काठमाडौं : बझाङको मष्टा गाउँपालिका–२ की १२ वर्षीया सम्झना कामी असोज ७ गते गाईवस्तु बाँध्न भनी घरबाट निस्किइन् । तर, उनी गाईवस्तु बाँधेर घर फर्किनन् । राति अवेरसम्म घर नफर्किए पछि सोधीखोजी शुरु भयो । खोजी गर्ने क्रममा उनी नजिकैको मन्दिरमा भेटिइन्, तर मृत अवस्थामा । १२ वर्षीया बालिका कामीको बलात्कार पछाडि हत्या भएको प्रारम्भिक अनुसन्धानले देखाएको छ ।
अर्थात्, फेरि अर्र्की बालिकाको सम्झनै डरलाग्दोगरी बलात्कार पछाडि हत्या गरिएको छ । हत्याको विरोधमा देशभर प्रदर्शन भइरहेको छ । राजधानी उपत्यकामै शनिबार पनि प्रदर्शन भएको छ । हत्याराको पहिचान गरी कडा कार्बाहीको माग गरिएको छ । प्रदर्शनमा उत्रिएका अधिकारकर्मी तथा युवाविद्यार्थीहरुले बलात्कारीलाई पनि एसिड प्रहार गर्नेमाथि व्यवस्था गरिएकै जस्तो कडा कानून निर्माणको माग गरेका छन् ।
दुई वर्ष अगाडि कञ्चनपुरका निर्मला पन्तकै नियतिमा सम्झनाको मृत्यु भएको छ । निर्मलाका हत्यारा अहिलेसम्म पहिचान हुन नसक्नुले सम्झनाको हत्यारा पहिचानप्रति सरकारमाथि प्रदर्शनकारीले प्रश्न उठाएका छन् । लगातार बलात्कार घटना भइरहेकाले बलात्कारीलाई कडा कार्बाही गर्ने कानून निर्माण गर्न दबाव शुरु भएको छ ।
हुन पनि बलात्कार पछाडि हत्या हुने संख्या लगातार बढिरहेको छ । चालु वर्षको साउन महिनामा मात्रै २६० बलात्कारका मुद्दा दर्ता भएको प्रहरी प्रधान कार्यालयको तथ्याङ्क छ । अघिल्लो आर्थिक वर्ष २०७६–०७७ मा दुई हजार १४४ वटा बलात्कार मुद्दा दर्ता भएको थियो । लकडाउनका कारण अझ बलात्कार बढेको प्रहरी तथ्याङ्कले देखाएको छ ।
गएको चैत ११ गते लकडाउन शुरु भएपछि हरेक दिन कम्तिमा दुई जना बलात्कृत हुने गरेको तथ्य प्रहरीसँग छ । अझ हत्याका मुद्दा प्रहरीसम्म नपुग्ने र पुगेपनि दर्ता हुने संख्या जोड्ने हो भने धेरै हुन जान्छ । राजधानी उपत्यका र प्रदेश–५ मा बलात्कार धेरै भएका छन् । चैतदेखि साउन मसान्तसम्म प्रदेश ५ मा ९० वटा बलात्कार घटना दर्ता भएका छन् भने राजधानी उपत्यकामा ८७ मुद्दा दर्ता भएका छन् ।
बलात्कृत हुनेमा १५ वर्ष मुनिका ६० प्रतिशत छन् । ११ देखि १५ वर्षसम्मका सवैभन्दा धेरै छन् । यो उमेर समूहमा गत आर्थिक वर्ष सात सय बढी घटना भएका छन् । ६ महिनाका शिशुदेखि ७५ वर्षका बृद्धा समेत बलात्कृत हुनु राष्ट्रिय लज्जाको विषय हो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies