेपालमा पैसा कसरी पठाउने जानकार नभएका सेवाग्राहीहरूका लागि रेमिट्यान्स कम्पनीहरूले गर्ने चेतनामूलक कार्यक्रममा दूतावासको सहयोग रहने ढकालले प्रतिबद्धता व्यक्त गरे । उनले रेमिट्यान्स कम्पनीका प्रतिनिधिहरूलाई आवश्यक परेको अवस्थामा सुझाव सल्लाह र छलफलका लागि दूतावास सदैव साथ रहने बताए । अवैधानिक तरिकाबाट नेपाल भित्रिने रेमिट्यान्सले राज्यलाई घाटा र सेवाग्राहीहरूलाई समस्यामा पार्ने ढकालको भनाइ थियो ।
उक्त कार्यक्रममा सहभागी नेपाल पत्रकार महासंघ कतार शाखाका अध्यक्ष दिल कुमार श्रेष्ठले डिस्प्ले बोर्डमा एक्सचेन्ज रेट राख्नका लागि सुझाव दिएका थिए । नेपाल राष्ट्र बैंकबाट रेमिट्यान्स कारोबारका लागि इजाजत वा मान्यता प्राप्त कम्पनीहरू, बैंक तथा वित्तीय संस्थाहरूलाई औपचारिक माध्यम मान्ने गरिन्छ । वैदेशिक रोजगार वा व्यापार व्यवसायबाट प्राप्त गरेको आम्दानीलाई औपचारिक माध्यम प्रयोग गरी आफन्त, साथीभाइको नाममा नेपालमा रहेको कुनैपनि बैंक खाता या मोबाइल वालेटमा रकम स्थानान्तरण गर्नुलाई रेमिट्यान्स भनिन्छ ।
काठमाडौं : सत्तारुढ तथा विपक्षी दलका सांसदहरुले रुस–युक्रेन युद्धमा करिब १५ हजार नेपाली युवाहरुको जीवन समाप्त हुने अवस्था रहेकोे भन्दै तत्काल पीडामा रहेका परिवारले उनीहरुको सम्बन्धमा जानकारी पाउने अवस्था हुनुपर्ने माग गरेका छन् ।
प्रतिनिधि सभाको बिहीबारको बैठकमा विशेष समय लिएर बोल्दै नेकपा एमालेका सांसद सूर्य थापा र नेपाली कांग्रेसका सांसद डा. चन्द्रकान्त भण्डारीले सरकारले मुलुक र आश्रित परिवारलाई युद्धमा फसेका नेपालीबारे जानकारी सार्वजनिक गर्न नसक्नु राष्ट्रिय लज्जाको विषय भएको बताए ।
एमाले सांसद थापाले गत जुन महिनाको २८ तारिकमा रुस–युक्रेन युद्धमा नेपाली युवाहरु ठूलो संख्यामा भर्ति गरिएको सम्बन्धमा अमेरिकको न्युयोर्क टाइम्सले विस्तृत विवरणसहितको समाचार सार्वजनिक गरेपनि नेपाल सरकारले परिवारका सदस्यहरुलाई न श्वास, न आशको अवस्थामा पुर्याएको दाबी गरे । उनले नेपालीलाई युद्धग्रस्त क्षेत्रमा पु¥याउने गिरोहको खोजी र कारबाही गर्न पनि ढिलाइ भएको दाबी गरे ।
उनले वैदेशिक रोजगारीमा वैधानिकरुपमा श्रम स्वीकृति लिएर कतार गएका प्यूठान काठेबगरका सोमेस सुनार र स्वर्गद्वारीका लालबहादुर घर्ती दलालमार्फत रुस पुगेको विषयमा परिवारका सदस्यहरुले परराष्ट्र मन्त्रालयको कानून र उद्धार शाखामा निवेदन दिएको हप्तौं भएपनि उनीहरुको अवस्था पत्ता लगाउन कुनै पहल नभएको बताए ।
सांसद थापाले नेपाल सरकारले आफ्ना नागरिकको खोजी गरी नेपाल फिर्ता गर्ने क्षमता राख्नुपर्ने माग गर्दै भने, ‘नेपालले औपचारिकरुपमा भारत र बेलायतबाहेक अन्य देशको सेनामा आफ्ना नागरिक पठाउन नपाउने अवस्था छ, तर नेपालीहरु रुस र युक्रेनका सेनामा भर्ना भएर आपससमा लडिरहेका छन् । यतिका समय बितिसक्दा पनि किन सरकार, प्रधानमन्त्री र परराष्ट्र मन्त्रालय बोल्दैनन् ?’
सांसद थापाले तत्कालै सार्थक पहल भएको अवस्थामा रुस तथा युक्रेनी सेनामा पुगेका नेपालीको सग्लो शरीर स्वदेश नफर्किने खतरा रहेको विषयमा सरकारले चासो राख्नुपर्ने माग समेत गरे ।
उता नेपाली कांग्रेसका सांसद डा. भण्डारीले सरकारका गलत नीतिका कारण सीमित व्यक्तिका हातमा मुलुकको अर्थतन्त्र पुगेकाले रोजगारीको सिर्जना हुन नसकी देशबाट युवा पलायनको डरलाग्दो अवस्था उत्पन्न भएकाले संसदले नीतिगत हस्तक्षेपको निर्णय गर्नुपर्ने अवस्थामा देश पुगेको बताए । उनले मुलुकमा बिचौलियाको बिगबिगी रहेकाले रोजगारी सिर्जना हुने कृषि, पर्यटन तथा उद्योगका काममा लगानी हुन नसकेको विषमया सबै दल एकढिक्का भएर लाग्न ढिलाइ भएको उल्लेख गरे ।
काठमाडौं : सारदा सुवेदीसमेत ३ जनालाई वैदेशिक रोजगारीका लागि बेलायत पठाइदिन्छु भनि ठगी गरेको अभियोगमा एक व्यक्ति पक्राउ परेका छन् । बागलुङ बडिगाड गाउँपालिका घर भइ हाल काठमाडौं बागबजार बस्ने युद्ध बहादुर केसीले सारदा सुवेदीसमेत ३ जनालाई वैदेशिक रोजगारीका लागि बेलायत पठाइदिन प्रतिव्यक्ति २६ लाख रुपैयाँ लाग्छ भनि ७६ लाख रुपैयाँ लिएर फरार भएको उजुरी परेपछि प्रहरीले उनलाई पक्राउ गरेको हो ।
केसीले सुवेदीलगायतलाई बेलायतमा केयर गिभरमा १० लाख ५० हजार रुपैयाँ तलब हुने काम लगाइदिन्छु भनि विश्वास दिलाइ उक्त रकम लिएको प्रहरीले बताएको छ । केसीलाई थप अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौं पठाइएको प्रहरीले बताएको छ ।
काठमाडौं : हंगेरी, दक्षिण कोरिया र पोर्चुगलमा वैदेशिक रोजगारीमा पठाइदिने भन्दै ठगी गर्ने तीन जनालाई प्रहरीले पक्राउ गरेकोे छ । रौतहट माधव नारायण नगरपालिका वडा नं. ३ घर भइ हाल काठमाडौं वडा नं. १४ कुलेश्वर बस्ने चन्दन कुमार श्रेष्ठले अभिषेक रावललाई वैदेशिक रोजगारीका लागि हंगेरी पठाइदिन्छु भनि ठगी गरेको उजुरीमा प्रहरीले पक्राउ गरेको छ ।
श्रेष्ठले रावललाई हंगेरी पुगेपछि प्रतिष्ठित कम्पनीमा प्याकिङको काम लगाइदिन्छु, मासिक १ लाख २० हजार रुपैयाँ तलब हुन्छ भनि विश्वास दिलाइ पटक–पटक गरी २ लाख ७४ हजार रुपैयाँ लिएर सम्पर्कविहीन भइ ठगी गरेको उजुरी परेको प्रहरीले बताएको छ । प्रहरीले श्रेष्ठलाई कुलेश्वरबाट पक्राउ गरेको हो ।
त्यस्तै वैदेशिक रोजगारीका लागि दक्षिण कोरिया पठाइदिन्छु भनि ठगी गरेको उजुरीका आधारमा प्रहरीले गोरखाको गोरखा नगरपालिका वडा नं. १४ घर भइ हाल काठमाडौंको सामाखुसी बस्ने बाबुराम थापालाई पनि पक्राउ गरेको छ । थापाले अमिर तामाङसमेत ३ जनालाई वैदेशिक रोजगारीका लागि कोरिया पठाइदिने र प्रतिव्यक्ति ७ लाख ५० हजार रुपैयाँ लाग्ने बताएर पीडितहरुबाट पटक–पटक गरी ९ लाख रुपैयाँ लिएको प्रहरीले बताएको छ ।
थापाले दक्षिण कोरिया पुगेपछि प्रतिष्ठित कृषि कम्पनीमा मासिक २ लाख ५० हजार रुपैयाँ तलब हुन्छ भनि विश्वास दिलाइ उक्त रकम लिएको खुलेको प्रहरीले बताएको छ । थापालाई प्रहरीले सामाखुसीबाट पक्राउ गरेको हो ।
त्यसैगरी पोर्चुगल पठाइदिन्छु भनि ठगी गरेको उजुरीका आधारमा प्रहरीले सिन्धुपाल्चोक लिसंखुपाखर घर भइ हाल काठमाडौंको मित्रनगर बस्ने टिका बहादुर भण्डारीलाई पनि पक्राउ गरेकोे छ । भण्डारीले टोपेन्द्र घर्तीसमेत २ जनालाई वैदेशिक रोजगारीका लागि पोर्चुगल पठाइदिने र त्यसका लागि प्रतिव्यक्ति १५ लाख रुपैयाँ लाग्छ भनि १७ लाख ६० हजार रुपैयाँ लिइ सम्पर्कविहीन भएको प्रहरीले बताएको छ ।
भण्डारीले पोर्चुगल पुगेपछि प्रतिष्ठित कृषि कम्पनीमा मासिक १ लाख ५० हजार रुपैयाँ तलब हुने काम लाइदिन्छु भनि विश्वास दिलाइ उक्त रकम लिएको देखिएको प्रहरीले बताएको छ । पक्राउ परेका तीनै जनालाई थप अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौं पठाइएको काठमाडौं उपत्यका अपराध अनुसन्धान कार्यालय मिनभवनले जनाएको छ ।
तिलु शर्मा पौडेल/मध्यान्ह
दोहा, कतार : कालीका गाउँपालिका १ रसुवाकी नानी तामाङ (नाम परिवर्तन)लाई यूएईबाट कतारमा घरेलु कामदारको रूपमा बेचिएको पाइएको छ । १९ महिना अगाडि नेपालको एक म्यानपावरबाट रसुवा नै घर भएका अमृत गुरुङले दुबई भिजिट भिसामा पठाएपछि उनी दुबईबाट कतारमा बेचिएको भेद खुलेको हो ।
गत सालको डिसेम्बरमै एनसीसी कतारले यस बारेमा जानकारी पाए पनि कसरी कदम चाल्ने, कहाँबाट सत्य तथ्य बुझ्ने र कसरी नेपाल फिर्ता पठाउने भन्ने बारेमा दूतावाससँग समन्वय गर्दै अगाडि बढेको एनसीसी कतारका अध्यक्ष रमेश भट्टले बताए । यो विषय मानव बेचबिखनसँग जोडिने र अति नै संवेदनशील रहेका कारण केही समय लागेको बताउँदै उनले एनसीसीको जानकारीमा आइसकेपछि एनसीसीकै श्रमिक विभागका संयोजक र सह संयोजकले आवश्यक कदम चालेको बताए ।
श्रमिक विभागका संयोजक कृष्ण पन्थीले मासिक करिब १२ सय तलब दिने सर्तमा यूएईबाट कतार ल्याए पनि दुई–तीन महिनामा एक पटक एक हजार मात्रै दिने गरेको पीडितलाई उद्धृत गर्दै मध्यान्हसँगको कुराकानीमा बताए । उनले तामाङ आफैंले हिम्मत गरेर घर छोडेर एनसीसीको सम्पर्कमा आइसकेपछि मात्र उनको नेपाल फिर्तीका लागि सहजीकरण गर्न सहज भएको बताए ।
दुबईबाट कतार पठाउने पीडकको खोजी र पीडितलाई उचित न्याय दिलाउन एनसीसी कतारले पुरै पहल गर्ने भएको छ । कतारमा घरेलु कामदारका लागि नेपाल सरकारले श्रम स्वीकृति दिँदैन ।
काठमाडौं : सामाखुसी क्षेत्रमा कार्यालय स्थापना गरेका वैदेशिक रोजगार व्यवसायीलाई घरधनीहरुले साथ दिएका छन् । काठमाडौं महानगरपालिकाको ७ दिनभित्र कार्यालय हटाउनुपर्ने उर्दीपछि भएको म्यानपावर व्यवसायी र घरधनीहरुबीचको छलफलमा घरधनीहरुले म्यानपावर कम्पनीहरुले घर छोड्नुपर्ने पक्षमा आफूहरु नरहेकाले ट्राफिक व्यवस्थापन गरेर पूर्ववतरुपमा कार्यालय सञ्चालन गर्न आग्रह गरेको विस्डम ह्युमेन रिसोर्स प्रा.लि.का सञ्चालक भेष केसीले जानकारी दिए ।
महानगरपालिकाले ७ दिनभित्र कलकारखानासहित म्यानपावर कम्पनीका कार्यालय आवासीय क्षेत्र बाहिर सार्न माइकिङ गरेपछि वैदेशिक रोजगार व्यवसायी एकता समितिले वडाध्यक्षलगायतसग महानगरपालिकाले गरेको माइकिङका सम्बन्धमा छलफल गरेको थियोे । छलफलमा वडाध्यक्ष ख्यामराज तिवारीले म्यानपावर कम्पनीको कार्यालय राख्न नदिने वा दिने भन्ने कानूनमा स्पष्ट नभएको, तर आवासीय क्षेत्र छुट्याइएको अवस्थामा आवासीय क्षेत्रमा मापदण्डअनुसार हुनुपर्ने मध्यमार्गी धारणा सार्वजनिक गरेका थिए ।
व्यवसायी केसीले महानगरपालिको उर्दीपछि पहिलेदेखि नै कार्यालय सार्ने योजना बनाएका बाहेक उर्दीकै कारणले कुनै पनि म्यानपावर कम्पनी नसरेको जानकारी दिए । व्यवसायीहरुले कार्यालय सार्न वैदेशिक रोजगार विभागको अनुमतिसहित अन्य कानूनी प्रक्रिया पूरा गर्नुपर्ने भएकाले महानगरपालिकाले भन्नेबित्तिकै कार्यालय सार्न नसकिने बताएका छन् ।
काठमाडौं महानगरले माइकिङ गर्दै उक्त क्षेत्रमा सञ्चालनमा रहेका म्यानपावर कम्पनीसहित उद्योगहरु ७ दिनभित्र स्थानान्तरण गर्न निर्देशन दिँदै ७ दिनको अवधिमा स्थानान्तरण नगरेमा कानूनी कारबाही गर्ने बताएको थियोे । तर त्यसपछि महानगरपालिकाबाट थप कुनै निर्देशन आएको छैन । व्यवसायी केसीले वैदेशिक रोजगार व्यवसायीहरुबीच पार्किङको समस्यालाई समाधान हुने गरी पार्किङ तथा अन्तर्वार्ताका गतिविधि सञ्चालन गर्ने सहमति भएको र सोही अनुसार पार्किङ र अन्तर्वार्ताको कामहरु भइरहेको बताए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies